Nehemi na wǝli nabwənə te tɩn
5
Kʋ dɛɛn na wǝli fɩɩn tɩn, mʋ nɔɔna zanzan, kaana dɩ baara maama sɩŋɩ sɩ ba taa tiini ba pʋʋna ba donnǝ Zwifǝ tiinə bam. 2 Nɔɔna zanzan dɛɛn mʋ tɛ ba wɩ: «Dɩ́ biə tiini ba daga mʋ, dɩ́ nan na wʋ nɛ wʋdiu sɩ dɩ́ di, dɩbam dɩdaanɩ dɩ́ biə wʋ́ tɩ mʋ.» 3 Badonnǝ maa tɛ ba wɩ: «Dɩbam kwe dɩ́ tɩ sɩm, dɩ dɩ́ karɩ, dɩdaanɩ dɩ́ sam mʋ dɩ́ pa jɩna sɩ dɩ́ joŋi wʋdiiru sɩ dɩ́ di sɩm tiinə wəri.» 4 Badaara daa ta maa wɩ: «Dɩbam jɩnɩ sǝbiǝ mʋ sɩ dɩ́ ma dɩ́ ŋwɩ Pɛ wʋm lampoo kʋm o na tiŋi dɩ́ karɩ dɩdaanɩ dɩ́ kadwi ŋwaanɩ tɩn. 5 Nan nii! Dɩbam dɩ dɩ́ donnǝ Zwifǝ tiinə bam yɩ woŋo dɩdʋa mʋ, dɩ́ yɩ yɩra dɩ jana daanɩ. Dɩbam biə dɩ bantʋ biə ba garɩ daanɩ, yɩ dɩ́ laan kwe dɩbam biə bam dɩ́ yəgi dɩ́ pa-ba sɩ ba taa yɩ gambɛ. Ba fɩn dɩbam sɩ dɩ́ yəgi dɩ́ bukwa dɩ́ pa-ba. Ba ta ma vrɩ dɩbam karɩ, dɩ dɩ́ kadwi pa dɩ́ daa warɩ kʋlʋkʋlʋ sɩ dɩ́ kɩ.»6 Amʋ na ni ba pʋmpʋna kam tɩn mʋ a banɩ yɔɔrɩ dɩ zaŋɩ. 7 A wʋbʋŋa ma ja sɩ a wǝli-ba. A ma bwɛ Yisɩrayɛlɩ yigǝ tiinǝ dɩ ba nakwa bam a wɩ: «Abam ba kwaana dɩ á na bʋŋɩ sɩ á zi á tɩtɩ cʋrrʋ Zwifǝ tiinə baŋa nɩ, sɩ á zaŋɩ tɩn. Abam yǝni á fɩn á cʋrrʋ sɩ ba ŋwɩ səbu zanzan ba jɩna ŋwaanɩ.» A ta ma bəŋi kɔ-fɔrɔ kʋm maama sɩ dɩ́ nii taanɩ dɩm kʋntʋ baŋa nɩ, 8 yɩ a wɩ: «Dɩ́ ya kwaanɩ sɩ dɩ́ joori dɩ́ yəgi Zwifǝ tiinə balʋ ba na yəgi-ba ba pa vərə tɩn mʋ. Abam tɩtɩ daa ma fɩn á cʋrrʋ Zwifǝ tiinə sɩ ba yəgi ba tɩtɩ ba pa abam sɩ ba taa yɩ á gambɛ. Kʋ lana na?» Ba yigǝ tiinǝ bam ma maŋɩ da cɩmm, ba na gɛ taanɩ sɩ ba ləri tɩn ŋwaanɩ.
9 Amʋ ma ta dɩ ba a wɩ: «Abam na jɩgɩ kʋlʋ á kɩ tɩn ba lana. Abam maŋɩ sɩ á kwarɩ Wɛ mʋ, sɩ á daarɩ á taá kɩ lanyɩranɩ. Á na kɩ kʋntʋ, dwi-gɛ tiinə balʋ na yɩ dɩ́ dʋna tɩn bá na cwǝŋǝ sɩ ba mwanɩ dɩbam. 10 Amʋ sɛ sɩ nɔɔna bam ba a te ba jɩnɩ səbu dɩ wʋdiu, yɩ balʋ na tʋŋɩ ba pa-nɩ tɩn dɩ kɩ a na kɩ te tɩn. Nan pa-na sɩ dɩ́ daa yɩ taa pini dɩ́ cʋrrʋ tɩm.a 11 Kwe-na ba kadwi, dɩ ba karɩ, dɩ ba sam á joori á pa-ba lele. Nan ta yagɩ-na jɩna yalʋ ba na jɩgɩ tɩn á cɛ-ba, kʋ na yɩ mɩna, naa sana, naa nugə, naa sǝbiǝ mʋ.» 12 Ba dɩ ma ləri ba wɩ: «Dɩ́ wʋ́ sɩɩnɩ dɩ́ kɩ nmʋ na tagɩ te tɩn. Dɩ́ wʋ́ pa-ba ba wǝǝnu maama, yɩ dɩ́ daa bá taa pini-ba.»
Amʋ laan ma bəŋi kaanɩm tiinə bam yɩ a pa nakwa bam du durə ba yigə nɩ sɩ ba kɩ ba tɔgɩ ba na tagɩ te tɩn. 13 Amʋ ma bwǝli gɔrɔ kʋlʋ na vɔgɩ a təŋə nɩ tɩn, yɩ a pɩpagɩ-kʋ pa wǝǝnu tɩlʋ ya na wʋ ka yɩra nɩ tɩn siiri tɩga nɩ.b A ma ta dɩ ba a wɩ: «Wʋlʋ maama na vɩn sɩ o tʋŋɩ o tɔgɩ o ni dɩm, Wɛ wʋ́ pɩpagɩ kʋ tu tɩntʋ doŋ mʋ sɩ o ga o sɔŋɔ dɩ o wǝǝnu maama, yɩ o laan ta yɩ bwəri.» Kɔgɔ kʋm maama ma sɛ yɩ ba wɩ: «Amina!» Ba ma tee Baŋa-Wɛ yɩ ba daarɩ ba kɩ ba tɔgɩ ba ni dɩm.
14 Bɩna fugə-yale yam maama wʋnɩ a dɛɛn na te Zuda laŋa kam tɩn, amʋ dɩ a cʋrrʋ maama wʋ sɛ sɩ dɩ́ kwe wʋdiiru tɩlʋ tɩʋ kʋm dɩdɛɛrʋ wʋm na jɩgɩ cwǝŋǝ sɩ o joŋi o di tɩn sɩ dɩ́ di-tɩ. Kʋ maa yɩ Pɛ Atazeregesɩ paarɩ dim bɩna fiinle bɩnɩ dɩm nɩ mʋ o tiŋi-nɩ sɩ a ji dɩdɛɛrʋ wʋm, sɩ kʋ taa nii o paarɩ dim bɩna fiintɔ-yale bɩnɩ dɩm nɩ. 15 Dɩdɛɛra balʋ dɛɛn na loori yigə ba nii Zuda laŋa kam tɩn yǝni ba fɩn nɔɔna bam ba joŋi ba səbu-poŋo səbu-dala fiinna mʋ, yɩ ba wʋdiiru dɩ sana ta zɩga. Ba tɩntʋŋna dɩ maa bɛɛsɩ nɔɔna bam. Amʋ nan wʋ kɩ kʋntʋ, a na kwarɩ Wɛ tɩn ŋwaanɩ. 16 Amʋ ma yɔɔrɩ a kwe a dam dɩ a wʋbʋŋa maama a kɩ kəbrə kam lɔɔm baŋa nɩ. Amʋ wʋ bʋŋɩ sɩ a beeri tɩga a pa a tɩtɩ. Amʋ tɩntʋŋna bam maama dɩ sɩɩnɩ ba yiǝ sɩ ba taa tʋŋɩ tɩtʋŋa yam.
17 Kʋ ta wǝli da, Zwifǝ tiinə dɩ ba yigǝ tiinǝ bi dɩ fiinnu dɛɛn mʋ tui a te, yɩ a paɩ-ba ba ni-wʋdiu maŋa maama. Nɔɔna ta ma zɩgɩ tɩɩnɩ dɩdonnǝ nɩ ba tui yɩ a wǝli-ba. 18 Dɛ maama wʋnɩ, a dɛɛn yǝni a gʋ na-bɩa mʋ, dɩ pi-kamunə yardʋ dɩdaanɩ ceeni zanzan. Da fugə maama wʋnɩ, a maa yǝni a paɩ ba yəgi sana zanzan sɩ nɔɔna bam taa nyɔa. A nan na ye nɩ kʋ tiini kʋ camma kʋ paɩ nɔɔna bam tɩn ŋwaanɩ mʋ amʋ wʋ tagɩ nɩ ba pa-nɩ kʋlʋ a na yɩ ba dɩdɛɛrʋ yɩ a maŋɩ sɩ a joŋi tɩn.c
19 Amʋ Tu Wɛ, a nan loori‑m sɩ n guli amʋ gulə sɩ n kɩ-nɩ lanyɩranɩ, a na kɩ kʋlʋ maama a pa nɔɔna bantʋ tɩn ŋwaanɩ.