Orang musti hati-hati jang sampe sesat
4
1 Sudara-sudara yang kita sayang, ngoni jang percaya pa samua orang yang babilang kalu Tuhan Allah pe Roh ada pa dorang. Mar lebe bae ngoni priksa dulu pa dorang supaya tau kalu tu roh yang ada pa dorang itu butul-butul dari Tuhan Allah ato nyanda. Kita bilang bagitu lantaran banya nabi palsu so muncul kong pigi kamana-mana di dunia ini. 2 Bagini de pe cara supaya torang bole tau kalu Tuhan Allah pe Roh ada pa orang ato nyanda: orang yang mangaku kalu Yesus Kristus so datang ka dunia ini jadi manusia, tu orang itu ada Tuhan Allah pe Roh. 3 Mar tu orang yang nyanda mangaku sama deng itu tentang Yesus, pa dia itu nyanda ada Tuhan Allah pe Roh. Tu roh yang ada pa orang itu roh antiKristus. Ngoni so dengar kalu tu roh itu mo datang kong skarang dia so ada di dunia ini.4 Hei ngoni yang kita so anggap kita pe anak-anak, ngoni itu dari Tuhan Allah. Ngoni so se kala tu nabi-nabi palsu, lantaran tu Roh yang ada pa ngoni de pe kuasa lebe basar dari tu roh yang ada di dunia ini. 5 Tu nabi-nabi palsu itu dari dunia ini, so itu dorang cuma babicara tentang hal-hal duniawi. Kong tu orang-orang di dunia yang nyanda kanal pa Tuhan badengar pa tu nabi-nabi palsu itu. 6 Torang ini dari Tuhan Allah. So itu orang yang kanal pa Tuhan Allah, dia itu badengar pa torang. Mar orang yang nyanda badengar pa torang, dia itu nyanda kanal pa Tuhan Allah. Bagitu no sampe torang bole se beda antara tu Tuhan Allah pe Roh yang ja se ajar tu butul deng tu roh yang ja se ajar tu sesat.
Tuhan Allah pe sayang beking orang percaya bole basayang
7 Sudara-sudara yang kita sayang, mari jo torang baku-baku sayang. Soalnya tu sayang itu dari Tuhan Allah, kong sapa jo yang ja basayang, dia itu so kanal Tuhan Allah kong so jadi Dia pe anak. 8 Mar sapa yang nyanda basayang, dia nyanda kanal pa Tuhan Allah lantaran Tuhan Allah itu ja basayang. 9 Tuhan Allah so kase tunjung kalu Dia sayang pa torang deng cara bagini: Dia utus De pe Anak satu-satunya ka dunia ini, supaya lewat tu Anak itu torang bole hidop deng Tuhan sampe slama-lamanya. 10 Bagini tu sayang: bukang kalu torang so sayang pa Tuhan Allah, mar Tuhan Allah yang so sayang pa torang. Dia so utus Dia pe Anak jadi korban supaya lewat De pe anak itu torang pe dosa-dosa bole mo dapa ampung.
11 Sudara-sudara yang kita sayang, kalu Tuhan Allah sayang pa torang sama deng itu, torang lei musti baku-baku sayang. 12 Nyanda ada satu orang yang perna lia pa Tuhan Allah. Mar kalu torang baku-baku sayang, de pe arti Tuhan hidop satu deng torang kong Dia pe sayang beking torang butul-butul basayang iko Dia pe mau.
13 Tuhan Allah so kase Dia pe Roh pa torang, deng bagitu torang bole tau kalu torang tetap hidop satu deng Tuhan Allah kong Tuhan hidop satu deng torang. 14 Trus torang sandiri so lia kong basaksi kalu Bapa so utus Dia pe Anak for se slamat ni dunia ini. 15 Sapa yang mangaku kalu Yesus itu Anak Allah, Tuhan Allah tetap hidop satu deng dia, kong tu orang itu hidop satu deng Tuhan Allah. 16 Torang so tau deng percaya tentang Tuhan Allah pe sayang pa torang.
Tuhan Allah ja basayang. Sapa yang ja basayang, tu orang itu tetap hidop satu deng Tuhan Allah, kong Tuhan Allah lei hidop satu deng dia. 17 Tuhan pe sayang itu ada pa torang. Tu Dia pe sayang itu yang beking torang bole basayang iko De pe mau supaya nanti kalu Tuhan mo adili samua orang, torang nyanda mo tako lantaran torang pe hidop di dunia ini sama deng Tuhan Yesus pe hidop. 18 Kalu torang basayang, torang nyanda ada rasa tako. Soalnya Tuhan Allah beking torang bole basayang iko Dia pe mau, itu no yang beking ilang tu rasa tako. Kalu orang rasa tako Tuhan mo hukum pa dia, itu de pe arti dia blum ada Tuhan Allah pe sayang yang bole beking dia basayang iko Tuhan pe mau.
19 Torang basayang, lantaran Tuhan Allah so lebe dulu sayang pa torang. 20 Kalu ada orang bilang, “Kita sayang pa Tuhan Allah,” mar dia binci pa de pe sudara yang percaya, dia itu pangbadusta. Soalnya sapa tu nyanda sayang pa de pe sudara yang percaya yang dia dapa lia, nyanda mungkin dia sayang pa Tuhan Allah yang nyanda dapa lia. 21 Ini tu prenta yang torang trima dari Tuhan Allah: sapa yang sayang pa Tuhan Allah, dia lei musti sayang pa de pe sudara yang percaya.