Yisɩrayɛlɩ tiinə vɩn Robʋam
10
Robʋam dɛɛn ma vu Sishɛm, Yisɩrayɛlɩ tiinə bam maama na jeeri da sɩ ba tiŋ‑o pɛ tɩn ŋwaanɩ. 2 Nebatɩ bu Zeroboam dɛɛn ya duri o vu Ezipi mʋ sɩ o lu Pɛ Solɔmɔn jɩŋa nɩ. O maa na ni Solɔmɔn tʋʋnɩ ŋwa kʋntʋ tɩn, o ma joori sɔŋɔ.a 3 Ba ma tʋŋɩ ba bəŋi Zeroboam sɩ o tɔgɩ dɩ Yisɩrayɛlɩ kɔgɔ kʋm maama sɩ ba vu Robʋam te. Ba ma ta dɩd-o ba wɩ: 4 «Nmʋ ko Solɔmɔn dɛɛn tiini o yaarɩ dɩbam dɩ tɩtʋŋ-cɛɛra. Kʋntʋ tɩn, nan kwaanɩ sɩ n pa kʋ taa bwǝnǝ kʋ pa dɩbam, sɩ dɩ́ wanɩ dɩ́ sin dɩ́ yaara yam wʋnɩ. N na kɩ kʋntʋ, dɩ́ wʋ́ sɛ dɩ́ pa‑m.» 5 Robʋam ma lǝri-ba o wɩ: «Nan ve-na sɩ da yatɔ kwaga nɩ sɩ á laan joori á ba sɩ dɩ́ nii.» Nɔɔna bam ma viiri. 6 Pɛ Robʋam ma bwɛ taanɩ dɩm dɩ nɔn-kwɩn sɩlʋ dɛɛn ya na yɩ o ko Solɔmɔn nakwa tɩn. O ma bwe-ba o wɩ: «Bɛ wʋbʋŋa mʋ abam jɩga sɩ á ma á wǝli-nɩ sɩ a ləri a pa nɔɔna bantʋ?» 7 Nakwa bam ma ləri ba wɩ: «Nmʋ na tu n tɩtɩ sɩ n sɛ nɔɔna bam zɩm na loori‑m kʋlʋ tɩn, yɩ n duri ba yibwənə, ba laan wʋ́ sɛ ba pa‑m.»8 Robʋam ma vɩn nɔn-kwɩn sɩm bʋbʋŋɩ dɩm yɩ o daarɩ o vu o banɩ dɩ nɔn-dʋnnʋ tɩlʋ na yɩ o yuudonnə pa ba wʋ o tee nɩ tɩn. 9 O ma bwe-ba o wɩ: «Nɔɔna bantʋ na wɩ a ko wʋm na yaarɩ-ba zanzan tɩn, a laan pa ba sin dɩ ba yaara yam tɩn, bɛ wʋbʋŋa mʋ abam jɩga sɩ á ma á wǝli-nɩ sɩ a ma a ləri a pa-ba?»
10 Nɔn-dʋnnʋ tɩm na yɩ o yuudonnə tɩn ma ləri ba wɩ: «Kʋ na yɩ balʋ na loori‑m kʋntʋ tɩn, ta n brɩ-ba n wɩ: ‹Amʋ nʋa kam tɩtɩ kulimə ka dwe a ko wʋm təŋə! 11 A ko kǝm dɛɛn sɩɩnɩ kʋ cana á baŋa nɩ. Kʋ nan na yɩ amʋ, kʋʋ́ dwǝni dáanɩ. A ko wʋm dɛɛn mɛ fɩna mʋ o frɩ abam. Amʋ nan laga a kwe fɩna sɩlʋ niə na cana nɩ nɔŋɔ dʋnɩm tɩn mʋ a ma a magɩ abam.› »
12 Da yatɔ yam dɛ dɩm nɩ mʋ Zeroboam dɩ nɔɔna bam maama daa joori ba vu Pɛ Robʋam te, nɩ o na maŋɩ o ta o tiŋi te tɩn. 13 Ba na tu tɩn, Pɛ Robʋam ma zagɩ-ba dɩ ni-cɛɛrɩ, o na dʋlɩ nɔn-kwɩn sɩm taanɩ dɩm o yagɩ tɩn ŋwaanɩ. 14 O nan yɔɔrɩ o kɩ o tɔgɩ nɔn-dʋnnʋ tɩm wʋbʋŋa yam mʋ. O ma ta o wɩ: «A ko kǝm dɛɛn sɩɩnɩ kʋ cana á baŋa nɩ. Kʋ nan na yɩ amʋ, kʋʋ́ dwǝni dáanɩ. A ko wʋm dɛɛn mɛ fɩna mʋ o frɩ abam. Amʋ nan lagɩ a kwe fɩna sɩlʋ niə na cana nɩ nɔŋɔ dʋnɩm tɩn mʋ a ma a magɩ abam.» 15 Pɛ Robʋam na wʋ sɛ nɔɔna bam taanɩ dɩm tɩn dɛɛn tɔgɩ Wɛ wʋbʋŋa na jaanɩ te tɩn mʋ. Kʋ pɛ Baŋa-Wɛ na dɛ DƖ nijoŋnu Ahiya baŋa DƖ ta te dɩ Nebatɩ bu Zeroboam tɩn mʋ sɩɩnɩ kʋ kɩ. 16 Yisɩrayɛlɩ tiinə bam maama na maanɩ nɩ pɛ wʋm vɩn sɩ o kɩ o tɔgɩ ba wʋbʋŋa yam tɩn, ba ma cɛ sɔɔ yɩ ba lǝr-o ba wɩ: «Yisɩrayɛlɩ tiinə bam, dɩbam dɩdaanɩ Zese bu Davidi daɩ daanɩ. Dɩ́ yigə tǝrǝ o dwi dɩm paarɩ wʋnɩ! Pa-na dɩ́ maama joori-na sam. Davidi dwi tu, tan nii n tɩtɩ sɔ-yuu kʋm baŋa nɩ!» Ba maama ma sɩɩnɩ ba joori ba sam.b 17 Kʋ nan na yɩ Yisɩrayɛlɩ dwi tiinə balʋ na zʋʋrɩ Zuda tɩɩnɩ dɩm nɩ tɩn yɩranɩ, Pɛ Robʋam dɛɛn ta mʋ di paarɩ ba baŋa nɩ.
18 Pɛ Robʋam ma tʋŋɩ Adoram wʋlʋ na nii tɩtʋŋ-cɛɛra yam baŋa nɩ tɩn sɩ o vu Yisɩrayɛlɩ dwiə yalʋ na wʋ jazɩm baŋa seeni tɩn te. O na yi da tɩn, nɔɔna bam ma dʋl-o dɩ kandwa ba gʋ. Kʋntʋ baŋa nɩ Pɛ Robʋam ma faŋɩ o lə o təriko o duri o lu o vu Zeruzalɛm. 19 Dɩ zɩm maama Yisɩrayɛlɩ dwi tiinə na wʋ jazɩm baŋa seeni tɩn vɩn mʋ sɩ Davidi dwi dɩm taa di paarɩ ba baŋa nɩ.