8
Yisɩrayɛlɩ tiinə bam maama dɛɛn ma jeeri kaporo nɩ, sɩ kʋ maŋɩ dɩ Na Ni dɩm. Esdrasɩ dɛɛn nan yɩ Wɛ niə karanyɩna tu mʋ yɩ o kwǝri o yɩ Wɛ kaanɩm tu. Ba ma tʋŋɩ ba bǝŋ-o sɩ o ja Moyisi niə tɔnɔ kʋm Baŋa-Wɛ na pɛ Yisɩrayɛlɩ tiinə bam tɩn, o ba o karɩmɩ sɩ ba cəgi.a 2 Canɩ sɩrpɛ pulim dɛ dɩm nɩ,b mʋ Esdrasɩ jaanɩ Wɛ niə tɔnɔ kʋm o ba o zɩgɩ nɔn-kɔgɔ kʋm yigə nɩ.c Baara, dɩ kaana, dɩ balʋ maama na bɩgɩ ba yi sɩ ba ni-taanɩ kuri tɩn dɛɛn mʋ wʋra. 3 Dɛ dɩm kʋntʋ nɩ mʋ Esdrasɩ maŋɩ kaporo kʋm nɩ o karɩmɩ Wɛ niə yam kʋ zɩgɩ tɩtɩɩtɩ sɩ kʋ yi wɩa tɩtarɩ maŋa nɩ. Nɔn-kɔgɔ kʋm dɩ yɔɔrɩ ba maŋɩ da mʋ ba cəgi taanɩ dɩm.4 Ba ya kwe dɛ mʋ ba kɩ bimbim tigisim dɩm ŋwaanɩ. Esdrasɩ ma di o dɔgɩ dɩ baŋa nɩ yɩ o ŋɔɔnɩ dɩ nɔɔna bam. Matitɩya, dɩ Sema, dɩ Anaya, dɩ Yuri, dɩ Hilkiya, dɩ Maaseya dɛɛn wʋ o jazɩm nɩ mʋ. Pedaya, dɩ Mikayɛlɩ, dɩ Malkiya, dɩ Hasum, dɩ Hasabadana, dɩ Zakari, dɩdaanɩ Mesulam maa zɩgɩ o jagwiə nɩ.
5 Esdrasɩ dɛɛn zɩgɩ bimbim dɩm yuu nɩ mʋ pa nɔɔna bam maama kwǝni ba nii ba na‑o. O na yɔɔrɩ o puri tɔnɔ kʋm tɩn, mʋ ba maama zaŋɩ ba zɩgɩ wɛɛnɩ. 6 Esdrasɩ ma ta o wɩ: «Á pa-na sɩ dɩ́ tee Baŋa-Wɛ, sɩ o yɩ Wɛ kamunu!»
Nɔɔna bam maama ma zǝŋi ba jɩn wɛɛnɩ, yɩ ba daarɩ ba ta wɩ: «Amina! Amina!» Ba ta ma tiiri yɩ ba yibiyə vin tɩga nɩ sɩ ba zuli Baŋa-Wɛ.
7 Nɔɔna bam na zɩgɩ ba ni Wɛ niə yam tɩn, mʋ Levi tiinə badonnǝ wǝli-ba sɩ ba wanɩ ba ni kʋ kuri. Bantʋ maa yɩ Zozwe, dɩ Bani, dɩ Serebia, dɩ Yamini, dɩ Akuba, dɩ Sabetayi, dɩ Odiya, dɩ Maaseya, dɩ Kelita, dɩ Azarɩa, dɩ Yozabadɩ, dɩ Hanan, dɩdaanɩ Pelaya. 8 Ba ma karɩmɩ Wɛ niə tɔnɔ kʋm yɩ ba maŋɩ kʋ kuri lanyɩranɩ, sɩ nɔɔna bam wanɩ ba ni kʋ kuri lanyɩranɩ.
9 Ba dɛɛn na ni Wɛ niə taanɩ kʋntʋ tɩn mʋ ba yɔɔrɩ ba keeri bɔgɩ-bɔgɩ.d Tɩʋ kʋm dɩdɛɛrʋ Nehemi, dɩ Esdrasɩ na yɩ Wɛ niə karanyɩna tu dɩ Wɛ kaanɩm tu tɩn, dɩ Levi tiinə balʋ na jɩgɩ nɔɔna bam ba zaasɩ tɩn laan ma ta dɩ nɔɔna bam maama ba wɩ: «Zɩm dɛ dɩm yɩ dɩ yɩra mʋ dɩ paɩ abam Tu Baŋa-Wɛ dɩm. Kʋntʋ ŋwaanɩ, yɩ pa-na sɩ á wʋʋ cɔgɩ, nan yɩ taá keerǝ.»
10 Nehemi ma ta dɩ ba o wɩ: «Joori-na á sam, sɩ á di wʋdi-ywənnu, á daarɩ á nyɔ dɩvɛn. Ta cɛ-na á wo-laarʋ tɩm dɩ balʋ na ba jɩgɩ tɩn sɩ ba dɩ di ba su. Zɩm dɛ dɩm na yɩ dɩ yɩra dɩ paɩ Baŋa-Wɛ tɩn ŋwaanɩ, yɩ pa-na sɩ á wʋʋ cɔgɩ. Bɛŋwaanɩ, Baŋa-Wɛ wʋpolo kʋm DƖ na paɩ abam tɩn mʋ wʋ́ ji abam dam.»
11 Levi tiinə bam dɩ ma zi nɔɔna bam bɩcwaanʋ yɩ ba wɩ: «Zuri-na á bɩcara. Zɩm dɛ dɩm yɩ dɩ yɩra dɩ paɩ Baŋa-Wɛ. Yɩ pa-na sɩ á wʋʋ cɔgɩ.»
12 Nɔɔna bam maama ma joori ba sam, ba vu ba di ba su dɩ wʋpolo. Ba ma cɛ ba wǝǝnu dɩ balʋ na gɛ tɩn. Bɛŋwaanɩ, ba dɛɛn ni Wɛ bɩtara kalʋ ba na karɩmɩ ba brɩ-ba tɩn kuri lanyɩranɩ.
Vwə cwiim kuri
13 Kʋ na kɩ da yale tɩn, mʋ sɔ-yuni tɩm yigǝ tiinǝ, dɩ Wɛ kaanɩm tiinə, dɩdaanɩ Levi tiinə bam joori ba gilimi Esdrasɩ tee nɩ sɩ ba yɛ taanɩ dɩlʋ na nuŋi Wɛ niə yam wʋnɩ tɩn. 14 Ba ma maanɩ nɩ kʋ maŋɩ kʋ pʋpʋnɩ kʋ tiŋi Wɛ niə tɔnɔ kʋm Baŋa-Wɛ na pɛ Moyisi tɩn wʋnɩ, kʋ wɩ Baŋa-Wɛ ya pɛ Yisɩrayɛlɩ tiinə bam ni sɩ ba cwi vwə. Baá ma-ya ba di candiə bɩnɩ maama canɩ sɩrpɛ cana kam wʋnɩ sɩ ba taa zʋʋrɩ ya wʋnɩ maŋa fɩnfɩɩn.e 15 Ba ta ma lwarɩ nɩ ba maŋɩ sɩ ba tɔɔlɩ kwǝrǝ Zeruzalɛm nɩ dɩ ba tɩɩnɩ dɩdonnǝ nɩ ba brɩ nɔɔna bam maama ba wɩ: «Diini-na pweeru laŋa kam nɩ á goni Olivi tweeru nɛ dɩ sɩ vɔɔrʋ, dɩ kʋrʋ tiu nɛ dɩ sɩ vɔɔrʋ, dɩ tweeru dwi dwi nɛ sɩlʋ na jɩgɩ vɔɔrʋ tɩn. Laan ja-na tɩntʋ maama á joori á ba á ma-tɩ á cwi vwə nɩnɛɛnɩ Wɛ niə yam na brɩ te tɩn.»
16 Nɔɔna bam ma sɩɩnɩ ba beeri tweeru nɛ dɩ sɩ vɔɔrʋ ba ja ba joori ba sam. Ba laan ma te pwe ba sam nayuni nɩ dɩ ba kʋnkwallʋ nɩ. Ba ma daarɩ ba te-sɩ Wɛ-digə kam kʋnkɔlɔ kʋm nɩ, dɩ kaporo kʋlʋ na maŋɩ dɩ Na Ni dɩm tɩn seeni, dɩ kʋlʋ na maŋɩ dɩ Efrayim Ni dɩm tɩn seeni. 17 Balʋ maama dɛɛn na nuŋi gabɛɛm nɩ ba joori tɩn mʋ te pwe sɩm yɩ ba zʋ sɩ wʋnɩ. Kʋ na zɩgɩ Nun bu Zozwe maŋa nɩ sɩ kʋ yi maŋa kam kʋntʋ tɩn, Yisɩrayɛlɩ tiinə bam dɛɛn daa wʋ di candiə kam kʋntʋ. Nɔɔna bam maama wʋʋ ma poli zanzan.
18 Ba dɛɛn kwe da yarpɛ mʋ ba di candiə kam. Dɛ maama wʋnɩ, Esdrasɩ maa yǝni o karɩmɩ Wɛ niə tɔnɔ kʋm wʋnɩ o brɩ-ba. Da nana dɛ dɩm nɩ ba kɔgɔ kʋm maama ma gilimi daanɩ Wɛ ŋwaanɩ, nɩnɛɛnɩ Wɛ ni dɩm na brɩ te tɩn.