Ba tɛ ba brɩ ba lwarɩm jaja
9
Cana kam kʋntʋ da fiinle-yana dɛ dɩm nɩ, mʋ Yisɩrayɛlɩ tiinə bam maama jeeri sɩ ba vɔ ni. Ba dɛɛn zʋ gwar-zɩnzwara mʋ, yɩ ba daarɩ ba kɩ tɩɩrʋ ba taagɩ ba yum sɩ kʋ brɩ nɩ ba wʋrʋ cɔgɩ. 2 Yisɩrayɛlɩ dwi tiinə bam nan ya maŋɩ ba pwɛ ba tɩtɩ dɩ vərə dwi maama mʋ. Ba maa zɩgɩ wɛɛnɩ yɩ ba tɛ jaja lwarɩm yalʋ ba dɩ ba nabaara na kɩ tɩn. 3 Ba ma zɩgɩ da kʋntʋ, yɩ ba karɩmɩ Baŋa-Wɛ niə yam tɔnɔ kʋm wʋnɩ taan, nɩnɛɛnɩ lɛɛra yatɔ. Ba ma daarɩ ba kɩ lɛɛra yatɔ ba yɔɔrɩ ba tɛ ba lwarɩm jaja, yɩ ba zuli ba Tu Baŋa-Wɛ dɩm. 4 Bimbim dɩ dɩ natəm dɛɛn zɩgɩ da Levi tiinə ŋwaanɩ. Zozwe, dɩ Bani, dɩ Kadimeli, dɩ Sebanɩa, dɩ Bunni, dɩ Serebia, dɩ Bani wʋdoŋ wʋm, dɩdaanɩ Kenani na yɩ Levi tiinə tɩn ma zɩgɩ dɩ baŋa nɩ ba warɩ ba Tu Baŋa-Wɛ dɩm dɩ kwǝr-dɩa. 5 Levi tiinə badonnǝ ma pa nɔɔna bam maama baarɩ sɩ ba zuli Wɛ. Kʋ dɛɛn yɩ Zozwe, dɩ Kadimeli, dɩ Bani, dɩ Hasabenɩa, dɩ Serebia, dɩ Odiya, dɩ Sebanɩa, dɩdaanɩ Petasia mʋ. Ba ma ta ba wɩ:«Zaŋɩ-na wɛɛnɩ sɩ dɩ́ tee dɩ́ Baŋa-Wɛ dɩm! Dɩntʋ mʋ wʋra maŋa maama!
Baŋa-Wɛ, nmʋ yɩrɩ dɩm tiini dɩ jɩgɩ paarɩ-zulǝ, pa nɔɔna maama tee-dɩ. Nɔɔna wʋ́ zəŋi-dɩ mʋ sɩ kʋ dwǝni woŋo maama.
6 Dɩ́ Tu Wɛ, nmʋ yɩranɩ mʋ yɩ Baŋa-Wɛ. N ma n kɩ wɛyuu dwi maama, dɩ wɛ-baŋa calɩcwɩ sɩm maama. Nmʋ mʋ ta kɩ tɩga baŋa, dɩ nanɩɩrʋ, dɩ wǝǝnu tɩlʋ maama na wʋ tɩ wʋnɩ tɩn. Nmʋ ma n pa nabiinǝ dɩ wǝǝnu maama jɩgɩ ŋwɩa. Wɛyuu maama wʋ́ tiiri ba zuli‑m mʋ.a
7 Nmʋ Baŋa-Wɛ dɛɛn mʋ kuri dɩ́ nabaarʋ Abram. N ma n ja-o n nuŋi Babilɔnɩ tiinə tɩʋ Uri nɩ, yɩ n daarɩ n ləni o yɩrɩ dɩm sɩ dɩ taa yɩ Abraham.b 8 Nmʋ na nɛ nɩ o jɩgɩ cɩga dɩ nmʋ tɩn mʋ n goni ni dɩd-o nɩ: nmʋ wʋ́ pa‑o Kaanan tiinə tɩga kam, dɩ Hɛtɩ tiinə tɩga, dɩ Amɔɔrɩ tiinə tɩga, dɩ Perezi tiinə tɩga, dɩ Yebusi tiinə tɩga, dɩ Girgasɩ tiinə tɩ sɩm maama, sɩ o dwi tiinə taa zʋʋrɩ da.c N kɩ n su n ni-gonim dɩm kʋntʋ, n na yɩ cɩga tu tɩn ŋwaanɩ.
9 Nmʋ nan nɛ dɩ́ nabaara bam dɛɛn na yaarɩ te Ezipi wʋnɩ, yɩ n daarɩ n ni ba na keeri ba loori‑m te Nanɩ-sʋŋʋ kʋm ni nɩ tɩn.d 10 N dɛɛn yɔɔrɩ n kɩ wo-kɩnkagɩla mʋ yɩ n tɔgɩ ya baŋa n pa kʋ cɛ Ezipi Pa-farʋ wʋm yɩra, dɩ o dɩdɛɛra dɩ o tɩʋ kʋm tiinə maama yɩra, n na ye ba na bɛɛsɩ n nɔɔna bam te tɩn ŋwaanɩ. Kʋ ta ma pa nmʋ da kʋ ŋwaanɩ n na yɩrɩ kamunu, yɩ dɩ ta wʋra dɩ zɩm maama mʋ.
11 Nmʋ dɛɛn tiŋi cwǝŋǝ mʋ nɩnɩʋ kʋm tɩtarɩ nɩ n pa n nɔɔna bam, pa ba nɔnɩ tɩ-kʋra baŋa nɩ ba bɛ. Balʋ na zəli-ba tɩn maŋɩ nɩnɩʋ kʋm wʋnɩ mʋ, nɩnɛɛnɩ kandwa mʋ tʋ ya maŋɩ na-luŋə wʋnɩ te.
12 Nmʋ dɛɛn yǝni n tɔgɩ ba yigə mʋ yɩ á veǝ. Wɩa nɩ n nyɩ dɩ kunkoŋo na zɩgɩ dəki tɩn mʋ, yɩ tɩtɩɩ nɩ n nyɩ dɩ mim sɩ ba taa naɩ cwǝŋǝ ba veǝ.e 13 N nɔɔna bam dɛɛn na yi Sinayi piu kʋm tɩn, mʋ n tu n yi ba te, yɩ n daarɩ n zɩgɩ wɛyuu nɩ n ŋɔɔnɩ dɩ ba. Nmʋ ma n brɩ-ba cwe sɩlʋ na lana tɩn, yɩ n pa-ba niə yalʋ na jɩgɩ cɩga tɩn sɩ ba taa tɔgɩ-ya sɩ ba ŋwɩa kɩ lam. 14 N ma n brɩ-ba sɩ ba pɔɔrɩ n siun dɛ dɩm ba pa‑m, sɩ dɩ taa yɩ dɩ yɩra da yadonnə yam wʋnɩ mʋ.
Nmʋ ta dɛ n tɩntʋŋnʋ Moyisi baŋa mʋ, n pa-ba n niə yam. 15 Kana dɛɛn na jɩgɩ-ba tɩn, n pɛ wʋdiiru nuŋi Wɛ-sɔŋɔ nɩ pa ba di. N ta ma n pa na nuŋi piu wʋnɩ, sɩ ba nyɔ ba zuri ba na-nyɔm.f Nmʋ ma n daarɩ n pa-ba ni, sɩ ba zʋ tɩga kalʋ n na goni ni sɩ n pa-ba tɩn wʋnɩ, sɩ ba taa te-ka.
16 Dɩ́ nabaara bam zwa dɛɛn nan kwarɩmɩ mʋ, yɩ ba ta brɩ ba tɩtɩ kamunni. Ba ma yɔɔrɩ ba vɩn sɩ ba sɛ nmʋ niə yam. 17 Ba dɛɛn swe wo-kɩnkagɩla yalʋ n na kɩ ba tɩtarɩ nɩ tɩn mʋ ni nɩ, yɩ ba wʋ cəgi n taanɩ dɩm. Ba wʋ-dɛɔ kʋm baŋa nɩ mʋ, ba dɛɛn kuri ba yigə tu sɩ kʋ tu ja-ba o joori Ezipi wʋnɩ, sɩ ba daa taa yɩ gambɛ da.
Nmʋ nan yɩ Wɛ dɩlʋ na kwe nɔɔna lwarɩm n yagɩ n cɛ-ba tɩn mʋ. N ma n yɩ yibwən-durə tu, yɩ n sono gaalɩ. N ma n yǝni n pɩɩnɩ n banɩ. N ŋwaŋa na daga tɩn ŋwaanɩ, n dɛɛn wʋ mɛ n kwaga n ya-ba.g
18 Ba dɛɛn tiini ba twɩ‑m. Ba mɔɔnɩ jwəm mʋ na nyɩ dɩ nʋa tɩn, yɩ ba wɩ dɩntʋ mʋ vrɩ-ba dɩ ja nuŋi Ezipi wʋnɩ. 19 Ba dɛɛn nan na wʋ kagʋa kam wʋnɩ tɩn, n wʋ yagɩ ba yɩra, n ŋwaŋa kam na daga tɩn ŋwaanɩ. Wɩa nɩ mʋ n kunkoŋo kʋm zɩgɩ dəki ba yigə nɩ sɩ kʋ brɩ-ba cwǝŋǝ. Tɩtɩ maama nɩ n mim dɩm maa yǝni dɩ pa-ba pooni.
20 Nmʋ ta pɛ-ba n Joro mʋ pa ba yiǝ pʋʋrɩ.h N ma n pa-ba Maanɩ kʋm sɩ ba di, yɩ n ta pa-ba na sɩ ba zuri ba na-nyɔm. 21 Bɩna fiinna yam ba na kɩ kagʋa kam wʋnɩ tɩn, n zǝni-ba pa ba wʋ gɛ kʋlʋkʋlʋ. Ba gwaarʋ tɩm wʋ zarɩmɩ, yɩ ba nɛ dɩ wʋ fʋlɩ cwǝŋǝ kam cam ŋwaanɩ.
22 Nmʋ dɛɛn pɛ ba di tɩɩnɩ dɩ pwa zanzan. Ba tɩga sisəm dɩm ma tʋlɩ dɩ yi yigə yigə. Kʋ na yɩ Hesebon tɩʋ pɛ Sɩhɔn dɩ Basan tɩʋ Pɛ Ɔgɩ, ba joŋi bantʋ tɩga kam maama ba te.
23 Nmʋ ta mʋ pɛ dɩ́ nabaara bam dwi dɩm puli zanzan, nɩnɛɛnɩ wɛyuu calɩcwɩ sɩm na daga te tɩn. Nmʋ pɛ ba biə bam di tɩga kalʋ n na goni ni dɩ ba kwə bam wɩ ba maŋɩ sɩ ba joŋi-ka yɩ ba laan zʋʋrɩ da tɩn mʋ.
24 N wanɩ Kaanan tiinə bam n zəli ba yigə nɩ pa nmʋ nɔɔna bam zʋ ba tɩga kam ba te. Nmʋ laan ma n pa n nɔɔna bam dam, sɩ ba kɩ Kaanan tiinə bam dɩ ba pwa ba na lagɩ te tɩn. 25 Ba dɛɛn di tɩɩnɩ dɩlʋ na lɔgɩ dɩ pɩ tɩn, dɩ tɩ-ywəŋə na kɩ wʋdiiru lanyɩranɩ tɩn, dɩ sam dɩlʋ na su dɩ wo-laarʋ dwi dwi tɩn mʋ.
Ba yi da ba na vʋla yalʋ na kʋgɩ ya tigi da tɩn mʋ, dɩ vinyə tweeru, dɩ Olivi tweeru, dɩ tweeru dwi dwi na ləri biə tɩn, dɩdaanɩ tweeru karɩ. Ba ma yɔɔrɩ ba di wʋdi-laarʋ ba su, pa ba nu lanyɩranɩ. Ba wʋʋ ma poli nmʋ lanyɩranɩ dɩm ŋwaanɩ.
26 Dɩ kʋ dɩ, n nɔɔna bam sɩn ba zwa mʋ yɩ ba lɔ n kwaga nɩ. Ba ma vri ba kwaga ba ya n niə yam. Ba dɛɛn gʋ n nijoŋnə balʋ na kaanɩ-ba sɩ ba joori ba ba nmʋ tee nɩ tɩn mʋ. Ba maa tiini ba twɩ‑m kuni zanzan.
27 Kʋntʋ ŋwaanɩ n ma n pa ba dʋna cwǝŋǝ sɩ ba di-ba yɩ ba daarɩ ba bɛɛsɩ-ba. Nmʋ nɔɔna bam nan na keeri ba loori‑m ba cam dɩm ŋwaanɩ tɩn, n zɩgɩ wɛyuu nɩ mʋ n cəgi ba kərə kam.
Nmʋ yibwən-durə kam ŋwaanɩ mʋ n tʋŋɩ joŋnə sɩ ba joŋi-ba ba dʋna jɩŋa nɩ ba yagɩ.i 28 Ba wʋʋ maa na yǝni kʋ tʋ tɩn, mʋ ba daa joori ba kɩ lwarɩm, yɩ n daa n pa ba dʋna bam di-ba. Ba dɩ na culi ba lwarɩm dɩm, yɩ ba loori‑m ba cam dɩm ŋwaanɩ tɩn, nmʋ ta zɩgɩ wɛyuu nɩ mʋ n cəgi-ba.
N dɛɛn joŋi-ba n yagɩ kuni zanzan wʋnɩ, n yibwən-durə kam na gaalɩ tɩn ŋwaanɩ. 29 Nmʋ dɛɛn yǝni n kaanɩ-ba mʋ sɩ ba taa ye n niə yam ni nɩ. Ba nan na brɩ ba tɩtɩ kamunni tɩn ŋwaanɩ, mʋ ba vɩn nmʋ ni-kaana yam. Ba ma sɩn ba zwa yɩ ba vɩ-ya, dɩ ya na maŋɩ ya jɩgɩ ŋwɩa ya pa wʋlʋ na tɔgɩ-ya tɩn dɩ.
30 Bɩnɩ maama wʋnɩ, nmʋ ta zuri n yɩra mʋ dɩ ba. N ma n pa n joro tɔgɩ n nijoŋnǝ bam baŋa sɩ ba ŋɔɔnɩ dɩ n nɔɔna bam yɩ ba kaanɩ-ba. Ba nan na sɩn ba zwa yɩ ba vɩn sɩ ba cəgi tɩn, nmʋ pɛ tɩɩnɩ dɩdonnǝ tiinə cwǝŋǝ sɩ ba di-ba.j 31 Dɩ kʋ maama dɩ, nmʋ wʋ cɔgɩ-ba naa n yagɩ ba yɩra, nmʋ yibwən-durə na tiini ya daga tɩn ŋwaanɩ. Cɩga tɩn, nmʋ tiini n jɩgɩ nɔɔna ŋwaŋa zanzan!
32 Dɩ́ Tu Wɛ, nmʋ yɩ Dam-fɔrɔ Tu Wɛ kamunu, yɩ n kikiə jɩgɩ fʋʋnɩ! Nmʋ tiini n jɩgɩ cɩga mʋ sɩ n yɩ yagɩ n ni-gonim dɩ n sono kʋm. Nan yɩ swe dɩ́ yaara yam maama swiə! Kʋ na yɩ dɩbam, dɩ dɩ́ pwa, dɩ dɩ́ yigǝ tiinǝ, dɩ dɩ́ kaanɩm tiinə, dɩ dɩ́ nijoŋnǝ bam, kʋ ta wǝli dɩ dɩ́ nabaara bam dɩ n nɔɔna bam maama, dɩbam maama tiini dɩ́ yaarɩ mʋ, kʋ zɩgɩ Asiiri pwa bam na bɛɛsɩ dɩbam maŋa kalʋ nɩ tɩn, sɩ kʋ yi zɩm.
33 Nmʋ nan yɔɔrɩ n kɩ cɩga mʋ dɩ n na kɩ dɩbam te tɩn. Nmʋ wʋ n cɩga wʋnɩ, sɩ kʋ yɩ dɩbam mʋ tʋŋɩ lwarɩm.k 34 Dɩbam nabaara, dɩ dɩ́ pwa bam, dɩ dɩ́ yigǝ tiinǝ bam, dɩ dɩ́ kaanɩm tiinə bam maama, ba tʋŋɩ ba tɔga n niə yam. Ba wʋlʋwʋlʋ wʋ cəgi n ni-kaana yam, naa ba sɛ nmʋ zaasɩm dɩm.
35 Maŋa kalʋ ba dɛɛn na te ba tɩtɩ tɩ-ywəŋə kalʋ n na pɛ-ba tɩn wʋnɩ, yɩ n nii ba baŋa nɩ lanyɩranɩ tɩn, ba ta vɩn sɩ ba yagɩ lwarɩm kikiə, sɩ ba daarɩ ba zuli‑m.
36 Laan nan nii! Dɩ́ yɩ gambɛ mʋ tɩga kantʋ n dɛɛn na kwe n pa dɩ́ nabaara bam tɩn wʋnɩ. Ka nan ya yɩ tɩ-ywəŋə mʋ ka na paɩ dɩbam wʋdi-laarʋ. 37 Dɩ́ tɩga kam wo-laarʋ tɩm maama laan ve pwa balʋ n na pɛ cwǝŋǝ sɩ ba taa te dɩbam tɩn tee nɩ mʋ. Dɩbam na kɩ lwarɩm tɩn ŋwaanɩ mʋ kʋntʋ kɩa. Pwa bam kʋntʋ maa jɩgɩ dɩbam tɩtɩ, dɩ dɩ́ vara, ba kɩ ba na lagɩ te tɩn. Kʋntʋ ma pa dɩ́ cam dɩm laan kɛ jɩŋa.»
Nɔɔna bam dugi durə
38 «Tɩntʋ maama na kɩ tɩn ŋwaanɩ mʋ dɩbam Yisɩrayɛlɩ dwi tiinə bam maama sɛ sɩ dɩ́ du durə. Dɩ́ nan pʋpʋnɩ-dɩ mʋ dɩ́ tiŋi, sɩ dɩ́ yigǝ tiinǝ zi ba jɩn sɩm da. Dɩ́ Levi tiinə bam, dɩ dɩ́ kaanɩm tiinə bam dɩ jɩn wʋ́ tɔgɩ sɩ zi da.»