Pwa Twannʋ Tɩle Tu
Eli ve o jeeri Pɛ Ahazɩa
1
Pɛ Akabɩ dɛɛn na tɩgɩ tɩn, mʋ Moabɩ tiinə vɩn sɩ ba taa wʋ Yisɩrayɛlɩ tiinə dam kuri nɩ.2 Dɛ dɩdwɩ mʋ Samari tɩʋ pɛ Ahazɩa zɩgɩ o nayuu nɩ o tɔgɩ təkoro kʋm nɩ o cɔɔlɩ o tʋ tɩga nɩ pa o tiini o pogili. O ma tʋŋɩ o tɩntʋŋna sɩ ba vu ba bwe Ekoron tiinə jwəm Baal-Zebubɩ ba nii, oó joori o zaŋɩ naa o daa bá zaŋɩ.
3 Baŋa-Wɛ malɛka ma vu o ta dɩ Wɛ nijoŋnu Eli na yɩ Tisibi tu tɩn ka wɩ: «Zaŋɩ n vu n jeeri Pɛ Ahazɩa tɩntʋŋna bam n bwe-ba nɩ: ‹Awo, bɛŋwaanɩ mʋ abam maa ve sɩ á bwe Ekoron tiinə jwəm Baal-Zebubɩ sɩ á nii? Wɛ nan tǝrǝ Yisɩrayɛlɩ tɩʋ wʋnɩ mʋ na?a 4 Nan ve-na á ta dɩ pɛ wʋm nɩ o brɩ o bá zaŋɩ sara kalʋ o na tigi ka wʋnɩ tɩn. O maŋɩ sɩ o tɩ mʋ. Baŋa-Wɛ na tagɩ te tɩn mʋ kʋntʋ.› » Eli ma sɩɩnɩ o vu o kɩ kʋntʋ.
5 Tɩntʋŋna bam ma joori ba vu pɛ Ahazɩa te. O ma bwe-ba o wɩ: «Bɛŋwaanɩ mʋ abam joori á ba yo?» 6 Ba ma ləri ba wɩ: «Nɔɔnʋ mʋ jeeri dɩbam o ta o wɩ: dɩ́ joori dɩ́ ba dɩ́ ta dɩ brɩ-m nɩ Baŋa-Wɛ mʋ tagɩ dɩ nmʋ o wɩ: ‹Bɛŋwaanɩ mʋ n tʋŋɩ nɔɔna sɩ ba vu ba bwe Ekoron tiinə jwəm Baal-Zebubɩ ba nii? Wɛ tǝrǝ Yisɩrayɛlɩ tɩʋ wʋnɩ mʋ pa n kɩ kʋntʋ na? Nmʋ kǝm dɩm kʋntʋ ŋwaanɩ n bá yagɩ sara kalʋ n na tigi ka wʋnɩ tɩn. Nmʋ maŋɩ sɩ n tɩ mʋ.› »
7 Ahazɩa ma bwe-ba o wɩ: «Nɔɔnʋ wʋm na jeeri abam yɩ o ta kʋntʋ doŋ tɩn nyɩ tɩta mʋ?»
8 Tɩntʋŋna bam ma lǝr-o ba wɩ: «Nɔɔnʋ wʋm zʋ gɔrɔ kʋlʋ na jɩgɩ varɩm kʋrʋ tɩn mʋ. O ma vɔ varɩm tɔnɔ kilə o təŋə nɩ.» Ahazɩa maa wɩ: «Tisibi tu Eli mʋ kʋntʋ.»
9 Pɛ wʋm ma lɩ jar-kərə fiinnu dɩ ba yigə tu o tʋŋɩ-ba Eli tee nɩ. Jar-kərə yigə tu wʋm ma vu o na Eli na je piu kʋdoŋ yuu nɩ. O ma ta dɩd-o o wɩ: «Wɛ tɩntʋŋnʋ, pɛ wʋm wɩ n tu n ba o te.» 10 Eli ma ləri jar-kərə yigə tu wʋm o wɩ: «Amʋ na sɩɩnɩ a yɩ Wɛ tɩntʋŋnʋ, sɩ o pa min-vʋgʋ zɩgɩ wɛyuu nɩ dɩ ba dɩ di nmʋ dɩ n nɔɔna fiinnu bam maama kulə.» O na tagɩ kʋntʋ o ti tɩn, mʋ mim dɩm sɩɩnɩ dɩ nuŋi wɛyuu nɩ dɩ ba dɩ zwɛ ba maama.
11 Kʋntʋ na kɩ tɩn, pɛ wʋm ma joori o tʋŋɩ jar-kərə fiinnu dɩ ba yigə tu yɩ ba vu Eli te. Yigə tu wʋm ma ta dɩ Eli o wɩ: «Wɛ tɩntʋŋnʋ, pɛ wʋm wɩ n kɩ lɩla n tu n ba o te.» 12 Eli ma ləri o wɩ: «Amʋ na sɩɩnɩ a yɩ Wɛ tɩntʋŋnʋ, sɩ o pa min-vʋgʋ zɩgɩ wɛyuu nɩ dɩ ba dɩ di nmʋ dɩ n nɔɔna fiinnu bam maama kulə.» Wɛ min-vʋgʋ kʋm ma sɩɩnɩ kʋ nuŋi wɛyuu nɩ kʋ ba kʋ zwɛ ba maama kulə.
13 Kʋntʋ na kɩ tɩn, pɛ wʋm daa ma joori o tʋŋɩ jar-kərə fiinnu dɩ ba yigə tu sɩ ba vu Eli te o kɩ yigǝ tiinǝ batɔ tu. Jar-kərə yigə tu wʋm ma vu o kuni doonǝ Eli yigə nɩ yɩ o loori‑o o wɩ: «Wɛ tɩntʋŋnʋ, duri amʋ dɩ a kwaga nɔɔna bam ŋwaŋa, sɩ n yagɩ sɩ dɩ́ taa ŋwɩ. 14 Kʋ na yɩ jar-kərə yigǝ tiinǝ bale bam dɩ ba kwaga nɔɔna bam, dɩ́ maanɩ min-vʋgʋ kʋm na zɩgɩ wɛyuu nɩ kʋ ba kʋ di ba maama te tɩn. Kʋ nan na yɩ amʋ, duri a ŋwaŋa sɩ n yagɩ sɩ a yɩ tɩ.»
15 Baŋa-Wɛ malɛka kam ma ta dɩ Eli ka wɩ: «Zaŋɩ n tɔgɩ dɩd-o sɩ á tu á vu pɛ wʋm te. Nan yɩ ta n kwarɩ fʋʋnɩ.» Eli ma sɩɩnɩ o tu pa ba tɔgɩ daanɩ ba vu ba yi pɛ wʋm te. 16 Eli ma ta dɩ pɛ wʋm o wɩ: «Baŋa-Wɛ na tagɩ kʋlʋ tɩn mʋ tɩntʋ: Nmʋ na tʋŋɩ nɔɔna sɩ ba vu ba bwe Ekoron tiinə jwəm Baal-Zebubɩ ba nii tɩn, kʋ yɩ Wɛ na tǝrǝ Yisɩrayɛlɩ tɩʋ wʋnɩ sɩ n bwe‑o n nii tɩn ŋwaanɩ mʋ na? Kǝm dɩm kʋntʋ ŋwaanɩ, nmʋ daa bá yagɩ sara kalʋ n na tigi ka wʋnɩ tɩn sɩ n zaŋɩ wɛɛnɩ. N maŋɩ sɩ n tɩ mʋ.»
17 Pɛ Ahazɩa ma sɩɩnɩ o tɩ, sɩ kʋ maŋɩ dɩ Wɛ nijoŋnu Eli na wuuri o ta o taanɩ te tɩn. Ahazɩa dɛɛn ba jɩgɩ bəkərə. Kʋntʋ ŋwaanɩ o nyaanɩ Zʋram ma ləri o yuu nɩ o ji Yisɩrayɛlɩ tɩʋ pɛ. Kʋ dɛɛn kɩ maŋa kalʋ Zʋzafatɩ bu Yoram na di paarɩ Zuda tɩʋ nɩ o kɩ bɩna yale tɩn mʋ. 18 Ahazɩa dɛɛn na di paarɩ yɩ o tʋŋɩ wǝǝnu tɩlʋ maama tɩn, ba pʋpʋnɩ-tɩ ba tiŋi Yisɩrayɛlɩ Tɩʋ Pwa Cɩbarɩ tɔnɔ kʋm wʋnɩ.