Ba joori ba lɔ Zeruzalɛm kabri sɩm
3
Kʋ yɩ Wɛ kaanɩm yigə tu Eliyasibi dɩ o donnǝ kaanɩm tiinə dɛɛn mʋ zaŋɩ ba lɔ kəbrə kam na wʋ Peeni Ni dɩm seeni tɩn. Ba ma fɔgɩ ba kɩ tɩʋ kʋm ni bwəəru tɩm da. Ba ta ma lɔ kəbrə kam ba vu ba yi Wǝǝnu Bi di-dɩdɔrɔ kʋm, dɩdaanɩ Hananɛlɩ di-dɩdɔrɔ kʋm. Ba ma kwe tɩ maama ba pa Wɛ.a2 Zeriko tiinə bam ma lɔ kəbrə kalʋ na toŋi da tɩn.
Imiri bu Zakuri dɩ ma lɔ o toŋi da.
3 Senaa dwi kʋm tiinə dɩ ma lɔ Kale ni dɩm. Ba ma cwi dɩ ywə yam, yɩ ba daarɩ ba kɩ dɩ bwəəru tɩm tɩ je nɩ. Ba ta ma kɩ luuru dɩdaanɩ da-kamunnu sɩ ba taa maɩ ba pɩ ka ni dɩm.
4 Yuri bu Meremɔtɩ, o ta na yɩ Hakoza naa tɩn, dɩ mʋ lɔgɩ kəbrə kam o toŋi da.
Berekiya bu Mesulam, o ta na yɩ Mesezabɛɛlɩ naa tɩn, dɩ mʋ lɔgɩ o toŋi da.
Baana bu Sadoki dɩ maa lɔ kəbrə kam o toŋi da.
5 Tekoa tɩʋ kʋm tiinə dɩ ma nuŋi ba lɔ ba toŋi kəbrə kam. Kʋ daarɩ, ba tɩʋ nakwa bam maa vɩn sɩ ba kɩ tɩtʋŋ-dɛɛra yalʋ tɩtʋŋa yigǝ tiinǝ bam na pɛ-ba sɩ ba kɩ tɩn.
6 Kʋ na yɩ Yesana ni dɩm, kʋ yɩ Pasɩa bu Yoyada dɩ Bezodɩa bu Mesulam dɛɛn mʋ kwɛ-dɩ. Ba ma cwi dɩ ywə yam, yɩ ba daarɩ ba kɩ dɩ bwəəru tɩm tɩ je nɩ. Ba ta ma kɩ luuru dɩdaanɩ da-kamunnu mʋ sɩ ba taa maɩ ba pɩ ka ni dɩm.
7 Gabawɔn tu Melatɩa, dɩ Meronɔtɩ tu Zadɔn, dɩ Gabawɔn tiinə bam, dɩ Mitspa tiinə mʋ kɩ daanɩ ba lɔ kəbrə kam ba toŋi da. Mitspa dɛɛn yɩ tɩʋ kʋlʋ Efratɩ wa-zʋʋrɩ seeni laŋa dɩdɛɛrʋ wʋm na zʋʋrɩ tɩn mʋ.
8 Haraya bu Uziyɛlɩ dɛɛn yɩ səbu-sɩŋa gɔgɔ mʋ. O dɩ ma lɔ o toŋi da.
Hanania na ye tralɩ nugə kǝm tɩn, dɩ ma lɔ kəbrə kam o toŋi.
Bantʋ ma fɔgɩ ba kwɛ Zeruzalɛm kabri sɩm sɩ kʋ vu kʋ yi Kabri lilirim dɩm seeni.
9 Huuri bu Refaya dɛɛn te Zeruzalɛm laŋa kam cicoro mʋ. O dɩ ma lɔ o toŋi da.
10 Harumatɩ bu Yedaya dɩ ma lɔ o toŋi mɛ na bwələ dɩ o tɩtɩ sɔŋɔ tɩn.
Hasabenɩya bu Atusi dɩ daa ma lɔ mɛ na toŋi da tɩn.
11 Harim bu Malkiya dɩdaanɩ Pahat-Moabɩ bu Hasubi dɩ dɛɛn ma lɔ ba toŋi kəbrə kam nɩ, yɩ ba daarɩ ba kwɛ Jugu di-dɩdɔrɔ kʋm.
12 Alohɛsɩ bu Salum dɩ dɛɛn na nii Zeruzalɛm laŋa wʋdoŋ kam tɩn ma vu o lɔ o toŋi da. O bukwa ma zən‑o dɩ o tɩtʋŋa yam.
13 Kʋ na yɩ Bolo seeni ni dɩm, Hanun dɩdaanɩ balʋ na zʋʋrɩ Zanoa tɩʋ nɩ tɩn mʋ lɔgɩ-dɩ. Ba ma kɩ dɩ bwəəru tɩm tɩ je nɩ yɩ ba ta kɩ luuru dɩdaanɩ da-kamunnu sɩ ba taa maɩ ba pɩ ka ni dɩm. Ba ta ma fɔgɩ ba lɔ kəbrə kam sɩ ka vu ka yi Tampuuri Ni dɩm. Ba na lɔgɩ mɛ tɩn dɩdwarɩm wʋ́ yi kantɩ maŋɩm mʋrʋ mʋ.
14 Rekabi bu Malkiya na nii Bɛte-Hakerem laŋa kam tɩn ma fɔgɩ o lɔ Tampuuri Ni dɩm. O ma kɩ dɩ bwəəru tɩm tɩ je nɩ yɩ o ta kɩ luuru dɩdaanɩ da-kamunnu sɩ ba taa maɩ ba pɩ ka ni dɩm.
15 Kola-Hozɛ bu Salum dɛɛn na nii Mitspa laŋa kam tɩn ma fɔgɩ o lɔ Buli-yi Ni dɩm. O ma pu-dɩ yɩ o daarɩ o kɩ dɩ bwəəru tɩm tɩ je nɩ. O ta ma kɩ luuru dɩdaanɩ da-kamunnu sɩ ba taa maɩ ba pɩ ka ni dɩm. Kʋ na yɩ Siloeb Bugǝ kʋm, o lɔgɩ kəbrə mʋ pa ka saŋɩ pɛ wʋm kadugə kam. Kəbrə kam ta tʋlɩ ka yi natən-yiə yalʋ na maa diini ya zʋʋrɩ Davidi tɩʋ kʋm tɩn mʋ.
16 Azabuki bu Nehemi dɛɛn na nii Bɛt-Zura laŋa kam cicoro tɩn ma lɔ kəbrə kam o toŋi da sɩ ka vu ka yi Davidi yibeeli dɩm seeni, ka daarɩ ka yi bugǝ kʋm, kʋ wǝli dɩ jar-kərə tigə je sɩm seeni.
Levi tiinə balʋ na lɔgɩ kəbrə kam tɩn
17 Levi tiinə badonnǝ dɩ dɛ ba lɔ kəbrə kam:
Kʋ maa yɩ Bani bu Rehumi mʋ lɔgɩ o toŋi daa kadoŋ. Hasabia na yɩ Kələ laŋa cicoro kʋm yigə tu tɩn zɩgɩ o laŋa kam yuu nɩ o lɔ o toŋi da.
18 Kʋ nan na yɩ Keyila laŋa cicoro kʋdoŋ kʋm, Enadadɩ bu Enadadɩ na yɩ ka yigə tu tɩn dɩ o cʋrrʋ tɩm mʋ lɔgɩ ba toŋi da.
19 Zozwe bu Etisɛrɩ dɛɛn na yɩ Mitspa yigə tu tɩn ma lɔ o toŋi kəbrə kam sɩ kʋ maŋɩ dɩ najara zɩla tigisim digə kam yigə nɩ. O ta lɔgɩ-ka mʋ o vu o yi mɛ kəbrə kam na gugwǝli tɩn.
20 Zabayi bu Baruki daa ma lɔ kəbrə kam o toŋi da, o zɩgɩ ka gugwəlim je sɩm nɩ o lɔ o yi kaanɩm tu Eliyasibi sɔŋɔ ni nɩ mʋ.
21 Yuri bu Meremɔtɩ wʋlʋ ta na yɩ Hakoza naa tɩn dɩ ma lɔ o toŋi kəbrə kam o vu o yi Eliyasibi sɔŋɔ daa kadoŋ kam nɩ.
Kaanɩm tiinə balʋ na lɔgɩ kəbrə kam tɩn
22 Balʋ dɩ dɛɛn na lɔgɩ kəbrə kam ba toŋi da tɩn yɩ kaanɩm tiinə balʋ na zʋʋrɩ Zeruzalɛm laŋa kam nɩ tɩn mʋ.
23 Bɛnzamɛn dɩ Hasubi ma lɔ mɛ na bwələ dɩ ba sam tɩn ba toŋi da.
Maaseya bu Azarɩa wʋlʋ ta na yɩ Ananɩa naa tɩn dɩ ma lɔ kəbrə kam o toŋi mɛ na bwələ dɩ o sɔŋɔ tɩn.
24 Enadadɩ bu Enadadɩ dɩ ma lɔ o toŋi da sɩ kʋ zɩgɩ Azarɩa sɔŋɔ nɩ sɩ kʋ yi mɛ kəbrə kam na gugwǝli yɩ gugoro wʋra tɩn.
25-26 Yuzayi bu Palalɩ dɩ daa ma lɔ kəbrə kam o zɩgɩ gugoro kʋm yigə nɩ, jazɩm baŋa seeni pɛ sɔŋɔ di-dɩdɔrɔ kʋm na wʋ mɛ yɩ kʋ bwələ dɩ pa-tara bam kʋnkɔlɔ tɩn.
Parʋsɩ bu Pedaya dɩ daa ma lɔ o toŋi da sɩ kʋ taa ve wa-puli seeni. O lɔgɩ o vu o yi Na Ni dɩm seeni dɩdaanɩ di-dɩdɔrɔ kʋlʋ na zɩgɩ da tɩn mʋ. Ofɛɛlɩ je sɩm nɩ mʋ kʋntʋ, Wɛ-digə tɩntʋŋna bam dɛɛn na zʋʋrɩ mɛ tɩn.
27 Tekoa tɩʋ tiinə bam dɩ daa ma lɔ ba toŋi da. Bantʋ tʋŋɩ di-dɩdɔrɔ-kamunu kʋm na zɩgɩ mɛ tɩn seeni, yɩ ba lɔ ba vu ba yi kəbrə kam na bwələ dɩ Ofɛɛlɩ tɩn.
28 Kaanɩm tiinə badonnǝ dɩ daa ma lɔ kəbrə kam ba toŋi da. Ba zɩgɩ Sisəŋ-nɔɔnʋ Ni dɩm nɩ mʋ ba lɔa ba ve baŋa kam seeni. Nɔɔnʋ maama dɛɛn zɩgɩ o tɩtɩ sɔŋɔ nɩ mʋ o lɔa.
29 Yimera bu Sadoki dɩ ma lɔ o toŋi kəbrə kam je sɩlʋ na zɩgɩ o sɔŋɔ kʋm yigə nɩ tɩn.
Sekanɩa bu Semaya wʋlʋ na yɩ Wa-puli seeni Ni yɩrɩnʋ wʋm tɩn ma lɔ o toŋi da.
30 Selemɩa bu Hanania, dɩ Hanun na yɩ Zalafɩ biə bardʋ tu wʋm tɩn, dɩ daa maa lɔ ba toŋi da.
Berekiya bu Mesulam dɩ ma zɩgɩ o di sɩm yigə nɩ o lɔ kəbrə kam o toŋi da.
31 Malkiya na yɩ səbu-sɩŋa gɔgɔ tɩn mʋ lɔgɩ kəbrə kam o toŋi da. O ma vu o yi sɔŋɔ kʋlʋ Wɛ-digə tɩntʋŋna dɩ pipimpiinə na zʋʋrɩ tɩn. Je sɩm kʋntʋ dɛɛn bwələ dɩ Yɩrɩm Ni dɩm mʋ. O ta lɔgɩ o yi mɛ kəbrə kam na jɩgɩ gugoro yɩ wɛyuu digə wʋ ka yɩra nɩ tɩn mʋ.
32 Səbu-sɩŋa gwarʋ tɩm dɩ pipimpiinə bam dɩ laan ma zɩgɩ gugoro kʋm digə kam na wʋ mɛ tɩn ba lɔ kəbrə kam ba vu ba yi Peeni Ni dɩm seeni.