Jang ja se beda-beda orang
2
1 Kita pe sudara-sudara, torang so percaya pa Yesus Kristus, tu torang pe Tuhan yang luar biasa. So itu torang nimbole se beda-beda orang. 2 De pe conto, ada orang kaya maso pa ngoni pe tampa bakumpul for baibada. Dia da pake cincin mas deng baju yang bagus deng mahal. Kong maso lei tu orang miskin ka situ. Tu orang miskin itu da pake baju besae. 3 Kong pa tu orang yang da pake baju bagus deng mahal itu ngoni sambut deng hormat, trus bilang pa dia, “Mari bapak, dudu jo di tampa yang bagus ini!” Mar pa tu orang miskin itu ngoni bilang, “Badiri jo di sana!” ato “Dudu jo di lante di dekat kita pe tampa kaki!” 4 Deng beking bagitu, ngoni so se beda-beda orang kong so jadi hakim deng maksut yang jaha.5 Sudara-sudara yang kita sayang, dengar akang tu kita mo bilang ini: Tuhan so pili tu orang-orang yang dunia ja anggap miskin supaya dorang percaya kuat pa Dia. Dorang itu yang nanti mo jadi orang-orang dari Tuhan Allah yang Berkuasa sbagai Raja, itu sama deng tu Dia da janji pa samua orang yang sayang pa Dia. 6 Mar ngoni da hina tu orang-orang miskin. Padahal tu orang-orang kaya yang justru ja tindas pa ngoni kong bawa pa ngoni ka pengadilan for urus pa ngoni di situ. 7 Dorang itu lei yang ja hojat tu Nama yang luar biasa. Kong lewat Nama itu, ngoni jadi Tuhan punya.
8 Kalu ngoni beking tu atoran yang paling penting tu da tulis di Kitab Suci, ngoni so beking tu bae. Tu atoran itu pe bunyi bagini, “Sayang jo pa orang laeng sama deng ngoni sayang pa ngoni pe diri sandiri.”
9 Mar kalu ngoni ja se beda-beda orang, ngoni so beking dosa. Deng bagitu ngoni so langgar tu atoran-atoran di Kitab Suci. 10 Soalnya sapa jo yang beking samua Tuhan Allah pe atoran-atoran mar kalu dia langgar satu jo dari tu atoran itu, dia so langgar samua atoran. 11 Soalnya Tuhan Allah perna bilang, “Jang bersina,” deng Dia lei bilang, “Jang babunung.” Jadi biar ngoni nyanda bersina mar ngoni da babunung orang, itu sama jo deng ngoni da langgar samua tu Tuhan Allah pe atoran.
12 So itu torang musti hati-hati kalu babicara deng beking sesuatu, lantaran torang tau kalu nanti Tuhan mo adili pa samua orang pake tu hukum yang bole bantu se lapas manusia dari dosa. 13 Soalnya nanti waktu Tuhan mo adili pa manusia, Dia nyanda mo rasa kasiang pa orang-orang yang nyanda ada rasa kasiang pa orang laeng. Mar pa orang-orang yang so se tunjung tu dong pe rasa kasiang pa orang laeng, Tuhan nyanda mo hukum pa dorang.
Kalu torang percaya pa Tuhan, pasti torang ja beking tu bae
14 Kita pe sudara-sudara yang percaya, kalu satu orang bilang dia percaya pa Tuhan, mar dia nyanda ja beking tu bae, itu sama deng de pe percaya pa Tuhan nyanda ada de pe guna kong dia nyanda mo slamat. 15 De pe conto bagini: ada ngoni pe sudara laki-laki ato parampuang nyanda ada baju deng nyanda cukup makanan for mo makang hari-hari. 16 Kong ngoni cuma da bilang pa dia, “Pigi jo deng bae-bae. Torang harap ngana da pake baju supaya nyanda rasa dingin deng lei cukup makanan supaya bole mo kanyang.” Tu ngoni da bilang itu nyanda ada de pe guna lantaran ngoni nyanda bantu apa tu dia pe perlu. 17 Bagitu lei deng torang pe percaya pa Tuhan. Kalu torang percaya mar nyanda ja beking tu bae, tu torang pe percaya itu nyanda ada de pe guna.
18 Mar ada orang stou yang mo bilang, “Ngana percaya pa Yesus, mar kita ja beking tu bae pa orang laeng.” Pa tu orang yang bilang bagitu, kita mo bilang, “Ngoni nyanda dapa se bukti pa kita kalu orang butul-butul percaya pa Tuhan kalu dia nyanda ja beking tu bae pa orang laeng. Mar kita mo se tunjung tu kita pe percaya pa Tuhan deng cara ja beking tu bae pa orang laeng.” 19 Ngoni percaya kalu cuma ada satu Tuhan Allah. Itu bagus! Mar tu setang-setang lei percaya tu hal itu kong dorang tako sampe totofore.
20 Hei ngoni orang-orang yang nintau apa-apa! Kalu orang percaya pa Tuhan mar nyanda ja beking tu bae pa orang laeng, dia pe percaya itu nyanda ada de pe guna. 21 De pe conto tu torang pe nene moyang Abraham. Dulu Tuhan Allah suru pa Abraham taru de pe anak Ishak di tampa ja kase korban persembahan for mo jadi korban persembahan pa Tuhan. Abraham beking tu Tuhan da suru itu, kong Tuhan bilang kalu Abraham itu orang yang butul. 22 Jadi ngoni tau kalu Abraham da beking dua hal ini: dia percaya pa Tuhan deng lei dia ja beking tu Tuhan da suru pa dia, deng bagitu Abraham pe percaya pa Tuhan jadi sempurna lantaran dia beking tu Tuhan da suru. 23 Jadi deng Abraham beking bagitu, apa tu da tulis dulu di Kitab Suci itu so jadi gnap. Bagini tu da tatulis, “Abraham percaya pa Tuhan Allah kong Tuhan beking Abraham jadi orang yang butul di muka pa Dia.” So itu no ja bilang kalu tu Abraham itu Tuhan Allah pe tamang.
24 Jadi torang bole tau kalu Tuhan Allah beking torang jadi orang yang butul di muka pa Dia bukang cuma lantaran torang bilang percaya pa Dia, mar lantaran torang percaya deng lei ja beking tu bae pa orang laeng. 25 Ada lei tu conto laeng bagini: dulu ada satu parampuang tu de pe nama Rahab. Dia itu parampuang nakal. Waktu itu, dia trima kong se sambunyi tu orang Israel pe mata-mata pa de pe ruma kong tolong pa dorang kaluar lewat jalang laeng supaya slamat. Deng Rahab beking bagitu, Tuhan beking dia jadi orang yang butul di muka pa Tuhan.
26 Jadi orang yang bilang kalu dia percaya pa Tuhan, mar dia nyanda ja beking tu bae pa orang laeng, tu de pe percaya itu nyanda ada de pe guna. Dia itu sama deng orang yang so mati, ada badan mar so nyanda ada jiwa.