Yunus kase tau TUHAN pe pesan kong orang-orang Niniwe bertobat
3
1 TUHAN babicara pa Yunus kadua kali, 2 “Pigi jo ka Niniwe, tu kota basar itu, kong pi kase tau pa dorang apa tu Kita da bilang pa ngana.”3 Abis itu Yunus pigi ka kota Niniwe, sama deng tu TUHAN so prenta. Tu kota Niniwe itu pe basar skali. Kalu mo baron akang tu kota itu, makang waktu tiga hari. 4 Kong Yunus mulai maso ka kota itu, dia bajalang satu hari. Trus, dia bilang pa orang-orang Niniwe, “Ampa pulu hari lei, ini kota mo ancor!”
5 Orang-orang Niniwe percaya tu Tuhan Allah pe pesan itu. Kong dorang samua ambe keputusan for mo bapuasa. Samua orang, sapa jo dia, musti pake kaeng karong, tanda manyasal so beking sala.
6 Waktu raja Niniwe dengar tu brita, dia turung dari kadera raja kong dia ganti de pe baju krajaan deng kaeng karong. Klar itu dia dudu di abu, tanda so tobat. 7 Tu raja deng de pe pejabat-pejabat kase kaluar prenta for se tau pa orang-orang Niniwe bagini, “Samua orang deng tu binatang ja piara: sapi, kambing deng domba, nimbole makang deng minum. 8 Samua orang deng tu binatang ja piara musti pake kaeng karong. Samua orang musti basombayang pa Tuhan Allah deng sunggu-sunggu. Masing-masing orang jo musti roba tu kalakuan jaha, kong brenti ja beking tu kekrasan. 9 Sapa tau Tuhan Allah nyanda mo mara lei pa torang, kong Dia mo babale sayang sampe torang nyanda mo mati.”
10 Waktu Tuhan Allah lia tu dorang da beking itu, Dia tau dorang so bertobat, so itu Dia ambe keputusan so nyanda jadi mo hukum pa dorang.