Orang percaya so nyanda perlu beking tu atoran-atoran di kitab Taurat for mo slamat
7
1 Sudara-sudara, skarang kita babicara pa ngoni yang so tau tu atoran-atoran di kitab Taurat. Ngoni pasti tau slama torang hidop, torang ja iko tu atoran-atoran itu. 2 Kita ambe conto dari tu atoran tentang laki-bini. Tu bini itu masi ada hubungan deng de pe laki slama de pe laki masi hidop. Mar kalu de pe laki so mati, dia bebas dari tu atoran itu. 3 So itu, kalu tu de pe laki masi hidop, trus tu bini kaweng ulang deng laki-laki laeng, tu bini itu so bersina. Mar kalu dia pe laki so mati, tu bini itu nyanda bersina kalu dia kaweng ulang, dia itu so bebas dari tu atoran itu.4 Kita pe sudara-sudara, bagitu lei yang jadi pa torang deng tu atoran-atoran di kitab Taurat. Dulu torang musti iko tu atoran-atoran di kitab Taurat supaya bole mo dapa slamat. Mar Kristus so mati, kong torang yang percaya pa Dia so se tinggal tu torang pe hidop lama yang cuma iko tong pe mau sandiri, so sama deng torang lei so mati sama-sama deng Dia. Jadi skarang for mo slamat torang bukang iko tu atoran-atoran di kitab Taurat. Torang so jadi Kristus punya, Dia itu yang so hidop ulang. Kong lantaran torang so jadi Kristus punya, torang beking tu hal-hal bae for Tuhan Allah. 5 Soalnya waktu torang blum percaya pa Yesus, torang cuma hidop iko tu keinginan manusia yang suka ja beking dosa. Kong waktu torang tau tu atoran-atoran di kitab Taurat, torang pe mau for beking dosa lebe tatamba sampe tare torang ja beking tu dosa. Kong dosa itu no yang beking torang dapa hukum tapisa deng Tuhan slama-lamanya. 6 Mar skarang for mo slamat torang bukang iko tu atoran-atoran di kitab Taurat. Soalnya torang so se tinggal tu hidop yang lama itu, sama deng torang pe hidop lama so mati sama-sama deng Kristus waktu Dia mati. Deng bagitu tu atoran-atoran di kitab Taurat so nyanda mo kuasai lei pa torang. So itu, torang bole hidop iko Tuhan Allah pe mau deng cara baru yang iko tu Roh pe mau, so bukang lei deng cara lama yang iko tu atoran-atoran tu da tulis di kitab Taurat.
7 No kalu tu atoran-atoran di kitab Taurat itu beking torang lebe beking dosa, apa torang mo bilang kalu tu atoran-atoran di kitab Taurat itu besae? Nyanda to? Tu atoran-atoran di kitab Taurat itu nyanda besae, malatare deng ada tu atoran-atoran itu kita sandiri bole tau apa tu dosa. De pe conto: di kitab Taurat da tulis tu atoran, “Jang ngoni suka orang laeng punya for jadi ngoni punya.” Kita sandiri nintau kalu suka skali orang laeng punya kote itu dosa, baru dari tu atoran-atoran itu no kita tau kalu itu dosa. 8 Mar waktu kita tau tu atoran itu, tu keinginan dosa pa kita pe hati beking kita lebe suka orang laeng punya for jadi kita punya. Mar kalu tu atoran itu nyanda ada, tu keinginan for beking dosa pa kita pe hati lei nyanda mo ada.
9 Dulu waktu kita blum tau tu atoran-atoran di kitab Taurat, kita pikir kita hidop deng bae. Mar serta kita tau tu atoran-atoran di kitab Taurat, kita baru sadar kalu kita kote berdosa. Kong pa kita pe hati mulai kita rasa ada keinginan yang basar for beking dosa. 10 Jadi kita pantas dapa hukuman tapisa deng Tuhan for slama-lamanya. Sebenarnya deng kita beking tu atoran-atoran di kitab Taurat, kita bole hidop deng Tuhan slama-lamanya. Mar waktu kita tau tu atoran-atoran di kitab Taurat itu, malatare kita beking dosa sampe kita nanti mo dapa hukuman tapisa deng Tuhan slama-lamanya. 11 Tu atoran-atoran di kitab Taurat itu kase tunjung tu butul. Mar lantaran ada keinginan for beking dosa pa kita pe hati, so itu kita tatipu deng cara kita pikir kalu kita bole mo slamat kalu kita beking tu atoran-atoran itu. Mar kote tu keinginan for beking dosa pa kita pe hati itu tetap ada sampe kita lei beking dosa, jadi de pe laste, kita dapa hukuman tapisa deng Tuhan slama-lamanya, bole mo bilang kita sama deng so mati.
12 Mar biar bagitu tu atoran-atoran di kitab Taurat itu nyanda besae mar dari Tuhan, bagitu lei tu prenta-prenta di kitab Taurat itu lei dari Tuhan, itu samua butul deng bagus. 13 Mar jang sampe ada orang yang bapikir kalu tu atoran yang bagus itu yang beking sampe kita dapa hukuman tapisa deng Tuhan Allah for slama-lamanya, tantu katu nyanda bagitu. Dosa yang kita ja beking itu no, yang beking kita dapa hukuman tapisa deng Tuhan Allah for slama-lamanya. Soalnya bagini: tu atoran itu bagus, mar waktu kita tau tu atoran itu, kita pe keinginan for beking dosa tare lebe tatamba sampe kita beking dosa. Jadi deng ada tu atoran-atoran yang bagus itu kita bole tau mana tu dosa, kong kita bole tau lebe jelas kalu dosa itu jaha.
Hal bae deng hal jaha baku malawang pa kita pe hati
14 Torang tau tu atoran-atoran di kitab Taurat itu dari Tuhan Allah pe Roh. Mar kita ini cuma manusia, kita so sama jo deng da jual jadi budak dosa. 15 Kita sandiri bingo deng tu kita pe kalakuan. Soalnya kita suka mo beking tu bae mar yang kita ja beking tare tu jaha yang kita binci. 16 Kalu kita beking tu jaha yang kita nyanda suka mo beking, itu de pe arti kita so mangaku kalu tu atoran-atoran di kitab Taurat itu bae. 17 Jadi itu bukang kita pe mau sampe kita da beking tu jaha itu, mar kita beking tu jaha lantaran tu keinginan dosa yang ada pa kita pe hati. 18 Soalnya kita tau, pa kita pe diri, nyanda ada tu bae. Kita cuma manusia, kita memang suka mo beking tu bae, mar kita nyanda mampu mo beking itu. 19 Kita nyanda beking tu bae yang kita suka mo beking itu, malatare tu jaha yang kita nyanda suka, itu yang kita beking. 20 Kalu kita beking tu jaha yang kita nyanda suka, itu de pe arti bukang kita pe mau sampe kita beking tu jaha, mar tu keinginan for beking dosa yang ada pa kita pe hati sampe kita beking itu.
21 Jadi yang biasa tu da jadi pa kita bagini: biar kita suka mo beking tu bae, mar tu keinginan jaha tetap ada pa kita pe hati. 22 Soalnya pa kita pe hati, kita suka skali mo iko tu Tuhan Allah pe atoran-atoran, 23 mar de pe laste, kita nyanda iko tu Tuhan Allah pe atoran-atoran lantaran ada keinginan basar for beking dosa pa kita pe diri yang baku malawang tu kita pe pikiran for iko tu Tuhan Allah pe atoran-atoran itu. Tu pengaru itu beking kita pe diri susa mo talapas dari tu ja beking dosa. 24 Ado kasiang skali kita ini! Sapa yang mo bantu pa kita lapas dari hukuman tapisa deng Tuhan for slama-lamanya lantaran kita beking dosa? 25 Mar kita bilang makase pa Tuhan Allah lantaran lewat Tuhan Yesus Kristus, dosa so nyanda kuasai lei pa kita.
Jadi pa kita pe hati, kita suka beking tu Tuhan Allah pe atoran-atoran, mar pa kita pe diri lei ada tu kita pe keinginan dosa yang ja suru kita beking tu dosa.