Mbanafta Yesu ta sana mndu nda mta dzva ni
3
1 Mbaɗa *Yesu ka ləglami da həga tagha skwa la *Yahuda,
ka slaftá tsi ta sana mndu nda mta dzva ni ta nzaku hada.
2 Ka dzaʼa mbanafər mbanaf a tsi ta na mndu na baɗu Sabat,
ká mnduha nzata ka ngha Yesu tiritiri,
kabga ŋa mutsaftá rutsak tida.
3 « Sliʼaf sliʼa gra,
ka sagha ka sladata ta kəma mnduha,
» ka Yesu nda tsa mndu nda mta dzva ni ya.
4 Kaʼa nda həŋ tama mantsa:
« Nu skwi nda ra ŋa magay baɗu Sabat na?
Maga skwi ɗina re,
ari maga ghwaɗaka skwi a na?
Mbanaftá mndu skwi ta raku re,
ari dzatá mnda a skwi ta raku?
» kaʼa nda həŋ.
Tsitsriɗ,
ka həŋ nzata.
5 Ka kuzlanaftá tsi ta Yesu ta ŋuɗuf manda waftani ta həŋ,
kabga tsa təŋata ghəŋa taŋ ya.
Huf safi ta ŋuɗufa Yesu,
« tɗaptɗa ta dzva gha gra,
» kaʼa nda tsa mndu nda mta dzva ni ya.
Ka tɗapta tsi ta dzva ni,
gi kundliŋ mbatani tsa.
6 Ka gazlagabtá la *Farisa dzibil,
gi ka laghu həŋ dzrəku kawadaga nda mnduha mghama Hiridus ª ŋa zba tva dzatá Yesu.
Sliʼadaghata mnduha slanaghatá Yesu ta wa drəf
7 Ka sliʼaptá i *Yesu nda duhwalha ni mataba taŋ,
ka laghwi ta wa drəfa Galili.
Snaŋta mnduha ta tsa skwi ta mag Yesu ya,
ka sliʼakta həŋ daga ta haɗika Galili,
nda ya ma Zudiya,
8 nda pɗakwa gwal ta haɗika Ursalima,
nda gwal ta haɗika Idum,
nda gwal ta ɓla ghwa *Yardeŋ,
nda gwal ta waftá luwa Tir nda Tsiduŋ tani.
9 Ka mnanatá Yesu ta duhwalha ni ŋa payanatá kwambalu,
kabga yaha mnduha da ɓisla iʼi kəʼa,
10 kabga nda ndəgha mnduha mbambanaf tsi,
kəl inda gwal ɗaŋwa ka sliʼadaghata.
11 Ghur ka gwal kasaf ghwaɗaka sulkum ta həŋ ngha Yesu guli ná,
ka sliʼadaghatá həŋ da tsəlɓu ma ghuva ni ka wahu.
« Kagha Zwaŋa Lazglafta!
» ka həŋ nda tsi.
12 Ka davanaghatá Yesu ta həŋ ka ŋɗaŋɗa.
« Ma mnaŋ kuni ta iʼi » kaʼa nda həŋ.
Ɗagabta Yesu ta duhwalha ni ghwaŋpəɗ his
13 Tahula tsa,
ka sliʼaftá *Yesu ka laghwi ta kuɗuŋur.
Ka hagaʼatá tsi ta gwal kumaŋ tsi,
ka sliʼadaghatá həŋ slanaghata.
14 Ka ɗagaʼatá tsi ta gwal ghwaŋpəɗ his ŋa nzaku ta vata ni,
ŋa ghunay ni guli ta həŋ mna Gwaɗa Lazglafta.
15 Vlaŋha ta mbrakwa ghazligiŋtá duhwalha halaway ma mnduha ta həŋ.
16 Wya hga tsa gwal ghwaŋpəɗ his ɗagab tsi ya:
Simuŋ tsanaf tsi ta hga ni ka Piyerª,
17 nda i Yakubu nda zwaŋama ni Yuhwana ta nzakway ka zwana Zebedi,
Bwarneges kəʼa tsanaftá hga taŋ,
manda mnay kazlay:
Zwana ŋəzla luwaª kəʼa ya,
18 nda Andre,
Filip,
Bartelemi,
Mata,
Tuma,
Yakubu zwaŋa Alfe,
Tade,
Simuŋ mnda la Kananit,
19 nda Zudas Iskaryut.
Tsa Zudas ya ta skwaptá Yesu.
Razanaftá Sulkum nda ghuɓa
20 Tahula tsa,
ka sliʼaftá həŋ ka laghu dzagha.
Ka sliʼigəldaghatá mnduha dlivis slanaghatá həŋ,
ha ka trapta i *Yesu nda duhwalha ni ta mutsaftá fitik ŋa zaŋtá skwa zay.
21 Snaŋta la taŋ ma Yesu ta skwi ta mnə lu kazlay:
Nda hwaɗa ghunislakani kəʼa ya,
ka sagha həŋ da klay.
Zlgha wa Yesu ta ghəŋa razay ta razu lu
22 Ka gwal tagha zlaha Musa ŋa mnduha ta sliʼakta ma luwa Ursalima ta mnay guli mantsa:
« Nda ksa na mndu na da Belzebulª,
kabga nda mbrakwa halaway ta ghazligiŋta tsi ta duhwalha halaway ma mnduha,
» ka həŋ.
23 Ka hagaftá *Yesu ta həŋ ka mnay ŋa taŋ nda mahdihdi.
Kaʼa nda həŋ mantsa:
« Waká halaway dzaʼa ghəzligiŋtá halaway na?
24 Ka tavaptá luwa turtuk ná,
dzaʼa nzakway tsa luwa ya tɗukwa ra?
25 Ka dgavap dga həga mndu his ná,
ta dzaʼa Nzəgla nza tsa həga ya ra?
26 Ka kuranavatá ghəŋa ni halaway katsi ná,
nda dga his nda tsa tama,
sladglata a nda tsa tama guli wu,
kɗavakta ŋa ni tsa.
27 Ka ta habaf a mndu ta mndu nda mbra wu katsi ná,
laviŋta a ta lami da həga ga taŋ ka hlugudunustá huzla ni wa.
28 Kahwathwata ka yu ta mnaghunata:
Inda dmakuha dzaʼa magata mnduha,
dzaʼa plinis pla Lazglafta ta həŋ nda inda rarazuha dzaʼa həŋ rarazay tani.
29 Ama inda mndu dzaʼa razanaftá Sulkum nda ghuɓa,
plinista a lu ta dmakwa ni ɗekɗek wa.
Dzaʼa nzakway dmakwa ni ta ghəŋa ni ŋa kɗekedzeŋ,
» kaʼa nda həŋ,
30 kabga « nda ghwaɗaka sulkum ma vgha ni,
» ka həŋ ta mnay ta Yesu,
kəl Yesu ka mna tsa gwaɗa ya ŋa taŋ.
I wa vərɗa zwana ma ni ma Yesu?
31 Tahula tsa,
ka ɓhadaghatá i ma ni nda zwana ma ni ma *Yesu,
ka sladaghuta mabli.
Ka ghunadamtá həŋ ta mndu da həga ŋa hgagaptá Yesu.
32 Tizlik tskatá mnduha ta vata Yesu ta lagha lu da mnay ŋa ni kazlay:
Waʼa i ma gha nda zwana ma gha ta hga kagha mabli kəʼa.
33 « I wa ma ɗa nda zwana ma ɗa na?
» kaʼa zlghaftá wa ni.
34 Ka nghadaptá tsi ka tsa mnduha ta nzaku ta wanafta ya,
kaʼa mantsa:
« Wana i ma ɗa nda zwana ma ɗa,
35 kabga inda mndu ta maga skwi manda ya ta kum Lazglafta,
tsaya zwaŋama ɗa,
tsaya makuma ɗa,
tsaya ma ɗa,
» kaʼa.