Torang musti baharap deng yakin dapa slamat dari Yesus Kristus
5
1 Sudara-sudara, Kristus so se bebas pa torang dari tu atoran-atoran di kitab Taurat, so itu no torang memang so bebas. So lantaran itu torang musti tetap kuat deng tu torang pe percaya pa Dia, kong jang se biar lei tu torang pe diri jadi budak ulang taika deng tu atoran-atoran kitab Taurat itu.2 Tarukira jo bae-bae, kita ini Paulus, kong kita bilang pa ngoni bagini: kalu ngoni kase tu ngoni pe diri dapa sunat iko tu atoran sunat supaya Tuhan bole beking ngoni jadi orang yang butul di muka pa Dia, itu kasiang so sala, kong apa tu Kristus da beking di kayu salib nyanda ada de pe guna for ngoni. 3 Kita se inga ulang lei pa ngoni: tiap orang yang kase de pe diri dapa sunat iko tu atoran, dia itu lei musti iko samua tu atoran di kitab Taurat. 4 Kalu ngoni suka Tuhan beking ngoni jadi orang yang butul di muka pa Dia lantaran ngoni iko tu atoran-atoran di kitab Taurat, itu de pe arti ngoni pe hubungan deng Kristus so jadi putus. Dulu Tuhan so se tunjung tu Dia pe bae pa ngoni lewat Yesus Kristus supaya Tuhan bole beking pa ngoni jadi orang yang butul di muka pa Dia, mar skarang ngoni cuma suka iko tu atoran-atoran itu for jadi orang yang butul di muka pa Dia, deng bagitu ngoni so nyanda mo rasa tu bae yang Tuhan so se tunjung pa ngoni. 5 Mar sudara-sudara, torang so percaya pa Kristus Yesus, so itu tu Roh Kudus bakarja pa torang pe hati, jadi torang baharap deng yakin kalu Tuhan mo beking torang jadi orang yang butul di muka pa Dia, itu no yang torang da tunggu-tunggu. 6 Soalnya for torang yang so percaya pa Kristus Yesus, nyanda penting for torang kalu torang iko tu atoran sunat ato nyanda iko, mar yang paling penting torang percaya pa Kristus Yesus trus tu torang pe percaya itu bole dapa lia kalu torang basayang pa orang laeng.
7 Dulu, ngoni pe bagus skali ja iko pa Yesus, ngoni bole mo se sama deng orang yang iko lomba lari kong da lari bae-bae for mo sampe di finis. Mar skarang ini ngoni so nyanda iko lei tu ajaran yang butul. Sapa so yang pengaruhi bagitu pa ngoni? 8 Tu pengaru itu bukang dari pa Tuhan yang da pangge pa ngoni for iko pa Dia. 9 Ada yang bilang bagini, “Sadiki ragi yang da taru di adonan roti, beking tu samua adonan itu jadi bareis,” bagitu lei no deng tu dorang pe pengaru yang sadiki itu bole beking banya orang jadi nyanda iko lei tu butul. 10 Kita percaya pa Tuhan, kong kita yakin skali pa Dia kalu ngoni nyanda mo tapengaru for iko tu orang-orang yang kase pengaru yang nyanda butul itu. Kong tu orang yang ja kase pengaru sampe beking ngoni pe pikiran jadi kacau itu, dia itu pasti mo dapa hukuman dari Tuhan, biar sapa jo dia itu.
11 Sudara-sudara, ada orang-orang yang bilang kalu kita ini ja se ajar pa orang-orang kalu dorang musti dapa sunat iko tu atoran yang ada di kitab Taurat. Padahal kita nyanda ja se ajar bagitu, lantaran kalu kita memang se ajar bagitu pasti tu orang-orang yang sama-sama Yahudi deng kita nyanda da siksa pa kita. Mar kita ja se ajar pa orang-orang kalu dorang musti percaya pa Yesus Kristus yang da mati di kayu salib, kong so lantaran kita se ajar bagitu tu orang Yahudi malawang skali pa kita, kong tu Yesus pe kematian di kayu salib itu sama deng jadi batu sandungan yang beking dorang nimau mo percaya. 12 Tu orang-orang yang beking kacau pa ngoni pake tu ajaran sunat itu, lebe bae dorang itu potong jo sampe abis tu dorang pe alat kelamin sandiri!
13 Sudara-sudara, Tuhan Allah so pangge pa ngoni for iko pa Dia supaya ngoni bole bebas dari taika deng tu atoran-atoran itu. Cuma ngoni jang bapikir kalu ngoni so bebas trus ngoni bole beking tu kalakuan yang nyanda bagus iko apa jo tu ngoni suka, bukang bagitu kasiang. Mar yang butul, ngoni baku-baku sayang jo deng baku-baku bantu jo. 14 Soalnya tu dasar dari samua atoran di kitab Taurat bagini, “Sayang jo pa orang laeng sama deng ngoni sayang pa ngoni pe diri sandiri.” 15 Mar kalu ngoni tare cuma bakalae deng baku beking susa, hati-hati jo ngoni, nanti ngoni tare cuma mo baku beking ancor, ngoni itu bole mo se sama deng tu binatang yang baku-baku gigi sampe baku abis.
Orang percaya musti hidop iko tu Roh Kudus pe mau
16 Kita pe maksut bagini: ngoni musti hidop iko tu Roh Kudus pe mau, kong deng bagitu ngoni nyanda mo beking tu keinginan yang nyanda bagus. 17 Tu keinginan yang nyanda bagus, itu baku malawang deng tu keinginan dari Roh Kudus. Bagitu lei deng tu keinginan dari Roh Kudus, itu baku malawang deng tu keinginan yang nyanda bagus. Soalnya tu keinginan yang nyanda bagus deng tu keinginan yang dari Roh Kudus baku malawang, sampe itu beking torang nyanda beking tu hal-hal yang torang suka mo beking. 18 Mar kalu torang hidop iko tu Roh Kudus pe mau, torang nyanda lei hidop taika deng tu atoran-atoran di kitab Taurat.
19 Tu keinginan-keinginan yang nyanda bagus, itu dapa lia dari kalakuan yang rupa ini: ja baseks bebas, beking tu kalakuan yang caparuni, beking tu hal-hal yang nyanda pantas for beking, 20 ja basemba hal laeng yang bukang Tuhan, pake ilmu sihir, binci pa orang laeng, ja baku ambe, mangiri pa orang laeng, pangmara skali, cuma pikir diri sandiri, suka beking orang-orang tapica-pica deng baku beda pendapat sampe baklompo-klompo, 21 mangiri sampe badendam, pangmabo, beking pesta mabo-mabo sampe beking tu hal-hal sambarang, deng hal-hal laeng yang nyanda bagus lei. Tentang samua tu hal-hal nyanda bagus itu, ni hari kita se inga ulang pa ngoni sama deng tu kita so perna bilang pa ngoni waktu dulu lei, kita bilang bagini: orang yang hidop ja beking tu hal-hal itu, dia nyanda mo dapa bagean waktu Tuhan Allah Berkuasa sbagai Raja pa Dia pe orang-orang.
22 Mar tu orang yang iko tu Roh Kudus pe mau, tu Roh Kudus mo bantu pa dia hidop rupa ini: ja basayang, sukacita, hidop deng hati tenang, pangsabar, pangbae, ja beking tu bae, bole mo percaya akang, 23 lemah lembut deng bole kuasai diri sandiri. Nyanda ada atoran yang se sala tu orang yang ja beking bagitu. 24 Sapa jo yang so jadi Kristus Yesus pe orang, dia itu so nyanda beking tu keinginan yang nyanda bagus deng tu nafsu yang besae, itu bole mo se sama deng dia so se mati tu sifat itu di kayu salib. 25 Kalu tu Roh Kudus so kase hidop yang baru pa torang, mari jo torang hidop iko tu Roh Kudus pe mau. 26 Torang jang angka-angka diri sandiri, jang torang baku pancing mara, kong jang torang baku mangiri.