Sbagian orang Yahudi tetap setia pa Tuhan
11
1 Tu orang-orang Yahudi dari dulu Tuhan Allah so pili, mar ada yang nyanda badengar pa Dia. No skarang, apa Dia tolak pa dorang? Tantu katu nyanda to? Soalnya kita sandiri orang Yahudi, Abraham pe keturunan, dari suku Benyamin, mar Dia nyanda tolak pa kita. 2 Tuhan Allah nyanda tolak Dia pe orang-orang tu orang Yahudi yang Dia so pili dari dulu. Ngoni tau to di Kitab Suci waktu tu nabi Elia da bamengelu pa Tuhan Allah tentang tu orang-orang Yahudi, dia bilang, 3 “Tuhan, tu nabi-nabi yang ja se tau Tuhan pe pesan, orang Yahudi sandiri yang da bunung pa dorang. Kong tu tampa-tampa korban persembahan dorang lei so kase ancor, cuma kita sandiri kasiang yang masi hidop, kong dorang lei mo cari bunung pa kita.”4 Mar waktu itu Tuhan Allah bilang bagini pa nabi Elia, “Masi ada tuju ribu orang Yahudi yang jadi Kita pe orang. Dorang itu setia pa Kita, dorang nyanda perna berlutut semba pa Baal.”
5 Kong sama deng tu da jadi waktu nabi Elia itu, skarang lei banya orang Yahudi yang nyanda setia pa Tuhan, mar ada jo dari orang Yahudi yang setia biar cuma sadiki. Tu orang Yahudi yang setia itu yang Tuhan da pili dari dulu mo jadi De pe orang. Dia pili pa dorang lantaran Dia mo se tunjung De pe bae pa dorang, 6 bukang lantaran dorang ja beking tu bae. Soalnya kalu Tuhan pili pa dorang lantaran dorang ja beking tu bae, de pe arti Tuhan pili pa dorang lantaran mo balas tu dorang pe bae, bukang lantaran Dia pe sayang yang Dia kase tunjung deng cuma-cuma.
7 Jadi, orang Israel cari jalang for mo jadi butul di muka pa Tuhan, mar amper samua nyanda dapa. Ada yang dapa, mar cuma sadiki. Dorang itu yang Tuhan so pili dari dulu, dorang so dapa tu jalang for Tuhan beking dorang jadi butul di muka pa Dia. Kong tu laeng jadi kras hati, dorang nimau dengar pa Tuhan. 8 Dorang itu sama deng tu da tulis di Kitab Suci bagini,
“Tuhan Allah beking dorang sama deng orang yang da tasono,
nyanda balia pake dorang pe mata,
deng nyanda badengar pake dorang pe talinga,
sampe ni hari dorang nyanda mangarti apa-apa.”
9 Raja Daud bilang lei tentang dorang bagini,
“Biar jo tu dorang pe makang-makang bole jadi sama jerat deng prangkap,
pertama dorang rasa snang deng aman,
mar de pe laste dong pe kejahatan beking dong jadi sesat sampe dong binasa.
Dorang sama deng da tasontong di batu kong jatung.
Itu no tu balasan for dorang pe kras hati.
10 Biar jo dorang tanggong tu dorang pe hukuman bagini:
dorang so nyanda mo mangarti apa-apa sama deng dorang pe mata so glap so nimbole mo balia,
deng dorang lei pikul beban trus sama deng orang yang so bongko.”
Tuhan lei mo se slamat tu orang bukang Yahudi yang so percaya
11 Jadi bagimana dang deng tu orang Yahudi yang nyanda percaya pa Yesus? Apa itu beking Tuhan tolak pa dorang sampe nyanda ada jalang lei for dorang mo dapa slamat dari hukuman dosa? Tantu nyanda katu to? Dorang masi bole mo slamat dari hukuman dosa asal dorang percaya, mar lantaran dorang nyanda percaya pa Yesus sampe tu bangsa-bangsa bukang Yahudi dapa kesempatan for percaya kong bole mo dapa slamat. Waktu tu orang-orang Yahudi lia pa orang-orang bukang Yahudi so jadi percaya kong dapa slamat, dorang itu jadi cemburu sampe dorang suka lei mo percaya. 12 Tu orang-orang Yahudi pe nyanda percaya itu no yang beking sampe samua orang dari bangsa-bangsa laeng di dunia ini bole dapa berkat keslamatan. Jadi tu orang Yahudi pe nyanda percaya itu beking sampe orang bukang Yahudi jadi percaya, kong nanti kalu orang Yahudi lei jadi percaya, pasti tu berkat lei jadi lebe basar.
13 Skarang kita mo babilang pa ngoni, kita pe sudara-sudara yang percaya yang bukang Yahudi: kita ini rasul tu Yesus pe utusan for ja kase tau tu Kabar Bae tentang Yesus pa ngoni tu orang-orang yang bukang Yahudi. Kita beking bae-bae tu kita pe tugas itu lantaran kita tau tu tugas itu luar biasa skali. 14 Kita baharap deng kita pe tugas ini kita bole mo beking orang Yahudi tu satu bangsa deng kita mo cemburu lantaran dorang lia ada orang dari bangsa laeng yang dapa slamat. Sapa tau waktu tu orang-orang Yahudi lia itu, dorang lei bole percaya kong dapa slamat. 15 Soalnya waktu Tuhan nyanda trima tu orang Yahudi yang nyanda percaya itu, itu jadi kesempatan for samua orang di dunia ini jadi percaya kong ada hubungan bagus deng Tuhan. No apa lei kalu kita pe sudara-sudara orang Yahudi percaya pa Yesus kong Dia trima pa dorang, tantu katu itu lebe bagus. Kalu itu jadi bagitu, dorang sama deng orang yang so mati kong hidop ulang. 16 Kalu torang beking roti, roti pertama torang srahkan pa Tuhan, kong tu roti-roti brikut jadi Tuhan punya. Ato kalu tu akar pohong torang srahkan pa Tuhan, tu pohong itu lei jadi Tuhan punya. Bagitu lei deng torang orang Yahudi, torang so jadi Tuhan punya lantaran torang pe nene moyang Tuhan punya.
17 Orang-orang Yahudi yang nyanda percaya, dorang itu bole mo se sama deng tu cabang-cabang pohong zaitun yang da se pata dari pohong yang da tanang. Kong di tampa itu ada se cangkok akang cabang pohong zaitun liar, tu ngoni orang bukang Yahudi yang percaya. Jadi ngoni bole mo trima lei tu janji yang Tuhan da kase pa orang-orang Yahudi pe nene moyang dulu. 18 Ngoni tu orang-orang bukang Yahudi yang so percaya, ngoni nimbole pandang enteng pa tu orang-orang Yahudi yang nyanda percaya. Kalu ngoni pandang enteng pa dorang, inga kalu ngoni itu cuma cabang, bukang akar. Soalnya bukang cabang yang kase makang pa akar, mar tu akar yang kase makang pa cabang.
19 So itu, jang sampe ada dari pa ngoni babilang, “Torang yang Tuhan sayang, Dia so tolak pa tu orang Yahudi, sama deng tu cabang-cabang pohong yang da se pata kong da se cangkok di pohong zaitun yang da tanang.” 20 Memang butul, banya orang Yahudi yang Tuhan da tolak, mar Dia da tolak pa dorang lantaran dorang nyanda percaya. Kong Tuhan trima pa ngoni lantaran ngoni percaya pa Dia. Jadi ngoni jang basombong, mar lebe bae ngoni tako jo pa Tuhan. 21 Soalnya Tuhan Allah tolak tu orang Yahudi yang nyanda percaya. Jadi lebe-lebe lei ngoni tu orang-orang bukang Yahudi, kalu ngoni nyanda percaya pasti Dia lei mo tolak pa ngoni.
22 Dari samua tu kita da bilang tadi, torang bole mangarti kalu Tuhan Allah itu bae deng Dia lei tegas kalu ja kase hukuman. Dia kase hukuman pa orang-orang Yahudi yang nyanda percaya pa Dia, mar Dia se tunjung De pe bae pa ngoni tu orang-orang yang bukang Yahudi yang tetap baharap pa Dia pe bae pa ngoni itu. Jadi kalu lei ngoni tu orang yang bukang Yahudi nyanda percaya, Dia lei tetap mo hukum pa ngoni sama deng tu cabang yang da potong dari de pe pohong. 23 Kong tentang tu orang Yahudi yang nyanda percaya itu, kalu dorang bertobat, Tuhan Allah mo trima ulang pa dorang lantaran Dia ada kuasa mo trima pa dorang. 24 Ngoni tu orang-orang bukang Yahudi, ngoni sebenarnya nyanda pantas Tuhan trima, sama deng tu cabang dari pohong zaitun liar yang orang potong tu nyanda cocok dapa cangkok di pohong Zaitun yang da tanang. Mar biar bagitu Tuhan trima pa ngoni lantaran ngoni percaya pa Dia. Jadi lebe-lebe lei tu orang Yahudi kalu dorang percaya, Tuhan tantu mo trima ulang pa dorang. Dorang itu sama deng cabang yang dapa potong dari pohong zaitun yang da tanang itu, jadi cocok kalu se cangkok ulang di pohong zaitun itu.
Orang-orang Yahudi mo babale pa Tuhan
25 Sudara-sudara, kita mo kase tau tu Tuhan pe rahasia supaya ngoni nyanda rasa diri pande, bagini: banya tu orang-orang Yahudi yang so jadi kras kapala. Dorang bagitu sampe waktu so lengkap tu jumla dari orang-orang bukang Yahudi yang Tuhan so tentukan jadi percaya. 26 Kong kalu so bagitu, baru samua keturunan Israel mo slamat. Itu sama deng tu da tulis di Kitab Suci,
“Nanti mo datang dari Sion satu Orang yang mo se slamat pa manusia.
Dia mo se hapus tu kejahatan dari orang-orang Yahudi tu Yakub pe keturunan.
27 Itu Kita pe perjanjian deng dorang kalu Kita mo se ampung dorang pe dosa.”
28 Banya orang Yahudi nyanda trima tu Kabar Bae tentang Yesus, so itu dorang so jadi Tuhan Allah pe musu. Mar so lantaran itu ngoni dapa untung. Biar bagitu, tu orang-orang Yahudi tetap Tuhan sayang lantaran dari jo dorang pe nene moyang Tuhan so pili. 29 Soalnya kalu Tuhan Allah so pangge pa dorang for jadi Dia pe orang kong kase akang berkat pa dorang, Dia nyanda perna mo ruba tu De pe pikiran itu.
30 Dulu, ngoni tu orang-orang yang bukang Yahudi nyanda iko pa Tuhan Allah. Mar skarang lantaran bangsa Yahudi so nyanda dengar-dengaran pa Tuhan Allah, kong Tuhan Allah se tunjung De pe rasa kasiang pa ngoni sampe Dia se bebas pa ngoni dari hukuman dosa. 31 Skarang tu orang-orang Yahudi nyanda dengar-dengaran pa Tuhan Allah. Tuhan Allah lei mo se tunjung Dia pe rasa kasiang pa dorang sampe kase bebas pa dorang dari hukuman dosa sama deng tu da beking pa ngoni tu orang-orang bukang Yahudi. 32 Jadi orang-orang Yahudi deng lei tu orang-orang bukang Yahudi da hidop nyanda dengar-dengaran pa Tuhan Allah, kong Tuhan Allah so kase biar pa dorang beking bagitu supaya Dia bole se tunjung tu Dia pe rasa kasiang pa dorang samua sampe dorang bole bebas dari hukuman lantaran dosa.
Tuhan itu luar biasa
33 Bukang main Tuhan Allah pe bae. Dia pe hikmat nyanda ada yang mo lawang, kong Dia tau samua hal. Nyanda ada satu orang tu bole mo mangarti tu Dia pe keputusan, deng lei apa Dia pe maksut tu Dia ja beking. 34 Sama deng tu da tatulis di Kitab Suci,
Sapa yang tau Tuhan pe pikiran?
Sapa yang mampu mo kase nasehat pa Dia?
35 Ato sapa yang perna kase sesuatu pa Tuhan
sampe dia mo tuntut supaya Tuhan musti balas pa dia? Nyanda ada to?
36 Tuhan Allah yang da ciptakan samua, Dia yang ja baator samua, kong samua itu for Dia. Jadi mari jo torang puji deng hormat pa Dia sampe slama-lamanya. Amin.