14
Abɩa ma tɩ yɩ o vu o kwə te. Ba ma kwe‑o ba kɩ Davidi tɩʋ Zeruzalɛm nɩ. O tʋʋnɩ dɩm kwaga nɩ o bu Asa ma ləri o di paarɩ. Asa paarɩ dim maŋa kam nɩ ba tɩʋ kʋm sin dɩ najara bɩna fugə mʋ.
Zuda tɩʋ Pɛ Asa taanɩ
2 Asa dɛɛn kɩ wo-laarʋ mʋ, yɩ o tɩtʋŋa su o Tu Baŋa-Wɛ yi lanyɩranɩ. 3 O ma ja kaanɩm bimbin-yɔɔrʋ tɩm, dɩ pweeru yuu wara-je sɩm o cɔgɩ. O ta ma lɔ kandwa yalʋ ba na jɩgɩ ba zuli tɩn, yɩ o daarɩ o cɩcʋgɩ Aseraa nyɩnyʋgʋ dɛ sɩm o yagɩ. 4 O laan ma pa Zuda dwi tiinə bam ni nɩ ba taa zuli Baŋa-Wɛ dɩm na yɩ ba nabaara bam Wɛ tɩn, sɩ ba daarɩ ba taa sɛ DƖ niə yam dɩ DƖ kwiə yam. 5 Zuda tɩɩnɩ dɩm maama wʋnɩ mʋ o dɛɛn pɛ ba cɔgɩ wara-je kaanɩm bimbinə yam, dɩ yalʋ ba na zwɛ wǝǝnu tɩlʋ lwǝm na ywǝmmǝ tɩn ya baŋa nɩ tɩn. Kʋ maa pa Asa paarɩ dim maŋa kam nɩ, yazurə yɔɔrɩ ka wʋ Zuda laŋa kam nɩ mʋ. 6 Asa dɛɛn fɔgɩ o lɔ Zuda tɩɩnɩ dɩm o cɩ-dɩ o kaagɩ dɩ kabri, ba laŋa kam na wʋ nɛ daanɩm tɩn ŋwaanɩ. Bɩna yam kʋntʋ maama nɩ, nɔɔn-nɔɔnʋ wʋ zaŋɩ najara dɩd-o, Bɛŋwaanɩ Baŋa-Wɛ dɛɛn mʋ pɛ o zʋʋrɩ tɩga kam nɩ dɩ bɩcar-zuru.
7 O dɛɛn ma ta dɩ Zuda tiinə bam o wɩ: «Pa-na sɩ dɩ́ fɔgɩ dɩ́ pɩ tɩɩnɩ dɩm dɩ́ zɩgɩ dɩ dam, sɩ dɩ taa jɩgɩ kabri-lilirru, dɩ ni-bwəəru tɩlʋ na jɩgɩ luuru tɩn. Tɩga kam ta yɩ dɩbam nyɩm mʋ, dɩ́ na kɩ dɩ́ tɔgɩ dɩ́ Tu Baŋa-Wɛ wʋbʋŋa tɩn ŋwaanɩ. Dɩntʋ mʋ cɩgɩ dɩbam dɩ́ dʋna jɩŋa nɩ pa ba ba daanɩ dɩbam.»
Ba ma sɩɩnɩ ba lɔ ba tɩɩnɩ dɩm ba pɩ, yɩ wǝǝnu kɩ lanyɩranɩ tɩ pa-ba.
8 Asa dɛɛn jɩgɩ jar-kərə mʋrrʋ biə-yatɔ (300,000) mʋ na nuŋi Zuda dwi dɩm nɩ. Ba maama maa ze jara-kǝm cɩ-kwɛn-kamunə, dɩ cicwə. O ta maa jɩgɩ jar-kərə mʋrrʋ biə-yale dɩ funɔnɔ (280,000) na nuŋi Bɛnzamɛn dwi dɩm nɩ, yɩ ba dɩ ze jara-kǝm cɩ-kwɛn-balɛ, dɩdaanɩ tɛn, dɩ cɩna. Jar-kərə bam maama dɛɛn yɩ pamaŋ-bɩbɛ mʋ.
9 Dɛ dɩdʋa Kusi tu wʋlʋ yɩrɩ na yɩ Zara tɩn ma nuŋi dɩ jar-kərə mʋrrʋ-yirr, dɩ jara-kǝm tərikooru biə-yatɔ o vu o yi Maresa sɩ o jeeri Zuda tiinə bam dɩ najara. 10 Asa dɩ ma nuŋi dɩ o jar-kərə bam o jeer-o dáanɩ, Zefata bolo je sɩm nɩ. Ba maama ma fɔgɩ ba kikili ba jar-kərə bam sɩ ba kɩ jara yam.
11 Asa dɛɛn ma loori o Tu Baŋa-Wɛ dɩm o wɩ: «Baŋa-Wɛ, nmʋ yɩranɩ mʋ waɩ nabwənə n joŋi n yaga dɩdɛɛra kɔgɔ jɩŋa nɩ. Dɩbam Tu Baŋa-Wɛ, dɩ́ tɩɩgɩ nmʋ baŋa nɩ mʋ sɩ n wǝli dɩbam. Kʋ nan yɩ nmʋ yɩrɩ dɩm ŋwaanɩ mʋ dɩbam nuŋi sɩ dɩ́ jeeri kɔ-fɔrɔ kʋntʋ dɩ najara. Baŋa-Wɛ, nmʋ mʋ yɩ dɩbam Wɛ dɩm. Nan yɩ sɛ sɩ nɔɔn-nɔɔnʋ dwəni dɩ nmʋ o di.»
12 Baŋa-Wɛ ma cɔgɩ Kusi tiinə bam pa ba duri sɩ ba lu Asa dɩ Zuda jar-kərə bam jɩŋa nɩ. 13 Asa dɩ o nɔɔna bam ma zəli-ba taa ba vu ba yi Gerarɩ seeni. Kusi tiinə bam zanzan ma tɩ pa ba kɔgɔ kʋm daa warɩ najara yam sɩ ba kɩ. Bɛŋwaanɩ, Baŋa-Wɛ dɩ DƖ jar-kərə bam dɛɛn yɔɔrɩ ba wanɩ-ba mʋ. Zuda tiinə bam ma pɛ ba dʋna bam jɩjɩgɩrʋ zanzan ba ja ba viiri. 14 Ba dɛɛn ta ma cɔgɩ tɩ-balwa balʋ na gilimi Gerarɩ tɩʋ kʋm tɩn, Baŋa-Wɛ fʋʋnɩ na tiini dɩ jɩgɩ je sɩm kʋntʋ nɔn-biə bam tɩn ŋwaanɩ. Zuda tiinə bam ma lɛɛrɩ ba pɛ tɩɩnɩ dɩm kʋntʋ maama jɩjɩgɩrʋ ba ja ba viiri, tɩ na tiini tɩ daga tɩn ŋwaanɩ. 15 Ba ta ma vu ba li nayɩra balʋ na yɩrɩ vara bam tɩn, yɩ ba kalɩ peeni, dɩ bʋnɩ, dɩ yogondə zanzan ba ja ba kɛ. Ba laan ma joori ba vu Zeruzalɛm.