Yunus
Yunus nyanda iko TUHAN pe prenta
1
1 Satu kali TUHAN babicara pa Yunus, tu Amitai pe anak. TUHAN bilang, 2 “Yunus, pigi jo ka Niniwe, tu kota basar itu. Kita so tau dorang pe kejahatan. Jadi ngana pi kase tau pa dorang, so talalu banya dorang da beking tu jaha.”3 Mar Yunus nimau, dia cuma mo lari ka Tarsis lantaran mo bajao dari pa TUHAN. Jadi Yunus pigi ka Yafo, kong di sana dia dapa kapal mo ka Tarsis. Abis dia bayar frak, dia nae ka kapal for mo blayar ka Tarsis, supaya jao dari TUHAN.
4 Mar TUHAN beking angin kancang deng omba basar, sampe tu kapal amper-amper mo ancor. 5 Tu orang-orang di kapal so tako samua. Dorang babataria minta tolong pa dong pe tuhan masing-masing. Kong dorang lei kase buang ka laut tu dong pe muatan, supaya tu kapal jadi ringan kong nyanda mo tengglam.
Waktu itu, Yunus ada di dek paling bawa. Dia da baguling sampe tasono di situ. 6 Kong kapten kapal turung ka bawa, dia dapa lia pa Yunus kong bilang, “Bagimana lei ngana ini cuma da tasono sadap? Bangong jo, kong minta tolong pa ngana pe tuhan, sapa tau dia mo kase slamat pa torang supaya torang nyanda mati!”
7 Di atas kapal, tu orang-orang kapal baku bilang, “Mari jo torang samua cabu lot, supaya dapa tau sapa pe sala sampe tu angin deng omba jadi kras bagini.” Jadi dorang iko cabu lot, kong Yunus tu da dapa.
8 Waktu itu jo dorang tanya-tanya akang pa dia, “Co bilang kamari pa torang! Lantaran sapa so kong torang amper mo cilaka bagini? Apa so ngana pe karja? Dari mana so ngana? Kong sapa dang ngana?”
9 Yunus manyao, “Kita kwa orang Ibrani. Kita percaya pa TUHAN, Allah tu ada di sorga. Dia tu da beking laut deng darat.”
10 Abis itu, Yunus kase cirita lei pa dorang bagimana dia da lari dari pa TUHAN. Abis Yunus bacirita, samua orang so lebe tako. Kong dorang bilang, “Kiapa dang ngana beking bagitu?”
11 Waktu itu, angin deng omba so lebe kancang. Kong dorang batanya ulang pa Yunus, “No skarang, torang mo beking apa dang pa ngana supaya tu angin deng omba ini mo jadi tedo?”
12 Kong Yunus manyao, “Angka jo pa kita kong kase lego ka laut, pasti kwa ini angin deng omba mo tedo. Soalnya kita tau memang gara-gara kita kong tu angin deng omba jadi bagini.”
13 Biar bagitu, tu orang-orang kapal bakuat bapanggayung, supaya tu kapal dapa bapinggir ka darat. Mar dorang kasiang nyanda mampu, soalnya tu angin deng omba so lebe kancang lei. 14 Jadi dorang bilang deng suara kuat pa TUHAN, “Oh TUHAN, jang kase mati pa torang lantaran mo buang pa tu orang ini ka laut. Dia nyanda beking sala apa-apa pa torang. Jadi kalu sampe torang buang pa dia, jang hukum pa torang. Torang so tau TUHAN, ini angin deng omba jadi lantaran TUHAN pe mau.”
15 Abis itu, dorang angka pa Yunus kong kase lego ka laut, trus tu angin deng omba iko tedo. 16 Kong waktu itu, tu orang-orang kapal jadi tako skali pa TUHAN. Kong dorang potong binatang for beking korban persembahan pa TUHAN deng bajanji pa Dia.
17 Kong TUHAN suru ikang basar pi tlang pa Yunus, trus Yunus tinggal di dalam ikang pe puru slama tiga hari tiga malam.