Vərə bam ta kwaanɩ sɩ ba cɔgɩ tɩtʋŋa yam
6
Sanbalati, dɩ Tobia, dɩ Arabi tu Gesɛm, dɩdaanɩ dɩ́ dʋna bam maama ma ni kwǝrǝ nɩ dɩ́ lɔgɩ kəbrə kam dɩ́ ti, pa pwəli daa tǝri ka wʋnɩ. Kʋlʋ yɩranɩ na muri tɩn, dɩ́ ya ta wʋ kwe ka bwəəru tɩm dɩ́ kɩ di-niə yam nɩ. 2 Sanbalati dɩ Gesɛm ma tʋŋɩ kwǝrǝ ba pa-nɩ, sɩ a jeeri-ba Ono tɩ-kamparɩ tɩʋ kʋdoŋ nɩ sɩ dɩ́ na daanɩ. Ba nan ya bʋŋɩ sɩ ba kɩ-nɩ lwarɩm mʋ. 3 Amʋ ma tʋŋɩ nɔɔna sɩ ba vu ba ta dɩ ba nɩ: «Amʋ jɩgɩ tɩtʋŋ-kuri mʋ a tʋŋa pa a bá wanɩ a jeeri da. Amʋ na lagɩ a ba abam te, tɩtʋŋɩ dɩm wʋ́ zɩgɩ mʋ.» 4 Ba beeri dɩm nan ya yɩ kwǝrǝ dɩdʋa mʋ kuni bɩna. Kuni bɩna wʋm maama nɩ, a dɩ ma lǝri-ba nɩnɛɛnɩ a na maŋɩ a ta te tɩn.5 Sanbalati laan ma tʋŋɩ o tɩtɩ tɩntʋŋna bam dɩdʋa dɩ kwǝrǝ, sɩ o pa-nɩ tɔnɔ kʋlʋ ni na puri tɩn. 6 Ba ma pʋpʋnɩ kʋ wʋnɩ ba wɩ:
«Gesɛm mʋ pɛ a lwarɩ nɩ sawɩa mʋ kaagɩ je sɩm maama ka ŋɔɔnɩ nɩ nmʋ dɩ Zwifǝ tiinə bam maama bʋŋɩ sɩ á nuŋi pa-farʋ wʋm kwaga nɩ mʋ. Kʋntʋ nan mʋ pɛ á yɔɔrɩ á sɩɩnɩ á yiǝ dɩ á kəbrə kam lɔɔm. Ba ta wɩ nmʋ kwaanɩ sɩ n tiŋi n tɩtɩ mʋ sɩ n ta n yɩ ba pɛ. 7 Ba wɩ n maŋɩ n beeri n nijoŋnə balʋ na wʋ́ zɩgɩ Zeruzalɛm nɩ ba ta wɩ: ‹Ba tiŋi pɛ Zuda nɩ!› tɩn. Pa-farʋ Atazeregesɩ nan na wʋ́ ni-taanɩ dɩntʋ tɩn ŋwaanɩ, nmʋ maŋɩ sɩ n ba mʋ sɩ dɩ́ kɩ dɩ́ yum daanɩ dɩ́ nii dɩ́ wʋ́ kɩ tɛ mʋ.»
8 Amʋ ma lǝri-ba a wɩ: «Kʋ daɩ cɩga! Sawɩa brɩ ka tǝri je je nɩ ka kaagɩ ka ŋɔɔna. Abam tɩtɩ mʋ lʋgɩ wǝǝnu tɩm kʋntʋ a pa dɩbam.»
9 Ba dɛɛn yɔɔrɩ ba kwaanɩ sɩ ba fugi dɩbam mʋ yɩ ba bʋŋɩ nɩ: «Ba jɩn sɩm na bugi, tɩtʋŋa yam daa bá tʋŋɩ.» Amʋ dɩ ma warɩ Wɛ yɩ a wɩ: «Amʋ Tu Wɛ, pa-nɩ dam.»
10 Dɛ dɩdwɩ mʋ a ve Delaya bu Semaya sɔŋɔ sɩ a war‑o. O dɛɛn ta yɩ Mehetabehɛlɩ naa mʋ. Semaya nan ya pɩ o tɩtɩ mʋ o wʋ o sɔŋɔ nɩ. O ma ta dɩ amʋ o wɩ: «Nɔɔna mʋ bʋŋɩ sɩ ba zaŋɩ n baŋa nɩ tɩtɩɩ dɩdwɩ ba gʋ-m. Nan pa dɩ́ duri dɩ́ vu dɩ́ zʋ Wɛ digə kam di-laa kʋm wʋnɩ. Dɩ́ laan maa wʋ́ pɩ ka ni dɩ́ səgi daanɩ sɩ ba yɩ yi‑m ba gʋ.»
11 A ma lǝr-o a wɩ: «Amʋ daɩ balʋ na duri ba səgi sɩ cam yɩ yi-ba tɩn. Bɛŋwaanɩ mʋ amʋ wʋ́ duri a zʋ Wɛ-digə wʋnɩ sɩ a lu tʋʋnɩ? Amʋ brɩ a bá kɩ kʋntʋ.» 12 A na bʋŋɩ kʋ wʋnɩ tɩn mʋ a maanɩ nɩ kʋ ya daɩ Wɛ mʋ ŋɔɔnɩ dɩd-o, sɩ kʋ yɩ Tobia dɩ Sanbalati mʋ ve ba pa‑o səbu sɩ o ta taanɩ dɩm kʋntʋ dɩ amʋ. 13 Ba nan sʋg-o sɩ o pa fʋʋnɩ zʋ-nɩ mʋ, sɩ a daarɩ a kɩ lwarɩm. A na cɔgɩ a yɩrɩ kʋntʋ, ba yaá kɩ-nɩ cavɩɩra.
14 «Amʋ Tu Wɛ, guli Tobia dɩ Sanbalati na kɩ-nɩ te tɩn. Nan yɩ swe nɩ ni-joŋ-kana Noadɩa, dɩ nijoŋnə sɩsɩm sɩm maama ya kwaanɩ mʋ sɩ ba fugi-nɩ.»a
Ba na ti ba tɩtʋŋa yam tɩte tɩn
15 Ba dɛɛn kwe da fiinnu-yale mʋ ba lɔ kəbrə kam ba ti. Kʋ maa yɩ Eluuli cana kam da fiinle-yanu dɛ nɩ mʋ kʋntʋ. 16 Dɩbam dʋna bam dɩdaanɩ tɩɩnɩ dɩlʋ na gilimi dɩbam tɩn na ni kʋntʋ tɩn, mʋ ba baarɩ maama ti, yɩ fʋʋnɩ tiini dɩ ja-ba. Bɛŋwaanɩ, ba maama lwarɩ nɩ Wɛ mʋ wǝli dɩbam pa dɩ́ kɩ tɩntʋ maama.
17 Kʋntʋ maama tɩn, dɩ Zuda yigǝ tiinǝ bam badaara mɩ dɩ Tobia mʋ. Ba ma yǝni ba tʋŋɩ kwǝri ba pa daanɩ. 18 Zuda tiinə zanzan dɩ dɛɛn maa sɔ ni dɩd-o, bɛŋwaanɩ Ara bu Sekanɩa yɩ Tobia tɩmbaarʋ mʋ. Kʋ ta wǝli da o bu Yohanan dɩ ya ve o di Berekiya bu Mesulam bukɔ mʋ. 19 Nɔɔna maa yǝni ba tui ba tɛ dɩ amʋ Tobia kǝm na lana te tɩn. Ba ta ma jaanɩ kʋlʋ maama amʋ na wʋ́ ta tɩn ba vu ba lwe ba tiŋi o yigə nɩ. O dɩ maa yǝni o pʋpʋnɩ twannʋ o pa-nɩ sɩ o fugi-nɩ.b