Zuda tɩʋ Pɛ Abɩa taanɩ
13
Yisɩrayɛlɩ tɩʋ pɛ Zeroboam paarɩ dim bɩna fugə-nana bɩnɩ dɩm wʋnɩ mʋ Abɩa dɛɛn di Zuda tɩʋ paarɩ. 2 O dɛɛn jǝni Zeruzalɛm nɩ o di paarɩ dɩm bɩna yatɔ mʋ. O nu yɩrɩ mʋ yɩ Maakaa wʋlʋ na yɩ Gibea tu Yureli bukɔ tɩn.Jara dɛɛn ma tʋ Abɩa dɩ Zeroboam tɩtarɩ laŋa nɩ. 3 Abɩa ma la nɔɔna balʋ na ye najara kǝm lanyɩranɩ tɩn mʋrrʋ biə-yana (400,000) o kɩ daanɩ sɩ o jeeri Zeroboam dɩ najara. Zeroboam ma jeer-o dɩ o jar-kərə mʋrrʋ biə funɔnɔ (800,000) balʋ dɩ na yɩ nɔn-babɛ tɩn.
4 Abɩa dɛɛn ma vu o zɩgɩ Zemarayim piu kʋm yuu nɩ. Piu kʋm kʋntʋ wʋ Efrayim pweeru laŋa kam nɩ mʋ. O ma tɔɔlɩ baŋa baŋa o wɩ:
«Zeroboam, dɩ Yisɩrayɛlɩ tiinə bam maama, cəgi-na a taanɩ dɩm. 5 Abam yɔɔrɩ á ye nɩ Baŋa-Wɛ dɩm na yɩ Yisɩrayɛlɩ tiinə Wɛ tɩn maŋɩ DƖ goni ni dɩ Davidi nɩ: DƖ wʋ́ kwe Yisɩrayɛlɩ tɩʋ paarɩ dɩm DƖ pa wʋntʋ dɩ o dwi dɩm sɩ kʋ taa ve wuu. 6 Kʋ nan na yɩ te tɩn, Nebatɩ bu Zeroboam ya na yɩ Davidi bu Solɔmɔn tɩntʋŋnʋ tɩn mʋ nuŋi o tu wʋm kwaga nɩ. 7 O ma beeri nɔn-wo-kʋrrʋ o dɩ o kwaga nɩ pa ba vu ba dwəni dɩ Solɔmɔn bu Robʋam. Ka maŋa nɩ dɩ Robʋam ta warɩ sɩ o kuri o tɩtɩ wʋbʋŋa o tɔgɩ-ya. O maa bwǝnǝ sɩ o wanɩ ba yigə o cɩ.
8 Abam dɩ nan kwaanɩ sɩ á vɩn paarɩ dɩlʋ Baŋa-Wɛ na tiŋi DƖ pa Davidi dwi dɩm tɩn mʋ. Á kɔgɔ kʋm sɩɩnɩ kʋ daga lanyɩranɩ. Abam ta maa jɩgɩ Zeroboam na kwe səbu-sɩŋa o mɔ na-pwalɩ kamwarʋ tɩlʋ sɩ á taá zuli tɩn á tee nɩ. 9 Nan yɩ swe-na nɩ á zəli Arɔn biə bam na yɩ Baŋa-Wɛ kaanɩm tiinə tɩn, dɩ Levi dwi tiinə bam mʋ. Abam laan ma lwǝni tɩɩnɩ dɩdonnǝ kikiə dɩ á na kuri á tɩtɩ kaanɩm tiinə tɩn. Wʋlʋ maama maa na wanɩ o ja na-bala, dɩ pi-balɩ sɩrpɛ o ba o ma o kɩ pɛɛra, kʋntʋ tu waɩ o kwɛ o tɩtɩ sɩ o ji kaanɩm tu o kaanɩ abam wa-yɔɔrʋ tɩm.
10 Dɩbam nan ta zuli dɩ́ Tu Baŋa-Wɛ mʋ, yɩ dɩ́ wʋ yagɩ-DƖ. Arɔn dwi dɩm nɔɔna mʋ yɩ Baŋa-Wɛ kaanɩm tiinə dɩbam tee nɩ, yɩ Levi dwi tiinə bam yǝni ba tʋŋɩ ba wǝli-ba. 11 Tɩtɩɩtɩ maama dɩ dɩdaan-ni maama nɩ, ba yǝni ba kɩ zwɛɛm pɛɛra mʋ, yɩ ba zwɛ wǝǝnu tɩlʋ lwǝm na ywǝmmǝ tɩn ba pa Baŋa-Wɛ. Ba ta yǝni ba kwe dɩpɛ mʋ ba tiŋi taabʋlʋ kʋlʋ ba na kwɛ Wɛ ŋwaanɩ tɩn baŋa nɩ, yɩ ba daarɩ ba tarɩgɩ min-zwǝǝnu tɩm na zɩgɩ səbu-sɩŋa min-zwǝn-zɩgʋ kʋm baŋa nɩ tɩn dɩdaan-ni maama nɩ. Kʋntʋ tɩn, dɩbam yɔɔrɩ dɩ́ kɩ te dɩ́ Tu Baŋa-Wɛ na brɩ sɩ dɩ́ taa kɩ tɩn mʋ. Kʋ nan na yɩ abam, á nuŋi DƖ kwaga nɩ mʋ. 12 Taá ye-na nɩ Wɛ sɩɩnɩ DƖ wʋ dɩbam tee nɩ. Dɩntʋ mʋ yɩ dɩbam yigə tu. DƖ kaanɩm tiinə bam mʋ ti ba yigə sɩ ba wu nabwaanʋ sɩ dɩ́ laan zaŋɩ najara dɩ abam. Yisɩrayɛlɩ tiinə bam, yɩ dwəni-na dɩ Baŋa-Wɛ dɩm na yɩ á nabaara bam Wɛ tɩn, bɛŋwaanɩ á bá na kʋ kuri.»
13 Abɩa ta na zɩgɩ da o ŋɔɔnɩ kʋntʋ tɩn, mʋ Zeroboam tʋŋɩ o jar-kərə badonnǝ sɩ ba dalɩ ba tɔgɩ Zuda jar-kərə bam kwaga seeni ba zaŋɩ ba baŋa nɩ dɩ najara. Balʋ na daarɩ tɩn dɩ maa wʋ Zuda tiinə bam yigə seeni. 14 Zuda tiinə bam ma maanɩ wɩ ba dʋna bam li-ba mʋ yigə seeni, dɩ kwaga kam seeni. Ba ma keeri ba loori Baŋa-Wɛ sɩ DƖ wǝli-ba. Kaanɩm tiinə bam ma wu ba nabwaanʋ tɩm, 15 yɩ Zuda tiinə bam maama kaasɩ tiguri-kaasa. Zeroboam dɩ Yisɩrayɛlɩ jar-kərə bam na ni sɔɔ kʋm tɩn, Wɛ ma pa ba duri sɩ ba lu Abɩa dɩ Zuda tiinə bam jɩŋa nɩ. 16 Yisɩrayɛlɩ tiinə bam dɛɛn na duri kʋntʋ tɩn mʋ Wɛ pɛ Zuda tiinə bam wanɩ-ba ba di. 17 Abɩa dɩ o nɔɔna bam ma yɔɔrɩ ba gʋ Yisɩrayɛlɩ tiinə bam zanzan. Yisɩrayɛlɩ jar-kərə balʋ na tɩgɩ tɩn yɩ mʋrrʋ biə-yanu (500,000) mʋ. 18 Kʋ dɛɛn nan yɩ Zuda dwi tiinə bam na kɩ ba cɩga dɩ Baŋa-Wɛ dɩm na yɩ ba nabaara bam Wɛ tɩn ŋwaanɩ mʋ ba wanɩ Yisɩrayɛlɩ tiinə bam ba di dɛ dɩm kʋntʋ nɩ.
19 Abɩa dɩ o nɔɔna bam ma zəli Zeroboam taan. Ba ma vrɩ tɩɩnɩ dɩdonnǝ o tee nɩ ba te. Tɩɩnɩ dɩm kʋntʋ nan yɩ Betɛlɩ, dɩ Yesana, dɩ Efrɔn, kʋ wǝli dɩ dɩ nawuurə yam maama. 20 Abɩa paarɩ dim maŋa kam maama wʋnɩ, Zeroboam daa wʋ joori o na dam. Baŋa-Wɛ ma waarɩ Zeroboam pa o tɩ.
21 Kʋ daarɩ, Abɩa dam dɩm kɩ dɩ wǝli da mʋ. O kaana dɛɛn yɩ fugə-bana mʋ. O bu-baara maa yɩ fiinle-bale, yɩ o bukwa yɩ fugə-bardʋ.
22 Abɩa dɛɛn na di paarɩ yɩ o kɩ wǝǝnu tɩlʋ maama na daarɩ tɩn, kʋlʋ maama o na kɩa, dɩ taana yalʋ o na taga tɩn, ba pʋpʋnɩ ba tiŋi Wɛ Nijoŋnu Ido mɩmaŋa yam tɔnɔ kʋm wʋnɩ.