Solɔmɔn na lɔgɩ Wɛ-digə kam te tɩn
1 Pwa 6:1-29
3
Solɔmɔn dɛɛn pɛ ba sɩŋɩ Baŋa-Wɛ digə kam lɔɔm Zeruzalɛm tɩʋ nɩ. Kʋ yɩ Moriza piu kʋm yuu nɩ mʋ. Baŋa-Wɛ ya maŋɩ DƖ vɩɩrɩ DƖ tɩtɩ dɩ Solɔmɔn ko Davidi dáanɩ mʋ, mɛ seeni Yebusi tu Aravɩna dɛɛn na yǝni o ve o magɩ o mɩna tɩn. Davidi maŋɩ o kuri je sɩm kʋntʋ mʋ sɩ ba lɔ Wɛ-digə kam da.a 2 Solɔmɔn paarɩ dim bɩna yana bɩnɩ dɩm, canɩ sɩle cana kam da yale dɛ dɩm nɩ mʋ ba puli sɩ ba lɔ-ka.3 Solɔmɔn dɛɛn na tiŋi Wɛ-digə kam biri-bərə te tɩn yɩ kantɩ fusɩrdʋ mʋ ka saŋ-dɩdɔrɔ maŋɩm baŋa nɩ. Ka saŋ-kukugə maŋɩm dɩ maa yɩ kantɩ fiinle. Kʋ nan yɩ ba faŋa maŋɩm dɩm mʋ ba kwe ba maŋɩ-ka. 4 Wɛ-digə kam jɩgɩ napɔrɔ mʋ ka yigə kam seeni, kʋ saŋ-kukugə maŋɩm na yɩ kantɩ fiinle, yɩ kʋ wɛ-baŋa seeni maŋɩm dɩ yɩ kantɩ fiinleb. Kʋ na yɩ napɔrɔ kʋm wʋ kʋm seeni, ba dɛɛn kwe səbu-sɩŋa na yɩ lanyɩranɩ tɩn mʋ ba taagɩ kʋ maama.
5 Kʋ na yɩ Wɛ-digə kam tɩtɩ, o dɛɛn pɛ ba kwe da-pɩlwarʋ mʋ ba kwǝli ka wʋ kabri sɩm. O ta ma pa ba kwe səbu-sɩŋa na yɩ lanyɩranɩ tɩn ba taagɩ sɩ maama, yɩ ba daarɩ ba gɔgɩrɩ kʋrʋ tiu nɛ nyɩnyʋrʋ, dɩ nyɩnyʋrʋ na lwǝni capʋnnʋ tɩn ba kɩ da. 6 O dɛɛn ta kwe kandwa-ŋʋna mʋ o ma o kwɛ Wɛ-digə kam yɩra maama. Ba maa na mɛ səbu-sɩŋa kalʋ ba tʋŋɩ ka tɩtʋŋa tɩn maa nuŋi Paravayim nɩ. 7 Kʋ na yɩ dɛ tɩlʋ ba na kwe ba nɩ Wɛ-digə kam tɩn, dɩ ka manco-pɩʋ dɛ sɩm, dɩ ka kabri sɩm, dɩ bwəəru tɩm, kʋ dɛɛn yɩ səbu-sɩŋa mʋ o mɛ o taagɩ-tɩ. O laan ma daarɩ o pa ba gɔgɩrɩ Serubɛn nyɩnyʋrʋ o kɩ kabri sɩm yɩra nɩ.
8 Solɔmɔn ta ma lɔ Wɛ-di-laa cɩga cɩga kam na tiini ka yɩ lanyɩranɩ fasɩ Wɛ ŋwaanɩ tɩn. Ka dɩdwarɩm maŋɩm dɩ ka yalɩm maŋɩm maama yɩ kantɩ fiinle fiinle mʋ, pa ka maŋɩ dɩ Wɛ-digə kam tɩtɩ. O laan ma kwe səbu-sɩŋa duuni na yi kilo mʋrrʋ fiinle (20,000) tɩn o taagɩ ka wʋ maama. 9 Səbu-sɩŋa cɩna yalʋ ba na kwe ba kɩ da tɩn duuni maa ma dɩ səbu-dala fiinnu na yɩ te tɩn. Ba ta ma kwe səbu-sɩŋa ba taagɩ di sɩlʋ na lɔgɩ sɩ din tɩn kabri sɩm.
10 Kʋ na yɩ Wɛ-di-laa cɩga cɩga kam, Solɔmɔn pɛ ba kwe dɛ mʋ ba sarɩ Serubɛn sɩle nyɩnyʋrʋ ba zɩgɩ ka wʋnɩ, yɩ ba taagɩ-tɩ dɩ səbu-sɩŋa. 11 Serubɛn sɩm na yarɩgɩ sɩ vwana pa kʋ zɩgɩ digə kam saŋa dɩdʋa nɩ kʋ vu kʋ yi kadoŋ kam nɩ, kʋ yɩ kantɩ ni maŋɩm kuni fiinle mʋ. Serubɛn dɩdʋa vɔŋɔ dɩdwarɩm yɩ kantɩ ni maŋɩm kuni bɩnu mʋ, yɩ o yarɩgɩ-kʋ o dwe digə kam kəbrə kam. Kʋ vɔŋɔ kʋdoŋ kʋm dɩ maa yɩ kantɩ ni maŋɩm kuni bɩnu, yɩ kʋ yi kʋ dwe Serubɛn kadoŋ kam vɔŋɔ. 12 Serubɛn kantʋ kam dɩ yarɩgɩ ka vɔŋɔ kʋdoŋ kʋm ka dwe digə kam saŋa kadoŋ kam. Ka dɩ vɔŋɔ dɩdwarɩm yɩ kantɩ ni maŋɩm kuni bɩnu mʋ. 13 Serubɛn sɩle sɩm kʋntʋ vwana na yarɩgɩ yɩ ya dwe daanɩ, ya maama yɩ kantɩ ni maŋɩm kuni fiinle mʋ. Sɩ nan zɩgɩ sɩ nɛ baŋa nɩ mʋ, yɩ sɩ jeeri Wɛ-digə kam ni dɩm.
14 Kʋ na yɩ gar-jalɩ dɩlʋ na wʋ́ le dɩ cɩ Wɛ-di-laa cɩga cɩga kam tɩn, Solɔmɔn ma pa ba kwe gar-ŋʋnɩ sɩlʋ nyɩnyʋrʋ na yɩ nazon-pupwiə, dɩ nasʋŋ-pupwiə, dɩ nasʋŋʋ cwɛ-cwɛ tɩn ba ma ba sɔ gar-fɩfalɩ, yɩ ba daarɩ ba gɔgɩrɩ Serubɛn nyɩnyʋrʋ ba kɩ sɩ yɩra nɩ.
15 O laan ma daarɩ o pa ba mɔ ywə yale pa ya zɩgɩ Wɛ-digə kam yigə nɩ. Ywə yale yam na toŋi daanɩ, ya maama dɩdwarɩm yɩ kantɩ fiintɔ-sɩnu mʋ. Ba ma kɩ nipuru yalʋ dɩdwarɩm na yɩ kantɩ sɩnu tɩn ba məəli ywə yam yuu kʋm seeni. 16 O ta kɩ capʋnnʋ mʋ yɩ o milimi-tɩ daanɩ. O laan ma kwe-tɩ o kɩ ywə yam yuu nɩ. O ta ma mɔ Grɩnadɩnɩ biə bi nyɩnyʋrʋ yɩ o kwe-tɩ o məəli capʋnnʋ tɩm yɩra nɩ. 17 O ma kwe ywə yam o cwi Wɛ-digə kam yigə nɩ, ka jazɩm seeni dɩ ka jagwiə seeni. O ma pa ba bǝi ywe dɩlʋ na zɩgɩ ka jazɩm seeni tɩn wɩ: ‹Yakini›c. Dɩlʋ maa na zɩgɩ jagwiə seeni tɩn maa yɩ ‹Bʋazɩ›d.e