Nehemi Tɔnɔ
Nehemi yigə na wʋ Zeruzalɛm wʋnɩ te tɩn
1
Hakalia bu Nehemi mʋ brɩ taanɩ dɩntʋ.Kʋ na kɩ te tɩn mʋ tɩntʋ: Kʋ dɛɛn maŋɩ dɩ Pɛrsɩ Pɛ Atazeregesɩ paarɩ dim bɩna fiinle bɩnɩ dɩm Kisilu cana kam nɩ mʋ.a Amʋ Nehemi maa wʋ Suzi tʋ-fɔrɔ kʋm nɩ. 2 Amʋ cʋrʋ Hanani ma tɔgɩ dɩ nɔɔna badonnǝ o zɩgɩ Zuda tɩʋ nɩ o ba a te.b Amʋ ma bwe-ba sɩ a lwarɩ Zwifǝ tiinə balʋ fɩɩn na zɩgɩ Babilɔnɩ nɩ ba joori sɔŋɔ tɩn yazurə bwiə. A daa ma bwe-ba Zeruzalɛm tɩʋ kʋm bwiə. 3 Ba ma ta ba brɩ-nɩ ba wɩ: «Zwifǝ tiinə balʋ na wʋra tɩn wʋ cam dɩ cavɩɩra wʋnɩ. Zeruzalɛm kabri maama sirimi, yɩ mim zwɛ tɩʋ kʋm ni bwəəru tɩm.»c 4 Amʋ na ni tɩntʋ maama tɩn, mʋ a jǝni tɩga nɩ a keeri.
A kwe da zanzan mʋ a vɔ ni, yɩ a yɔɔrɩ a keerǝ.d A maa loori Wɛ yɩ a wɩ:
5 «Wɛyuu Tu Baŋa-Wɛ dɩm, nmʋ yɩ kamunu mʋ, yɩ dɩ́ tiini dɩ́ kwarɩ-m. N zɩgɩ dɩ cɩga mʋ n sono kʋm baŋa nɩ n soe balʋ na soe-m yɩ ba tɔgɩ n niə yam tɩn, nɩ n na goni ni sɩ n kɩ n pa-ba te tɩn. 6 A loori-m! Nii amʋ seeni, sɩ n cəgi a wɛ-loro kʋlʋ a na loori wɩa dɩ tɩtɩ maama nmʋ tɩtɩ nɔɔna Yisɩrayɛlɩ tiinə bam ŋwaanɩ tɩn. A lagɩ a ta jaja nɩ dɩbam Yisɩrayɛlɩ tiinə yɔɔrɩ dɩ́ kɩ lwarɩm zanzan. Cɩga tɩn, amʋ, dɩ a nabaara dɩ tɔgɩ dɩ́ wǝli da. 7 Dɩbam tiini dɩ́ tʋŋɩ wo-balɔrɔ tɩtʋŋɩ mʋ dɩ nmʋ. Kʋ na yɩ nmʋ niə yalʋ dɩ cullu tɩlʋ maama n na pɛ n tɩntʋŋnʋ Moyisi sɩ o brɩ dɩbam tɩn, dɩ́ vɩn sɩ dɩ́ tɔgɩ-ya mʋ.e
8 Nan guli nɩ n ya maŋɩ n ta dɩ Moyisi n wɩ: ‹Abam Yisɩrayɛlɩ tiinə bam na wʋ jaanɩ cɩga dɩ amʋ, a lagɩ a jagɩ abam mʋ a yagɩ tɩɩnɩ dɩdonnǝ wʋnɩ. 9 Sɩ á nan na joori sɩ á ba amʋ te yɩ á sɛ a niə yam, amʋ wʋ́ ja abam a joori mɛ a na kuri sɩ á taá zuli-nɩ da tɩn, nɩnɛɛnɩ á na maŋɩ á jagɩ á vu á wʋ je sɩlʋ maama nɩ dɩ.›
10 Amʋ Yuutu Wɛ, yɩ swe nɩ bantʋ yɩ n tɩtɩ nɔɔna dɩ n tɩntʋŋna mʋ. Kʋ nan yɩ nmʋ mʋ kwe n dam dɩm n ma n vrɩ-ba n yagɩ. 11 Nan cəgi amʋ wɛ-loro kʋm sɩ n daarɩ n sɛ n tɩntʋŋna bam maama na beeri nmʋ zulə tɩn dɩ ba na loori kʋlʋ tɩn. Pa pɛ wʋm duri a yibwənə sɩ a na yigə-vəŋə zɩm.»
Kantʋ maŋa kam nɩ amʋ zʋʋrɩ dɩ pɛ wʋm mʋ a nii o wʋdiu baŋa nɩ.