Yohanes dapa penglihatan
4
1 Abis itu, kita tu Yohanes lia satu pintu di sorga da tabuka. Kong kita dengar suara yang perna da babilang pa kita, tu suara itu pe kuat sama deng tu bunyi trompet. Trus tu suara itu babilang lei pa kita, “Yohanes, nae jo kamari! Kita mo se tunjung pa ngana tu hal-hal yang musti mo jadi abis ini.”2 Waktu itu jo, Tuhan pe Roh kuasai pa kita. Trus kita lia satu tahta di sorga, kong ada satu Orang yang da dudu di tahta itu. 3 Dia yang da dudu di tahta itu bacahaya sama deng tu cahaya dari permata yaspis deng sardis, kong ada lei pelangi yang da balingkar di tahta itu. Tu pelangi itu pe cahaya dapa lia sama deng permata zamrud pe cahaya. 4 Kong ada lei dua pulu ampa tahta laeng yang da bakliling di tahta itu, kong di atas tu dua pulu ampa tahta itu ada dudu dua pulu ampa tua-tua. Dorang da pake baju puti kong pa dorang pe kapala ada mahkota dari mas. 5 Ada lei kilat kaluar dari tu satu tahta yang ada di tenga, kong dapa dengar bunyi guntur baku-baku sambung. Di muka tu satu tahta itu ada tuju obor yang da bamanyala, itu no tu Tuhan Allah pe tuju Roh. 6 Deng di muka tu tahta itu dapa lia ada sesuatu yang sama deng lautan kaca tu de pe bening sama deng kristal.
Kong di tenga tahta deng di sekliling tu tahta itu, ada ampa mahluk tu sama deng binatang. Tu ampa mahluk itu pe bagean muka deng blakang punung deng mata. 7 Tu mahluk yang pertama sama deng singa, tu kadua sama deng sapi jantan muda, tu katiga pe muka sama deng manusia, kong yang kaampa sama deng burung rajawali yang da terbang. 8 Tu ampa mahluk itu masing-masing ada anam sayap, kong pa de pe bagean dalam sampe luar punung deng mata. Siang deng malam tu mahluk-mahluk itu nyanda perna brenti bapuji-puji pa Tuhan. Dorang bilang,
“Kudus, kudus, kudus jo Tuhan Allah,
Tuhan Yang Mahakuasa.
Tuhan yang dari dulu ada,
yang skarang ada,
deng yang mo datang lei.”
9 Tu ampa mahluk itu manyanyi lagu puji-pujian deng hormat pa Dia yang da dudu di tahta, kong dorang lei ja bilang makase pa Dia. Dia itu yang hidop slama-lamanya. Kong tiap kali dorang beking bagitu, 10 tu dua pulu ampa tua-tua itu berlutut di muka pa Dia yang da dudu di tahta itu trus dorang semba pa Dia yang hidop slama-lamanya. Kong waktu itu, dorang buka tu dong pe mahkota trus dorang taru di muka tu tahta itu deng babilang,
11 “Ya Tuhan tu torang pe Tuhan Allah.
Cuma Tuhan yang luar biasa,
Tuhan yang pantas dapa hormat,
deng lei Tuhan yang punya kuasa!
Soalnya Tuhan so beking samua,
kong itu samua ada lantaran Tuhan suka itu mo ada,
so itu no Tuhan beking itu samua.”