Pɛ Asa na tʋŋɩ wo-laarʋ tɩlʋ tɩn
«Pɛ Asa, dɩ Zuda tiinə bam, dɩ Bɛnzamɛn tiinə bam maama, cəgi-na a taanɩ dɩntʋ: Baŋa-Wɛ wʋ́ taa wʋ abam tee nɩ, nɩ á na yɔɔrɩ á mɩ dɩ DƖ. Á na beeri DƖ je, DƖ wʋ́ pa abam cwǝŋǝ sɩ á na‑DƖ. Abam nan na nuŋi DƖ kwaga nɩ, DƖ dɩ wʋ́ dʋlɩ abam mʋ DƖ yagɩ. 3 Bɩna zanzan wʋnɩ Yisɩrayɛlɩ tiinə bam wʋ sɛ sɩ ba tɔgɩ Wɛ dɩm cɩga cɩga, yɩ ba ba jɩgɩ kaanɩm tu sɩ kʋ tu taa brɩ-ba. Ba maa wʋ lwarɩ Wɛ niə yam. 4 Cam nan na yǝni dɩ yi-ba, ba yǝni ba pipiri sɩ ba joori Baŋa-Wɛ dɩm na yɩ Yisɩrayɛlɩ tiinə Wɛ tɩn te mʋ. Ba ma yǝni ba beeri DƖ je, yɩ DƖ pa-ba cwǝŋǝ sɩ ba na‑DƖ. 5 Maŋa kam kʋntʋ nɩ, nɔɔna dɛɛn ba beeri yɔɔ yɔɔ, vuvugə na tʋ tɩɩnɩ dɩm maama dɩ dɩ nɔn-biə baŋa nɩ tɩn ŋwaanɩ. 6 Dwi dɩdwɩ yɔɔrɩ dɩ zaŋɩ dɩ cɔgɩ dɩdoŋ dwi yɔɔ yɔɔ mʋ, yɩ tɩʋ dɩdʋa nɔɔna dɩ zaŋɩ tɩʋ kʋdoŋ nɔɔna baŋa nɩ. Kʋ nan yɩ Baŋa-Wɛ mʋ jaanɩ lɛɛrʋ dwi maama DƖ tui ba baŋa. 7 Kʋ nan na yɩ abam, kɩ-na dam á kɩ á tɩtɩ kuri nɩ, sɩ á yɩ pa á vwana bugi. Bɛŋwaanɩ, abam wʋ́ na á tɩtʋŋa yam nyɔɔrɩ.»
8 Asa na ni Wɛ nijoŋnu Azarɩa na ŋɔɔnɩ yiyiu-ŋwɛ sɩlʋ maama tɩn mʋ o nɛ baarɩ. O ma lɩ jwə-yɔɔrʋ tɩlʋ na wʋ Zuda dɩ Bɛnzamɛn tɩɩnɩ yam maama wʋnɩ tɩn o dʋlɩ o yagɩ. Kʋ ta na yɩ tɩɩnɩ dɩlʋ na wʋ Efrayim pweeru laŋa kam nɩ yɩ o vrɩ-dɩ o te tɩn, o dʋlɩ ba jwǝnǝ yam dɩ o yagɩ. O laan ma pa ba fɔgɩ ba kwɛ Baŋa-Wɛ kaanɩm bimbim dɩm na zɩgɩ Wɛ-digə kam napɔrɔ kʋm yigə nɩ tɩn.
9 Asa dɛɛn ma bəŋi Zuda dwi tiinə, dɩ Bɛnzamɛn dwi tiinə bam sɩ ba la daanɩ. O ta ma bəŋi nɔɔna balʋ na nuŋi Efrayim, dɩ Manasɩ, dɩ Simeyon dwiə yam wʋnɩ yɩ ba laan ba ba zʋʋrɩ Zuda laŋa kam nɩ tɩn. Bɛŋwaanɩ, Yisɩrayɛlɩ tiinə zanzan ya tu ba sɛ ba pa Asa, ba na maanɩ nɩ o Tu Baŋa-Wɛ mʋ wʋ o tee nɩ tɩn ŋwaanɩ.a
10 Ba maama dɛɛn nan jeeri Zeruzalɛm nɩ Asa paarɩ dim bɩna fugə-yanu canɩ sɩtɔ cana kam wʋnɩ mʋ. 11 Dɛ dɩm kʋntʋ nɩ ba ma kwe na-balɩ biə-yarpɛ (700), dɩ peeni dɩ bʋnɩ mʋrrʋ tɩrpɛ (7,000) ba kɩ kaanɩm ba pa Baŋa-Wɛ. Vara bam kʋntʋ nan yɩ ba na vrɩ balʋ ba dʋna bam jɩŋa nɩ tɩn mʋ. 12 Ba laan ma kɩ ni-mɔrɔ sɩ ba yɔɔrɩ ba taa tɔgɩ Baŋa-Wɛ dɩm na yɩ ba nabaara Wɛ tɩn dɩ ba bɩcara maama, kʋ wǝli dɩ ba dam maama. 13 Ba ta sɛ nɩ wʋlʋ maama na vɩn sɩ o tɔgɩ Baŋa-Wɛ dɩm na yɩ Yisɩrayɛlɩ tiinə Wɛ tɩn, baá gʋ kʋntʋ tu, nabwəm naa dɩdɛɛrʋ mʋ yoo, baarʋ naa kaanɩ mʋ dɩ. 14 Ba laan ma du durə Baŋa-Wɛ yɩrɩ dɩm ŋwaanɩ ba vɔ ba tɩtɩ. Ba nan yɔɔrɩ ba kwe sɔɔ kʋlʋ na zaŋɩ baŋa baŋa tɩn, dɩ nabwaanʋ wum, dɩ namunnu wum mʋ ba du durə dɩm dɩ kwǝr-dɩa. 15 Zuda tiinə bam maama wʋʋ dɛɛn ma poli dɩ ba na kɩ kampwələ sɩ kʋ yɔɔrɩ kʋ nuŋi ba bɩcara nɩ tɩn. Ba ma beeri Baŋa-Wɛ je dɩ ba wʋʋ maama, yɩ DƖ dɩ pa-ba cwǝŋǝ sɩ ba na‑DƖ. DƖ dɛɛn cɩgɩ-ba ba dʋna jɩŋa nɩ pa ba daa ba yaarɩ-ba.b
16 Asa nu nakwɩ Maaka ya cwi Asera nyɩnyʋgʋ daa pa nɔɔna jɩgɩ-ka ba kaana. O ma vu o go-dɩ o dɩ tɩga nɩ o daarɩ o kwe-ka o zwɛ Sɩdrɔn bugə kam ni nɩ. O ta ma lɩ Maaka sɩ o daa yɩ taa jɩgɩ dam pɛ sɔŋɔ nɩ. 17 Asa dɛɛn wʋ wanɩ o cɔgɩ wara-je bimbim sɩlʋ na wʋ Yisɩrayɛlɩ laŋa kam maama wʋnɩ tɩn. Dɩ kʋ dɩ, o ŋwɩa maama wʋnɩ o yɔɔrɩ o kwe o cɩga o pa Baŋa-Wɛ mʋ. 18 O dɛɛn ta ma kwe pɛɛra yalʋ o dɩ o ko wʋm na kwe ba pa Baŋa-Wɛ tɩn o ja o vu o tiŋi Wɛ-digə kam wʋnɩ. Pɛɛra yam dɛɛn yɩ səbu-poŋo wǝǝnu, dɩ səbu-sɩŋa wǝǝnu, dɩ zɩla dwi dwi mʋ.
19 Jara dɛɛn daa wʋ kɩ Zuda tɩʋ kʋm nɩ sɩ kʋ taa nii bɩnɩ dɩlʋ Asa na di paarɩ o kɩ bɩna fiintɔ-yanu tɩn wʋnɩ.