Yunus 2

Yunus pe sombayang syukur pa TUHAN

1 Waktu Yunus di dalam ikang pe puru, dia basombayang pa TUHAN, tu Allah yang dia ja semba. 2 Dia bilang, “Oh TUHAN, waktu kita so siksa skali di laut, amper-amper mo mati, kita bataria minta tolong pa TUHAN. TUHAN dengar kita da bataria kong tolong pa kita.

3 Waktu di kapal, TUHAN lego pa kita ka tenga laut sampe pa de pe dasar paling dolong. Tu aros so baputar-putar akang pa kita, kong tu TUHAN pe omba basar da paka kras pa kita. 4 Dalam hati kita bilang, ‘TUHAN so user pa kita, so kase jao kita dari pa Dia. Apa kita masi bole mo lia tu Dia pe Ruma Ibada Pusat yang kudus?’ 5 Tu aer laut da se putar-putar pa kita for mo beking kita cilaka. Tu laut so mo tlang pa kita, di laut kita pe kapala so tabungkus deng lumut laut. 6 Kita so tengglam ka kaki gunung di bawa laut. Kita takurung di situ, kong so nyanda ada jalang mo kaluar akang sampe slama-lamanya. Mar waktu itu, TUHAN tu Allah yang kita ja semba angka pa kita supaya slamat. 7 Memang waktu itu kita so nyanda ada harapan lei mo hidop. Mar di situ kita dapa inga pa TUHAN, kong kita basombayang. Kita pe sombayang itu TUHAN so dengar dari TUHAN pe Ruma Ibada Pusat yang kudus.

8 Ada orang-orang yang cuma percaya pa opo-opo tu nyanda barguna, so dorang itu tu da kase tinggal pa TUHAN yang nyanda brenti sayang pa dorang. 9 Mar kita mo kase korban persembahan pa TUHAN deng ucapan syukur. Kita mo beking samua tu kita pe janji pa TUHAN. Memang tu keslamatan cuma dari pa TUHAN!”

10 Klar itu, TUHAN prenta pa tu ikang basar pi kase munta pa Yunus di pinggir pante, kong tu ikang beking rupa tu TUHAN da prenta.