Zakɔbɩ joŋi Yizakɩ yu-yoŋo dɩm
27
Yizakɩ dɛɛn ma kwɩn yɩ o yiǝ yam dwe. O dɛɛn ma bəŋi o bu-kwɩan Esayu yɩ o laan ta dɩd-o o wɩ: «Amʋ bu.» O dɩ ma ləri o wɩ: «Nii-nɩ da.» 2 Yizakɩ maa wɩ: «Amʋ laan yɩ nankwɩan mʋ yɩ a yǝri amʋ tʋʋnɩ dɛ. 3 Kʋntʋ tɩn, kwe n taŋa kam dɩ ka cɩna, sɩ n vu gaa n tɔɔrɩ n gʋ ga-varɩm n pa-nɩ.a 4 Laan kwe varɩm wʋm n ma n kɩ wʋdiu na ywəmmə nɩ a na soe-kʋ te tɩn, sɩ n daarɩ n ja n ba n pa-nɩ sɩ a di. Nmʋ na kɩ kʋntʋ, a laan wʋ́ sɔɔlɩ Wɛ sɩ DƖ ma kɩ nmʋ yu-yoŋo, sɩ a daarɩ sɩ a laan na wʋ́ tɩ, sɩ a tɩ.»5 Yizakɩ dɛɛn na wʋra o ŋɔɔnɩ dɩ Esayu kʋntʋ tɩn, Rebeka ya zɩgɩ o cəgi mʋ. Esayu maa zaŋɩ o nuŋi o kɛ gaa sɩ o gʋ varɩm o ja ba. 6 O na kɛ o daarɩ tɩn, Rebeka ma ta dɩ Zakɔbɩ o wɩ: «Amʋ ni nmʋ ko na tagɩ dɩ n zɩmbaarʋ o wɩ: 7 ‹Ve n gʋ ga-varɩm n ja n ba n saŋɩ wʋdiu n pa-nɩ sɩ a di, sɩ a laan sɔɔlɩ Baŋa-Wɛ sɩ DƖ ma kɩ n yu-yoŋo, sɩ a daarɩ sɩ a laan na wʋ́ tɩ, sɩ a tɩ.› 8 A bu, fɔgɩ n cəgi, sɩ n daarɩ n kɩ kʋlʋ a na wʋ́ brɩ-m tɩn. 9 Zʋ vara bam wʋnɩ n lɩ bʋ-balɩ sɩle n ja n ba n pa-nɩ. Amʋ laan wʋ́ ma-sɩ a ma saŋɩ n ko wʋdiu, sɩ kʋ taa ywəmmə nɩ o na soe-kʋ te tɩn. 10 Sɩ n laan ja n zʋ n pa n ko sɩ o di. Kʋntʋ wʋ́ pa o sɔɔlɩ Wɛ sɩ DƖ kɩ nmʋ yu-yoŋo, yɩ o laan daarɩ o tɩ.»
11 Zakɔbɩ ma ta dɩ o nu Rebeka o wɩ: «Nmʋ ye nɩ amʋ zɩmbaarʋ Esayu yɩ nɔn-kʋgʋ mʋ, yɩ amʋ daɩ nɔn-kʋgʋ. 12 Amʋ ko na taanɩ amʋ o nii, oó taa nii-nɩ nɩ wʋlʋ na gan‑o mʋ, yɩ amʋ ya na beeri sɩ o sɔɔlɩ Wɛ sɩ DƖ ma kɩ-nɩ yu-yoŋo tɩn, a laan wʋ́ joori a ja lwarɩm mʋ a ba a pa a tɩtɩ.» 13 O nu wʋm maa wɩ: «Amʋ bu, yagɩ sɩ sɔɔlɩm dwi maama ba amʋ baŋa nɩ. Nmʋ za n kɩ amʋ na wɩ n kɩ te tɩn. Ve n ja bʋnɩ dɩm n ba n pa-nɩ.»
14 Zakɔbɩ ma sɩɩnɩ o vu o ja-dɩ o ba o pa o nu, yɩ o saŋɩ wʋdiu kʋlʋ na ywəmmə tɩn, nɩnɛɛnɩ o ko wʋm na soe wʋdiu kʋm te tɩn. 15 Rebeka laan ma kwe o bu-kwɩan Esayu gwar-laarʋ na wʋ o tee nɩ tɩn, o zʋ o jɩŋa-bu Zakɔbɩ. 16 O daa ta ma kwe bʋnɩ dɩm tankwallʋ tɩm o ma o kwǝli Zakɔbɩ jɩan yam dɩdaanɩ o ban dɩm mɛ na yɩ sisolo tɩn. 17 O laan ma kwe wʋdi-yoŋo kʋm, dɩ dɩpɛ dɩm o na kɩ tɩn o pa o bu Zakɔbɩ.
18 Zakɔbɩ ma vu o ko te yɩ o wɩ: «A ko.» O ma ləri o wɩ: «Amʋ bu wɔɔ mʋ kʋntʋ?» 19 Zakɔbɩ ma ləri o ko wʋm o wɩ: «Amʋ yɩ nmʋ bu-kwɩan Esayu mʋ. Amʋ nan kɩ nɩnɛɛnɩ nmʋ na tagɩ dɩ amʋ te tɩn mʋ. Kʋntʋ tɩn, zaŋɩ n jǝni n di amʋ ga-varɩm a na saŋɩ tɩn, sɩ n laan daarɩ n sɔɔlɩ Wɛ sɩ DƖ ma kɩ-nɩ yu-yoŋo.» 20 Yizakɩ ma bwe‑o o wɩ: «Amʋ bu, n kɩ tɩta mʋ n na-kʋ lɩla tɩntʋ?» O ma ləri o wɩ: «Nmʋ Yuutu Baŋa-Wɛ mʋ wǝli-nɩ kʋntʋ.» 21 Yizakɩ laan ma ta dɩ Zakɔbɩ o wɩ: «Amʋ bu, nan tɩtwəni n yi amʋ yɩra, sɩ a taanɩ‑m a nii nmʋ sɩɩnɩ n yɩ amʋ bu-kwɩan Esayu mʋ naa n daɩ.» 22 Zakɔbɩ ma tɩtwəni o yi o ko Yizakɩ te. O ma taan‑o o nii yɩ o wɩ: «Kwǝrǝ kam yɩ Zakɔbɩ kwǝrǝ mʋ, yɩ jɩan yam laan yɩ Esayu jɩan.» 23 O maa wʋ lwar-o, bɛŋwaanɩ o jɩan yam dɛɛn jɩgɩ kʋrʋ yɩranɩ mʋ, nɩ Esayu jɩan yam na yɩ tɩte tɩn. O laan ma sɛ sɩ o sɔɔlɩ Wɛ sɩ DƖ ma kɩ o bu wʋm yu-yoŋo. 24 O daa ma bwe‑o o wɩ: «Kʋntʋ tɩn, nmʋ sɩɩnɩ n yɩ amʋ bu-kwɩan Esayu mʋ na?» O ma ləri o wɩ: «Ɛɛn.»
25 Yizakɩ laan ma ta o wɩ: «Ja n ga-varɩm nwana yam n ba n pa-nɩ sɩ a di, sɩ a laan daarɩ a sɔɔlɩ Wɛ sɩ DƖ kɩ nmʋ yu-yoŋo.» Zakɔbɩ ma ja wʋdiu kʋm o yi o te o pa‑o yɩ o di. O ta ma pa‑o dɩvɛn yɩ o nyɔ. 26 O ko Yizakɩ laan ma ta dɩd-o o wɩ: «Amʋ bu, tɩtwəni n yi yo, sɩ n kukwǝri-nɩ.» 27 O dɩ ma yi o te o kukwǝr-o. Yizakɩ ma ni o gwaarʋ tɩm lwəm, yɩ o daarɩ o sɔɔlɩ Wɛ o wɩ: «Nii mʋ! Amʋ bu wʋm lwəm dɩm nyɩ nɩnɛɛnɩ gaa kʋlʋ Baŋa-Wɛ na kɩ yu-yoŋo DƖ yagɩ kʋ baŋa nɩ tɩn lwəm mʋ.
28 Wɛ wʋ́ pa nyɔnɔ nuŋi wɛyuu
kʋ pa nmʋ tɩga kam fɔgɩ ka kɩ wʋdiiru zanzan,
sɩ n mɩna dɩ n dɩvɛn gaalɩ.
29 Wɛ wʋ́ pa dwi-gɛ tiinə taa tʋŋɩ ba paɩ nmʋ
yɩ nɔɔna tiiri nmʋ yigə nɩ ba pa‑m zulə.
Nmʋ wʋ́ tan yɩ n ko-biə bam yuutu,
yɩ nmʋ nu-biə bam maama wʋ́ tiiri nmʋ yigə nɩ ba pa‑m zulə.b
Balʋ na sɔɔlɩ lwarɩm ba yagɩ nmʋ baŋa nɩ tɩn
wʋ́ joori ba na sɔɔlɩm kʋntʋ doŋ ba baŋa nɩ.
Balʋ nan na sɔɔlɩ Wɛ sɩ DƖ kɩ nmʋ lanyɩranɩ tɩn,
dɩ wʋ́ joori ba na yu-yoŋo.»
30 Yizakɩ na sɔɔlɩ Wɛ sɩ DƖ kɩ Zakɔbɩ yu-yoŋo o ti yɩ Zakɔbɩ nuŋi pooni o daarɩ o ko wʋm tɩn, mʋ o zɩmbaarʋ Esayu o zɩgɩ gaa nɩ o yi. 31 Wʋntʋ dɩ ma kɩ wʋdi-yoŋo o ja o zʋ o ko tee nɩ. Esayu laan ma ta o ko o wɩ: «A ko, zaŋɩ n jǝni sɩ n di a ga-varɩm nwana yam, sɩ n daarɩ n sɔɔlɩ Wɛ sɩ DƖ amʋ yu-yoŋo.» 32 O ko Yizakɩ ma bwe‑o o wɩ: «Nmʋ yɩ wɔɔ mʋ?» O ma ləri o wɩ: «Amʋ yɩ nmʋ bu-kwɩan Esayu mʋ.» 33 Yizakɩ ma ni yɩ kʋ sɔɔrɩ o yɩra kʋ pa ya tiini ya saɩ. O ma bwe‑o o wɩ: «Sɩ wɔɔ nan mʋ jaanɩ ga-varɩm nwana yam o zʋ yo o pa amʋ tɩn? Amʋ di a ti mʋ kʋntʋ yɩ a maŋɩ a sɔɔlɩ Wɛ sɩ DƖ kɩ wʋntʋ yu-yoŋo, yɩ nmʋ laan n ba n zʋʋrɩ. Wʋntʋ nan wʋ́ sɩɩnɩ o na Wɛ yu-yoŋo dɩm kʋntʋ mʋ!»
34 Esayu na ni o ko taanɩ dɩm kʋntʋ tɩn, o ma tiini o kaasɩ wɛ wɛ yɩ o coosǝ o ko wʋm tee nɩ o wɩ: «A ko, a loori‑m! Sɔɔlɩ Wɛ sɩ DƖ kɩ amʋ dɩ yu-yoŋo!» 35 O ma lǝr-o o wɩ: «Nmʋ nyaanɩ wʋm zʋ amʋ te mʋ o ganɩ-nɩ o ma joŋi Wɛ yu-yoŋo dɩlʋ ya na yɩ nmʋ nyɩm tɩn.»
36 Esayu maa wɩ: «O yɩrɩ na yɩ Zakɔbɩ tɩn sɩɩnɩ kʋ yɩ cɩga mʋ! O ganɩ amʋ tɩntʋ o kɩ kuni bɩle mʋ.c O maŋɩ o ŋɔ amʋ bu-kwɩan nyɔɔrɩ dɩm, yɩ lele kʋntʋ o daa vrɩ Wɛ yu-yoŋo dɩlʋ ya na yɩ a nyɩm tɩn o wǝli da!» O laan daa ma bwe o ko wʋm o wɩ: «Kʋntʋ, Wɛ yu-yoŋo daa wʋ daarɩ nmʋ tee nɩ kɩ amʋ yuu nɩ na?» 37 Yizakɩ ma ləri Esayu o wɩ: «Amʋ maŋɩ a pa wʋntʋ ji nmʋ yuutu yɩ a ta pa o nu-biə maama taa yɩ wʋntʋ tɩntʋŋa. A nan ta kwe wʋdi-fɔrɔ dɩdaanɩ dɩvɛn a pa‑o. Kʋntʋ tɩn, amʋ bu, bɛɛ daa mʋ wʋ́ daarɩ sɩ a kwe a pa‑m?»
38 Esayu ma fɔgɩ o ta dɩ o ko o wɩ: «Amʋ ko, nmʋ brɩ n wʋ daarɩ Wɛ yu-yoŋo sɔɔlɩm kʋdoŋ na? Nan sɔɔlɩ Wɛ sɩ DƖ kɩ yu-yoŋo DƖ yagɩ amʋ dɩ yuu nɩ! A ko! A ko!» Esayu ma tʋ kərə nɩ baŋa baŋa.
39 O ko Yizakɩ ma ləri o wɩ:
«Nmʋ zʋʋrɩm je bá taa yɩ tɩga kalʋ na kɩ wʋdiiru zanzan.
Tɩga kam ta bá na wɛyuu nyɔnɔ kʋm.
40 N nyɔɔnɩ dam dɩ n sʋgʋ mʋ n wʋ́ ma n joŋi n tɩtɩ.
Nmʋ nan mʋ wʋ́ sɛ n pa n nyaanɩ.
Kʋ laan nan na zʋ nmʋ yɩra,
nmʋ wʋ́ vrɩ n tɩtɩ wʋntʋ dam kuri nɩ.»
Zakɔbɩ na duri o vu o nabɔŋɔ te tɩn
41 Esayu na ni kʋntʋ tɩn, o ma dʋnɩ Zakɔbɩ, ba ko na sɔɔlɩ Wɛ sɩ DƖ kɩ yu-yoŋo wʋntʋ yuu nɩ tɩn ŋwaanɩ. O ma ta o tɩtɩ nɩ o wɩ: «Dɩbam ko bá daanɩ yɩ o tɩ. O luə kam kwaga nɩ, amʋ laan wʋ́ gʋ a nyaanɩ Zakɔbɩ.»
42 Rebeka dɛɛn ma ni o bu-kwɩan Esayu na bʋŋɩ te tɩn. O ma tʋŋɩ o bəŋi Zakɔbɩ yɩ o ta dɩd-o o wɩ: «Nmʋ zɩmbaarʋ wʋm bʋŋɩ sɩ o gʋ-m mʋ sɩ kʋ pa o bam zuri. 43 Kʋntʋ tɩn, kɩ tɩte amʋ na wʋ́ brɩ-m tɩn: Duri n vu amʋ nabɔ Laban te Haran nɩ. 44 Ta n zʋʋrɩ wʋntʋ sɔŋɔ nɩ sɩ kʋ taa ve maŋa kalʋ nmʋ zɩmbaarʋ wʋm bam dɩm na wʋ́ zuri tɩn. 45 O bam dɩm na sɩɩnɩ dɩ zuri yɩ o swe nmʋ na tʋŋɩ kʋlʋ o yɩra nɩ tɩn, amʋ laan wʋ́ tʋŋɩ kwərə sɩ nmʋ zɩgɩ dáanɩ n joori yo. Bɛŋwaanɩ mʋ amʋ wʋ́ yɔɔrɩ a ga abam bale dɛ dɩdwɩ wʋnɩ?»
46 Rebeka laan ma ta dɩ Yizakɩ o wɩ: «Hɛtɩ tiinə bukwa bam Esayu na di tɩn, pa an daa ba ni a ŋwɩa ywəəni. Zakɔbɩ dɩ nan daa na lagɩ o di Hɛtɩ tiinə bukɔ je sɩntʋ nɩ, amʋ tʋʋnɩ brɩ dɩ wʋ́ taa garɩ a ŋwɩa.»