Sara tʋʋnɩ
23
Sara dɛɛn jɩgɩ bɩna bi dɩ fiinle-yarpɛ (127) mʋ, 2 yɩ o laan ba o tɩ Kiriyat-Arba nɩ. Kʋ yɩ Kaanan tɩʋ mʋ, kʋ yɩrɩ dɩdoŋ mʋ Ebrɔn. Abraham ma zaŋɩ o vu sɩ o keeri Sara yɩ o kan yi-na o ŋwaanɩ.3 Abraham kaanɩ wʋm na tɩgɩ tɩn, o ma zaŋɩ o baŋa nɩ yɩ o vu sɩ o ŋɔɔnɩ dɩdaanɩ Hɛtɩ tiinə bam. O maa wɩ: 4 «Amʋ yɩ vəru mʋ a na zʋʋrɩ abam tɩtarɩ nɩ. A nan loori tɩga sɩ á pa-nɩ sɩ kʋ taa yɩ mɛ amʋ na wʋ́ kɩ a tʋ wʋm da tɩn.»
5 Hɛtɩ tiinə bam ma ləri Abraham ba wɩ: 6 «Cəgi yo seeni. Nmʋ yɩ Wɛ pabu mʋ dɩbam tɩtarɩ nɩ. Kʋntʋ tɩn, kuri dɩbam yibeelǝ yam wʋnɩ dɩlʋ na lamma dɩ pa‑m tɩn sɩ n kɩ n tʋ wʋm da. Nɔɔn-nɔɔnʋ bá vɩn nmʋ o wɩ n yɩ kɩ n tʋ wʋm o yibeeli nɩ.»
7 Abraham ma zaŋɩ wɛɛnɩ o tiiri tɩga nɩ Hɛtɩ tiinə bam na yɩ tɩga kam tiinə tɩn yigə nɩ. 8 O ma ta dɩ ba o wɩ: «Abam nan na sɛ sɩ amʋ kɩ a kaanɩ wʋm yo seeni, sɩ á sɛ sɩ á loori Tɩsoharɩ bu Efrɔn á pa-nɩ. 9 Loori‑o á pa-nɩ sɩ o kwe Makpela gugoro kʋm na wʋ o kara kam sisəm ni nɩ tɩn o pa-nɩ. Kʋ na yɩ o nyɩm tɩn, amʋ wʋ́ ŋwɩ kʋ səbu kʋm ni maama a pa‑o. Dɩ́ wʋ́ kɩ kʋntʋ abam maama yigə nɩ sɩ bɔɔnɩ dɩm laan ji yibeeli dɩ pa-nɩ.»
10 Hɛtɩ tu Efrɔn dɩ dɛɛn je o nɔɔna bam wʋnɩ. O ma ləri Abraham, Hɛtɩ tiinə balʋ maama dɛɛn na dɛ ba jeeri tɩʋ kʋm manco-pɩɩna yam ni nɩ tɩn dɩ cəgi yigə nɩ, o wɩ: 11 «Amʋ tu, cəgi yo seeni. Amʋ wʋ́ kwe kara kam mʋ a pa‑m zaanɩ, yɩ a ta wʋ́ pa‑m gugoro dɩlʋ na wʋ ka laŋa nɩ tɩn a wǝli da. Amʋ nɔɔna bam yigə nɩ mʋ a kwe a pa‑m. Ve n kɩ n kaanɩ wʋm da.»
12 Abraham daa ma tiiri tɩga nɩ tɩʋ kʋm nɔɔna bam yigə nɩ. 13 O ma ta dɩ Efrɔn, lʋgʋ kʋm nɔɔna bam maama yigə nɩ, o wɩ: «Nan cəgi a na ta kʋlʋ tɩn. Amʋ wʋ́ ŋwɩ tɩga kam səbu a pa‑m. Sɛ sɩ n joŋi səbu kʋm sɩ amʋ dɩ wanɩ a kwe a kaanɩ wʋm a kɩ dáanɩ.»
14 Efrɔn ma ləri Abraham o wɩ: 15 «Amʋ tu, cəgi-nɩ. Tɩga kam səbu maŋɩ dɩdaanɩ səbu-dala biə-yana yɩranɩ mʋ. Kʋntʋ nan daɩ kʋlʋ dɩbam na wʋ́ daanɩ daanɩ kʋ baŋa nɩ tɩn. Kwe-ka n ma n kɩ n kaanɩ wʋm.»
16 Abraham ma sɛ sɩ o ŋwɩ tɩga kam səbu kʋm ni sɩ kʋ maŋɩ dɩ Efrɔn na brɩ te Hɛtɩ tiinə bam maama yigə nɩ tɩn. O ma maŋɩ səbu səbu-dala biə-yana mʋ o pa‑o sɩ kʋ maŋɩ dɩ maŋɩm dɩlʋ pipiu-tiinə bam dɛɛn maŋɩ yaga nɩ te tɩn.
17 Kʋ dɛɛn kɩ kʋntʋ yɩ Efrɔn kara kam na wʋ Makpela nɩ yɩ ka bwələ dɩ Mamre tɩn ba ka ji Abraham nyɩm. Kara kam kʋntʋ dɩdaanɩ gugoro dɩlʋ na wʋ ka wʋnɩ tɩn, dɩdaanɩ tweeru tɩlʋ maama na wʋ kara kam wʋnɩ tɩn laan ma ji Abraham nyɩm. 18 O dɛɛn yəgi-ka Hɛtɩ tiinə balʋ maama na jeeri tɩʋ kʋm manco-pɩɩna yam ni nɩ tɩn tee nɩ mʋ yɩ ba sɛ sɩ kʋ yɩ o nyɩm.