5
Kʋ dɛɛn dɛ kʋntʋ mʋ yɩ Solɔmɔn pa ba tʋŋɩ Baŋa-Wɛ digə kam tɩtʋŋa maama ba ti. O laan ma ja wǝǝnu tɩlʋ maama o ko Davidi dɛɛn na pɔɔrɩ o zɩgɩ Wɛ ŋwaanɩ tɩn o ja o zʋ ka wʋ. Kʋ maa yɩ səbu-poŋo dɩ səbu-sɩŋa wǝǝnu tɩm dɩ digə kam wʋʋ zɩla yam maama mʋ o kwe o zɩgɩ Wɛ-digə kam lʋnnɩ tiŋim je sɩm nɩ.
Wɛ ni-gonim daka kam
2 Solɔmɔn dɛɛn pɛ ni mʋ yi Yisɩrayɛlɩ dwi tiinə nakwa bam maama sɩ ba ba Zeruzalɛm. Kʋ yɩ ba pwa bam dɩ ba sɔ-yuni tɩm yigǝ tiinǝ bam maama mʋ kʋntʋ. O dɛɛn bǝŋi-ba sɩ ba kɩ daanɩ ba ja Wɛ ni-gonim daka kam na wʋ Davidi tɩʋ Siyɔn nɩ tɩn ba ja ba zʋ Wɛ-digə kam.a 3 Ba maama ma kɩ daanɩ ba yi Pɛ Solɔmɔn te candiǝ kalʋ na kɩ canɩ sɩrpɛ cana kam nɩ tɩn maŋa nɩ.b 4 Yisɩrayɛlɩ tiinə nakwa bam maama na jeeri kʋntʋ tɩn, Levi dwi tiinə badonnǝ ma zǝŋi Wɛ ni-gonim daka kam wɛɛnɩ 5 sɩ ba ja ba zʋ Wɛ-digə kam. Levi tiinə bam dɩ kaanɩm tiinə bam dɩ ma zɩŋɩ Wɛ jero-vwe dɩm dɩdaanɩ dɩ yɩra zɩla yam maama ba ja ba kɛ. 6 Pɛ Solɔmɔn dɩ Yisɩrayɛlɩ tiinə kɔgɔ kʋm maama ma vu ba gilimi Wɛ ni-gonim daka kam yigə nɩ. Ba ma kwe peeni dɩ naanɩ zanzan ba ma ba kɩ kaanɩm ba pa Wɛ. Vara bam tiini ba daga zanzan pa nɔɔn-nɔɔnʋ warɩ ba ni o ga.
7 Wɛ kaanɩm tiinə bam ma zɩŋɩ Baŋa-Wɛ ni-gonim daka kam ba ja ba zʋ Wɛ-digə kam wʋnɩ ba zɩgɩ-ka di-laa cɩga cɩga kam na tiini ka yɩ lanyɩranɩ fasɩ Wɛ ŋwaanɩ tɩn wʋnɩ. Ba dɛɛn zɩgɩ daka kam Serubɛn vwana yam kuri nɩ mʋ. 8 Serubɛn sɩle sɩm vwana yam twɩ mʋ wɛɛnɩ ya kwǝli daka kam dɩ ka dɛ sɩlʋ ba na maɩ ba zɩŋɩ-ka tɩn. 9 Dɛ sɩm kʋntʋ tiini sɩ dwara zanzan. Kʋ ma pa nɔɔnʋ na zʋ Wɛ-digə kam o zɩgɩ ka ni nɩ, o waɩ o tʋlɩ o naɩ dɛ sɩm. Kʋ nan na yɩ pooni dɩm nɩ mʋ o zɩga, o ba naɩ-sɩ. Sɩ ta zɩgɩ da dɩ zɩm maama. 10 Woŋo kʋlʋ yɩranɩ dɛɛn na wʋ Wɛ ni-gonim daka kam wʋnɩ tɩn mʋ yɩ kandwa-pɩlɛ sɩle sɩlʋ Moyisi dɛɛn na kwe o kɩ da Sinayic piu kʋm baŋa nɩ tɩn.d Dáanɩ mʋ Baŋa-Wɛ dɛɛn goni ni dɩ Yisɩrayɛlɩ tiinə bam maŋa kalʋ ba na nuŋi Ezipi nɩ ba kɛ tɩn.
11 Kaanɩm tiinə bam na nuŋi sɔ-yuu kʋlʋ yɩ ba wʋ dáanɩ tɩn maama nan ya kwɛ ba tɩtɩ Wɛ ŋwaanɩ mʋ. Ba ma nuŋi Wɛ di-laa kʋm wʋnɩ ba vu daa. 12 Levi tiinə balʋ na yɩ lən-leenə tɩn ma vu ba zɩgɩ kaanɩm bimbim dɩm wa-puli saŋa kam seeni. Bantʋ maa yɩ Azafɩ, dɩ Hemanɩ, dɩ Yedutun, kʋ wǝli dɩ ba biə, dɩ ba cʋrrʋ tɩm maama. Ba dɛɛn zʋ gar-fɩfalɩ mʋ, yɩ ba laan ze zwɩ dɩ kwaanʋ dwi dwi, ba jɩgɩ-tɩ ba kɩ kwɛɛra. Kaanɩm tiinə bi dɩ fiinle (120) dɩ ma ba ba wǝli lən-leenə bam kʋntʋ wʋnɩ, yɩ ba wui nabwaanʋ. 13 Nabwan-wura bam, dɩ lən-leenə bam kwɛɛra zɩla sɔɔ kʋm maŋɩ daanɩ lanyɩranɩ pa kwǝrǝ dɩdʋa zaŋɩ wɛɛnɩ ka zuli Baŋa-Wɛ. Ba ma leeni ba tee Baŋa-Wɛ yɩ ba wɩ:
«DƖ tiini o lamma,
yɩ DƖ sono kʋm wʋra maŋa maama.»