Yunus mara lantaran TUHAN nyanda jadi hukum pa orang-orang Niniwe
4
1 Yunus nyanda snang kong jadi mara skali, lantaran TUHAN nyanda jadi hukum pa orang-orang Niniwe. 2 Kong Yunus basombayang pa TUHAN, “TUHAN, waktu kita masi di kampung, kita so bilang to kalu TUHAN nyanda mo jadi hukum pa dorang. Kita tau Tuhan Allah pambae, pangsayang deng pangsabar. Tuhan Allah pe sayang nyanda perna abis pa torang, deng slalu rasa snang kalu nyanda jadi bahukum orang. So itu, waktu TUHAN suru pa kita mo ka Niniwe, kita cuma da lari ka Tarsis. 3 No kalu TUHAN nyanda jadi hukum pa orang-orang Niniwe, TUHAN ambe jo pa kita. Lebe bae kita mati daripada hidop.”4 Mar TUHAN bilang, “Pantas so ngana bamara bagitu?”
5 Abis itu, Yunus kaluar dari tu kota, dia pigi ka satu tampa di sabla timur. Di situ dia beking sabua kacili for tampa basombar. Dia dudu di sabua itu kong batunggu mo lia apa tu mo jadi di Niniwe.
6 Kong TUHAN Allah kase tumbu tu satu tanaman sampe langgar pa Yunus pe kapala, kong kase basombar akang pa dia. TUHAN beking bagitu for mo hibur pa Yunus. Yunus snang skali lantaran tu tanaman itu ada. 7 Mar de pe eso amper siang, Tuhan Allah suru satu ekor gai pi beking lobang tu tanaman, sampe tu tanaman itu mulai jadi kring. 8 Waktu matahari so kaluar, Tuhan Allah beking lei angin timur panas batiop. Tu panas matahari beking Yunus pe kapala saki, sampe dia amper mo flao. Waktu itu jo Yunus so suka skali mo mati, kong dia bilang, “Lebe bae mati jo kita!”
9 Mar Tuhan Allah bilang pa Yunus, “Pantas so ngana mara lantaran tu tanaman itu so mati?”
Yunus manyao, “Pantas no kita mara sampe suka mo mati.”
10 Trus Tuhan Allah bilang pa Yunus, “Tu tanaman cuma da batumbu tu malam, kong de pe eso iko mati. Bukang ngana lei tu da se batumbu deng piara, asi to ngana rasa kasiang skali pa tu tanaman itu. 11 Bagitu lei deng Kita, Kita memang rasa kasiang deng tu Niniwe, tu kota pe basar itu. Soalnya di Niniwe ada sratus dua pulu ribu orang lebe yang blum tau mana tu bae deng tu jaha, deng pe banya skali lei binatang tu dorang ja piara.”