2 Korintus 3

Roh Kudus itu no tu perjanjian yang baru

1 Jang ngoni kira kalu torang so mulai lei bicara se bangga tentang tong pe diri sandiri. Ngoni tau kalu torang ini nyanda perlu bawa surat rekomendasi pa ngoni ato dapa rekomendasi dari pa ngoni sama deng tu orang laeng ja beking. 2 Ngoni itu no tu da jadi torang pe surat rekomendasi, lantaran orang bole lia tu tong pe hasil karja dari pa ngoni pe hidop yang bagus itu. Kong itu so tatulis pa torang pe hati lantaran torang sayang pa ngoni kong samua orang bole kanal deng bole mo baca itu. 3  Ngoni pe hidop yang bagus itu se tunjung kalu Yesus Kristus da karja pa ngoni pe hati, kong ngoni ini no tu torang pe hasil playanan. Jadi ngoni itu kurang sama jo deng surat yang Kristus da tulis. Kong Kristus nyanda tulis deng tinta ato nyanda da tulis di batu sama deng dulu waktu tu atoran-atoran yang Tuhan da kase pa Musa da tulis lei di batu, mar Dia da tulis itu samua pa ngoni pe hati kong Dia tulis itu pake Tuhan Allah yang Hidop pe Roh.

4 Torang brani bilang tentang tu torang pe karja pa ngoni itu lantaran torang pe percaya pa Tuhan Allah, kong samua itu bole jadi lantaran tu Yesus Kristus da beking for torang. 5 Torang nyanda ada alasan apa-apa for bilang kalu torang sandiri mampu for beking ni karja, mar Tuhan Allah yang beking torang jadi mampu for beking ni karja. 6  Dia itu no yang beking torang mampu jadi orang-orang yang ja beking tu Dia da suru for se tau tu perjanjian yang baru pa manusia, tu perjanjian antara Tuhan Allah deng manusia. Tu perjanjian yang baru itu yang bakarja lewat Tuhan pe Roh kong beking manusia bole mo dapa tu hidop kekal, tu perjanjian yang baru itu bukang tu atoran-atoran di kitab Taurat yang da tatulis itu yang nyanda se slamat pa manusia dari hukuman dosa.

7 Dulu Tuhan tulis tu atoran-atoran Taurat di batu kong kase itu pa Musa. Waktu itu, tu orang-orang Israel nyanda mampu mo haga tu Musa pe muka, lantaran Tuhan Allah pe kuasa yang luar biasa beking tu Musa pe muka bacahaya. Mar tu kuasa yang luar biasa itu cuma nyanda lama, so itu tu cahaya yang ada pa Musa pe muka mulai bailang sampe so nyanda ada sama skali. Kong biar lei tu atoran-atoran itu bole beking manusia mati lantaran dorang nyanda mampu iko tu atoran-atoran itu, Tuhan Allah pe kuasa yang luar biasa tu da beking Musa pe muka bacahaya dapa lia memang luar biasa pa Musa pe muka waktu itu. Jadi kalu tu Tuhan Allah pe kuasa yang luar biasa so bagitu de pe hebat waktu da kase tu atoran-atoran itu, 8 pasti katu lebe basar lei no tu kuasa yang da sama-sama deng tu perjanjian yang baru itu yang bakarja lewat Tuhan pe Roh. 9 Tu atoran yang Tuhan Allah da kase pa Musa itu se tunjung kalu manusia da beking dosa kong manusia musti dapa hukum, mar biar lei bagitu tu kuasa yang ada deng tu atoran itu tetap luar biasa. Cuma katu, tantu lebe luar biasa lei no tu kuasa dari pa Tuhan Allah tu da sama-sama deng tu perjanjian yang baru itu, tu kuasa itu no yang bakarja bantu pa manusia supaya Tuhan Allah beking orang jadi butul di muka pa Dia. 10 Sebenarnya dulu tu kuasa yang ada deng tu atoran itu memang luar biasa, mar skarang tu kuasa itu so nyanda lei luar biasa kalu mo se banding deng tu kuasa dari Tuhan Allah yang da sama-sama deng tu perjanjian yang baru tu da bakarja pa manusia. 11 Soalnya hele tu atoran-atoran di kitab Taurat yang cuma for samantara, pe luar biasa tu kuasa yang da sama-sama deng tu atoran itu. No apa lei tare deng tu kuasa yang da sama-sama deng tu perjanjian yang baru itu tu nyanda perna mo ilang, pasti katu jao lebe basar de pe kuasa lei.

12 So lantaran torang samua baharap deng yakin pa tu perjanjian yang baru itu sampe torang brani skali for kase tau tu Kabar Bae pa orang-orang. 13  Torang so nyanda usa beking sama deng Musa. Musa itu da tutu de pe muka deng kaeng supaya tu orang-orang Israel nyanda lia tu cahaya yang dari Tuhan pe kuasa tu mulai da bailang dari pa de pe muka. 14 Tu orang-orang Israel dulu, dorang itu pe pikiran so jadi tumpul, dorang nyanda mangarti maksut dari tu atoran-atoran itu, itu sama deng ada kaeng yang da tutu tu dong pe kapala. Kong sampe skarang ini, kalu dorang baca tu atoran itu, dorang nyanda mangarti tu dia, itu so kurang sama jo deng masi ada yang da tutu tu dong pe pikiran. Soalnya cuma kalu dorang percaya pa Kristus, itu baru dorang bole mangarti deng butul. 15 Malatare sampe ni hari, tiap kali dorang baca tu atoran-atoran di kitab Taurat tu Musa da tulis, ada sesuatu yang da tutu tu dong pe pikiran sampe dorang nyanda mangarti tu dorang da baca itu, itu sama deng ada kaeng yang da tutu tu dong pe kapala. 16 Mar kalu ada jo yang bertobat kong jadi percaya pa Tuhan, pasti dorang pe pikiran yang tumpul itu mo tabuka. 17 Soalnya Tuhan itu Roh. Kong kalu Tuhan pe Roh itu ada pa orang pe hati, tu orang itu mo jadi bebas dari tu atoran-atoran itu, tu atoran yang for torang brat mo beking. 18 Kong for torang samua yang percaya, so nyanda ada lei yang da tutu tu torang pe pikiran. Trus orang bole lia tu Tuhan Allah pe kuasa yang luar biasa ada pa torang, torang ini sama deng kaca yang se pantul tu Tuhan pe luar biasa. Tuhan slalu roba tu torang pe hidop supaya torang mo jadi sama deng Dia, kong tamba hari torang lei mo jadi luar biasa. Tuhan yang da beking torang jadi bagitu, so Dia no tu Roh Kudus.