6
Pɛ Solɔmɔn ma warɩ Wɛ o wɩ: «Baŋa-Wɛ, nmʋ maŋɩ n ta n wɩ: nmʋ wʋ́ tan zʋʋrɩ kunkwən-luluru wʋnɩ mʋ.2 Amʋ nan lɔgɩ sɔ-fɔrɔ mʋ a pa‑m, sɩ n tan zʋʋrɩ kʋ wʋnɩ maŋa maama.»3 Yisɩrayɛlɩ nɔn-kɔgɔ kʋm maama na zɩgɩ da kʋntʋ tɩn mʋ Solɔmɔn pipiri o jeeri-ba. O ma loori Wɛ sɩ DƖ kɩ-ba lanyɩranɩ o pa-ba.4 O maa wɩ:
«Baŋa-Wɛ dɩm na yɩ Yisɩrayɛlɩ tiinə Wɛ tɩn maŋɩ dɩ tiə! DƖ yɔɔrɩ DƖ kɩ DƖ su ni dɩlʋ DƖ na pooli dɩ a ko Davidi tɩn mʋ. Wɛ dɛɛn tagɩ DƖ wɩ: 5 ‹Kʋ na zɩgɩ maŋa kalʋ a na jaanɩ a nɔɔna bam a nuŋi Ezipi tɩn, a ya ta wʋ kuri tɩʋ Yisɩrayɛlɩ dwiə yam wʋnɩ sɩ ba lɔ digə ba ma zuli a yɩrɩ da. A nan wʋ kuri nɔɔn-nɔɔnʋ sɩ kʋ tu taa nii a nɔɔna Yisɩrayɛlɩ tiinə bam baŋa nɩ. 6 Kʋ laan nan na yɩ te tɩn, amʋ mʋ kuri Zeruzalɛm sɩ kʋ taa yɩ tɩʋ kʋlʋ wʋnɩ ba na wʋ́ taa zuli-nɩ tɩn,a yɩ a daarɩ a kuri Davidi sɩ o taa di paarɩ a nɔɔna bam baŋa nɩ.› »
7 Solɔmɔn ta ma ta o wɩ:
«Amʋ ko Davidi ya maŋɩ o bʋŋɩ o ja sɩ o lɔ Wɛ-digə sɩ ba taa zuli Baŋa-Wɛ dɩm na yɩ Yisɩrayɛlɩ tiinə Wɛ tɩn yɩrɩ da mʋ. 8 Baŋa-Wɛ ma ta dɩd-o DƖ wɩ: ‹Nmʋ kɩ cɩga dɩ n na jaanɩ wʋbʋŋa sɩ n lɔ digə amʋ yɩrɩ zulə ŋwaanɩ tɩn. 9 Kʋ nan daɩ nmʋ mʋ maŋɩ sɩ n lɔ digə kam n pa-nɩ. Sɩ kʋ yɩ nmʋ tɩtɩ bu mʋ wʋ́ lɔ digə kam amʋ yɩrɩ zulə ŋwaanɩ.›
10 Lele kʋntʋ Baŋa-Wɛ kɩ DƖ su te maama DƖ na pooli nɩ: DƖ wʋ́ kɩ tɩn mʋ. Amʋ laan mʋ ləri a ko Davidi yuu nɩ a ji Yisɩrayɛlɩ tɩʋ pɛ. A ma sɛ a lɔ Wɛ-digə kam sɩ Baŋa-Wɛ dɩm na yɩ Yisɩrayɛlɩ tiinə Wɛ tɩn yɩrɩ na zulə da. 11 A ta ma kwe Wɛ ni-gonim daka kam a zɩgɩ ka wʋnɩ. Baŋa-Wɛ ni dɩlʋ DƖ na goni dɩ Yisɩrayɛlɩ tiinə bam tɩn na pʋpʋnɩ kandwa-pɩlɛ sɩlʋ baŋa nɩ tɩn maa wʋ ka wʋnɩ.»
Solɔmɔn wɛ-loro kʋm
12 Solɔmɔn ma vu o zɩgɩ o jeeri Baŋa-Wɛ kaanɩm bimbim dɩm yɩ Yisɩrayɛlɩ kɔgɔ kʋm maama zɩgɩ ba niə. O ma zǝŋi o jɩan yam wɛɛnɩ sɩ o warɩ Wɛ. 13 O nan ya pɛ ba kɩ canna bimbim mʋ ba kwe ba zɩgɩ Wɛ-digə kam pooni yigə kʋnkɔlɔ kʋm tɩtarɩ dɩm nɩ. Dɩ saŋ-dɩdɔrɔ maŋɩm dɩdaanɩ dɩ saŋ-kukugə maŋɩm dɛɛn yɩ kantɩ ni maŋɩm kuni bɩnu mʋ. Dɩ wɛ-baŋa maŋɩm maa yɩ kantɩ ni maŋɩm kuni bɩtɔ. Solɔmɔn ma vu o zɩgɩ bimbim dɩm kʋntʋ baŋa nɩ o kuni nadoonə, yɩ o daarɩ o zǝŋi o jɩan yam wɛyuu nɩ. 14 O ma loori Wɛ o wɩ:
«Baŋa-Wɛ dɩm na yɩ Yisɩrayɛlɩ tiinə Wɛ tɩn, Wɛ dɩdoŋ tǝrǝ wɛyuu nɩ naa tɩga baŋa nɩ dɩ na nyɩ dɩ nmʋ. Nmʋ yɔɔrɩ n soe balʋ na tɔgɩ n cwe sɩm dɩ ba wʋʋ maama tɩn, dɩ n na yǝni n kɩ n sui ni dɩlʋ n na goni dɩ ba sɩ n kɩ tɩn. 15 Kʋ na yɩ amʋ ko Davidi na yɩ nmʋ tɩntʋŋnʋ tɩn, nmʋ na tiŋi ni dɩd-o sɩ n kɩ te tɩn, mʋ n sɩɩnɩ n kɩ tɩ maama sɩ kʋ ba kʋ yi zɩm.
16 Yisɩrayɛlɩ tiinə Baŋa-Wɛ dɩm, a laan loori‑m sɩ n kɩ te n na goni ni dɩ a ko Davidi yɩ n wɩ o dwi dɩm bá ga nɔɔnʋ sɩ o di paarɩ Yisɩrayɛlɩ tiinə baŋa nɩ, nɩ ba na kwaanɩ ba sɛ nmʋ niə yam nɩ Davidi tɩtɩ na kɩ te tɩn. 17 Baŋa-Wɛ dɩm na yɩ Yisɩrayɛlɩ tiinə Wɛ tɩn, nan sɛ sɩ kʋlʋ nmʋ na pooli dɩ n tɩntʋŋnʋ Davidi tɩn sɩɩnɩ kʋ kɩ. 18 Amʋ Tu Wɛ, nmʋ wʋ́ sɩɩnɩ n tan zʋʋrɩ dɩ nabiinǝ tɩga baŋa nɩ na? Wɛyuu dɩ wɛ-baŋa je sɩm maama nɩ, pwələ tǝrǝ ka na maŋɩ dɩ nmʋ. Tɩta mʋ digə kantʋ a na lɔgɩ tɩn wʋ́ wanɩ ka yi n zʋʋrɩm? 19 Amʋ Tu Baŋa-Wɛ, a yɩ nmʋ tɩntʋŋnʋ mʋ. Nan pa n yigə taa wʋ a wɛ-loro kʋm wʋnɩ. Cəgi a kərə kam sɩ n daarɩ n sɛ a na loori‑m woŋo kʋlʋ tɩn. 20 Popo, pa sɩ n yiǝ taa pagɩ digə kantʋ baŋa nɩ maŋa maama, tɩtɩɩ dɩ wɩa. Nmʋ maŋɩ n ta wɩ ka zɩgɩ n yɩrɩ dɩm zulə ŋwaanɩ mʋ. Maŋa kalʋ maama nɩ a na zɩgɩ a jeeri digə kantʋ a loori‑m, sɩ n cəgi a wɛ-loro kʋm. 21 Kʋ na yɩ amʋ dɩ n nɔɔna Yisɩrayɛlɩ tiinə bam, dɩ́ na zɩgɩ dɩ́ jeeri nmʋ digə kam sɩ dɩ́ loori‑m, sɩ n jǝni n wɛyuu sɔŋɔ kʋm wʋnɩ n cəgi dɩ́ wɛ-loro n daarɩ n yagɩ n cɛ dɩbam.
22 Nɔɔnʋ na kɩ o cɔgɩ o doŋ yigə yɩ ba ja-o ba zʋ nmʋ digə kam wʋnɩ sɩ o zɩgɩ nmʋ kaanɩm bimbim dɩm yigə nɩ o du durə nɩ: o wʋ kɩ o cɔgɩ, 23 jǝni wɛyuu nɩ n cəgi o taanɩ dɩm sɩ n daarɩ n kɩ kʋlʋ na maŋɩ tɩn. Pɔɔrɩ cɩga n tɩntʋŋna bam tɩtarɩ nɩ. Pa lwarɩm tu wʋm na waarɩm dɩlʋ na maŋɩ dɩ o kikiə tɩn, sɩ n daarɩ n pa wʋlʋ na jɩgɩ cɩga tɩn na o bʋra.
24 Nmʋ nɔɔna Yisɩrayɛlɩ tiinə bam lwarɩm na pɛ ba dʋna di-ba najara wʋnɩ, yɩ ba laan na pipiri ba joori nmʋ te ba zʋ nmʋ digə kam wʋnɩ ba ma n yɩrɩ dɩm ba loori‑m sɩ n duri ba yibwənə n daarɩ n yagɩ n cɛ-ba, 25 jǝni wɛyuu nɩ n cəgi ba kərə kam kʋntʋ. Sɩɩnɩ n yagɩ ba lwarɩm dɩm n ma n cɛ-ba, n daarɩ n ja-ba n joori tɩga kalʋ nmʋ na kwe n pa ba dɩ ba nabaara bam tɩn.b
26 Nmʋ nɔɔna bam lwarɩm na pɛ n ja kunkoŋo kʋm pa dʋa ba nɩ, yɩ ba laan na ləni ba wʋrʋ ba zɩgɩ ba jeeri n digə kam ba ma n yɩrɩ dɩm ba loori zǝnǝ nmʋ tee nɩ dɩ n na waarɩ-ba te tɩn, 27 nan jǝni wɛyuu nɩ n cəgi ba kərə kam. Yagɩ n nɔɔna Yisɩrayɛlɩ tiinə bam lwarɩm n cɛ-ba, sɩ n daarɩ n brɩ-ba cwə-laa sɩ ba taa tɔga. Pa dʋa joori ka nɩ tɩga kantʋ n na kwe n pa n nɔɔna sɩ ba taa te tɩn baŋa nɩ.
28 Da-kʋrɩ dɩ yawɩ-cɛɛrʋ na tu tɩ yi ba tɩga kam, yɩ yawɩɩrʋ naa kayɩra dwi dwi na cɔgɩ ba kara wʋdiiru tɩm, yɩ ba dʋna na zaŋɩ ba tɩʋ kʋlʋ maama baŋa nɩ, naa kʋ na yɩ lɛɛrʋ tɩlʋ maama mʋ yi n nɔɔna Yisɩrayɛlɩ tiinə bam, 29 cəgi ba kərə kam. Ba wʋlʋ maama na zǝŋi o jɩa o jeeri n digə kantʋ yɩ o loori‑m naa o keeri o loori‑m, o wʋʋ na tiini kʋ cɔgɩ tɩn ŋwaanɩ, 30 sɩ n jǝni n wɛyuu sɔŋɔ kʋm nɩ n cəgi o kərə kam kʋntʋ. Yagɩ ba maama lwarɩm n cɛ-ba sɩ n daarɩ n wǝli-ba. Kɩ dɩ ba dɩdʋa dɩdʋa sɩ kʋ maŋɩ dɩ ba kikiə na yɩ te tɩn, nmʋ yɩranɩ mʋ na ye nabiinu wʋbʋŋa na yɩ te tɩn ŋwaanɩ.c 31 Kʋntʋ wʋ́ pa n nɔɔna bam taa kwarɩ-m, yɩ ba taa tɔgɩ n cwe sɩm da yalʋ maama ba na wʋ́ taa ŋwɩ yɩ ba zʋʋrɩ tɩga kalʋ nmʋ na kwe n pa dɩ́ nabaara bam tɩn wʋnɩ.
32 Kʋ nan na yɩ vərə balʋ na daɩ n nɔɔna Yisɩrayɛlɩ tiinə tɩn, bantʋ waɩ ba zɩgɩ sa-tɩʋ nɩ ba tui yo seeni, ba na ni n ŋwa tɩn ŋwaanɩ. Kʋ yɩ n yɩrɩ na zaŋɩ dɩ n na mɛ n dam n tʋŋɩ tɩtʋŋ-kamunə tɩn ŋwaanɩ mʋ bantʋ yǝni ba tui yo. Bantʋ na tu ba zɩgɩ ba jeeri n digə kantʋ ba loori‑m, 33 sɩ n jǝni n wɛyuu sɔŋɔ kʋm nɩ n cəgi ba wɛ-loro kʋm kʋntʋ. Kɩ n su kʋlʋ maama ba na loori n tee nɩ tɩn, sɩ lʋgʋ baŋa nɔɔna maama da kʋ ŋwaanɩ ba ni nmʋ yɩrɩ dɩm ŋwa, yɩ ba taa kwarɩ-m, nɩnɛɛnɩ nmʋ tɩtɩ nɔɔna Yisɩrayɛlɩ tiinə bam na kɩ te tɩn. Ba maa wʋ́ lwarɩ nɩ digə kantʋ a na lɔgɩ tɩn sɩɩnɩ ka yɩ nmʋ yɩrɩ dɩm zulə ŋwaanɩ mʋ.
34 Nmʋ nɔɔna bam na nuŋi sɩ ba vu mɛ maama n na tʋŋɩ-ba sɩ ba zaŋɩ najara dɩ ba dʋna, yɩ ba na zɩgɩ ba jeeri tɩʋ kʋntʋ n na kuri tɩn, dɩ Wɛ-digə kantʋ a na lɔga nmʋ yɩrɩ dɩm zulə ŋwaanɩ tɩn ba loori zǝnǝ nmʋ tee nɩ, 35 sɩ n jǝni wɛyuu nɩ n cəgi ba wɛ-loro kʋm dɩ ba na magɩ ba japoori ba loori te n yigə nɩ tɩn, sɩ n daarɩ n kɩ cɩga n pa-ba.
36 Nɔɔn-nɔɔnʋ tǝrǝ o na ba kɩ lwarɩm.d Nmʋ nɔɔna bam nan na kɩ lwarɩm pa nmʋ banɩ zaŋɩ dɩ ba, n waɩ n yagɩ sɩ ba dʋna di-ba pa ba ji pɩɩna sa-tɩʋ nɩ yigə yigə naa bwələ bwələ dɩ. 37 Je sɩm kʋntʋ nɩ ba wʋbʋŋa na joori yɩ ba ləni ba wʋʋ Wɛ ŋwaanɩ, sɩ n cəgi ba wɛ-loro. Ba na zɩgɩ ba dʋna bam tɩʋ nɩ ba loori‑m yɩ ba wɩ: ‹Dɩ́ sɩɩnɩ dɩ́ cɔgɩ mʋ yɩ dɩ́ kɩ lwarɩm dɩ kǝm-balwaarʋ›, 38 ba maa na pipiri ba joori n te dɩ ba wʋʋ maama, nan sɛ sɩ n cəgi ba wɛ-loro kʋm. Ba na maŋɩ sa-tɩʋ nɩ ba zɩgɩ ba jeeri tɩga kantʋ n na pɛ ba nabaara bam tɩn, dɩ tɩʋ kʋlʋ nmʋ na kuri n pa n tɩtɩ tɩn, dɩ a na lɔgɩ digə kalʋ nmʋ yɩrɩ dɩm zulə ŋwaanɩ tɩn, 39 sɩ n jǝni n wɛyuu sɔŋɔ kʋm nɩ, n cəgi ba wɛ-loro kʋm dɩ ba kərə kam, sɩ n daarɩ n kɩ cɩga n pa-ba. Nan kwe n nɔɔna na kɩ kʋlʋ maama ba cɔgɩ n yigə tɩn n yagɩ n cɛ-ba.
40 Amʋ Tu Wɛ, nan yɔɔrɩ n pa n yi taa pagɩ digə kantʋ baŋa nɩ, yɩ n pʋrɩ n zwa sɩ n tan cəgi wara yalʋ maama ba na yǝni ba loori‑m ka wʋnɩ tɩn.
41 Yuutu Baŋa-Wɛ, nan zaŋɩ
n ba n zʋ n jǝŋǝ je sɩm nɩ!
Tɔgɩ dɩ n ni-gonim daka kam n ba n tan zʋʋrɩ da,
sɩ n dam dɩm brɩ jaja!
Pa n zaanɩ taa wʋ kaanɩm tiinə bam baŋa nɩ,
nɩ ba zʋ gwar-laarʋ mʋ tɩn.
Pa n tɩtɩ nɔɔna bam taa jɩgɩ wʋpolo,
n na yǝni n kɩ-ba lanyɩranɩ tɩn ŋwaanɩ.
42 Yɩ fɔgɩ n vɩn wʋlʋ n laan na tiŋi
sɩ o di paarɩ n nɔɔna baŋa nɩ tɩn.
Nan guli Pɛ Davidi gulə,
dɩ nmʋ na goni ni dɩd-o
n sono kʋm ŋwaanɩ tɩn.»