11
Robʋam na yi Zeruzalɛm tɩn mʋ o bəŋi Zuda dɩ Bɛnzamɛn dwiə yam nɔɔna balʋ na ye najara kǝm lanyɩranɩ tɩn. Ba dɛɛn yɩ jar-kərə mʋrrʋ bi dɩ funɔnɔ (180,000) mʋ. O ma ja wʋbʋŋa sɩ o zaŋɩ najara dɩ Yisɩrayɛlɩ dwi tiinə badaara bam, sɩ o wanɩ o pa ba maama joori ba kɩ daanɩ sɩ o taa te-ba.2 Baŋa-Wɛ ma pa DƖ tɩntʋŋnʋ Semaya ni yɩ DƖ wɩ:3 «Nan pa amʋ taanɩ dɩntʋ yi Zuda tɩʋ Pɛ Solɔmɔn bu Robʋam, dɩ Yisɩrayɛlɩ tiinə balʋ na nuŋi Zuda dɩ Bɛnzamɛn dwiə yam wʋnɩ tɩn nɩ:4 ‹Baŋa-Wɛ kwǝrǝ mʋ tɩntʋ: Yɩ zaŋɩ-na á kɩ najara dɩ á cʋrrʋ. Á maama ve-na sɔŋɔ, sɩ amʋ mʋ pɛ kʋntʋ maama kɩ.› »a Ba maama ma sɛ Baŋa-Wɛ ni dɩm yɩ ba joori ba sam. Ba daa wʋ zaŋɩ najara dɩ Zeroboam nɔɔna bam.
Robʋam na lɔgɩ tɩɩnɩ dɩlʋ o pɩ tɩn
5 Robʋam dɛɛn ma maŋɩ Zeruzalɛm nɩ o zʋʋra, yɩ o daarɩ o pa ba cɩ Zuda tɩɩnɩ dɩdonnǝ ba kaagɩ dɩ kabri. 6 Dɩ nan yɩ: Betelɩhɛm, dɩ Etam, dɩ Tekoa, 7 dɩ Bɛt-Zura, dɩ Soko, dɩ Adulamɩ, 8 dɩ Gatɩ, dɩ Maresa, dɩ Zifi 9 dɩ Adorayim, dɩ Lakisi, dɩ Azeka, 10 dɩ Zʋra, dɩ Ayalɔn, dɩ Ebrɔn. Tɩɩnɩ dɩm kʋntʋ maama mʋ o dɛɛn pɛ dɩ ji dalɩm je Zuda dɩ Bɛnzamɛn tɩɩnɩ yam wʋnɩ. 11 O dɛɛn maa ta fɔgɩ o lɔ kabri, o ma o cɩ o kaagɩ tɩɩnɩ dɩm kʋntʋ, yɩ o tiŋi dɩdɛɛra dɩ maama wʋnɩ. O ta ma lɛɛrɩ o pa tɩɩnɩ dɩm kʋntʋ wʋʋ su dɩ wʋdiiru, dɩ nugə, dɩ sana. 12 O ta ma yagɩ jara-kǝm cɩ-kwɛn dɩ cicwə tɩɩnɩ dɩm kʋntʋ wʋnɩ sɩ kʋ pa dɩ taa dana.
Kʋntʋ baŋa nɩ Robʋam dɛɛn di paarɩ Zuda dɩ Bɛnzamɛn dwiə yam baŋa nɩ. 13 Wɛ kaanɩm tiinə bam dɩ Levi dwi tiinə bam na zʋʋrɩ Yisɩrayɛlɩ laŋa kam je sɩlʋ maama nɩ tɩn dɩ ma sɛ ba pa‑o. 14 Levi tiinə bam ma varɩgɩ ba yagɩ ba tɩ sɩm, dɩ ba sam ba ya na zʋʋrɩ tɩɩnɩ dɩlʋ maama nɩ tɩn, yɩ ba vu ba zʋʋrɩ Zuda provɛnsɩ dɩm dɩ Zeruzalɛm tɩʋ kʋm nɩ. Ba nan kɩ kʋntʋ bɛŋwaanɩ Pɛ Zeroboam dɩ o kwaga kam ya lɩ-ba Baŋa-Wɛ kaanɩm tɩtʋŋɩ dɩm nɩ mʋ. 15 O laan ma kuri o tɩtɩ kaanɩm tiinə sɩ ba taa kɩ kaanɩm wara-je sɩm bimbinə yam baŋa nɩ ba pa jwǝnǝ yalʋ o na kɩ o zɩgɩ yɩ ya yɩ bʋnɩ dɩ naanɩ nyɩnyʋrʋ tɩn.b 16 Nɔɔna balʋ na nuŋi Yisɩrayɛlɩ dwi dɩlʋ maama wʋnɩ yɩ ba wʋbʋŋa ja sɩ ba yɔɔrɩ ba taa zuli Baŋa-Wɛ dɩm na yɩ Yisɩrayɛlɩ tiinə Wɛ tɩn dɛɛn ma tɔgɩ dɩ Levi tiinə bam ba vu Zeruzalɛm sɩ ba taa kɩ kaanɩm dáanɩ ba paɩ Baŋa-Wɛ na yɩ ba nabaara bam Wɛ tɩn. 17 Kʋntʋ ma pa Zuda paarɩ dɩm kuri ja tɩga. Bɩna yatɔ wʋnɩ mʋ ba dɛɛn yɔɔrɩ ba sɛ ba pa Solɔmɔn bu Robʋam. Bɩna yatɔ yam kʋntʋ wʋnɩ ba tɔgɩ Davidi dɩ Solɔmɔn niə yam na brɩ te tɩn mʋ.
Robʋam digə tiinə taanɩ
18 Robʋam nan ya di Mahalatɩ mʋ o ma o kɩ o kaanɩ. Wʋntʋ dɛɛn yɩ Davidi bu Yerimoti bukɔ mʋ. O nu yɩrɩ maa yɩ Abihali na yɩ Zese bu Eliabɩ bukɔ tɩn. 19 Mahalatɩ ma lʋ bəkəri sɩtɔ o pa Robʋam. Ba yɩra maa yɩ Yewuki, dɩ Semari, dɩ Zaham. 20 Pɛ wʋm daa ma di Absalɔn bukɔ Maaka yɩ ba lʋ Abɩa, dɩ Atayi, dɩ Ziza, dɩ Selomiti. 21 Robʋam dɛɛn nan yɔɔrɩ o soe Absalɔn bukɔ Maaka mʋ o dwe o kaana bam dɩ o ka-bi sɩm maama. O dɛɛn jɩgɩ kaana fugə-nana mʋ, dɩ ka-bi fusɩrdʋ. O bu-baara dɛɛn yɩ fiinle-nana mʋ, yɩ o bukwa yɩ fusɩrdʋ.
22 Robʋam dɛɛn nan kuri Maaka bu Abɩa mʋ sɩ o taa wʋ o biə bam maama yigə nɩ, Bɛŋwaanɩ, o wʋbʋŋa jaanɩ sɩ wʋntʋ mʋ ba o ləri o yuu nɩ o ji pɛ. 23 O dɛɛn tɔgɩ swan baŋa nɩ mʋ o lɩ o bu-baara bam wʋnɩ o pa ba jagɩ ba vu Zuda dɩ Bɛnzamɛn tɩɩnɩ yam maama, sɩ ba taa zʋʋrɩ tɩɩnɩ dɩlʋ na lɔgɩ dɩ pɩ tɩn wʋnɩ. O ma la wʋdiiru zanzan o pa-ba, yɩ o daarɩ o beeri bukwa zanzan sɩ ba di-ba ba ma ba kɩ ba kaana.