Vərə kwaanɩ sɩ ba cɔgɩ tɩtʋŋa yam
4
Sanbalati na yɔɔrɩ o ni nɩ dɩbam Zwifǝ tiinə bam wʋra dɩ́ fɔgɩ dɩ́ lɔ Zeruzalɛm kabri sɩm tɩn, mʋ kʋ tiini kʋ fuli o wʋ. O laan ma puli sɩ o taa kɩ dɩbam o mwana.a 2 O dɛɛn zɩgɩ o yuudonnə yigə nɩ, dɩdaanɩ Samari jar-kərə bam yigə nɩ mʋ yɩ o ta o wɩ: «Zwifǝ tiinə nabwənə bantʋ bʋŋɩ nɩ ba wʋra ba kɩ bɛɛ mʋ? Ba bʋŋɩ sɩ ba joori ba lɔ ba tɩʋ kʋm ba pɩ mʋ na? Ba tɩɩnɩ nɩ dɛ dɩdwɩ kaanɩm wʋ́ wanɩ dɩ garɩ dɩ ti ba tɩtʋŋa yam mʋ na? Ba nan wʋ́ wanɩ ba na kandwa sɩ ya nuŋi weeru tɩntʋ wʋnɩ yɩ mim cɔgɩ-ya tɩn na?»3 Amɔn tu Tobia dɛɛn zɩgɩ o tee nɩ mʋ. O dɩ ma ləri o taanɩ dɩm o wɩ: «Nii kəbrə kalʋ ba na wʋra ba lɔa tɩn! Yiru tɩtɩ na diini ka baŋa nɩ, oó yigi-ka mʋ o dɩ tɩga nɩ!»
4 Amʋ dɩ ma loori Wɛ a wɩ: «Dɩbam Wɛ, nii ba na gooni dɩbam te! Cəgi mwaanʋ tɩlʋ dwi ba na mwanɩ dɩbam tɩn! Nan pipiri ba mwaanʋ tɩm sɩ tɩ joori ba tɩtɩ yuu nɩ. Pa nɔɔna vrɩ ba jɩjɩgɩrʋ maama, sɩ ba daarɩ ba zɩŋɩ-ba ba ja ba vu sa-tɩʋ yigə yigə. 5 Yɩ kwe ba kǝm-balwaarʋ tɩm n ma n cɛ-ba! Yɩ saarɩ ba lwarɩm! Bɛŋwaanɩ, ba tiini ba twɩ dɩbam balʋ na wʋra dɩ́ lɔ tɩn mʋ.»
6 Dɩ́ ma sɩn zwa yɩ dɩ́ tʋŋa. Kʋ wʋ daanɩ yɩ kəbrə kam di ka yi ka cicoro je, nɔɔna bam maama wʋbʋŋa dɛɛn na jaanɩ sɩ ba tʋŋɩ tɩn ŋwaanɩ.
7 Kʋ daarɩ Sanbalati, dɩ Tobia, dɩ Arabi tiinə bam, dɩ Amɔn tiinə bam, dɩ Asedodi tiinə bam maama na ni nɩ dɩ́ lɔgɩ kəbrə kam pa ka vu yigə, yɩ pwəli sɩm maama sɩn tɩn, mʋ ba banɩ tiini dɩ zaŋɩ. 8 Bantʋ maama ma sɔ ni sɩ ba jeeri Zeruzalɛm tɩʋ kʋm dɩ najara. Ba ta ma bʋŋɩ sɩ ba pa vuvugə taa wʋra je maama wʋnɩ. 9 Dɩbam dɩ ma yɔɔrɩ dɩ́ warɩ Wɛ, yɩ dɩ́ daarɩ dɩ́ pa nɔɔna yɩrɩ tɩʋ kʋm wɩa dɩ tɩtɩɩ maama dɩ́ dʋna bam ŋwaanɩ.
10 Zuda tiinə bam dɛɛn yǝni ba leeni mʋ yɩ ba tʋŋa. Ba maa wɩ:
«Dɩbam tɩntʋŋna bam zɩŋɩ zɩla dɩ́ bugi!
Nii tɩɩrʋ dɩ weeru na daga te!
Dɩ́ zɩm wʋ́ kɩ tɩta mʋ dɩ́ lɔ kəbrə kam?»
11 Dɩ́ dʋna dɩ maa tɛ ba wɩ: «Dɩ́ wʋ́ da dɩ́ ba ba baŋa nɩ! Ba bá wuuri ba lwarɩ kʋ ni nɩ. Dɩ́ laan maa wʋ́ gʋ-ba sɩ tɩtʋŋa yam kwǝri.» 12 Kʋ nan na kɩ te tɩn, Zwifǝ tiinə balʋ na zʋʋrɩ ba twɛ dɩ dɩ́ dʋna bam tɩn ma yǝni ba ba kuni zanzan wʋnɩ, ba ta dɩ́ dʋna bam wʋbʋŋa yam ba brɩ dɩbam. 13 Kʋ ma pa a lɩ nɔɔna badonnǝ yɩ ba zɩgɩ kəbrə kam je tǝri tǝri wʋnɩ. Ba dɛɛn zɩgɩ da dɩdaanɩ sʋ-lwaanʋ, dɩ cicwə, dɩ cɩna mʋ. A dɛɛn kuri-ba digə dɩ digə mʋ sɩ ba zɩgɩ mɛ maama ta na wʋ lɔgɩ kʋ di tɩn.
14 Amʋ ma na nɩ kǝm dɩm maama daanɩ nɔɔna bam mʋ. A ma ta dɩ nɔɔna bam, dɩ ba yigǝ tiinǝ, dɩ ba nakwa bam a wɩ: «Yɩ taá kwarɩ-na dɩ́ dʋna bam. Nan guli-na nɩ dɩ́ Yuutu Wɛ dɩm yɩ kamunu, yɩ DƖ tɩtʋŋa yɛ ni. Kʋntʋ mʋ wʋ́ pa á jaŋɩ á donnǝ Yisɩrayɛlɩ tiinə bam, dɩ á biə, dɩ á kaana, dɩ á sam dɩm ŋwaanɩ.»
15 Dɩ́ dʋna bam ma maanɩ nɩ dɩ́ lwarɩ ba na sɔgɩ ni sɩ ba kɩ te tɩn. Wɛ dɩ ma pa ba wʋbʋŋa yam ji kafɛ. Ba na kɩ yɩ ba ga dɩ́ ŋwa tɩn ŋwaanɩ, dɩ́ maama dɩdʋa dɩdʋa ma joori dɩ́ lɔɔm je. 16-17 Kʋ na zɩgɩ dɩntʋ dɛ nɩ tɩn, a tɩntʋŋna bam cicoro mʋ tʋŋɩ kəbrə kam tɩtʋŋa, yɩ cicoro dɩ vɔ najara zɩla ba ze cicwə, dɩ najara cɩ-kwɛn, dɩ cɩna ba zɩga. Kʋ na yɩ Zuda dwi tiinə balʋ maama na tʋŋɩ kəbrə kam lɔɔm tɩtʋŋa tɩn, ba nakwa bam dɩ dɛɛn ma zɩgɩ ba kwaga nɩ. Tɩntʋŋna balʋ na zɩŋɩ lɔɔm zɩla tɩn dɩ maa ze najara zɩla dɩ jɩŋa dɩdʋa, yɩ ba daarɩ ba tʋŋɩ dɩ kadoŋ kam. 18 Lwara bam tɩtɩ kwe sʋ-lwaanʋ mʋ ba vɔ ba tee nɩ yɩ ba lɔa. Kʋ daarɩ wʋlʋ wʋm na yǝni o wui nabɔnɔ kʋm tɩn yɩranɩ mʋ zɩgɩ amʋ tee nɩ.
19 Amʋ laan ma ta dɩ dɩdɛɛra bam, dɩ nakwa bam, dɩdaanɩ nɔɔna bam maama a wɩ: «Tɩtʋŋa yam laŋa yalma, yɩ ya jagɩ ya yi kəbrə kam ni maama pa dɩ́ ba naɩ daanɩ. 20 Abam nan na wʋ mɛ maama yɩ á ni nabɔnɔ kʋm kwǝri, sɩ á ba dɩbam te yo seeni. Dɩ́ Wɛ dɩm mʋ lagɩ DƖ jaŋɩ DƖ pa dɩbam.»b
21 Dɛ maama wʋnɩ, tɩga na jɩgɩ ka pʋʋrɩ tɩn, mʋ dɩ́ cicoro yǝni dɩ́ puli kəbrə kam tɩtʋŋa. Dɩ́ cicoro kʋdoŋ kʋm dɩ maa ze najara zɩla ba yɩrɩ lwara bam. Dɩ́ yɔɔrɩ dɩ́ kɩ kʋntʋ mʋ taa, sɩ kʋ yi tɩtɩɩ nɩ, calɩcwɩ na puli sɩ sɩ nuŋi maŋa kalʋ tɩn. 22 Kʋ na yɩ kʋntʋ tɩn mʋ a dɛɛn tagɩ nɔɔna bam nɩ: «Nɔɔnʋ maama dɩ o wəlinu maŋɩ sɩ ba maŋɩ Zeruzalɛm nɩ mʋ ba pəni. Kʋntʋ mʋ wʋ́ pa ba taa yɩrɩ dɩ́ tɩʋ kʋm tɩtɩɩ nɩ, sɩ wɩa nɩ ba wanɩ ba taa tʋŋa.» 23 Kʋ nan na yɩ amʋ tɩtɩ, dɩ a cʋrrʋ tɩm, dɩ a tɩntʋŋna bam, dɩ balʋ na yɩrɩ-nɩ tɩn maama, dɩbam wʋlʋwʋlʋ yǝni dɩ́ warɩ sɩ dɩ́ lɩ dɩ́ gwaarʋ dɩ́ tiŋi wɩa nɩ, naa tɩtɩɩ nɩ. Dɩ́ maama yɔɔrɩ dɩ́ yǝni dɩ́ vɔ dɩ́ najara zɩla mʋ lanyɩranɩ dɩ́ zɩga.