Paulus babela de pe diri di muka pa raja Agripa
26
1 Kong raja Agripa bilang pa Paulus, “No skarang, ngana so bole babicara for babela ngana pe diri.”Trus Paulus basein deng de pe tangan kong babilang, 2 “Raja Agripa yang kita hormat. Orang-orang Yahudi da batudu pa kita, kong skarang kita rasa untung skali lantaran kita bole babela diri di muka pa bapak. 3 Apa lei kita tau, kalu bapak tau skali tu torang pe adat deng tu masala-masala di antara torang orang Yahudi. So itu, kita minta pa bapak supaya dengar akang deng sabar pa kita.
4 Samua orang Yahudi tau bagimana kita pe hidop pa kita pe kampung dari lei kita masi nyong-nyong, sampe kita tinggal di tenga-tenga kita pe bangsa di Yerusalem. 5 Dorang so lama tau kalu kita ini ja iko golongan Farisi, tu golongan yang paling kras iko tu atoran-atoran pa torang pe agama. Kalu dorang suka, dorang bole kase tau samua itu pa bapak. 6 Skarang kita musti mangada di pengadilan ini lantaran kita da baharap tu janji yang Tuhan Allah da kase pa torang pe nene moyang. 7 Tu torang pe dua blas suku Israel da tunggu-tunggu Tuhan Allah mo se gnap tu Dia pe janji itu. Kong samantara batunggu tu janji, siang malam torang ja baibada trus pa Tuhan Allah. Tuhan Allah pe janji itu, Dia mo se hidop ulang orang yang so mati. Jadi Raja Agripa, so lantaran kita da baharap deng yakin tu janji itu no kong orang-orang Yahudi batudu pa kita. 8 Kong skarang kita mo batanya pa orang-orang Yahudi yang ada di sini. Kiapa so ngoni anggap kalu nyanda mungkin Tuhan Allah mo se hidop ulang tu orang yang so mati?
9 Dulu, kita lei perna bapikir kalu kita musti malawang deng kras pa tu orang-orang yang ja iko pa Yesus, tu Orang Nazaret itu. 10 Di Yerusalem lei kita da beking bagitu. Kita dapa kuasa dari imam-imam kapala for tangka tu orang-orang yang ja iko pa Yesus kong kase maso ka bui pa dorang, malatare kita lei stuju kalu dorang itu musti dapa hukuman mati. 11 Kita lei maso ka ruma-ruma ibada agama Yahudi, kong kita ja siksa tu orang-orang yang iko pa Yesus deng paksa pa dorang bahojat pa Dia. Kita binci skali pa dorang, jadi kita dusu pa dorang sampe ka kota-kota di luar daera for mo siksa pa dorang.”
Paulus se cirita bagimana dia jadi percaya pa Yesus
12 Paulus bilang lei, “Satu kali, kita dapa tugas deng surat kuasa dari tu imam-imam kapala kong kita pigi ka Damsyik for mo siksa tu orang-orang yang ja iko pa Yesus. 13 Waktu so di tenga jalang pas tenga hari, kage-kage kita lia ada sinar pe silau skali dari langit. Tu sinar itu lebe trang dari matahari, kong tu sinar tutu pa kita deng tu orang-orang yang ada sama-sama deng kita. 14 Torang samua tajatung ka tana. Kita dapa dengar suara yang da babilang pa kita pake bahasa Ibrania. Tu suara itu da babilang bagini, ‘Saulus, Saulus kiapa ngana siksa pa Kita? Ngana beking siksa ngana pe diri sandiri lantaran da malawang pa Kita yang berkuasa pa ngana.’
15 Kong kita bale batanya, ‘Sapa dang ini?’
Tu suara itu babilang, ‘Kita ini Yesus, tu ngana ja siksa. 16 Skarang ngana bangong kong badiri jo. Kita da batunjung tu Kita pe diri pa ngana lantaran Kita da pili pa ngana mo jadi Kita pe playan. Ngana mo jadi saksi for se cirita apa tu ngana da lia skarang deng tu Kita mo se lia nanti pa ngana. 17 Nanti tu orang-orang Yahudi deng bukang Yahudi mo siksa pa ngana, mar Kita mo se slamat pa ngana dari pa dorang. Skarang, Kita utus ngana pigi pa dorang, 18 for buka dorang pe pikiran supaya dorang nyanda hidop di glap mar hidop di trang, supaya dorang talapas dari tu setang pe bos pe kuasa kong Tuhan Allah pe kuasa mo ada sama-sama deng dorang, kong so lantaran dorang percaya pa Kita dorang pe dosa-dosa mo dapa ampung, deng dorang mo dapa samua tu Tuhan da janji pa orang-orang yang Dia so beking jadi kudus.’
Paulus beking tu Tuhan Yesus da prenta
19 Jadi Raja Agripa, kita nyanda batolak for beking tu prenta yang Tuhan Yesus da kase pa kita waktu dapa penglihatan. 20 Kita se tau pa orang-orang supaya dorang bertobat kong percaya pa Tuhan Allah. Dorang musti hidop beking tu butul for se tunjung kalu dorang butul-butul so bertobat. Samua itu kita da se tau lebe dulu pa orang-orang Yahudi di Damsyik, di Yerusalem deng di tampa-tampa laeng di daera Yudea, trus kita lei da se tau itu pa orang-orang bukang Yahudi. 21 So lantaran kita da beking itu, tu orang-orang Yahudi tangka pa kita di Ruma Ibada Pusat trus coba mo bunung pa kita. 22 Mar sampe ini hari Tuhan Allah ja tolong pa kita, so itu kita bole badiri di sini for basaksi tentang Yesus pa ngoni samua, biar ngoni pejabat ato orang biasa. Samua tu kita da se tau itu sama deng tu nabi Musa deng tu nabi-nabi laeng so kase tau dulu. 23 Dorang so kase tau kalu tu Mesias musti tanggong banya siksa sampe mati, deng kalu Dia itu yang pertama tu mo hidop ulang. Kong Dia itu lei yang mo kase tau tu Kabar Bae pa orang-orang Yahudi deng orang-orang bukang Yahudi, itu sama deng Dia da kase trang pa dorang pe hati.”
24 Samantara Paulus da babela de pe diri, gubernur Festus potong tu Paulus pe bicara. Dia babilang deng suara kuat, “So gila ngana Paulus! Ngana kwa so talalu banya blajar sampe ngana pe pikiran so nyanda butul.”
25 Mar Paulus manyao, “Bapak Festus yang kita hormat. Kita kasiang nyanda gila, samua tu kita da bilang itu memang butul, kong kita pe pikiran lei masi sehat. 26 Raja Agripa sandiri tau butul tentang samua tu kita da bilang itu, so itu kita brani babicara trang-trangan di muka pa raja. Kita kwa yakin nyanda ada satu dari tu hal-hal yang kita da bilang yang raja nintau, lantaran samua itu da jadi di muka banya orang. 27 Raja Agripa percaya to apa tu nabi-nabi da tulis dari dulu itu? Kita yakin kalu raja percaya itu.”
28 Kong raja Agripa babilang pa Paulus, “Paulus, apa ngana kira gampang mo beking kita jadi orang Kristen cuma deng waktu pe singkat bagini?”
29 Kong Paulus bilang pa raja, “Kita basombayang pa Tuhan Allah supaya capat ato lama, bukang cuma Raja Agripa yang mo jadi percaya pa Yesus, mar samua orang yang ada di sini deng yang da dengar tu kita da bilang mo jadi sama deng kita. Mar tantu katu bukang jadi orang tahanan sama deng kita skarang ini.”
30 Pe klar Paulus babicara, raja Agripa, Bernike, gubernur Festus deng samua orang yang dudu sama-sama deng dorang itu iko badiri. 31 Waktu dorang bajalang kaluar, dorang baku bilang, “Tu orang itu nyanda beking kejahatan apa-apa yang beking dia musti maso bui ato mo dapa hukum mati.”
32 Kong raja Agripa bilang pa gubernur Festus, “Sebenarnya kwa kalu tu orang itu nyanda minta nae banding pa raja yang paling tinggi di krajaan Romawi, dia so bole bebas.”