Yesus se tau kalu nanti orang-orang mo kase rubu tu Ruma Ibada Pusat
24
1 Abis itu Yesus bajalang se tinggal tu Ruma Ibada Pusat. Waktu itu Dia pe murit-murit badekat pa Dia kong batunjung ka gedung-gedung yang ada di kompleks Ruma Ibada Pusat. 2 Kong Yesus bilang pa dorang, “Ngoni lia to tu gedung-gedung itu? Kita bilang pa ngoni, nanti satu waktu nyanda mo ada satu batu lei yang tasusung pa de pe tampa, samua itu mo dapa kase rubu.”Banya orang yang percaya mo mendrita skali seblum kiamat
3 Abis itu, Yesus pigi ka bukit Zaitun kong dudu di situ. Waktu itu Dia pe murit-murit datang badekat for babicara sandiri deng Dia, dorang bilang, “Guru, kase tau akang pa torang, tempo apa dang tu Guru da bilang tadi mo jadi? Kong apa dang tu tanda-tanda waktu Guru mo datang ulang deng tu tanda waktu hari kiamat?”
4 Yesus manyao pa dorang, “Hati-hati jo ngoni, jang sampe ada orang yang mo beking sesat pa ngoni. 5 Soalnya banya orang mo datang kong mo pake Kita pe nama. Dorang mo bilang bagini, ‘So kita ini tu Kristus tu Raja yang se slamat pa manusia’ kong dorang itu mo beking sesat banya orang. 6 Kong ngoni mo dengar ada prang di satu daera, ato ngoni mo dengar kabar-kabar tentang prang di tampa laeng. Mar biar bagitu, ngoni jang tako lantaran samua itu musti jadi lebe dulu, mar itu blum de pe waktu mo kiamat. 7 Soalnya nanti satu suku bangsa mo baprang deng suku bangsa laeng, satu krajaan baprang deng krajaan laeng, kong mo ada lei kelaparan deng tana goyang di mana-mana. 8 Mar samua itu baru de pe awal pendritaan seblum kiamat, sama deng tu pendritaan yang parampuang da rasa waktu mo melahirkan.
9 Waktu itu, ada orang-orang yang tangka pa ngoni trus mo srahkan for siksa deng bunung pa ngoni. Kong orang-orang dari samua suku bangsa mo binci pa ngoni lantaran da iko pa Kita. 10 Kong banya orang yang percaya so nyanda mo percaya lei pa Kita. Dorang mo baku binci deng mo baku hianat. 11 Ada banya nabi palsu mo muncul kong beking sesat banya orang. 12 Kong tu kejahatan yang orang da beking mo lebe tatamba banya, so itu banya orang so nyanda mo basayang lei. 13 Mar orang yang tetap batahang percaya pa Kita sampe akhir, Tuhan mo kase slamat pa dia. 14 Kong tu Kabar Bae tentang Tuhan Allah Berkuasa sbagai Raja mo se siar dulu ka sluru dunia supaya samua suku bangsa bole tau itu, abis itu baru dunia mo kiamat.”
Yesus kase tau tentang orang paling jaha yang mo datang
15 Yesus bilang lei, “Ngoni mo lia satu orang yang paling jaha tu tukang beking ancor samua, kong dia mo badiri di tampa yang kudus di Ruma Ibada Pusat. Nabi Daniel so tulis firman tentang hal itu. (Sapa yang da babaca ini, tarukira jo bae-bae!) 16 Kong kalu tu orang paling jaha itu so badiri di tampa yang kudus, lebe bae tu orang-orang yang ada di daera Yudea lari pi manyingkir jo ka gunung-gunung. 17 Tu orang yang ada di atas ruma jang turung pi ambe tu barang-barang pa de pe ruma, mar turung kong lari jo. 18 Bagitu lei deng tu orang yang ada di kobong, jang babale for ambe dia pe baju. 19 Waktu itu yang paling cilaka tu ibu-ibu yang hamil deng tu masi ja se batoto ade. 20 Basombayang jo supaya waktu ngoni da lari pi manyingkir itu, nyanda pas oras dingin ato di hari Sabat. 21 Soalnya tu hari-hari itu de pe siksa pe hebat skali, mulai dari pertama Tuhan Allah da beking ni dunia sampe skarang, nyanda perna ada tu siksa yang sama deng itu, kong nyanda perna mo ada lei. 22 Kong kalu Tuhan nyanda beking pende tu hari-hari yang pe siksa itu, nyanda ada satu orang yang mo slamat. Mar lantaran Dia sayang pa orang-orang yang Dia so pili, Dia beking pende tu hari-hari itu.
23 Waktu itu, kalu ada orang bilang pa ngoni bagini, ‘Co lia, Kristus ada di sini!’, ato ‘Kristus ada di sana!’, ngoni jang percaya itu. 24 Soalnya kristus-kristus palsu deng nabi-nabi palsu mo muncul. Dorang mo beking mujisat-mujisat deng hal-hal luar biasa, sampe kalu bole tu orang-orang yang Tuhan so pili jadi sesat. 25 Jadi tarukira jo bae-bae, samua ini Kita so bilang lebe dulu pa ngoni.
26 So itu kalu ada orang yang bilang pa ngoni bagini, ‘Co lia, Kristus ada di padang gurun,’ ngoni jang pigi ka situ. Ato kalu ada yang bilang pa ngoni, ‘Co lia, Kristus ada di ruang yang da tasambunyi,’, ngoni lei jang percaya itu. 27 Soalnya waktu Anak Manusia mo datang ulang, Dia pe kedatangan mo dapa lia ka sluru dunia, sama deng kilat pe cahaya yang muncul di timur trus sampe ka barat. 28 Kalu torang lia ada burung pangmakang bangkai bakumpul di satu tampa, itu de pe tanda kalu di tampa itu pasti ada bangkai, bagitu lei deng kalu tu Anak Manusia datang ulang ka dunia, orang pasti mo dapa tau itu lantaran lebe dulu ada tu de pe tanda-tanda.”
Tanda-tanda waktu Anak Manusia mo datang ulang
29 Yesus bilang, “Pe klar tu hari-hari siksa itu, matahari so nyanda mo basinar, tu bulan mo jadi glap, tu bintang-bintang mo ciri dari langit, deng samua kuasa di langit mo tabongkar-bongkar. 30 Waktu itu, mo ada tanda di langit kalu tu Anak Manusia datang ulang, kong samua suku bangsa di bumi mo sedi skali deng manangis. Dorang samua mo lia tu Anak Manusia datang di atas awan-awan dari sorga, Dia datang deng Dia pe kuasa deng Dia pe luar biasa. 31 Dia mo suru tu De pe malaekat-malaekat kaluar, kong mo dapa dengar bunyi trompet pe kuat skali. Dorang itu mo se kumpul tu orang-orang yang tu Anak Manusia so pili dari samua tampa di bumi ini, dari ujung barat sampe ka ujung timur, deng dari ujung utara sampe ka ujung slatan.”
Yesus kase tau tu keadaan waktu Anak Manusia mo datang ulang
32 Yesus bilang lei, “Co ngoni blajar dari tu pohong ara. Kalu de pe cabang-cabang kacili so baijo deng mulai batunas, ngoni tau kalu tu oras panas so dekat. 33 Bagitu lei kalu ngoni lia tu hari-hari siksa yang Kita da bilang tadi so mulai jadi, so nyanda lama tu Anak Manusia mo datang, so dekat skali. 34 Kita bilang pa ngoni, tu orang-orang yang hidop jaman ini ada yang blum mo mati sampe samua ini jadi. 35 Langit deng bumi mo ancor, mar tu Kita pe firman mo ada trus.”
Orang percaya musti slalu siap for Anak Manusia mo datang ulang
36 Yesus bilang lei, “Nyanda ada satu orang yang tau tempo apa deng jam brapa tu Anak Manusia mo datang ulang. Malaekat-malaekat di sorga nintau, enter Anak Manusia sandiri lei nintau, cuma Bapa sandiri yang tau. 37 Waktu tu Anak Manusia mo datang ulang, de pe keadaan sama deng keadaan dulu waktu jaman Nuh. 38 Dulu seblum Tuhan kase tu banjer basar skali, tu orang-orang pe hidop cuma makang minum, kaweng deng da se kaweng, dorang pe hidop cuma babagitu trus sampe di hari waktu Nuh maso ka kapal basar. 39 Tu orang-orang itu nyanda sadar kalu banjer basar mo datang. Dorang nanti sadar serta tu banjer so datang se abis pa dorang. No bagitu lei orang-orang nanti nyanda mo siap kalu kage-kage tu Anak Manusia so datang ulang. 40 Kong nanti waktu itu ada dua laki-laki da bakarja di kobong, tu satu laki-laki mo dapa angka ka sorga kong tu satu mo se tinggal. 41 Kong waktu itu lei ada dua parampuang da sama-sama bagiling gandum, tu satu parampuang mo dapa angka ka sorga kong tu satu mo se tinggal. 42 So itu bajaga-jaga jo, lantaran ngoni nintau tempo apa ngoni pe Tuhan mo datang.
43 Mar tarukira jo ini bae-bae, kalu tuang ruma so tau tempo apa tu papancuri mo bapancuri pa de pe ruma, tantu katu dia nyanda mo tidor lantaran dia mo bajaga-jaga supaya tu papancuri nyanda mo maso pa de pe ruma. 44 Bagitu lei deng ngoni, ngoni musti slalu siap for batunggu tu Anak Manusia mo datang. Soalnya ngoni nintau tempo apa tu Anak Manusia mo datang ulang, Dia mo datang kage-kage.”
Prumpamaan tentang budak yang setia deng yang nyanda setia
45 Yesus bilang lei, “Sapa tu budak yang setia deng bijaksana, yang de pe tuang da angka jadi kapala for budak-budak laeng, supaya bole kase makang pa dorang pas jam makang? 46 Tantu katu tu budak yang paling snang itu tu budak yang waktu de pe tuang pulang dia masi samantara da bakarja. 47 Kita bilang pa ngoni, pasti tu dia pe tuang itu mo angka pa dia kong kase percaya for awasi samua tu de pe tuang pe kepunyaan.
48 Mar kalu tu budak itu jaha, dia babilang pa de pe hati bagini, 49 ‘Kita pe tuang masi lama baru mo pulang.’ Kong dia mulai pukul-pukul tu budak-budak laeng, trus dia pi makang deng minum sama-sama deng tu pangmabo-pangmabo. 50 Kong di hari yang dia nyanda sangka-sangka, kage-kage dia pe tuang pulang, 51 kong tu dia pe tuang itu mo hukum pa dia sampe mati, trus dia pe nasib itu sama deng tu nasib dari orang-orang yang munafik. Di situ dorang mo manangis deng dong pe gigi tabaku goso kong babunyi lantaran pe mendrita skali.”