Kɩbarɩ tɔnɔ Twannʋ Tɩle Tu
Pɛ Solɔmɔn loori swan Wɛ tee nɩ
1 Pwa 3:1-15
1
Davidi bu Solɔmɔn dɛɛn yɔɔrɩ o jɩgɩ o paarɩ o di tɩʋ kʋm maama nɩ mʋ, yɩ o kuri ja tɩga. Bɛŋwaanɩ, o Tu Baŋa-Wɛ mʋ wʋ o tee nɩ, pa o yɩrɩ tiini dɩ zaŋɩ.2 Solɔmɔn dɛɛn ma bəŋi Yisɩrayɛlɩ tiinə bam maama sɩ ba jeeri daanɩ. Bantʋ maa yɩ balʋ na te jar-kərə mʋrʋ mʋrʋ tɩn, dɩ balʋ na te jar-kərə bi bi tɩn, dɩ Yisɩrayɛlɩ tɩʋ dɩdɛɛra bam, dɩ ba nakwa bam, dɩ ba sɔ-yuni yigǝ tiinǝ bam maama. 3 Ba na gilimi daanɩ tɩn, Pɛ Solɔmɔn dɩ Yisɩrayɛlɩ tiinə kɔgɔ kʋm maama ma vu Gabawɔn. Wara-je dɛɛn wʋ dáanɩ, vwe dɩlʋ o tɩntʋŋnʋ Moyisi dɛɛn na kɩ o zɩgɩ kagʋa kam wʋnɩ tɩn na wʋra tɩn ŋwaanɩ.a 4 Davidi dɛɛn ya loori yigə mʋ o ja Wɛ ni-gonim daka kam o zɩgɩ Kiriaf-Jeerim nɩ o vu Zeruzalɛm, mɛ o na cwi vwe sɩ o zɩgɩ-ka dɩ wʋnɩ tɩn.b 5 Kʋ nan na yɩ canna kaanɩm daka kalʋ Yuri wʋlʋ na yɩ Huuri bu tɩn bu Bezalɩlɩ dɛɛn na kɩ tɩn,c ka dɛɛn zɩgɩ Gabawɔn nɩ mʋ yɩ ka wʋ Baŋa-Wɛ jero-vwe dɩm yigə nɩ. Kʋntʋ ŋwaanɩ Solɔmɔn dɩ nɔn-kɔgɔ kʋm maama ve dáanɩ sɩ ba warɩ Baŋa-Wɛ. 6 Ba na zɩgɩ jero-vwe dɩm yigə nɩ kʋntʋ tɩn, mʋ Solɔmɔn fʋfɔ o yi canna kaanɩm bimbim dɩm, yɩ o kɩ zwɛɛm kaanɩm kuni mʋrʋ bimbim dɩm baŋa nɩ o pa Baŋa-Wɛ.
7 Tɩtɩɩ dɩm kʋntʋ mʋ Wɛ vɩɩrɩ DƖ tɩtɩ dɩd-o, yɩ DƖ wɩ: «Solɔmɔn, loori n na lagɩ kʋlʋ maama tɩn, sɩ amʋ wʋ́ pa‑m». 8 Solɔmɔn ma ləri o wɩ: «Nmʋ dɛɛn jɩgɩ a ko Davidi sono lanyɩranɩ, yɩ n daarɩ n pa a ləri o yuu nɩ a di paarɩ dɩm. 9 Yuutu Baŋa-Wɛ, laan pa ni dɩlʋ nmʋ na goni dɩ amʋ ko tɩn sɩɩnɩ kʋ kɩ.d Bɛŋwaanɩ, nmʋ pɛ amʋ mʋ ji pɛ a taa te kɔ-fɔrɔ kʋlʋ ni na daga zanzan nɩ tɩga kasʋlʋ te tɩn. 10 Nan pa-nɩ swan lanyɩranɩ dɩ yǝno, sɩ a taa maɩ a nii nɔɔna bantʋ baŋa nɩ. Bɛŋwaanɩ, wɔɔ mʋ wʋ́ wanɩ nmʋ kɔ-fɔrɔ kʋntʋ o nii o tɩtɩ nɩ?»
11 Wɛ ma ləri Solɔmɔn DƖ wɩ: «Nmʋ wʋbʋŋa yam lana zanzan. Bɛŋwaanɩ, nmʋ wʋ loori-nɩ sɩ n joŋi jɩjɩgɩrʋ, naa nadunni, naa zulə amʋ tee nɩ. Nmʋ ta ma n ba beeri tʋʋnɩ sɩ n pa n dʋna, naa sɩ n joŋi mʋmwɛ-dɛɛrɩ n pa n tɩtɩ. Kʋ nan yɩ swan dɩ yǝno mʋ n laga sɩ n tan maɩ n te amʋ nɔɔna balʋ a na kwe a pa‑m sɩ n tan yɩ ba pɛ tɩn. 12 Kʋntʋ ŋwaanɩ amʋ wʋ́ sɩɩnɩ a pa‑m swan dɩ yǝno. A nan ta wʋ́ pa‑m jɩjɩgɩrʋ, dɩ nadunni, dɩ zulə, sɩ pɛ wʋdoŋ yɩ kɛ nmʋ yigə nɩ, kʋ na yɩ balʋ na loori nmʋ tɩn, naa balʋ na wʋ́ saŋɩ nmʋ kwaga ba di paarɩ tɩn dɩ.»e
13 Solɔmɔn laan ma zɩgɩ Gabawɔn jero-vwe dɩm nɩ Wɛ jero-vwe dɩm na wʋ mɛ tɩn o joori Zeruzalɛm tɩʋ kʋm wʋʋ. O ma di paarɩ Yisɩrayɛlɩ baŋa nɩ.
14 Solɔmɔn dɛɛn ma la jara-kǝm tərikooru mʋrʋ dɩ biə-yana (1,400), dɩdaanɩ siseŋ-nɔɔna mʋrrʋ fugǝ-tɩle (12,000). O dɛɛn pɔɔrɩ sɩ sɩdonnǝ o yagɩ tɩɩnɩ dɩlʋ o na kuri sɩ ŋwaanɩ tɩn nɩ. Sɩdaara maa wʋ Zeruzalɛm nɩ mɛ o na zʋʋrɩ tɩn. 15 O paarɩ dim maŋa nɩ, səbu-poŋo dɩ səbu-sɩŋa tiini tɩ daga Zeruzalɛm nɩ, nɩ kandwa mʋ te. Sɛdrɩ da-ŋʋnnʋ dɩ maa ba jɩgɩ zʋrɩ nɩnɛɛnɩ kapʋrrʋ na daga te wa-zʋʋrɩ seeni bwəəlu tɩm nɩ tɩn. 16 Nɔɔna dɛɛn ve Ezipi dɩ Silisi tɩɩnɩ dɩm mʋ ba kwe səbu ba yəgi sise ba pa Solɔmɔn. Kʋ maa yɩ o pipimpiinə mʋ yǝni ba yəgi-sɩ Silisi tɩʋ nɩ, yɩ ba ŋwɩ kʋlʋ na maŋɩ tɩn. 17 Kʋ na yɩ jara-kǝm təriko, ba yǝni ba yəgi-kʋ Ezipi nɩ dɩ səbu-poŋo səbu-dala biə-yardʋ (600) mʋ. Sisǝŋǝ maa yəgi dɩ səbu-poŋo səbu-dala bi dɩ fiinnu (150). Pɛ wʋm pipimpiinə bam dɛɛn yǝni ba kwe tərikooru dɩ siseŋ-nɔɔna zanzan ba yəgi ba pa Hɛtɩ tiinə pwa bam dɩ Siiri tiinə pwa mʋ.