1 Timotius 4

Hati-hati pa orang-orang yang ja se ajar tu sesat

1 Roh Kudus da bilang deng jelas kalu nanti di hari-hari seblum kiamat, mo ada orang percaya yang nyanda mo percaya lei pa Tuhan. Tu orang-orang itu cuma mo iko pa setang-setang yang ja beking sesat pa manusia deng lei ja beking tu setang-setang pe ajaran. 2 Tu orang-orang yang ja kase ajar tu ajaran sesat itu, dorang itu munafik kong pangbadusta, dorang pe hati so nintau tu butul. 3 Dorang itu kase ajar kalu orang nimbole kaweng, deng lei nimbole mo makang bebrapa jenis makanan, padahal Tuhan Allah so beking tu samua makanan itu for mo makang. Kong kalu orang-orang percaya yang ja iko tu ajaran yang butul itu mo makang, dorang bilang makase dulu pa Tuhan Allah baru dorang makang. 4 Soalnya samua tu Tuhan Allah da beking itu bae. Tu Dia da beking itu samua nyanda ada yang haram, asal torang trima deng bilang makase pa Tuhan. 5 Soalnya Tuhan Allah pe firman deng torang pe sombayang beking samua itu jadi kudus.

Kristus Yesus pe playan yang bae

6 Timotius, ngana musti ja se ajar tu hal-hal itu pa sudara-sudara yang percaya supaya dorang nyanda iko tu ajaran sesat, deng bagitu ngana mo jadi Kristus Yesus pe orang karja yang bae. Kalu ngana beking bagitu, ngana pe percaya jadi lebe kuat lantaran ngana slalu iko tu ajaran yang butul, tu ajaran itu yang dari dulu orang so se ajar pa ngana. 7 Ngana jang badekat deng tu orang-orang yang suka bacirita dongeng-dongeng yang nyanda ada guna. Mar lebe bae tare, ngana latih jo bae-bae tu ngana pe diri supaya ja beking Tuhan Allah pe mau. 8 Kalu orang latih de pe diri for beking de pe badan jadi kuat, itu memang bae mar de pe guna cuma sadiki. Mar kalu orang latih de pe diri for ja beking Tuhan Allah pe mau, itu banya skali de pe guna. Itu bawa berkat for torang pe hidop skarang di dunia ini deng lei for torang pe hidop nanti. 9 Tu kata-kata itu butul kong torang musti iko akang itu. 10 Soalnya torang da brusaha kras ja layani pa Tuhan Allah lantaran torang baharap deng yakin pa Dia yang hidop. Dia itu yang kase slamat samua orang dari hukuman dosa, lebe kusus tu orang-orang yang percaya.

11 Ngana kase tau deng kase ajar jo tu samua itu pa orang-orang. 12 Ngana jang se biar orang mo pandang enteng pa ngana lantaran ngana masi muda. Mar lebe bae, ngana jadi conto yang bae for orang percaya. Ngana kase conto pa dorang lewat ngana pe bicara, ngana pe kalakuan, ngana pe sayang pa orang laeng, ngana pe percaya pa Tuhan, deng lei tu ngana pe pikiran musti bersi di muka pa Tuhan. 13 Samantara ngana batunggu pa kita mo datang, ngana musti ja baca akang tu Kitab Suci for orang-orang percaya di situ. Ngana lei kase smangat tu dorang pe percaya deng lei ajar bae-bae pa dorang. 14 Jang ngana nyanda pake tu karunia yang Roh Kudus da kase pa ngana tempo hari. Tu karunia itu ngana da trima waktu tu pemimpin-pemimpin jemaat da taru tangan pa ngana for mo utus pa ngana. Waktu itu Tuhan Allah da kase tau tentang tu karunia pa dorang, kong dorang se tau pa ngana. 15 Ngana musti beking samua itu pa ngana pe jemaat. Samua itu musti jadi yang paling penting for ngana, supaya orang-orang bole lia ngana pe kemajuan ja urus jemaat. 16 Ngana musti jaga bae-bae ngana pe cara hidop deng lei jaga supaya ngana cuma ja se ajar tu ajaran yang butul. Ngana musti beking trus tu hal-hal itu, kalu ngana beking bagitu Tuhan mo se slamat pa ngana deng lei pa tu orang-orang yang badengar pa ngana.