Hidop for beking snang pa Tuhan Allah
12
1 Sudara-sudara, Tuhan Allah so se tunjung Dia pe rasa kasiang pa torang, so itu kita se nasehat supaya ngoni srahkan jo tu ngoni pe hidop for iko Dia pe mau sama deng ngoni kase korban persembahan yang hidop, yang kudus, deng yang beking snang pa Dia. Itu no tu ngoni pe ibada yang butul. 2 Ngoni jang iko tu orang-orang di dunia ini pe cara hidop yang nyanda ja iko tu Tuhan Allah pe mau. Biar jo Tuhan Allah roba tu ngoni pe pikiran jadi baru supaya ngoni pe kalakuan lei bruba. Soalnya deng ngoni pe pikiran yang baru itu ngoni bole tau Tuhan Allah pe mau: mana yang bagus, mana yang beking snang pa Dia deng yang sempurna.3 Tuhan so se tunjung Dia pe bae pa kita sampe kita jadi rasul tu Dia pe utusan, kong so lantaran itu kita mo se nasehat pa ngoni samua supaya ngoni jang pikir tinggi-tinggi tentang ngoni pe diri, mar lebe bae tare ngoni pikir apa yang sebenarnya tentang ngoni pe diri iko tu kemampuan yang Tuhan Allah so kase pa ngoni masing-masing lantaran ngoni so percaya pa Dia. 4 Torang mo ambe conto deng torang pe badan yang ada banya anggota badan, kong tiap anggota badan ada de pe tugas masing-masing. 5 Bagitu lei deng torang yang so percaya pa Kristus. Torang ada banya mar so jadi satu, sama deng so jadi satu badan. Kong biar torang ada tugas masing-masing mar tetap baku perlu. 6 Tuhan so kase pa torang masing-masing karunia yang baku beda lantaran Dia pe bae pa torang. So itu torang musti pake bae-bae sama deng ini tu karunia-karunia itu: kalu Tuhan kase pa torang karunia for kase tau tu Tuhan pe pesan pa orang-orang, kase tau jo tu pesan itu iko tu pesan yang torang percaya Tuhan Allah so kase pa torang. 7 Kalu Tuhan so kase karunia for mo tolong pa orang laeng, tolong jo deng sunggu-sunggu. Kong kalu Tuhan kase karunia for mangajar, mangajar jo deng sunggu-sunggu. 8 Kalu Tuhan kase karunia for kase smangat pa orang laeng, beking jo itu deng sunggu-sunggu. Kalu Tuhan kase karunia pa torang for bakase pa orang, bakase jo deng tulus. Kalu Tuhan kase karunia for mo jadi pemimpin, bapimpin jo deng bae-bae. Kong kalu Tuhan kase karunia for se tunjung tu rasa kasiang for tolong pa orang, torang beking jo deng snang hati.
Orang percaya pe hidop
9 Ngoni basayang jo deng butul-butul, jang deng pura-pura. Ngoni binci jo samua hal yang jaha, kong beking jo trus samua tu hal bae yang so ada pa ngoni. 10 Ngoni baku-baku sayang jo sama deng basudara. Ngoni brusaha jo hormat pa orang laeng lebe dari yang orang laeng beking. 11 Ngoni karja jo deng rajin for Tuhan, jang ngoni malas. Ngoni karja jo deng smangat. 12 Ngoni musti snang lantaran ngoni bole baharap deng yakin pa Tuhan. Ngoni musti batahang percaya biar dapa susa, deng lei musti slalu basombayang. 13 Ngoni tolong jo pa Tuhan pe orang-orang kalu ada yang dorang perlu. Kong trima jo pa ngoni pe ruma tu orang-orang biar nyanda kanal pa dorang.
14 Kong kalu ada orang yang beking ngoni mendrita, minta jo Tuhan kase akang berkat pa dia bukang kutuk. 15 Trus kalu ada orang yang snang, ngoni snang jo sama-sama deng dia. Kong kalu ada orang yang sedi kong manangis, manangis jo deng dia. 16 Ngoni hidop jo satu hati deng ngoni pe sudara-sudara yang percaya. Jang sombong mar batamang jo deng tu orang-orang yang orang laeng ja anggap nyanda penting. Kong jang anggap ngoni pe diri itu so pande.
17 Kalu ada orang yang beking jaha pa ngoni, jang ngoni balas beking jaha lei pa dia. Ngoni beking jo trus tu bae di muka samua orang. 18 Kong brusaha jo hidop damai deng samua orang, apa lei kalu hidop damai itu musti ngoni yang beking lebe dulu.
19 Sudara-sudara yang kita sayang, jang ngoni balas dendam pa orang yang beking jaha pa ngoni mar se biar jo Tuhan Allah yang mara kong hukum pa dia. Soalnya da tulis di Kitab Suci bagini,
“Tuhan bilang,
Kita pe hak tu mo babalas,
Kita tu mo bahukum.”
20 “Mar kalu ngoni pe musu lapar,
kase jo dia makang.
Kalu dia aus,
kase jo dia minum.
Soalnya kalu ngoni beking bagitu pa ngoni pe musu,
dia nanti mo jadi malo kong dia roba tu kalakuan.”
21 Jadi jang sampe tu jaha se kala pa ngoni. Mar beking jo tu bae for kase kala tu jaha.