11
1 Vərɗa iʼi ta kataŋta, ka hinistá dzvu ta taŋtaŋa vakwa Daryaves mnda la Mediya ta pala. »
Vulu mataba mghamha his
2 « Ndanana tama, wya kahwathwata dzaʼa yu mnaghata: Mamu mghamha hkən dzaʼa sabi guli, ga mgham ta ghəŋa Persiya. Tahula tsa, ŋa saba mafwaɗa ni ka gadghəl katakata ta malaghutá inda taŋ. Mutsafta ni ta mbraku nda ma tsa gadghəla ni ya, ŋa sliʼanafta ta inda mndu ŋa vulu nda ga mghama la Gres. 3 Dzaʼa sab sa sana mgham nda sna ta vulu. Dzaʼa mutsay ta glaku katakata, dzaʼa magay ta skwi ya kumaŋ tsi. 4 Tahula dihata ni, dzaʼa pslu psla tsa ga mghama ni ya, ka dagavapta ni fwaɗ ta slərpa luwa fwaɗ ta ghəŋa haɗik. Zivira ni a dzaʼa da zay wu, dzaʼa tɗiŋ tɗa lu ta tsa ga mghama ni ya ka daganaftá sanlaha ma mnduha, ama haɗ tsaha ya dzaʼa ɓhiŋtá tsa si ŋa ni ma mbraku ya guli wa.
5 Tsa mgham dzaʼa ga mgham nda ma sud ya ná, dzaʼa mbru mbra, ama dzaʼa mbranagha mbra sana mali mataba sludziha ni, dzaʼa fərtu fərta glakwa ga mghama ni ka malaghutá ŋa ni.
6 Tahula laba vakuha mida, ŋa dzrafta taŋ ta wi: Ŋa nzakwa dzratá wi mataba tsa haɗikha his ya ná, dzaʼa vla vla lu ka marakw ta makwa mgham nda ma sud, ŋa mgham nda ma nur. Ama haɗ tsatsi dzaʼa katsafta wu, nzəɗavata a mbrakwa zəʼala taŋ guli wu, nzata a zwana taŋ guli wa. Dzaʼa vla vla lu ta tsatsi guli kawadaga nda mnduha ni, nda da ni, nda mndu ya ta hinistá dzvu ma tsa fitik ya.
7 Dzaʼa nzam nza sana mndu mataba mndəra taŋ ma vla mgham nda ma sud. Dzaʼa sliʼaf sliʼa da gruŋta nda vulu ta sludziha mgham nda ma nur. Dzaʼa lam la da matsaka huzla ni. Dzaʼa psla psla ta tsa sludziha ya nda vulu ŋa zata ni ta ghwa, 8 ha ka hlaghata ni ta lazglaftaha taŋ da Masar, nda skwa wuyay taŋ, nda huzlaha ka kfura tsedi, nda ya ka dasu. Tahula tsa, dzaʼa lab la vakuha, haɗ dzaʼa gwaɗglanaftá tsa mgham nda ma nur ya wa. 9 Mantsa tama, dzaʼa sliʼafta mgham nda ma nur, valanaghatá ga mgham nda ma sud, ama ŋa vraghuta ni ta haɗika ni.
10 Dzaʼa gaf ga zwana mgham nda ma nur ta sidi, ka tsakanatá ghuɓa gwal vulu ta ndəghuta katakata. Dzaʼa sliʼaf sliʼa həŋ da vulu, dzaʼa tsughwaɗap tsughwaɗa həŋ ta makuma manda zala ta ndəghuta nda vulu ha da matsaka huzla mgham nda ma sud. 11 Dzaʼa gaf ga mgham nda ma sud ta sidi, dzaʼa sliʼaf sliʼa liŋta guk nda vulu ta tsa mgham nda ma nur ya. Dzaʼa tskana tska tsaya ta ghuɓa gwal vulu ta ndəghuta, ama dzaʼa lam la həŋ da dzva mgham nda ma sud. 12 Manda zuta lu ta tsa ghuɓa gwal vulu nda ma nur ya, dzaʼa ghərɓay mgham nda ma sud ta ghərɓaku. Dzaʼa rwana rwa ta dəmbuʼata mnduha, kulam nda tsa, haɗ tsa mbrakwa ni ya dzaʼa nzəɗavata wa. 13 Dzaʼa hləglaf hla mgham nda ma nur ta sana sludziha ta ndəghuta ka malaghutá katakata ta tsa taŋtaŋ ya. Tahula luta vakuha mida, ŋa vrəgladaghata ni nda tsa ndəghuta sludziha ya, nda huzla vulu ya dagala dagala.
14 Ma tsa fitik ya, nda ndəgha mnduha dzaʼa ganavatá sidi ta mgham nda ma sud. Mataba mnduha gha tani Danyel, dzaʼa sliʼavafta gwal ta maga bisibisi ŋa hɗamtá skwi ya mnaŋ lu manda skwi ma suni ya, ama dzaʼa trap tra həŋ. 15 Dzaʼa lagha la mgham nda ma nur valanaghatá luwa nda matsaka huzlu, dzaʼa sŋanava sŋa ta haɗik ta vata tsa matsak ya, ŋa zata ni ta ghwa. Kulam nda nzakwa mgham nda ma sud nda vərɗa sludziha, ŋaŋta a da tsi wu, mbrafta a da tsi wa. 16 Tsa mgham nda ma nur ya, ta gavadaghatá tsi, skwi ya kumaŋ tsi dzaʼa tsi magay, haɗ mndu dzaʼa ŋaŋta da tsi guli wa. Dzaʼa nza nza ta haɗik ya ta ɗinuta. Ma dzva ni mbrakwa zaɗanatá inda skwi. 17 Tahula tsa, dzaʼa lagha la maga skwi nda inda mbrakwa ga mghama ni. Dzaʼa dzraf dzra ta wi nda mgham nda ma sud. Dzaʼa klaf kla ta makwa ni ka vlaŋta ka marakw, nda klafta ni ma ndana ni ta zaɗanata. Ama haɗ tsa skwi ta kum tsi ta magay ya dzaʼa magata wa. 18 Tahula tsa, dzaʼa faf fa ta iri ta haɗikha ta wa drəf, dzaʼa za za ta tsa ndəghata sanlaha ma haɗikha ya, ama dzaʼa sagha sa sana mghama sludzi zaɗanatá tsa ghərɓakwa ni ya. Dzaʼa vranaf vra ta ghəŋa ni ta nisəla tsa gla ghəŋa ni ya. 19 Dzaʼa zlrafta tsa mgham nda ma nur ya ta ndanu ta luwaha ma matsaka huzlu ta haɗika vərɗa tsatsi. Ama dzaʼa dziŋ dza tuthun, dzaʼa nzeghwa nzeghwa, dzaʼa zwaɗu zwaɗa.
20 Dzaʼa sab sa sana mgham da vla ni, dzaʼa ghunaftá sana mali ŋa tsəka dzumna ŋa vlaŋtá glaku ta ga mghama ni. Ama tahula fitik kwitikw kweŋkweŋ, dzaʼa pslanap psla lu, nda ma gufatá ŋuɗuf a wu, nda ma vəl vulu a guli wa.
21 Dzaʼa lam la sana falaya mndu da vla ni, sana mndu ya dzaʼa kwal lu walaŋtá vlaŋta sgita mamgham mgham. Manda gatsuwa dzaʼa lama tsi ka klaghutá ga mgham ma fitika nzakwa haɗik ta ɗughwana ɗughwana. 22 Dzaʼa faɗiŋ faɗa ta kəma ni ta sludziha ta nzakway manda mghama zala, ka huʼanaptá həŋ demdem. Mantsa ya guli nda mala mnduha dzratá wiª. 23 Ma tsa vəl dzrafta sanlaha ta wi nda tsi ya, dzaʼa klaf kla ta tsa dzratá wi ya ka nana mnduha nda tsi. Ta kəma ta kəma ta dzaʼa mbrakwa ni, dər má kiʼa yeya hutsekwata mnduha ta hinistá dzvu. 24 Ma fitik mamu zɗaku, dzaʼa lama tsi da vliha ya fərtu gadghəla ma kwakwar. Dzaʼa magay ta skwiha ya si kul walaŋta dadaha ni nda dzidzíha ni ta magata. Dzaʼa dgay ta skwi gadghəl ya ŋatsaf tsi ma zləɗu ŋa gwal ta kataŋta. Dzaʼa ndanay ta liŋtá ghumaha ni ma luwaha ma matsaka huzlu, ama ŋa fitik kiʼa.
25 Grafta ni kazlay nda mutsa mbrakwa ɗa, ufa vgha ɗa tama kəʼa, dzaʼa sliʼaf sliʼa nda ndəghatá sludziha liŋta guk nda vulu slanaghatá mgham nda təv sud. Dzaʼa hbaf hba tsaya ta vgha nda ndəghatá sludziha ta mbruta ta mbruta, ama haɗ dzaʼa ŋaŋta wu, kabga dzaʼa baravus bara lu ta vgha ta ghəŋa ni. 26 Gwal ta zə tsi ta skwi zɗa zɗa ta kuwa turtuk dzaʼa zləmbiŋta. Dzaʼa zlambu zlamba sludziha ni, nda ndəgha gwal dzaʼa rwanata lu sinak. 27 Tsa mghamha his ya ná, ta kuwa turtuk dzaʼa za həŋ ta skwa zay, ama ma ŋuɗufa taŋ ná, zba maganatá ghwaɗaka skwi ta sani skwi ta kum həŋ. Tsakalawi yeya skwi ma wa taŋ. Ka bətbət skwi ta gwaɗ həŋ guli, kabga kɗavakta ni ná, dzaʼa sagha sa ma fitik ya tsaf lu. 28 Dzaʼa vraghu vra mgham nda ma nur ta haɗika ni, nda skwa gadghəl katakata. Ma ŋuɗufa ni, dzaʼa ndanay ta gruŋtá mnduha dzratá wi nda ghuɓa. Dzaʼa magay nda həŋ ta skwi ya kumaŋ tsi ma ŋuɗufa ni, ma kɗaku tsi vraghuta dzagha ni.
29 Maga ta tsa fitik ya, dzaʼa vrəgladagha vra gruŋtá ga mgham nda ma sud, ama haɗ skwi ta dzaʼa magəglaku manda tsa ta luta taŋtaŋ ya wa. 30 Dzaʼa sliʼak sliʼa kwambaluha ma Kitim da gruŋta nda vulu. Dzaʼa ksu ksa zləŋ ŋa vraghuta ni nda rwatá vgha. Dzaʼa ganava ga ta sidi ta mnduha dzratá wi nda ghuɓa ka maga skwi kumaŋ tsi nda həŋ. Dzaʼa maranaŋ mara ta zɗaku ta gwal dzaʼa zlanavatá tsa dzratá wi nda ghuɓa ya. 31 Dzaʼa sliʼadagha sliʼa sludziha ni da niŋta ka dzibata vli ta vli nda ghuɓa nda matsaka huzla ni. Dzaʼa pyafta həŋ ta pla ghəŋ ta mag lu inda fitik, ka fatá ghwaɗaka manzakɗaway ta vla mbiɗa. 32 Dzaʼa gataf gata tsa mgham ya ta mnduha ka nanaghatá gwal ta zlanavata dzratá wi. Ama gwal nda sna ta Lazglafta taŋ ya ná, dzaʼa gɗava gɗa hahəŋ ta ŋavata nda mbraku. 33 Dzaʼa taghanaf tagha gwal nda ɗifil ma ghəŋa taŋ ta pgha mnduha ta skwi ta ndəghata mnduha. Ama dzaʼa mamu fitik dzaʼa pslata lu nda kafay ta sanlaha mataba taŋ. Dzaʼa driŋta nda dra lu ta sanlaha, dzaʼa pgham pgha lu ta sanlaha da gamak tahula hlaghutá huzla taŋ. 34 Ma tsa fitik dzaʼa ghuy həŋ ta ɗaŋwa ya, kiʼa nda kiʼa dzaʼa mutsafta həŋ ta katu. Mataba tsa gwal dzaʼa gwaftá vgha nda həŋ ya ná, nda maɗgwirmaɗgwir magata həŋ. 35 Mataba tsa gwal nda ɗifil ma ghəŋa taŋ ya ná, nda ndəgha gwal dzaʼa rwuta. Dzaʼa nzakway tsa rwakwa taŋ ya ŋa ghuɓiŋtá mnduha, nda ya ŋa sluwapta, nda ya ŋa ɓanaftá həŋ ha ka sagha kɗavakta fitik, kabga kɗavakta ni ná, dzaʼa sagha sa ma fitik ya tsaf lu.
36 Dzaʼa magay mgham ta skwi manda ya kumaŋ tsi. Dzaʼa fərtu fərta ghərɓakwa ni. Mal iʼi ka inda lazglaftaha kəʼa ta gray. Dzaʼa mnay ni ta skwi ya kul raku ka mnay ta Lazglafta ta hemanata lazglaftaha. Dzaʼa zay ta ghwa ha ka sagha maravata fitika gufata ŋuɗufa Lazglafta. Mantsa tama, ŋa magay Lazglafta ta skwi manda ya kura tsi ta magay. 37 Haɗ dzaʼa vlaŋtá glaku ta lazglaftaha dzidzíha ni, dər ya ta zɗəganatá miʼaha wa. Nziya nza tsi ná, mal iʼi ka inda lazglaftaha kəʼa ta gray. Haɗ dzaʼa vlaŋtá glaku ta ya dər turtuk wa. 38 Má ŋa magay ni mantsa ya, ŋa laghwa ni vla glaku ŋa lazglafta ya ta ngha luwaha ma matsaka huzlu, lazglafta ya kul snaŋtá dzidzíha ni. Dzaʼa vlay ŋa ni ta dasu, nda kfura tsedi, nda palaha nda bla nda bla, nda sana huzlaha ya nda sgit tida. 39 Nda mbrakwa tsa lazglafta ka matbay ya dzaʼa liŋta tsi ta luwaha nda vulu. Dzaʼa vlaŋ vla ta glaku katakata ta gwal ta tsuʼafta. Dzaʼa zabap zaba ta sanlaha ma mnduha ŋa nzakway ka mali ta ghəŋa ndəghatá mnduha, ka valaŋta ni ta haɗikha ta həŋ ŋa nisəla taŋ.
40 Ka sagha sa tsa kɗavakta fitik ya, dzaʼa liŋ la mgham nda ma sud guk nda vulu ta mgham nda ma nur. Ama ŋa valafta mgham nda ma nur tida nda mwataha plisa ni, nda sludziha ni ta plisha, nda ndəghata kwambaluha tani. Dzaʼa lam la nda sludziha ni da ndəghata haɗikha. Dzaʼa tsughwaɗap tsughwaɗa həŋ ta makuma manda zala ta ndəghuta. 41 Dzaʼa lam la da haɗik ya ta ɗinuta, dzaʼa rwaku ndəghata mnduha. Ama dzaʼa ndap nda la Idum, nda la Muwav, nda maliha la Ghamuŋ, ma dzva ni. 42 Ka gananaghatá tsa mghama nur ya ta ga mghama ni ta ghəŋa sanlaha ma haɗikha, haɗ dər haɗika Masar dzaʼa ndapta da tsi wa. 43 Dzaʼa nzanagha nza ta ghəŋa gadghəla la Masar, nda dasu tani, nda kfura tsedi tani, nda huzlaha nda bla nda bla tani. Dzaʼa ksay la Libiya nda la Kus ta səla ni. 44 Ama, dzaʼa ganaf ga gwaɗaha ta sagha nda ma mndəra luwa, nda ya nda ma nur, ta zləŋ. Dzaʼa gaf ga ta sidi katakata. Dzaʼa sliʼaf sliʼa pslata ta ndəghatá mnduha ta fərtuta. 45 Dzaʼa dzagwa dzagwa ta həga tumpulha mamgham mghama ni, ma takataka drəf nda ghwá nda ghuɓa ma haɗik ya ta ɗinuta. Ama hada dzaʼa kɗuta hafa ni kul haɗ mndu dzaʼa kataŋta. »