Solɔmɔn tɩtʋŋa yadonnə
8
Pɛ Solɔmɔn dɛɛn kwe bɩna fiinle mʋ o ma o lɔ Baŋa-Wɛ digə kam dɩ o tɩtɩ sɔŋɔ kʋm maama. 2 Solɔmɔn ma pa ba joori ba fɔgɩ ba lɔ tɩɩnɩ dɩlʋ Hiramɩ na kwe o pa‑o tɩn, yɩ o daarɩ o pa Yisɩrayɛlɩ tiinə bam vu ba zʋʋrɩ dɩ wʋnɩ. 3 Solɔmɔn ma vu o jeeri Hamatɩ-Zoba tɩʋ dɩ najara, yɩ o wanɩ-kʋ o di. 4 O ta ma pa ba fɔgɩ ba lɔ Tademorɩ ba zɩgɩ kagʋa kam nɩ, dɩ tɩɩnɩ dɩdonnǝ na wʋ Hamatɩ tɩʋ dɩm wʋnɩ, yɩ o lɔ-dɩ sɩ ba taa tiŋi zɩla dɩ wʋnɩ tɩn. 5 O daa ta pɛ ba fɔgɩ ba lɔ Bɛte-Horon tɩʋ kʋm na wʋ jazɩm baŋa seeni tɩn, dɩ Bɛte-Horon tɩʋ kʋm na wʋ kuri seeni tɩn mʋ o pɩ o zɩgɩ dɩ dam. Dɩ maa jɩgɩ kabri-lilirru, yɩ dɩ ni-bwəəru tɩm maa jɩgɩ luuru. 6 O ta ma fɔgɩ o lɔ Baalatɩ, dɩ tɩɩnɩ dɩlʋ o na wʋ́ taa tiŋi zɩla dwi dwi, dɩ jara-kǝm tərikooru, dɩ siseŋ-nɔɔna da tɩn. O ta pɛ ba lɔ o wʋbʋŋa na jaanɩ kʋlʋ maama sɩ o lɔ tɩn mʋ Zeruzalɛm nɩ, dɩ Liban nɩ, dɩ je sɩlʋ maama o na di paarɩ da tɩn.7-8 Solɔmɔn na fɩn nɔɔna balʋ sɩ ba taa tʋŋɩ tɩtʋŋ-dɛɛra tɩn dɛɛn yɩ Hɛtɩ tiinə, dɩ Amɔɔrɩ tiinə, dɩ Perezi tiinə, dɩ Hevi tiinə, dɩ Yebusi tiinə mʋ. Bantʋ daɩ Yisɩrayɛlɩ dwi tiinə yɩ ba badaara ta zʋʋrɩ Yisɩrayɛlɩ tɩga kam nɩ. Ba maa yɩ dwiə yalʋ Yisɩrayɛlɩ tiinə bam ya na wʋ yɔɔrɩ ba cɔgɩ tɩn biə mʋ. Ba ta yɩ gambɛ mʋ dɩ zɩm maama. 9 Kʋ nan na yɩ Yisɩrayɛlɩ tiinə bam tɩtɩ, Solɔmɔn dɛɛn wʋ pɛ bantʋ ji o gambɛ sɩ ba taa tʋŋɩ tɩtʋŋ-dɛɛra ba pa‑o. O nan pɛ ba ji o jar-kərə, dɩ ba dɩdɛɛra, dɩ o jara-kǝm tərikooru diinǝ, dɩdaanɩ o sise diinə yigǝ tiinǝ mʋ. 10 Dɩdɛɛra balʋ na nii tɩntʋŋna bam baŋa nɩ ba pa Solɔmɔn tɩn dɛɛn yɩ nɔɔna biə-yale dɩ fiinnu (250) mʋ.
11 Pɛ Solɔmɔn dɛɛn ma pa o kaanɩ wʋlʋ na yɩ Ezipi Pa-farʋ wʋm bukɔ tɩn zɩgɩ Davidi tɩʋ kʋm nɩ o vu sɔŋɔ kʋlʋ o na lɔgɩ o pa‑o tɩn. O nan tagɩ o wɩ: «Kʋ na yɩ Yisɩrayɛlɩ tɩʋ pɛ Davidi sɔŋɔ kʋm, kʋ wʋ maŋɩ sɩ a kaanɩ taa zʋʋrɩ kʋ wʋnɩ, kʋ na yɩ lanyɩranɩ fasɩ tɩn ŋwaanɩ. Bɛŋwaanɩ, jǝgǝ kalʋ maama Baŋa-Wɛ ni-gonim daka kam ya na zɩgɩ ka wʋnɩ tɩn yɩ lanyɩranɩ fasɩ mʋ.»
12 Solɔmɔn laan ma zwɛ vara kaanɩm bimbim dɩlʋ o na lɔga o zɩgɩ Wɛ-digə napɔrɔ kʋm yigə nɩ tɩn baŋa nɩ o kɩ kaanɩm o pa Baŋa-Wɛ. 13 O dɛɛn kɩ dɛ wʋnɩ kaanɩm dɩlʋ na maŋɩ dɩ Moyisi niə yam na brɩ te tɩn mʋ, nɩ kʋ na yɩ Wɛ siun da yam, dɩ can-dʋŋa candi sɩm, kʋ ta wǝli dɩ bɩnɩ bɩnɩ candi yatɔ yam. Candi sɩntʋ maa yɩ Dɩpɛ dɩlʋ na ba jɩgɩ dabɩlɩ dɩ wʋnɩ tɩn candiə kam,a dɩ Faa wo-vallʋ candiə kam, dɩ Vwə cwiim candiə kam.b 14 Solɔmɔn dɛɛn yɔɔrɩ o kɩ o tɔgɩ o ko Davidi kwiə yam mʋ, yɩ o kuri Wɛ kaanɩm tiinə bam pʋpwara dɩ pʋpwara sɩ ba taa tʋŋɩ ba tɩtʋŋa. O ta ma pɔɔrɩ Levi tiinə bam dɩ sɩ ba taa leeni ba zuli Baŋa-Wɛ, yɩ ba tʋŋɩ ba wǝli Wɛ kaanɩm tiini bam, nɩ kʋ na maŋɩ dɩ dɛ maama wʋnɩ tɩtʋŋa te tɩn. O ma kuri Wɛ wara-je sɩm ni-yɩrɩna bam pʋpwara dɩ pʋpwara, sɩ ba taa yɩrɩ manco-pɩɩna yam maama. Wɛ tɩntʋŋnʋ Davidi dɛɛn nan maŋɩ o pa ni sɩ ba kɩ kʋntʋ mʋ.c 15 Davidi dɛɛn na pɛ ni dɩlʋ maama kaanɩm tiinə bam, dɩ Levi dwi tiinə bam tɩtʋŋa yam ŋwaanɩ tɩn mʋ, ba yɔɔrɩ ba kɩ ba tɔgɩ-dɩ, nɩ kʋ na yɩ lʋnnɩ zɩla tiŋim di sɩm tɩtʋŋa yam dɩ.
16 Solɔmɔn na pɛ ni sɩ ba tʋŋɩ tɩtʋŋa yalʋ tɩn maama dɛɛn kɩ ya ti mʋ, kʋ na zɩgɩ dɛ dɩlʋ ba na cwi Baŋa-Wɛ digə kam candi tɩn, sɩ kʋ vu kʋ yi dɛ dɩlʋ ba na lɔgɩ-ka ba ti tɩn. Baŋa-Wɛ digə kam maama lɔgɩ ka zɩgɩ ka ti mʋ kʋntʋ.
17 Pɛ Solɔmɔn dɛɛn ma vu Ezion-Ebɛrɩ dɩ Eyilatɩ. Tɩɩnɩ dɩm kʋntʋ maa wʋ Edɔm laŋa kam nɩ, yɩ dɩ wʋ nɩnɩʋ kʋm ni nɩ. 18 Pɛ Hiramɩ ma tʋŋɩ nabor-kamunnu o pa Solɔmɔn. Hiramɩ nɔɔna balʋ na ye nabwǝǝru yuŋim tɩn dɛɛn mʋ nii tɩ baŋa nɩ. Bantʋ ma gwaanɩ dɩ Solɔmɔn nɔɔna bam ba yuŋi nabwǝǝru tɩm ba vu ba yi Ofiiri pa ba na səbu-sɩŋa zanzan dáanɩ. Ba ma ja səbu-sɩŋa kilo mʋrrʋ fugə-tɩnu (15,000) ba joori ba vu ba pa Pɛ Solɔmɔn.