Wɛ-digə kam lɔɔm taanɩ
2
Solɔmɔn wʋbʋŋa dɛɛn nan ya jaanɩ sɩ o lɔ digə mʋ Baŋa-Wɛ yɩrɩ zulə ŋwaanɩ, sɩ o daarɩ o lɔ paarɩ sɔ-fɔrɔ o pa o tɩtɩ. 2 O ma pa ba beeri nɔɔna mʋrrʋ fusɩrpɛ (70,000) balʋ na wʋ́ taa zɩŋɩ zɩla tɩn ba pa‑o. O ta pɛ ba beeri nɔɔna mʋrrʋ funɔnɔ (80,000) mʋ, sɩ ba yǝni ba din pweeru yuu ba yarɩ kandwa-zana ba pa‑o. O ma beeri nɔɔna mʋrrʋ tɩtɔ dɩ biə-yardʋ (3,600) o wǝli da sɩ ba taa nii tɩntʋŋna bam maama baŋa nɩ.3 Solɔmɔn laan ma tʋŋɩ kwǝrǝ kantʋ o pa Tiiri pɛ Hiramɩ wɩ:a
«Nmʋ dɛɛn kwe Sɛdrɩ dɛ mʋ n tʋŋɩ n pa amʋ ko Davidi pa o lɔ sɔ-fɔrɔ o zʋʋrɩ kʋ wʋnɩ. Nan kwaanɩ n wǝli amʋ kʋntʋ doŋ. 4 Amʋ ti a yigə mʋ sɩ a lɔ digə a Tu Baŋa-Wɛ yɩrɩ zulə ŋwaanɩ. Ba laan maa wʋ́ pɔɔrɩ-ka ba zɩgɩ sɩ ba yǝni ba taa zwɛ wǝǝnu tɩlʋ lwǝm na ywǝmmǝ tɩn da, sɩ ba ta daarɩ ba taa tigisi dɩpwa yalʋ na tigi Wɛ yigə nɩ tɩn ka wʋnɩ maŋa dɩ maŋa. Dáanɩ mʋ ba ta wʋ́ yǝni ba zwɛ kaanɩm pɛɛra tɩtɩɩtɩ maama, dɩ dɩdaan-ni maama, kʋ wǝli dɩ Wɛ siun da yam nɩ, dɩ can-dʋŋa candi sɩm nɩ, dɩ candi yalʋ maama na wʋra sɩ dɩ́ taa maɩ dɩ́ zuli dɩ́ Tu Baŋa-Wɛ dɩm tɩn. Mʋ DƖ na pɛ dɩbam Yisɩrayɛlɩ tiinə bam ni dɩlʋ sɩ dɩ́ taa kɩ maŋa maama tɩn.b
5 Digə kalʋ amʋ na lagɩ a lɔ tɩn wʋ́ taa tiini ka yɩ kamunu mʋ, dɩbam Tu Wɛ dɩm na dwe wa yadonnə yam maama tɩn ŋwaanɩ.c 6 Wɔɔ nan mʋ yi sɩ o lɔ digə o pa Baŋa-Wɛ? Wɛyuu baŋa tɩtɩ nɩ, pwələ tǝrǝ ka na maŋɩ dɩ DƖ! Amʋ yɩ wɔɔ mʋ sɩ a lɔ digə a pa‑DƖ? Digə kam nan wʋ́ taa yɩ mɛ ba na wʋ́ taa zwɛ kaanɩm da ba pa‑DƖ tɩn mʋ.
7 Nan tʋŋɩ gɔgɔ na waɩ o kwe səbu-sɩŋa, dɩ səbu-poŋo, dɩ canna, dɩ luuru o tʋŋɩ tɩtʋŋa lanyɩranɩ tɩn n pa-nɩ. Kʋ tu ta wʋ́ kwe gar-ŋʋnɩ sɩlʋ nyɩnyʋrʋ na yɩ nasʋŋ-pupwiə, dɩ nasʋŋʋ cwɛ-cwɛ, dɩ nazon-pupwiə tɩn o ma o tʋŋɩ. O ta maŋɩ sɩ o taa ye sarɩm tɩtʋŋa na yɩ te tɩn. Wʋntʋ dɩ gwarʋ tɩlʋ amʋ ko Davidi dɛɛn na kuri tɩn wʋ́ wǝli daanɩ ba tʋŋɩ Zeruzalɛm nɩ dɩ Zuda tɩɩnɩ dɩdonnǝ wʋnɩ.
8 Nan ta tʋŋɩ Liban tɩʋ Sɛdrɩ dɛ, dɩ tweeru dɩdonnǝ da-ŋʋnnʋ n pa-nɩ. Amʋ maanɩ nɩ n nɔɔna bam tiini ba ye dɛ gonim tɩtʋŋa abam je sɩm nɩ. Amʋ nɔɔna wʋ́ wǝli dɩ nmʋ nɔɔna bam, 9 sɩ ba lagɩ da-ŋʋnnʋ sɩ tɩ taa daga. Bɛŋwaanɩ, digə kalʋ a na bʋŋɩ sɩ a lɔ tɩn maŋɩ sɩ ka taa daga mʋ, yɩ ka jɩgɩ nɩnwaŋa lanyɩranɩ. 10 Kʋ na yɩ nmʋ tɩntʋŋna balʋ na wʋ́ goni dɛ sɩm tɩn, amʋ wʋ́ kwe bəniŋəd ywəllu mʋrrʋ fusɩrdʋ (60,000), dɩ caarae ywəllu mʋrrʋ fusɩrdʋ (60,000). A ta wʋ́ pa-ba sana kʋrɩwaa biə mʋrrʋ fiinle (20,000), dɩ nugə kʋrɩwaa biə mʋrrʋ fiinle (20,000) mʋ.»
11 Pɛ Hiramɩ na lagɩ o ləri Solɔmɔn tɩn, o pʋpʋnɩ tɔnɔ mʋ o pa‑o o wɩ: «Baŋa-Wɛ na soe o nɔɔna bam tɩn ŋwaanɩ mʋ o pɛ nmʋ ji ba pɛ.»
12 Hiramɩ ta ma ta o wɩ:
«Baŋa-Wɛ dɩm na yɩ Yisɩrayɛlɩ tiinə bam Wɛ tɩn mʋ maŋɩ dɩ tiə. Dɩntʋ mʋ naanɩ wɛyuu dɩ tɩga baŋa maama. DƖ nan pɛ bu wʋlʋ Pɛ Davidi na lʋgɩ tɩn jɩgɩ swan lanyɩranɩ, dɩdaanɩ yi-pʋrʋ, dɩ wʋbʋŋ-laarʋ. O maa wʋ́ lɔ digə o pa Baŋa-Wɛ, yɩ o ta lɔ sɔ-fɔrɔ o pa o tɩtɩ.
13 Amʋ nan lagɩ a tʋŋɩ Huram-Abi mʋ n tee nɩ, o na yɩ gɔgɔ cɩga cɩga yɩ o jɩgɩ yi-pʋrʋ tɩn ŋwaanɩ. 14 O nu maa yɩ Dan dwi dɩm bukɔ mʋ, yɩ o ko dɩ yɩ Tiiri tɩʋ tu. O ye ba na kwe səbu-sɩŋa, dɩ səbu-poŋo, dɩ canna, dɩ luuru, dɩ kandwa, dɩ dɛ ba gɔgɩrɩ wǝǝnu te tɩn. O nan ta wʋ́ wanɩ o ma gar-ŋʋnɩ sɩlʋ nyɩnyʋrʋ na yɩ nasʋŋ-pupwiə, dɩ nazon-pupwiə, dɩ nasʋŋʋ cwɛ-cwɛ tɩn, dɩdaanɩ gar-fɩfalɩ o ma o tʋŋɩ. O waɩ o sarɩ nyɩnyʋgʋ dwi maama, nɩ ba na wʋ́ brɩ-o sɩ o kɩ te tɩn. Wʋntʋ wʋ́ tʋŋɩ o wǝli nmʋ tɩtɩ gwarʋ tɩm, dɩ balʋ nmʋ ko Pɛ Davidi dɛɛn na kuri tɩn.
15 Pɛ Solɔmɔn, kʋ na yɩ amʋ tee nɩ, nan tʋŋɩ bəniŋə kam, dɩ caara yam, dɩ nugə kam, dɩ sana bam, n pa a tɩntʋŋna bam, nɩ n na goni ni sɩ n kɩ te tɩn. 16 Dɩbam dɩ wʋ́ goni Liban tɩʋ da-ŋʋnnʋ sɩ kʋ maŋɩ dɩ nmʋ na lagɩ te maama tɩn. Ba laan maa wʋ́ vɔ dɛ sɩm ba kɩ daanɩ, yɩ ba daarɩ ba dɩ-sɩ nɩnɩʋ kʋm nɩ ba yɛ ba vu ba yi Zope. Nmʋ nɔɔna bam dɩ laan maa wʋ́ jeeri da sɩ ba kwe-sɩ ba ja ba vu Zeruzalɛm.»
17 Solɔmɔn dɛɛn ma pa ba jeeli vərə balʋ na wʋ Yisɩrayɛlɩ tɩʋ wʋnɩ tɩn ni, nɩ o ko Davidi dɩ dɛɛn na kɩ te tɩn. O ma na nɩ ba yɩ nɔɔna mʋrrʋ bi dɩ fiinnu-batɔ dɩdaanɩ biə-yardʋ (153,600) mʋ.f 18 O ma lɩ ba wʋnɩ nɔɔna mʋrrʋ fusɩrpɛ (70,000) sɩ ba taa zɩŋɩ zɩla, sɩ ba nɔɔna mʋrrʋ funɔnɔ (80,000) taa yarɩ kandwa-zana pweeru je sɩm nɩ, yɩ ba wʋ mʋrrʋ tɩtɔ dɩ biə-yardʋ (3,600) dɩ taa nii tɩntʋŋna bam kʋntʋ baŋa nɩ.