Seba pa-kana wʋm taanɩ
9
Seba tɩʋ pa-kana wʋm dɛɛn ni Pɛ Solɔmɔn yɩrɩ na zaŋɩ je maama nɩ te tɩn. O ma zaŋɩ o vu Zeruzalɛm sɩ o maŋ-o dɩ bwiə yalʋ na dana tɩn o nii. O dɛɛn pɛ o tɩntʋŋna zanzan tɔgɩ dɩd-o ba vu, dɩdaanɩ yogondə yalʋ na zɩŋɩ wo-talooru dwi dwi, dɩ səbu-sɩŋa, dɩ kandwa-ŋʋna zanzan tɩn. O na yi Solɔmɔn te tɩn mʋ o bwe‑o bwiə yalʋ maama o wʋbʋŋa na jaanɩ sɩ o bwe tɩn. 2 Solɔmɔn dɩ ma ləri o bwiə yam maama. Ya na maŋɩ ya cana te dɩ, o wanɩ o ləri ya maama. 3 Seba tɩʋ pa-kana wʋm ma maanɩ Solɔmɔn swan yam na yɩ te tɩn. O ta ma na pɛ sɔŋɔ kʋlʋ o na lɔgɩ tɩn, 4 dɩ wʋdiiru tɩlʋ o na yǝni o di tɩn, dɩ o na kwɛ o tɩntʋŋna bam jǝŋǝ je te, dɩ balʋ na zɩŋɩ o wʋdiu dɩ wo-nyɔɔrʋ ba pa‑o tɩn na zʋ gwar-ŋʋnnʋ tɩlʋ tɩn, dɩdaanɩ pɛɛra yalʋ o na yǝni o zwɛ o ma o kɩ kaanɩm Baŋa-Wɛ digə kam nɩ tɩn. O na maanɩ tɩntʋ maama tɩn, kʋ ma pa o ni yɛ.5 O ma ta dɩ pɛ wʋm o wɩ: «A ta na wʋ a tɩtɩ tɩʋ nɩ yɩ a ni n ni-taanɩ dɩ n swan yam taanɩ tɩn maama sɩɩnɩ kʋ yɩ cɩga mʋ. 6 Kʋ na daɩ amʋ tɩtɩ mʋ na tu a na tɩntʋ maama, a yaá ta wɩ: kʋ yɩ vwan mʋ. A nan na ni wǝǝnu tɩlʋ tɩn wʋ yi te maama a yi dɩntʋ zɩm na nɛ tɩn cicoro. Nmʋ swan yam daga ya dwe ba na taga te ba brɩ-nɩ tɩn. 7 Nmʋ nɔɔna bam dɩ n tɩntʋŋna bam tiini ba jɩgɩ yu-yoŋo, ba na wʋ n tee nɩ dɛ maama ba cəgi nmʋ swan taana yam tɩn ŋwaanɩ. 8 N Tu Baŋa-Wɛ dɩm maŋɩ dɩ tiə, dɩ DƖ wʋʋ na dɛ nmʋ yɩ DƖ kuri‑m sɩ n di paarɩ DƖ yɩrɩ dɩm ŋwaanɩ tɩn. Baŋa-Wɛ na soe Yisɩrayɛlɩ dwi tiinə bam yɩ DƖ pa ba jǝni taan wuu tɩn ŋwaanɩ mʋ DƖ kuri‑m sɩ n ji ba pɛ, sɩ n daarɩ n tɔgɩ cwǝŋǝ n tan bʋra cɩga bʋra n pa-ba.»
9 Pa-kana wʋm dɛɛn ma kwe səbu-sɩŋa na dwe kilo mʋrrʋ tɩna (4,000) tɩn o pa Solɔmɔn, kʋ wǝli dɩ wo-talooru, dɩ kandwa-ŋʋna zanzan. Wo-talooru nan tǝrǝ sɩ na jɩgɩ kuri sɩ yi sɩlʋ Seba pa-kana wʋm na kwe o pa Pɛ Solɔmɔn tɩn.
10 Pɛ Hiramɩ tɩntʋŋna dɩ Pɛ Solɔmɔn tɩntʋŋna dɛɛn na zɩgɩ Ofiiri nɩ ba ja səbu-sɩŋa ba ba ba pa Pɛ Solɔmɔn tɩn, ba ta jaanɩ da-ŋʋnnʋa, dɩ kandwa-ŋʋna na nuŋi da tɩn mʋ ba ba ba pa‑o. 11 Pɛ wʋm ma kwe dɛ sɩm o ma kɩ natən-yiəb sɩ ya taa wʋ Wɛ-digə kam nɩ dɩ pɛ sɔŋɔ kʋm nɩ. O ma daarɩ o ma dɛ sɩm o kɩ kwaanʋ dwi dwi o pa balʋ na leeni tɩn. Tɩ tiini tɩ lana tɩ dwe tɩlʋ maama nɔɔna na maŋɩ ba na Zuda tɩʋ nɩ tɩn.
12 Pɛ Solɔmɔn dɛɛn kwe kʋlʋ maama Seba pa-kana wʋm na laga tɩn o pa‑o mʋ. Pa-kana wʋm na loori kʋlʋ maama o tee nɩ tɩn mʋ o pɛ‑o, pa kʋ dwǝni pɛɛra yalʋ pa-kana wʋm na jaanɩ o ba o pa‑o tɩn. Pa-kana wʋm dɩ o kwaga kam laan ma joori ba tɩʋ.
Solɔmɔn yɩrɩ na zaŋɩ te tɩn
13 Bɩnɩ maama wʋnɩ Solɔmɔn dɛɛn yǝni o joŋi səbu-sɩŋa kilo mʋrrʋ fiinle-tɩtɔ (23,000) mʋ, 14 kʋ wǝli dɩ lampoo kʋlʋ o na joŋi vələ, dɩ pipimpiinə tee nɩ tɩn. Arabɩ pwa bam maama, dɩ Yisɩrayɛlɩ tɩʋ tɩɩnɩ yigǝ tiinǝ bam dɩ dɛɛn yǝni ba ja səbu-sɩŋa dɩ səbu-poŋo ba ba ba pa‑o.
15 Pɛ Solɔmɔn dɛɛn kwe səbu-sɩŋa o ma kɩ najara nantan-kamunə biə-yale (200) mʋ. O dɛɛn kwe səbu-sɩŋa na yi kilo sɩrpɛ tɩn mʋ o ma turi sɩ dɩdʋa dɩdʋa. 16 O ta ma kɩ nantan-balwa biə-yatɔ (300), yɩ o kwe səbu-sɩŋa na maŋɩ dɩ kilo sɩtɔ (3) tɩn o ma turi sɩ dɩdʋa dɩdʋa. O ma kwe-sɩ o kɩ digə kalʋ ba na bǝi nɩ ‹Liban Kagʋa› tɩn wʋnɩ.
17 Pɛ wʋm ta ma pa ba kwe tuu yələ ba ma kɩ paarɩ yituŋ-kamunu ba pa‑o. Ba ma daarɩ ba ma səbu-sɩŋa kalʋ na yɩ lanyɩranɩ tɩn ba turi kʋ yɩra. 18 Natəm dɩlʋ na jɩgɩ na-baara yardʋ tɩn mʋ diini dɩ yi paarɩ jangɔŋɔ kʋm. Kʋ maa jɩgɩ səbu-sɩŋa yituŋ-balaŋa sɩ pɛ wʋm wanɩ o cwi o nɛ da. Kʋ jɩn sɩle sɩm maama maa jɩgɩ nyoŋo nyɩnyʋgʋ sɩ tikəri nɩ. 19 Natəm dɩm na-baarɩ maama dɩ maa jɩgɩ nyoŋo nyɩnyʋrʋ tɩle dɩ baŋa nɩ, jazɩm dɩ jagwiə seeni, sɩ kʋ kɩ nyoŋo nyɩnyʋrʋ fugǝ-tɩle. Lʋgʋ baŋa tɩɩnɩ maama nɩ paarɩ jangɔŋɔ tǝrǝ kʋ na nyɩ dɩ Pɛ Solɔmɔn nyɩm kʋm. 20 Kʋ na yɩ Pɛ Solɔmɔn na-zwɩ sɩm maama, kʋ wǝli dɩ o zɩla yalʋ maama na wʋ ‹Liban Kagʋa› digə kam nɩ tɩn, ba mɛ səbu-sɩŋa mʋ ba kɩ tɩ maama. Ba wʋ mɛ səbu-poŋo ba kɩ tɩ kʋlʋkʋlʋ, tɩ na ba jɩgɩ yuu Solɔmɔn paarɩ maŋa kam nɩ tɩn ŋwaanɩ. 21 Pɛ wʋm dɛɛn jɩgɩ nabor-kamunnu zanzan Pɛ Hiramɩ tɩntʋŋna na yuŋi yɩ tɩ beeri pipiu ŋwaanɩ tɩn. Bɩna yatɔ maama wʋnɩ o nabwǝǝru tɩm wʋ́ zɩŋɩ səbu-sɩŋa, dɩ səbu-poŋo, dɩ tuu yələ, dɩ kalwə, dɩ zunə dwi dwi mʋ tɩ ba tɩ pa‑o.
22 Pɛ Solɔmɔn dɛɛn mʋ yɩ nadum dɩ swan tu o dwe pwa maama lʋgʋ baŋa nɩ. 23 Lʋgʋ baŋa tɩɩnɩ maama pwa maa soe sɩ ba taa tui o te ba cəgi yi-pʋrʋ taanɩ dɩlʋ Baŋa-Wɛ na pɛ‑o tɩn. 24 Ba nan na yǝni ba tui, ba dɩdʋa dɩdʋa wʋ́ ja pɛɛra mʋ o ba o pa Solɔmɔn. Bɩnɩ maama wʋnɩ ba dɛɛn jaanɩ səbu-poŋo wǝǝnu, dɩ səbu-sɩŋa wǝǝnu, dɩ gwaarʋ, dɩ tralɩ nugəc, dɩ wǝǝnu tɩlʋ lwǝm na ywǝmmǝ tɩn dwi dwi, dɩ siseŋ-nɔɔna, dɩ bɩna-sise ba tui ba pa‑o.
25 Solɔmɔn dɛɛn cɩgɩ najɩrɩ mʋrrʋ tɩna (4,000) mʋ o zɩgɩ sɩ o sise sɩlʋ na vaŋɩ jara-kǝm tərikooru tɩn taa zɩgɩ da. O ta maa jɩgɩ siseŋ-nɔɔna mʋrrʋ fugǝ-tɩle (12,000). O dɛɛn pɔɔrɩ sɩ sɩdonnǝ o yagɩ tɩɩnɩ dɩlʋ o na kuri sɩ ŋwaanɩ tɩn nɩ. Sɩ sɩdaara maa wʋ Zeruzalɛm nɩ mɛ o na zʋʋrɩ tɩn. 26 O dɛɛn maa jɩgɩ dam o di tɩɩnɩ dɩlʋ na wʋ Efratɩ bugə kam seeni tɩn, sɩ kʋ kɛ kʋ yi Filisi tiinə laŋa kam, dɩdaanɩ Ezipi sisəm dɩm maama. 27 O paarɩ dim maŋa nɩ, səbu-poŋo tiini tɩ daga Zeruzalɛm nɩ, nɩ kandwa mʋ te. Sɛdrɩ da-ŋʋnnʋ dɩ maa ba jɩgɩ zʋrɩ nɩnɛɛnɩ kapʋrrʋ na daga te wa-zʋʋrɩ seeni bwəəlu tɩm nɩ tɩn. 28 Solɔmɔn dɛɛn ma pa o nɔɔna ve Ezipi dɩdaanɩ tɩɩnɩ maama sɩ ba taa yəgi siseŋ-nɔɔna ba jaanɩ ba tui ba pa‑o.d
Solɔmɔn tʋʋnɩ
29 Solɔmɔn dɛɛn na di paarɩ yɩ o kɩ wǝǝnu tɩlʋ maama tɩn, kʋ zɩgɩ o paarɩ dɩm pulim nɩ sɩ kʋ yi dɩ na kweeli maŋa kalʋ tɩn, ba pʋpʋnɩ-tɩ ba tiŋi Wɛ nijoŋnu Natan tɔnɔ kʋm wʋnɩ, dɩ Siloo tu Ahiya na ŋɔɔnɩ wǝǝnu tɩlʋ tɩn tɔnɔ kʋm wʋnɩ, dɩdaanɩ Yi-narʋ Ido vɩɩra yam tɔnɔ kʋm wʋnɩ. Vɩɩra yalʋ o dɛɛn na nɛ sɩ kʋ vu Nebatɩ bu Zeroboam seeni tɩn mʋ kʋntʋ. 30 Solɔmɔn jǝni Zeruzalɛm nɩ o di paarɩ Yisɩrayɛlɩ tɩʋ maama nɩ o kɩ bɩna fiinna mʋ. 31 O laan ma tɩ yɩ o vu o kwə te. Ba ma kwe‑o ba kɩ o ko Davidi tɩʋ Zeruzalɛm nɩ. O bu Robʋam ma ləri o yuu nɩ o di paarɩ.