Sisakɩ zaŋɩ najara dɩ Zeruzalɛm tiinə
12
Pɛ Robʋam dɛɛn joŋi dam mʋ yɩ o paarɩ dɩm kuri ja tɩga. Kʋ kwaga nɩ o dɩ o tɩʋ nɔɔna bam maama ma lɔ Baŋa-Wɛ niə yam kwaga nɩ.a 2 O paarɩ dim bɩna yanu maŋa nɩ mʋ Ezipi Pɛ Sisakɩ tu o zaŋɩ najara dɩ Zeruzalɛm tɩʋ kʋm, ba na vɩn Baŋa-Wɛ tɩn ŋwaanɩ.b 3 Sisakɩ dɛɛn zɩgɩ Ezipi nɩ o ja o jara-kǝm tərikooru mʋrʋ dɩ biə-yale (1,200), dɩ jar-kərə mʋrrʋ fusɩrdʋ (60,000) balʋ na dɔgɩ siseŋ-nɔɔna baŋa nɩ tɩn, dɩ jar-kərə balʋ na ve tɩga nɩ yɩ ba kɔgɔ warɩ kʋ ga kʋ ti tɩn o ba o zaŋɩ najara yam. Jar-kərə bam kʋntʋ badaara dɛɛn yɩ Libi tiinə, dɩ Suki tiinə, dɩ Kusi tiinə mʋ. 4 O dɩ o jar-kərə bam ma wanɩ Zuda tɩʋ tɩɩnɩ dɩlʋ maama na lɔgɩ dɩ pɩ tɩn ba di, yɩ ba laan vu ba yi Zeruzalɛm.5 Robʋam dɩ Zuda tɩʋ dɩdɛɛra bam ya ve Zeruzalɛm sɩ ba duri ba lu Sisakɩ jɩŋa nɩ mʋ. Wɛ nijoŋnu Semaya ma vu ba te yɩ o ta dɩ ba o wɩ: «Baŋa-Wɛ na tagɩ kʋlʋ tɩn mʋ tɩntʋ: Abam na nuŋi amʋ kwaga nɩ tɩn ŋwaanɩ mʋ amʋ dɩ nuŋi abam kwaga nɩ yɩ a kɩ abam Sisakɩ jɩŋa nɩ.»
6 Pɛ Robʋam dɩ o dɩdɛɛra bam ma tu ba tɩtɩ Wɛ yigə nɩ yɩ ba wɩ: «Baŋa-Wɛ sɩɩnɩ DƖ jɩgɩ cɩga dɩ kʋlʋ DƖ na kɩ tɩn.»c
7 Baŋa-Wɛ na nɛ ba na tu ba tɩtɩ te tɩn, DƖ daa ma pa DƖ kwǝrǝ yi Semaya DƖ wɩ: «Nɔɔna bam na tu ba tɩtɩ kʋntʋ tɩn, amʋ bá cɔgɩ-ba fasɩ. Kʋ na kɩ fɩɩn, a daa ta wʋ́ joŋi-ba. A bá tɔgɩ Sisakɩ baŋa nɩ a waarɩ Zeruzalɛm. 8 A nan wʋ́ pa cwǝŋǝ sɩ Sisakɩ ja-ba o kɩ o dam kuri nɩ. Kʋntʋ wʋ́ pa ba lwarɩ kɔɔ mʋ gara, nɩ ba na tʋŋɩ ba pa amʋ, naa ba na tʋŋɩ ba pa dwi-gɛ tiinə pwa bam mʋ.»
9 Ezipi tɩʋ Pɛ Sisakɩ ma sɩɩnɩ o zaŋɩ najara dɩ Zeruzalɛm. O ma vrɩ jɩjɩgɩrʋ tɩlʋ maama na wʋ Baŋa-Wɛ digə kam wʋnɩ tɩn, dɩ tɩlʋ maama na wʋ pɛ sɔŋɔ kʋm wʋnɩ tɩn, kʋ wǝli dɩ jara-kǝm cɩ-kwɛn sɩlʋ Solɔmɔn dɛɛn na mɛ səbu-sɩŋa o kɩ tɩn o ja o viiri. 10 Pɛ Robʋam ma kwe canna o ma o joori o kɩ cɩ-kwɛn sɩdonnǝ o zɩgɩ da. O ma kwe-sɩ o kɩ nɔn-babɛ sɩlʋ na yɩrɩ pɛ sɔŋɔ manchoŋo ni dɩm tɩn jɩŋa nɩ. 11 Maŋa kalʋ maama pɛ wʋm na wʋ́ vu Baŋa-Wɛ digə kam tɩn, nɔn-babɛ sɩm mʋ maŋɩ sɩ ba zɩŋɩ cɩ-kwɛn sɩm ba tɔgɩ o kwaga. Ba daa na ti, bantʋ ta mʋ wʋ́ zɩŋɩ-sɩ ba joori ba tiŋi pɛ sɔŋɔ yɩrɩna digə kam nɩ.
12 Robʋam na tu o tɩtɩ Baŋa-Wɛ yigə nɩ kʋntʋ tɩn, Baŋa-Wɛ ma dɩ DƖ banɩ na wʋnɩ, yɩ DƖ daa wʋ yɔɔrɩ DƖ cɔg-o fasɩ. Wǝǝnu dɛɛn nan kɩ lanyɩranɩ tɩ pa Zuda laŋa kam.
13 Robʋam dɛɛn ma fɔgɩ o jǝni Zeruzalɛm wʋnɩ o di paarɩ bɩna fugə-yarpɛ. O dɛɛn jɩgɩ bɩna fiinna-dɩdʋa mʋ yɩ o di paarɩ dɩm, yɩ o paarɩ dɩm ja dam lanyɩranɩ. Baŋa-Wɛ nan ya kuri Zeruzalɛm mʋ Yisɩrayɛlɩ dwiə yam maama wʋnɩ sɩ DƖ nɔɔna taa ve da ba zuli DƖ yɩrɩ dɩm. Robʋam nu dɛɛn yɩ Amɔn tiinə bukɔ Naama mʋ. 14 O dɛɛn nan tʋŋɩ lwarɩm kikiə, o na wʋ jaanɩ wʋbʋŋa sɩ o taa tɔgɩ Baŋa-Wɛ tɩn ŋwaanɩ.
15 Robʋam dɛɛn na di paarɩ yɩ o kɩ wǝǝnu tɩlʋ maama tɩn, kʋ zɩgɩ o paarɩ dɩm pulim nɩ sɩ kʋ yi dɩ na kweeli maŋa kalʋ tɩn, ba pʋpʋnɩ-tɩ ba tiŋi Wɛ nijoŋnu Semaya tɔnɔ kʋm wʋnɩ, dɩ Yi-narʋ Ido vɩɩra yam tɔnɔ kʋm wʋnɩ. O kwə nakwa yɩra natɔga dɩ pʋpʋnɩ ya tiŋi da. Maŋa kam kʋntʋ maama nɩ tigurə dɛɛn mʋ tigi Pɛ Robʋam dɩ Pɛ Zeroboam tɩtarɩ nɩ. 16 Robʋam ma tɩ yɩ o vu o kwə te. Ba ma kwe‑o ba kɩ o kwə bam yibeeli nɩ Davidi tɩʋ Zeruzalɛm nɩ. O tʋʋnɩ dɩm kwaga nɩ o bu Abɩa ma ləri o yuu nɩ o ji pɛ.