Orang Yahudi batudu pa Paulus di muka gubernur Feliks
24
1 Serta so lewat lima hari, datang tu imam basar Ananias sama-sama deng tua-tua Yahudi deng satu orang pengacara tu de pe nama Tertulus. Dorang samua itu mangada pa gubernur Feliks kong kase tau tu Paulus pe perkara. 2 Abis itu gubernur suru bawa Paulus ka situ. Trus Tertulus mulai batudu pa Paulus, dia bilang, “Bapak gubernur yang torang hormat. Serta Bapak pegang prenta di sini, torang pe hidop jadi tenang, deng lei torang pe daera ini jadi bagus lantaran bapak pande ja baator. 3 Di mana-mana torang da pigi akang, torang tau kalu samua itu bapak yang da beking. Kong for samua itu, torang bilang makase pa bapak. 4 Mar supaya torang nyanda beking abis talalu banya tu bapak pe waktu, kita bamohon pa bapak yang bae supaya dengar akang tu torang mo bilang sadiki ini.5 Bagini bapak, torang so lia kalu ni orang ini tukang beking kacau kong berbahaya. Soalnya di mana-mana dia beking kacau pa orang-orang Yahudi. Dia ini ja iko tu satu orang dari Nazaret pe ajaran, yang orang ja bilang aliran Nasrani. Kong dia yang jadi pemimpin dari tu aliran itu. 6 Malatare dia coba-coba mo beking najis tu torang pe Ruma Ibada Pusat, mar torang tangka pa dia kong mo adili pa dia iko torang pe atoran-atoran di kitab Taurat. 7 Mar tu kapala perwira Romawi Lisias datang ambe pa dia deng cara kasar dari pa torang. 8 Abis itu, kapala perwira Romawi bilang kalu torang mo tuntut pa Paulus, torang musti mangada pa bapak. Jadi kalu bapak sandiri priksa pa Paulus, bapak mo dapa tau kalu samua tu torang da tudu pa dia itu butul.”
9 Pe klar Tertulus bilang bagitu, tu orang-orang Yahudi laeng lei babilang kalu tu Tertulus da bilang itu butul.
Paulus babela de pe diri di muka pa gubernur Feliks
10 Abis itu, Gubernur basein pa Paulus kalu dia so bole babicara, kong Paulus bilang, “Bapak Gubernur, kita tau bapak so deng taong-taong ja urus perkara pa bangsa ini. So itu kita snang mo babela diri di muka pa bapak. 11 Bagini kwa bapak, nyanda lebe dari dua blas hari yang lalu, kita da pigi ka Yerusalem for baibada. Bapak bole tanya pa orang-orang tentang itu. 12 Waktu kita di Ruma Ibada Pusat, orang-orang Yahudi tau kalu kita nyanda baku ambe deng orang-orang deng nyanda beking kacau di situ. Kita lei nyanda beking kacau di tampa-tampa laeng tu ada di dalam kota. 13 Kong skarang dorang tudu macam-macam pa kita, padahal tu dorang da lapor pa bapak tadi nyanda ada de pe bukti.
14 Mar biar lei bagitu, kita mo bilang satu hal pa bapak. Kita ja semba pa Tuhan Allah tu torang pe nene moyang ja semba dari dulu. Kita semba pa Tuhan Allah deng cara iko tu ajaran yang Tuhan Yesus da kase ajar, tu ajaran yang dorang ja bilang sesat, tu aliran Nasrani. Kita percaya samua tu da tulis di atoran-atoran di kitab Taurat deng di kitab nabi-nabi. 15 Kita sama deng dorang baharap deng yakin pa Tuhan Allah kalu nanti samua orang yang so mati mo hidop ulang. Tu orang-orang yang mo hidop ulang itu, ada yang ja beking tu butul di muka pa Tuhan, ada lei yang nyanda ja beking tu butul di muka pa Tuhan. 16 So itu, kita slalu brusaha hidop deng hati bersi di muka pa Tuhan Allah deng lei di muka pa manusia.
17 Kong serta so bebrapa taong di tampa laeng, kita babale ka Yerusalem. Kita datang for kase doi sumbangan pa orang-orang dari kita pe bangsa Yahudi yang hidop susa deng lei for kase korban persembahan di Ruma Ibada Pusat. 18 Waktu kita da beking samua itu di Ruma Ibada Pusat, datang bebrapa orang Yahudi dari daera Asia. Dorang baku dapa deng kita di situ waktu kita baru klar beking tu adat beking bersi diria. Waktu itu, nyanda banya orang di situ deng kita lei nyanda da baribut. 19 Sebenarnya dorang itu yang musti datang kamari kong babilang pa bapak tu dorang pe tuduhan for kita. Itu lei kalu dorang memang ada tuduhan for kita. 20 Mar skarang tanya jo pa dorang ini, apa tu kita pe sala. Tu hari waktu dorang da urus pa kita di muka Mahkamah Agama, dorang nyanda dapa se bukti kalu kita ini memang sala. 21 Ato stou dorang anggap kita sala lantaran waktu itu kita da bilang deng kuat di muka pa dorang, ‘Kita dapa urus di sini lantaran kita percaya kalu Tuhan Allah mo se hidop ulang tu orang-orang yang so mati.’ ”
22 Mar gubernur Feliks yang tau banya tentang tu ajaran Yesus, dia se tunda tu dorang pe perkara, dia bilang, “Kalu tu kapala perwira Romawi Lisias so sampe di sini, baru kita mo ambe keputusan tu ngoni pe perkara.” 23 Kong gubernur suru tu perwira Romawi tetap tahang pa Paulus, mar kase los sadiki pa dia. Paulus pe tamang-tamang lei bole babesuk pa dia kong kase sadia tu de pe keperluan.
Paulus kase tau tentang Kristus Yesus pa gubernur Feliks deng Dia pe bini
24 Serta so bebrapa hari, tu gubernur Feliks bale ulang ka Kaisarea sama-sama deng de pe bini Drusila. Dia pe bini itu orang Yahudi. Kong Feliks suru orang pangge pa Paulus. Serta Paulus so di situ, dia bilang pa Feliks bagimana de pe cara supaya orang bole percaya pa Kristus Yesus. 25 Paulus lei babicara bagimana cara orang mo hidop butul di muka pa Tuhan, bagimana mo kuasai diri, deng lei tentang tu hari kiamat, waktu Tuhan mo adili samua orang. Pe dengar itu, Feliks jadi tako kong bilang, “So bole jo dulu, kong pigi jo skarang. Nanti kalu ada waktu kita mo pangge ulang pa ngana.” 26 Samantara itu, Feliks kote da babaharap kalu Paulus mo kase doi pa dia. So itu dia ja pangge pa Paulus for bacirita deng dia.
27 Pe lewat dua taong, Perkius Festus ganti pa Feliks jadi gubernur. Mar waktu Feliks masi ada di situ dia tetap tahang pa Paulus di bui lantaran dia mo ambe hati pa orang Yahudi.