Nehemi ve Zeruzalɛm
2
Kʋ kwaga nɩ, canɩ sɩna mʋ kɛ yɩ Nisan cana kam yi. Dɛ dɩdwɩ pɛ Atazeregesɩ na je o di wʋdiu tɩn, mʋ a jaanɩ sana a zʋ o te sɩ a pa‑o. Pɛ wʋm nan maŋɩ o wʋ nɛ amʋ yi-nywana a tɩtʋŋa baŋa nɩ. 2 O ma bwe-nɩ o wɩ: «Bɛɛ mʋ kɩ yɩ n yibiyə nywanɩ kʋntʋ? A ba bʋŋɩ nɩ n jɩgɩ yazurǝ. Woŋo mʋ daanɩ‑m na?» O taanɩ dɩm ma yɔɔrɩ dɩ pa a bɩcarɩ di, 3 pa a ləri a wɩ: «Pɛ, Wɛ wʋ́ pa‑m mʋmwɛ-dɛɛrɩ. Amʋ wʋʋ wʋ́ kɩ tɛ mʋ kʋ poli yɩ tɩʋ kʋlʋ ba na kɩ a nabaara bam da tɩn laan jigi di-dwəənu? Kʋ ni bwəəru tɩm maama dɩ maa zwɛ dɩdaanɩ mini.»a 4 Pɛrsɩ tɩʋ pɛ wʋm maa bwe-nɩ o wɩ: «Nmʋ nan lagɩ sɩ a kɩ bɛɛ mʋ a pa‑m?»A ma warɩ Wɛyuu Tu Wɛ dɩm a wʋnɩ sɩ o wǝli-nɩ, 5 yɩ a laan ləri pɛ wʋm a wɩ: «Pɛ, nmʋ yi na su dɩ amʋ kikiə, yɩ n sɛ sɩ n kɩ a na lagɩ te tɩn, sɩ n tʋŋɩ-nɩ sɩ a joori Zuda tɩʋ kʋlʋ wʋnɩ ba dɛɛn na kɩ a nabaara bam tɩn. Amʋ bʋŋɩ sɩ a na yi da, sɩ a joori a lɔ tɩʋ kʋm kabri sɩm mʋ a pɩ.» 6 Pa-kana wʋm dɛɛn je pɛ wʋm saŋa nɩ mʋ. Pɛ wʋm ma bwe-nɩ a na wʋ́ daanɩ da te, dɩdaanɩ maŋa kalʋ a na wʋ́ joori tɩn. O na sɛ sɩ o tʋŋɩ-nɩ kʋntʋ tɩn, a ma ta a brɩ-o a na wʋ́ kɩ kʋlʋ maama tɩn.
7 A ta loori pɛ wʋm a wɩ: «Nmʋ na sɛ sɩ n kɩ-nɩ yu-yoŋo, pa-nɩ twannʋ tɩlʋ a na wʋ́ pa nmʋ dɩdɛɛra balʋ na te Efratɩ bugə kam wa-zʋʋrɩ laŋa kam tɩn. Twannʋ tɩm kʋntʋ wʋ́ wǝli sɩ a kɛ a yi Zuda sɩ nɔɔn-nɔɔnʋ yɩ daanɩ-nɩ cwǝŋǝ nɩ. 8 A ta loori‑m sɩ n pa-nɩ tɔnɔ sɩ a ja vu a pa Azafɩ, o na nii pɛ kagʋa kam baŋa nɩ tɩn. A maa lagɩ sɩ o pa dɩbam da-ŋwɩ sɩ dɩ́ ma dɩ́ fɔgɩ dɩ́ lɔ dalɩm je sɩm na wʋ Wɛ-digə kam yɩra nɩ tɩn niə yam, dɩ tɩʋ kʋm kabri sɩm, dɩdaanɩ sɔŋɔ kʋlʋ wʋnɩ a na wʋ́ taa zʋʋrɩ tɩn.» Pɛ wʋm ma pa-nɩ kʋlʋ maama a na loori o tee nɩ tɩn, amʋ Tu Wɛ dɩm na tʋ a yigə nɩ tɩn ŋwaanɩ.
9 Pɛ wʋm dɛɛn ma pa jar-kərə yigǝ tiinǝ dɩ ba jar-kərə na dɔgɩ siseŋ-nɔɔna tɩn tɔgɩ-nɩ sɩ dɩ́ vu. A laan ma vu a yi nawuurə yalʋ na bɛ Efratɩ bugə kam tɩn, yɩ a kwe pɛ wʋm twannʋ tɩm a pa dɩdɛɛra balʋ na te laŋa kam kʋntʋ tɩn. 10 Kʋ daarɩ Sanbalati, wʋntʋ yɩ Bɛte-Horon tɩʋ tu mʋ. Tobia dɩ maa yɩ Amɔn laŋa kam yigə tu. Ba na ni nɩ nɔɔnʋ tuǝ sɩ o beeri Yisɩrayɛlɩ dwi tiinə lanyɩranɩ tɩn, mʋ ba wʋʋ tiini kʋ fuli.
11 A na yi Zeruzalɛm tɩn, a kɩ da yatɔ da 12 yɩ a wʋ pɛ nɔɔn-nɔɔnʋ lwarɩ Wɛ na brɩ-nɩ sɩ a kɩ kʋlʋ a pa Zeruzalɛm tɩn. Amʋ laan ma zaŋɩ tɩtɩɩ kʋnkʋrʋ nɩ a nuŋi dɩ a yuudonnə fɩnfɩɩn. Bɩnaga kalʋ amʋ dɛɛn na diini tɩn mʋ ya yɩ varɩm wʋlʋ yɩranɩ dɩ́ na kwe dɩ́ wǝli da. 13 Kʋ ta na yɩ tɩtɩɩ tɩn, mʋ a nuŋi a tɔgɩ Bolo seeni ni dɩm a kɛ. A laan ma tu a gaalɩ Prənyoŋo vʋlɩ dɩm a vu a yi Weeru-puuri ni dɩm. A na kaagɩ a ve kʋntʋ tɩn, mʋ a nii a na tɩʋ kʋm kabri sɩm na sirimi te, dɩdaanɩ mim dɩm na cɔgɩ tɩʋ kʋm ni bwəəru tɩm te tɩn. 14 A laan ma vu a yi Buli-yi ni dɩm, yɩ a ta vu Pɛ Bugǝ kʋm seeni. Bɩnaga kam a na diini tɩn ma ga cwǝŋǝ sɩ ka tɔgɩ kalankulə dɩ weeru tɩm wʋnɩ ka kɛ. 15 Kʋ ma pa a kwe bolo cwǝŋǝ kam a ve a maa kɛa, yɩ a maasɩ a nii tɩʋ kəbrə kam tɩtɩ dɩm kʋntʋ nɩ. A laan ma joori a kwe cwǝŋǝ kalʋ a ya na dɛ da a vu tɩn, yɩ a tɔgɩ Bolo seeni ni dɩm a daa zʋ tɩʋ kʋm wʋnɩ.
16 Tɩʋ kʋm nakwa bam wʋlʋwʋlʋ yǝri amʋ ya na ve tɩn, dɩ a na maŋɩ a kɩ kʋlʋ maama tɩn. A nan wʋ tagɩ kʋlʋkʋlʋ dɩ a donnǝ Zwifǝ tiinə bam, kʋ na yɩ ba kaanɩm tiinə bam, naa ba nakwa bam, naa ba yigǝ tiinǝ bam, naa balʋ maama na wʋ́ da ba tʋŋɩ tɩtʋŋɩ dɩm tɩn dɩ. 17 Amʋ laan ma ta dɩ ba a wɩ: «Nii-na dɩ́ na wʋ lɛɛrʋ tɩlʋ wʋnɩ tɩn. Zeruzalɛm tɩʋ kʋm laan jigi di-dwəənu mʋ, yɩ kʋ bwəəru tɩm dɩ zwɛ zwɛ. Nan pa-na sɩ dɩ́ joori dɩ́ lɔ kʋ kabri sɩm dɩ́ zɩgɩ, sɩ dɩ́ daa yɩ taa je dɩ cavɩɩra.» 18 A ta ma ta a brɩ-ba a Tu Wɛ dɩm na tʋ a yigə nɩ te, dɩdaanɩ pɛ wʋm na tagɩ kʋlʋ dɩ amʋ tɩn. Ba dɩ ma ləri ba wɩ: «Dɩ́ wʋ́ zaŋɩ wɛɛnɩ mʋ sɩ dɩ́ tʋŋɩ!» Ba ma sɩɩnɩ ba na dam sɩ ba puli tɩtʋŋɩ dɩm.
19 Horon tu Sanbalati, dɩ Amɔn tu Tobia, dɩ Gesɛm na yɩ Arabi tu tɩn ma ni dɩ́ na ti yigə sɩ dɩ́ kɩ te tɩn. Ba ma kɩ dɩbam ba mwanɩ yɩ ba wɩ: «Abam bʋŋɩ sɩ á kɩ tɛ mʋ? Á kikiə yam nyɩ dɩ á bʋŋɩ sɩ á nuŋi Pa-farʋ wʋm kwaga nɩ mʋ.» 20 A ma lǝri-ba a wɩ: «Dɩbam yɩ Wɛyuu Tu Wɛ dɩm tɩntʋŋna mʋ. Dɩntʋ nan mʋ wʋ́ pa dɩ́ vu yigə dɩdaanɩ dɩ́ tɩtʋŋɩ maama, sɩ dɩ́ puli lɔɔm dɩm. Kʋ nan na yɩ abam, á ba jɩgɩ kʋlʋkʋlʋ sɩ á joŋi Zeruzalɛm nɩ yo. Á nan ba tɔgɩ á jɩgɩ kǝm sɩ á kɩ dɩ dɩbam cullu kikiə.»b