Wɛ-digə kam zɩla
4
Solɔmɔn dɛɛn ma pa ba kwe canna ba ma ba mɔ kaanɩm bimbim, Dɩ sɛn sɩm maama dɛɛn ma-da sɩ ma-da mʋ, kantɩ fiinle fiinle. Dɩ maa yɩ kantɩ fugə wɛ-baŋa seeni. 2 O laan ma kwe canna o mɔ war-zʋn-zɔŋɔ yɩ o bəŋi kʋ yɩrɩ nɩ: ‹Nɩnɩʋ Kʋm›. Kʋ na zɩgɩ ni dɩdʋa sɩ kʋ vu ni dɩdoŋ tɩn yɩ kantɩ ni maŋɩm kuni fugə mʋ. Ka wɛ-baŋa maŋɩm maa yɩ kantɩ ni kuni bɩnu. N na kwe ŋʋna n maŋɩ-ka gigilu baŋa nɩ, kʋ yɩ kantɩ ni kuni fiintɔ mʋ kʋ kaagɩ. 3 Ba ma kwe canna ba gɔgɩrɩ wǝǝnu na nyɩ dɩ kunkwəəlua tɩn ba kɩ zʋn-zɔŋɔ kʋm niə yam seeni ba kaagɩ-ka gɩnɩ sɩle. Kantɩ ni maŋɩm maama jɩgɩ kunkwəəlu nyɩnyʋrʋ fugə mʋ. Ba dɛɛn mɔɔnɩ zʋn-zɔŋɔ kʋm dɩ kʋ nyɩnyʋrʋ tɩm daanɩ mʋ. 4 O ta ma kwe canna o mɔ na-bɛ fugə-sɩle pa war-zʋn-zɔŋɔ kʋm daŋɩ sɩ baŋa nɩ. Na-bɛ sɩm maama ma kwe sɩ kwɛ sɩ jeeri daanɩ mʋ. Na-bɛ sɩtɔ dɛɛn jeeri jazɩm baŋa seeni mʋ. Sɩ sɩtɔ dɩ jeeri wa-zʋʋrɩ seeni. Sɩ sɩtɔ maa jeeri jagwiə seeni yɩ sɩtɔ jeeri wa-puli seeni. 5 Zʋŋa kam dɛɛn lirǝ sɩ kʋ maŋɩ dɩ dayigǝ nʋa maŋɩmb mʋ. Ka ni dɩm maa nyɩ dɩ na-zʋŋa ni na yɩ te tɩn, yɩ ka laan ta ka nuŋi nɩ liisi ga-punnu na yɩ te tɩn. Ka wʋ́ wanɩ ka joŋi garɩwɛ mʋrrʋ tɩtɔ na mʋc.6 O ta ma kɩ war-zwɩ fugə, yɩ o zɩgɩ sɩnu digə kam jazɩm seeni, yɩ o daarɩ o zɩgɩ sɩnu ka jagwiə seeni. Ba dɛɛn jɩgɩ vara balʋ ba na wʋ́ kwe ba kɩ zwɛɛm kaanɩm tɩn mʋ ba zarɩ zwɩ sɩm kʋntʋ na bam wʋnɩ. Kʋ daarɩ, kaanɩm tiinə bam dɩ maa yǝni ba sanɩ ba jɩn war-zʋn-zɔŋɔ kʋm wʋ na bam wʋnɩ.
7 Solɔmɔn daa ma pa ba kwe səbu-sɩŋa ba ma ba mɔ min-zwǝn-zɩgɩrʋ fugə sɩ kʋ maŋɩ dɩ tɩte na maŋɩ kʋ pʋpʋnɩ tɩn, yɩ o daarɩ o kwe-tɩ o zɩgɩ Wɛ-digə kam wʋnɩ. Tɩ tɩnu mʋ o dɛɛn kwe o zɩgɩ jazɩm seeni, yɩ o daarɩ o kwe tɩnu o zɩgɩ jagwiə seeni.
8 O ta ma kɩ taabʋllʋ fugə. O ma kwe tɩntʋ dɩ o zɩgɩ Wɛ-digə kam wʋnɩ. Tɩnu dɛɛn zɩgɩ jazɩm seeni mʋ, yɩ tɩnu dɩ wʋ jagwiə seeni. O ta ma kɩ səbu-sɩŋa zwɩ bi sɩ ba taa jɩgɩ-sɩ ba zɩzagɩ na.
9 O ma lɔ kʋnkɔlɔ kʋlʋ na wʋra kaanɩm tiinə bam ŋwaanɩ tɩn, dɩdaanɩ kʋnkɔlɔ-kamunu kʋm, dɩ kʋ ni-bwəəru tɩm. O laan ma kwe canna o taagɩ kʋ bwəəru tɩm maama. 10 O ma kwe war-zʋn-zɔŋɔ kʋm o zɩgɩ Wɛ-digə kam jagwiə saŋa kam seeni sɩ kʋ maŋɩ dɩ ka gugoro kʋlʋ na jeeri wa-puli seeni tɩn.
11 Hiram ta ma mɔ zwɩ sɩlʋ ba na wʋ́ taa maɩ ba pɛ tɩntwarɩm tɩn, dɩ sɛbʋllʋ, dɩ na-zwɩ. O dɛɛn ma tʋŋɩ Wɛ-digə kam tɩtʋŋa yalʋ Pɛ Solɔmɔn na pɛ‑o tɩn o ti. 12 Kʋ maa yɩ:
Canna ywə yale yam, dɩ nipuru yale yam na wʋ ya yuu nɩ tɩn, dɩ canna kam na lɛɛnɩ daanɩ ka kwǝli nipuru yam tɩn, 13 dɩdaanɩ kampwɩ tweeru biə biə-yana nyɩnyʋrʋ tɩlʋ o na gɔgɩrɩ o yagɩ canna kalʋ na lɛɛnɩ daanɩ tɩn nɩ. Kampwɩ tweeru biə nyɩnyʋrʋ tɩm maa yɩ gɩnɩ sɩle na kwǝli nipuru dɩdʋa maama tɩn.
14 O dɛɛn ta mɔɔnɩ tərikooru tɩm, dɩ tɩ war-zwɩ sɩm, 15 dɩdaanɩ war-zʋn-zɔŋɔ kʋm, dɩ kʋ kuri canna na-bɛ nyɩnyʋrʋ fugə-sɩle sɩm, 16 kʋ ta wǝli dɩ zwɩ sɩlʋ ba na wʋ́ taa maɩ ba pɛ tɩntwarɩm tɩn, dɩ sɛbʋllʋ tɩm, dɩ wǝǝnu tɩlʋ ba na wʋ́ taa maɩ ba cu nwana ba lɩ tɩn.
Kʋ na yɩ Wɛ-digə yɩra zɩla yam maama, Huram-Abi dɛɛn kwe canna kalʋ na kwɛ tɩn mʋ o kɩ tɩ maama o pa Pɛ Solɔmɔn sɩ ba taa maɩ ba tʋŋa Baŋa-Wɛ digə kam tɩtʋŋa. 17 Pɛ wʋm dɛɛn pɛ ba mɔ tɩntʋ maama kamɔ-mɔra jǝgǝ kalʋ na wʋ Zʋrdɛn bolo kʋm nɩ sɩ kʋ maŋɩ dɩ Sukɔtɩ dɩ Zerɛdɩ tɩtarɩ laŋa nɩ tɩn mʋ. 18 Solɔmɔn dɛɛn pɛ ba kɩ wǝǝnu tɩntʋ zanzan mʋ. Kʋntʋ ŋwaanɩ ba wʋ lwarɩ tɩ canna kam duuni na maɩ te tɩn.
19 Solɔmɔn dɛɛn pɛ ba kɩ Wɛ-digə kam wʋ zɩla yam maama. Kʋ maa yɩ:
Səbu-sɩŋa bimbim dɩm, dɩ taabʋllʋ tɩlʋ baŋa nɩ ba na tiŋi dɩpwa yam na zɩgɩ Wɛ yigə nɩ tɩn mʋ.
20 O ta pɛ ba kwe səbu-sɩŋa kalʋ na yɩ lanyɩranɩ tɩn mʋ ba kɩ min-zwǝn-zɩgɩrʋ kʋm, dɩ tɩ min-zwǝǝnu tɩm. Tɩ maa zɩgɩ Wɛ di-laa kʋm wʋnɩ tɩ paɩ pooni, nɩ kʋ na maŋɩ te tɩn.
21 O ma pa ba gɔgɩrɩ səbu-sɩŋa punnu nyɩnyʋrʋ, yɩ ba kwe səbu-sɩŋa ba kɩ min-zwǝǝnu, dɩ wǝǝnu tɩlʋ na dwe mim dɩm tɩn. 22 O ma pa ba kwe səbu-sɩŋa na yɩ lanyɩranɩ tɩn ba kɩ wǝǝnu tɩlʋ na fɔgɩ tɩ kwɛ mim dɩm tɩn, dɩ war-zwɩ dɩ zʋŋ-tanlɛ sɩlʋ ba na maɩ ba zwɛ wǝǝnu tɩlʋ lwǝm na ywǝmmǝ tɩn, dɩdaanɩ min-cala zwɩ. O ta ma pa ba kwe səbu-sɩŋa ba taagɩ Wɛ-di-laa cɩga cɩga kam ni-bwəəru tɩm, dɩdaanɩ bwəəru tɩlʋ na zʋʋrɩ Wɛ-digə kam tɩtɩ tɩn.