Tentang jemaat yang beking tu kalakuan jaha
5
1 Sudara-sudara, kita da dengar, ada dari pa ngoni tu jemaat di situ yang ja baseks bebas, kong tu orang itu da baseks deng de pe mama tiri. Tu dia da beking itu jaha skali, hele tu orang yang nyanda kanal pa Tuhan nyanda ja beking itu. 2 Mar biar lei ada tu dari pa ngoni yang ja beking bagitu, ngoni masi sombong. Padahal mustinya ngoni sedi deng itu, deng mustinya lei ngoni se kaluar pa dia dari antara pa ngoni.3 Soalnya kita, biar lei kita nyanda ada sama-sama deng ngoni di situ, mar kita slalu inga-inga pa ngoni sama jo deng kita ada sama-sama deng ngoni, kong deng bagitu kita so kase hukuman pa tu orang yang da beking tu jaha itu. 4 Jadi waktu ngoni tu orang-orang yang percaya pa Tuhan Yesus bakumpul, kita pe pikiran ada sama-sama deng ngoni, deng lei tu kuasa dari Tuhan Yesus yang torang ja iko akang ada pa ngoni. Jadi waktu itu, 5 ngoni srahkan jo dia pa setang pe bos pe kuasa. Deng bagitu dia mo rasa siksa sampe dia pe sifat jaha lei ilang, supaya de pe jiwa bole mo slamat di hari waktu Tuhan mo adili pa samua orang.
6 Nyanda bagus kalu ngoni basombong, padahal ngoni ja beking tu kalakuan jaha itu. Pasti ngoni so tau kalu tu ragi biar sadiki bole mo beking samua adonan roti jadi bareis, itu sama deng satu orang dari pa ngoni da beking tu jaha, dia itu bole mo pengaruhi tu orang laeng sampe taiko beking tu jaha. 7 Ngoni buang jo tu ragi yang lama, itu sama deng ngoni da buang tu ngoni pe kalakuan jaha. Deng bagitu ngoni so jadi sama deng adonan yang baru tu nyanda baragi, lantaran tu ngoni pe kalakuan so bae kong memang ngoni so bersi dari tu ngoni pe kalakuan yang jaha itu. Soalnya Kristus so srahkan Dia pe diri mati jadi korban persembahan, Dia itu sama deng domba yang ja kase korban persembahan di hari raya Paskah. 8 So lantaran itu, torang jang hidop lei ja beking tu tong pe kalakuan dulu yang jaha deng ja beking tu dosa-dosa, itu sama deng torang beking tu tong pe hari raya itu deng roti yang da pake ragi lama. Mar torang jadi orang yang tulus deng yang butul, itu sama deng torang beking tu tong pe hari raya itu deng roti yang nyanda pake ragi.
9 Pa kita pe surat dulu, kita so perna tulis for ngoni supaya ngoni jang ja bergaul dekat deng tu orang-orang yang ja baseks bebas. 10 Kita pe maksut waktu tulis itu, kita bukang bicara tentang orang-orang yang nyanda percaya pa Tuhan yang ja baseks bebas, yang sraka, pangbatipu, deng ja basemba opo-opo. Ngoni bole bergaul deng tu orang-orang yang nyanda percaya itu lantaran dorang ada di mana-mana. Kalu umpama ngoni sama skali so nimbole bergaul deng dorang itu, ngoni musti hidop tapisa dari tu orang-orang di dunia ini. 11 Mar skarang kita tulis pa ngoni supaya ngoni jang bergaul dekat deng orang yang bilang de pe diri itu torang pe sudara yang percaya mar dia lei ja beking tu hal-hal yang jaha rupa ini: ja baseks bebas, sraka, ja basemba opo-opo, ja bicara besae tentang orang laeng, pangmabo ato pangbatipu. Ngoni nimbole bergaul dekat deng tu orang bagitu, hele mo makang sama-sama deng dia nimbole sama skali.
12 Soalnya torang ada tanggong jawab for adili tu orang-orang yang ada pa torang pe jemaat, mar torang nyanda ada tanggong jawab for mo adili tu orang-orang yang ada di luar torang pe jemaat. 13 Dorang itu nanti Tuhan Allah yang mo adili. Ngoni musti beking apa tu da tulis di Kitab Suci, “User jo tu orang-orang yang ja beking tu jaha dari antara pa ngoni!”