Tuhan Allah pe Roh bantu pa torang supaya nyanda iko tu keinginan dosa
8
1 Tuhan skarang so nyanda lei mo kase hukuman apa-apa pa torang lantaran torang ini orang-orang yang so percaya pa Kristus Yesus. 2 Soalnya torang so percaya pa Kristus Yesus, jadi Tuhan Allah pe Roh bakarja pa torang pe hati beking torang bole hidop baru. Tuhan Allah pe Roh itu bantu pa torang supaya torang bole bebas dari tu keinginan dosa deng dari tu hukuman tapisa deng Tuhan for slama-lamanya.3 Torang nyanda mungkin mo slamat dari hukuman dosa waktu torang iko tu atoran-atoran di kitab Taurat, lantaran torang cuma manusia yang nyanda mampu mo iko samua tu atoran-atoran itu, mar torang bole mo slamat lantaran Tuhan Allah. Tuhan Allah kase slamat pa torang deng cara utus Dia pe Anak ka dunia. Dia pe Anak pe badan sama deng torang manusia yang ja beking dosa pe badan, kong Dia pe Anak mati for se hapus tu manusia pe dosa. Jadi sbagai manusia, Tuhan Allah pe Anak se kala tu hukuman dosa. 4 Tuhan Allah pe maksut beking bagitu supaya torang samua ini bole beking tu Dia pe mau yang ada di atoran-atoran di kitab Taurat yang butul itu. Torang ini hidop iko tu Roh Kudus pe mau, bukang lei hidop iko tu keinginan manusia.
5 Orang-orang yang hidop iko tu keinginan manusia, dorang itu pikir-pikir tu keinginan duniawi. Mar tu orang-orang yang hidop iko tu Tuhan pe Roh, dorang itu pikir-pikir tu hal-hal yang beking snang pa Tuhan. 6 Tu orang-orang yang pikir-pikir tu keinginan manusia, dorang itu no tu mo dapa hukuman tapisa deng Tuhan slama-lamanya. Mar kalu orang-orang yang pikir-pikir tu Tuhan pe Roh, ada rasa tenang pa dorang pe hati, deng dorang lei mo hidop slama-lamanya deng Tuhan. 7 Soalnya kalu orang-orang yang pikir-pikir tu keinginan manusia, dorang itu yang ja malawang pa Tuhan Allah. Jadi dorang nyanda ja iko tu Tuhan Allah pe atoran lantaran memang dorang nyanda mampu mo iko itu. 8 Kong tu orang-orang yang cuma iko tu keinginan manusia, dorang itu nyanda mungkin mo beking Tuhan Allah snang.
9 Mar ngoni so nyanda lei hidop iko tu keinginan. Ngoni so hidop iko tu Tuhan Allah pe Roh kalu memang Dia pe Roh so ada pa ngoni pe hati. Mar inga, orang yang nyanda ada Kristus pe Roh pa de pe hati, dia itu bukang Kristus punya. 10 No kalu Kristus so ada pa ngoni pe hati, biar lei ngoni pe badan musti mati lantaran dosa mar Tuhan Allah pe Roh yang mo se hidop ulang pa ngoni slama-lamanya deng Tuhan. Ngoni bole hidop slama-lamanya deng Dia lantaran Tuhan so beking ngoni jadi butul di muka pa Dia. 11 Tuhan pe Roh so se hidop ulang pa Kristus Yesus kong tu Tuhan pe Roh itu lei no yang so ada pa ngoni pe hati. Jadi biar ngoni pe badan mo mati mar Tuhan nanti mo kase hidop ulang pa ngoni pake tu kuasa dari tu Dia pe Roh yang ada pa ngoni itu.
12 Sudara-sudara, ada tu torang musti beking lantaran Tuhan Allah pe Roh so ada pa torang. Itu sama deng torang masi ada utang yang musti bayar. Ini tu torang musti beking: torang musti hidop iko tu Tuhan Allah pe mau, bukang lei hidop iko tu keinginan manusia. 13 Soalnya kalu ngoni hidop iko tu keinginan manusia, ngoni mo dapa hukuman tapisa deng Tuhan slama-lamanya. Mar kalu ngoni hidop iko tu Tuhan pe Roh pe mau, Tuhan pe Roh itu mo bantu pa ngoni brenti beking tu keinginan-keinginan yang jaha tu ada pa ngoni pe hati, trus ngoni mo hidop slama-lamanya deng Tuhan.
14 Samua orang yang kase tu dorang pe diri supaya Tuhan Allah pe Roh pimpin tu dorang pe hati, so dorang itu no tu Tuhan Allah pe anak-anak. 15 Torang so bole tau kalu torang ini Tuhan pe anak-anak lantaran torang so trima tu Roh yang dari Tuhan Allah. Tu Roh yang dari Tuhan Allah itu nyanda beking torang jadi tako sama deng budak tako pa de pe tuang. Mar Tuhan Allah pe Roh beking torang jadi Tuhan Allah pe anak-anak, supaya torang bole pangge pa Dia itu, “Ya Bapa, Tuhan Allah tu torang pe Bapa!”. 16 Torang tau kalu torang ini Tuhan Allah pe anak-anak lantaran tu Roh yang da se yakin pa torang pe hati. 17 Jadi kalu torang ini Tuhan Allah pe anak-anak, torang lei jadi Dia pe ahli waris, itu de pe arti torang ini ada hak for mo trima samua tu Dia so se sadia for De pe anak-anak. Kong torang mo dapa itu sama-sama deng Kristus supaya torang lei dapa puji deng hormat sama-sama deng Dia. Mar kalu torang suka mo dapa itu, torang lei musti mendrita lantaran da iko pa Tuhan sama deng Kristus so mendrita.
Biar mendrita skarang nanti mo snang deng Tuhan
18 Kita yakin kalu tu pendritaan yang torang da rasa skarang ini nyanda ada arti apa-apa kalu mo se banding deng tu hidop yang luar biasa yang Tuhan nanti mo kase pa torang. 19 So itu, samua yang Tuhan Allah da ciptakan di dunia ini samantara da tunggu-tunggu deng snang hati tu waktu Tuhan mo se tunjung kalu torang yang percaya itu De pe anak-anak. 20 Soalnya dulu tu bumi deng de pe isi Tuhan so kutuk sampe jadi besae nyanda sama waktu pertama Tuhan da beking. Tuhan da kase hukuman bagitu bukang iko tu bumi pe mau, mar iko Dia pe mau. 21 Ni bumi deng samua de pe isi ada yang mo busu, rusak deng mo mati, mar nanti Tuhan mo kase bebas ni bumi deng de pe isi supaya nyanda mo jadi bagitu. Nanti ni bumi deng de pe isi mo hidop bebas dari samua itu kong mo hidop luar biasa sama-sama deng Tuhan Allah pe anak-anak.
22 Kong samantara batunggu Tuhan mo beking samua mo jadi baru ulang, torang tau dari dulu sampe skarang ni bumi deng de pe isi susa deng sengsara, sama deng tu parampuang yang da saki skali waktu so dekat-dekat de pe anak mo lahir. 23 Mar bukang cuma tu bumi yang da tunggu-tunggu tu waktu itu, deng torang yang percaya lei da tunggu-tunggu tu waktu itu. Pa torang ini Tuhan so kase akang tu Roh Kudus, so itu torang bole rasa sadiki tu hidop yang luar biasa yang Tuhan so janji pa torang for mo jadi Dia pe anak-anak. Torang lei mengelu susa deng sengsara pa torang pe hati lantaran torang da tunggu-tunggu Tuhan tu mo kase pa torang tu badan yang baru. 24 Waktu torang jadi percaya kong Tuhan so se slamat, mulai waktu itu torang so baharap deng yakin kalu nanti torang mo dapa yang Tuhan so janji pa torang itu. Mar kalu torang so dapa apa tu torang da tunggu-tunggu itu, itu de pe arti torang so nyanda perlu baharap to? Soalnya bagimana orang masi mo baharap kalu tu dia da harap itu dia so dapa? 25 Jadi, kalu torang blum dapa apa yang torang da harap-harap itu, torang tunggu-tunggu itu deng sabar sampe itu mo jadi.
26 Waktu torang nyanda kuat, tu Tuhan Allah pe Roh yang bantu pa torang. De pe conto bagini: waktu torang basombayang, torang nintau apa tu torang musti bilang pa Tuhan, mar tu Roh yang tolong pa torang for kase tau tu torang mo bilang pa Tuhan Allah. Tu Roh itu yang kase tau pa Tuhan deng cara yang torang sandiri nyanda mampu mo bilang deng kata-kata. 27 Tuhan Allah yang tau manusia pe isi hati, Dia tau apa tu Roh da bilang itu pe maksut. Soalnya apa yang tu Roh da bilang pa Tuhan for Tuhan pe orang-orang, itu iko Tuhan Allah pe mau.
28 Orang yang sayang pa Tuhan Allah, tu orang yang Tuhan Allah so pangge for iko tu De pe mau, apa jo yang da jadi pa dia biar itu bae ato nyanda, torang tau Tuhan Allah beking samua itu jadi bae for dia. 29 Soalnya dari dulu Tuhan Allah so pili pa samua orang yang Tuhan Allah tau kalu nanti tu orang-orang itu mo percaya pa Dia. Tuhan Allah so tentukan pa tu orang-orang itu supaya dorang pe sifat bole jadi sama deng Yesus tu De pe Anak pe sifat. Jadi dorang sama deng Yesus so basudara, kong Tuhan Allah beking Yesus jadi Anak yang tua dari dorang samua. 30 Tu orang-orang yang Tuhan Allah so tentukan dari dulu, Tuhan Allah lei pangge pa tu orang-orang itu for iko pa Dia. Dari tu orang-orang yang Dia da pangge itu, Tuhan Allah lei da beking tu orang-orang itu jadi butul di muka pa Dia. Kong pa tu orang-orang yang so jadi butul itu, Tuhan Allah mo kase tu hidop yang luar biasa.
Tuhan Allah pe sayang pa torang nyanda brenti-brenti
31 Kalu inga samua yang Tuhan so beking for torang, torang yakin Tuhan Allah ada sama-sama deng torang. Jadi sapa dang yang mampu malawang pa torang? Nyanda ada to? 32 Dia pe Anak sandiri, Dia nyanda tahang mar Dia kase sampe mati for torang. Jadi Tuhan Allah pasti mo kase pa torang samua yang torang perlu.
33 Sapa yang bole mo kase sala pa tu orang-orang yang Tuhan Allah so pili for iko pa Dia? Nyanda ada to? Soalnya Tuhan Allah so beking tu orang-orang itu jadi orang-orang yang butul di muka pa Dia. 34 Nyanda ada orang yang mo kase hukuman pa torang yang percaya pa Tuhan. Soalnya Kristus Yesus yang bela pa torang di muka pa Tuhan Allah. Kristus Yesus itu yang so mati for tubus torang pe dosa, deng lebe dari itu, skarang Dia so hidop ulang trus Dia dudu di tampa terhormat tu di sabla kanan pa Tuhan Allah.
35 Nyanda ada yang bole mo kase pisa pa torang dari Kristus pe sayang. Biar torang mo dapa tu susa, siksa, aniaya, kelaparan, nyanda ada baju, cilaka ato lei mo dapa bunung, biar samua bagitu Kristus tetap sayang pa torang. 36 Hal-hal itu jadi pa torang sama deng tu da tulis di Kitab Suci bagini:
“Ya Tuhan, siang malam orang trus-trus mo cari bunung pa torang lantaran torang da iko pa Tuhan,
dorang so anggap torang kurang sama deng domba-domba yang so siap mo dapa potong.”
37 Mar biar lei torang mo dapa samua tu susa, torang tetap mo menang luar biasa dari samua itu lantaran Kristus sayang pa torang.
38 Kita yakin skali biar torang mati ato torang hidop di dunia ini, biar malaekat-malaekat ato setang-setang mo beking bagimana, biar ada hal apa jo tu da jadi skarang ato nanti, 39 biar tu kuasa yang di langit deng di bumi ato apa jo yang Tuhan da ciptakan mo beking bagimana, itu samua nyanda mo beking torang tapisa deng Tuhan Allah pe sayang yang torang so dapa lantaran Kristus Yesus tu torang pe Tuhan.