Danyel 10

Skwi dzaʼa magaku ma kɗavakta fitik

1 Ta mahkəna vakwa mgham Kurets ta ga mgham ma Persiya, ka lagha sana gwaɗa da Danyel ta hgə lu ka Beltəsaʼtsar. Tsa gwaɗa ya ná, kahwathwata nzakwa ni: Dagala hwazlaɓaku ta mar tsi. Ka snaŋtá ta tsa gwaɗa ta lagha da tsi ya nda ma skwi manda suni. 2 Ma tsa fitik ya, ka magatá iʼi Danyel ta luma hkən rəŋrəŋ ta taw, 3 zaŋ a yu ta skwa zay zɗa zɗa wu, zaŋ a yu ta sluʼi wu, haɗ ima inabi ta lami da wa ɗa wa. Masaŋ a yu ta rɗi guli wu, ha ka magatá luma hkən rəŋrəŋ.

4 Baɗ mahisambsak fwaɗ mida ma tila mataŋtaŋ ta nzakw yu ta wa zala dagala ta hgə lu ka Tigres, 5 ka klaŋtá yu ta ghəŋ, ka nghaŋtá yu ta sana mndu nda suɗatá lguta liŋ ta vgha ni, nda hbatá ɓanava dasa Ufaz misti. 6 Manda pala ka beril ya vgha ni, manda wuɗa luwa ya kuma ni, manda zlghakwa vu ya na ira ni, manda ghuva tili kərzlaf lu ta wuɗaku ya na dzvuha ni nda səlaha ni guli. Ta gwaɗ tsi ta gwaɗa, manda hlawa tskatá mnduha na lwa ni. 7 Iʼi Danyel turtukwa ɗa ta nghaŋtá zlagapta tsa mndu ya manda skwi ma suni ya. Ngha a mnduha kawadaga nda iʼi wa, ama ka ghudzaku həŋ da zləŋ katakata, ka hway həŋ da ɗifa. 8 Ka nzatá yu turtukwa ɗa, ka ngha tsa mghama skwi manda skwi ma suni ya. Ka nzata yu hulepeteʼ, kusabrah ka kuma ɗa mbəɗuta, manda skwi nda mta yu. 9 Ka snaŋtá yu ta lwa tsa mndu ya ta gwaɗata, zlumbruhwa yu ghərmbəzla ta haɗik.

10 Ka ksihatá sana dzvu, ka fihata ta karamha ɗa nda huɗa dzvuha ɗa. 11 Ka tsa mndu ya nda iʼi mantsa: « Danyel, mamu sgita gha ta wa ira Lazglafta, fa fa ta sləməŋ ŋa snaŋtá klatá ghəŋa na gwaɗa ya ta mnə yu na. Slada slada nda slada, kabga ghunaga da kagha lu ta iʼi, » kaʼa. Tata tsa gwaɗa ya nda iʼi, ka sladatá yu. Ta ghudzaku yu gar gar gar.

12 Kaʼa nda iʼi guli mantsa: « Danyel, ma zləŋ ka ta zləŋ, kabga daga ka yawu fata gha ta ŋuɗufa gha ŋa snaŋtá skwi ta magaku, ka hanaganatá ghəŋa gha ta kəma Lazglafta gha, ka snaŋtá tsi ta tawa gha, dabga tsaya kəl yu ka sagha. 13 Ama ka haɗiftá mali ta ghəŋa ga mghama Persiya ta tvi ka fitik hisambsak ndeŋ mida. Ka sagha Mikaʼel tekw mataba maliha duhwalha Lazglafta da katihata, kabga ŋaghu ŋa lu ta iʼi ta vata mghamha Persiya. 14 Sagha sa yu da snaghamta klatá ghəŋa skwi dzaʼa magaku nda mnduha gha ma kɗavakta fitik, kabga ta takeʼa sana skwi manda skwi ma suni ta nghanatá tsa fitik ya. »

15 Tata tsa gwaɗa ya tsatsi nda iʼi, ka dzagatá yu ta ghəŋ nda ta haɗik, ka tsutá yu manda rgha. 16 Ama ka ksaŋtá sana mndu ta gara vgha nda mnda səla ta wubisima ɗa. Ka gunglatá yu ta wi, ka gwaɗ yu ta gwaɗa. Ka yu nda tsa mndu ta sladu ta vata iʼi ya mantsa: « Rvera ɗa, ta ghudzaku yu katakata, dabga na suni na ná, ta haɗ mbraku ma iʼi wa. 17 Waká iʼi kwalva gha dzaʼa laviŋtá gwaɗgaghata ni Rvera ɗa? Ndanana ná, wər ta haɗ mbraku ma iʼi wu, ta haɗ hafu ma iʼi guli wu, » ka yu.

18 Ka ksəglihatá tsa mndu ya kay guli, ka vlihatá tsi ta mbraku. 19 Kaʼa mantsa: « Ma zləŋ ka ta zləŋ, mamu sgita gha ta wa ira Lazglafta, ka nza zɗaku nda kagha, ŋava ŋa, mbra ta vgha! » kaʼa. Tata tsa gwaɗa ya nda iʼi, ka vravaftá mbrakwa ɗa. Ka yu mantsa: « Mna ta gwaɗa gha Rvera ɗa, kabga vliha vla ka ta mbraku, » ka yu.

20 Kaʼa nda iʼi mantsa: « Nda sna ka ta skwi kəl yu ka sagha da kagha ra? Ndanana ná, ka vra yu da vulu nda mali ta ghəŋa Persiya. Tahula kɗanata ɗa, dzaʼa sagha sa mali ta ghəŋa la Gres. 21 Ama dzaʼa mnagha mna yu ta skwi ya nda vinda ma deftera kahwathwata. Haɗ mndu ŋa katihata ŋa lma tsa lmu ya nda tsa ghumaha ya wu, ba Mikaʼel mala ghuni yeya.