Danyel 9

Duʼa Danyel ta ghəŋa mnduha ni

1-2 Ka nzakw Daryaves zwaŋa Ahasverus ma mndəra la Mediya, ka mghama Babila. Ma taŋtaŋa vakwa ni ta ga mgham, iʼi Danyel, ka naghamtá yu ma ɗelewerha nda ghuɓa. Mantsa tama, ka snaŋtá yu ta klatá ghəŋa tsa gwaɗa mnana Yawe ta anabi Irmiya ya. Ta gwaɗay ta ghəŋa vaku ndəfáŋ mbsak ya dzaʼa nzata luwa Ursalima ka kufik ya. 3 Ka zlraftá yu ta suma, ka favatá buhu ka buhwavatá hutiɗif, ka mbəɗavatá yu təv Mgham Lazglafta ka maga duʼa da tsi nda taw nda taw.

4 Ka mag yu ta duʼa da Yawe, Lazglafta ɗa, ka mnanaŋtá yu ta dmakuha ŋni, ka yu mantsa:

« Ar Mgham Lazglafta, dagala ka, ka makwitkwit ka, ta ŋanata dzratá wi nda zɗaku, nda gwal ya ta ɗvutá kagha, nda gwal ta ŋanatá zlahuha gha: 5 Gaga ŋni ta dmaku, kwalaghu kwala ŋni ta snatá gwaɗa, ŋa ŋni dmaku, gavagha ga ŋni ta sidi, mbəɗana mbəɗa ŋni ta hul ta zlahuha gha, nda skwiha ya mnaŋna ka ŋa magay. 6 Kwalaghu kwala ŋni ta snatá gwaɗa kwalvaha gha la anabi si ta mna gwaɗa nda hga gha, ŋa mghamha ŋni, nda ya ŋa maliha ŋni, nda ya ŋa dzidzíha ŋni, nda ya ŋa hamata mnduha demdem.

7 Ar Rvera ɗa, kagha ná, tɗukwa ka, ksu ksa hula ta aŋni ta kəma gha. Mantsa nzakwa ni. Ndanana ná, hbu hba hula ta inda gwal ta haɗika Yahuda, nda gwal ma Ursalima, nda inda la Israʼila, gwal ndusa ndusa, nda gwal diʼiŋ diʼiŋ tani, ma inda haɗikha ghazlam ka ta həŋ dida, dabga kwalaghuta taŋ ta ŋanatá gwaɗa gha manda ya ta raku. 8 Ar Yawe! Ŋa ŋni na hula, nda mghamha ŋni tani, nda maliha ŋni tani, nda dzidzíha ŋni, kabga gaghata ŋni ta dmaku. 9 Kuravagha kura ŋni, Mgham Lazglafta ŋni. Kulam nda tsa, ta plaŋna pla ka ta dmakwa ŋni ma tawa hiɗahiɗa gha. 10 Sna a ŋni ta lwa Yawe, Lazglafta ŋni ŋa nzata manda tagha skwiha vlaŋna ka nda ma wa kwalvaha gha la anabi wa.

11 Ka ɓlanaptá inda la Israʼila ta zlaha gha, ka mbəɗatá hul, ka kwalaghutá sna skwi ta tagha skwa gha. Ka hlutá tsa ksiʼi waɗa lu daga ghalya, vindaf lu ma zlaha kwalva gha Musa ya ta aŋni kabga gagha ga ŋni ta dmaku. 12 Hɗam hɗa ka ta gwaɗa gha ya mnaŋna ka, nda ya ta ghəŋa maliha ŋni ta pgha aŋni. Ka ghunaŋnaktá ka ta zləmnda katakata ta ghəŋa aŋni ma Ursalima. Haɗ mndu ta kəɗ nghaŋtá mndərga zləmnda manda tsaya ma inda vli ta ghəŋa haɗik wa. 13 Manda ya nda vinda ma zlaha Musa ná, sagha sa inda tsa zləmnda ya ta ghəŋa aŋni, kulam nda tsa, ka kwalaghutá ŋni ta taw da Yawe, Lazglafta ŋni. Kwalaghu kwala ŋni ta mbəɗanatá hul ta dmakuha ŋni, kwalaghu kwala ŋni ta fanatá sləməŋ ta kahwathwata gha. 14 Tsaya tama kəl Yawe ka pghaŋnaghatá tsa zləmnda payaf tsi ya. Kagha Yawe, Lazglafta ŋni ná, tɗukwa kagha ma inda skwi ta mag ka, ama aŋni, ka kwalaghutá aŋni ta faghatá sləməŋ.

15 Ndanana Mgham Lazglafta ŋni, kagha ta hlagapta nda dzva gha ta mbruta, ta mnduha gha ma haɗika Masar, ka kulaŋta lu ta hga gha ha gita, gagha ga ŋni ta dmaku, gavagha ga ŋni ta sidi. 16 Mghama ɗa, daga manda ghalya ka ta gɗata ta maraŋnatá nzakwa gha ka tɗukwa. Mantsa ya tama, kdəkkdək zlana zla ta tsa gufatá ŋuɗufa gha katakata ta ghəŋa Ursalima luwa gha, ghwá gha nda ghuɓa ya. Mantsa nzakwa ni, ta ghəŋa dmaku ga ŋni, nda krughuva dzidzíha ŋni, ta ghuɓasay inda gwal ta waŋnafta ta Ursalima nda mnduha gha.

17 Ndanana, fa fa ta sləməŋ tama Lazglafta ŋni, ka sna ka ta duʼa nda tawa kwalva gha. Vlaŋ vla ta glaku ta ghəŋa gha nda ma nghapta gha nda zɗakwa gha ka vla gha nda ghuɓa zaɗana lu. 18 Ar Lazglafta ɗa, fa fa ta sləməŋa gha ka sna ka, guna guna ta iri gha ka nghanata ka ta luwa ŋni ya zaɗana lu, tsa luwa ta hgə lu nda hga gha ya. Ta ghəŋa nzakwa ŋni tɗukwa a kəl ŋni ka sagha nda tawa ŋni ta kəma gha wu, ama ta ghəŋa glakwa hiɗahiɗa gha. 19 Rvera ɗa, sna! Rvera ɗa, plaŋna pla ta dmakwa ŋni! Rvera ɗa, fa fa ta sləməŋ! Ma tɗə ka ta huɗi ka sawi kataŋtá tsa luwa ya, nda tsa mnduha gha ya tani ŋa vlaŋtá glaku ta ghəŋa gha, Lazglafta ɗa, » kaʼa.

Klata ghəŋa tsa lumaha ndəfáŋ mbsak ya

20 Ka gɗavatá yu ta maga duʼa, ka mnigiŋtá dmakwa ɗa, nda dmakwa mnduha ɗa la Israʼila, ka vla tawa ɗa ŋa Yawe, Lazglafta ɗa ta ghəŋa ghwá ni nda ghuɓa. 21 Tata maga tsa duʼa ya yu tama, ka ndragaghatá tsa Gabriyel si nghaŋ yu taŋtaŋ manda skwi ma suni ya kay ta vata iʼi, ga hawu ta fitika pla ghəŋ.

22 Wya kəʼa tsaliɗipta: « Danyel, ndanana, sagha sa yu da tsalaghaptá ghwinslak ŋa snaŋta gha ta klatá ghəŋa ni ɗina. 23 Na tsa fitika zlrafta gha ta taw da Lazglafta ya ná, ka sab gwaɗa da tsi, tsaya kəl yu ka sagha da snaghamta, kabga mamu sgita gha ta wa ira Lazglafta. Guna guna ta sləməŋ wuzlaŋ, ka sna ka ta tsa gwaɗa ta ghəŋa tsa skwi nghaŋ ka manda skwi ma suni ya.

24 Tsanaf tsa Lazglafta ta luma ndəfáŋ mbsak^ª ta mnduha gha, nda ya ŋa luwa gha nda ghuɓa. Ɗina tsa fitik ya, ŋa hluta ghwaɗaka skwi, ŋa kwala dmaku kul haɗ, ŋa slərɓaptá zughu ma krughuvi ŋa klaktá nzaku tɗukwa ŋa ɗekɗek, ŋa ŋərzlanatá tsa skwi manda skwi ma suni, nda gwaɗa ya mna la anabi ya, ŋa fəglaghutá nda ma pghanaghatá rɗi ta tsa vli ta ghuɓuta ya. 25 Wya skwi ŋa snaŋta gha, ŋa famta gha ma sləməŋ tama: Daga ma saba tsa gwaɗa ta ghəŋa hlagaptá gwal si hlagha lu ya, nda gwaɗa ta bəglaftá luwa Ursalima ya, ha ka sagha fitika zlagapta sana mgham pghanagha lu ta rɗi, dzaʼa nzəɗava nzəɗa lu ka luma ndəfáŋ, nda lumaha mkuʼ mbsak his mida. Dzaʼa bəglaf ba lu ta tsa luwa ya nda matsaka huzlu ŋa katay, ama dzaʼa mamu ghuya ɗaŋwa ma tsa fitik ya.

26 Tahula tsa lumaha mkuʼ mbsak his mida ya, dzaʼa dza dza lu ta tsa mgham ta zlagapta pghanagha lu ta rɗi ya. Haɗ mndu dzaʼa mista ni wu. Tahula tsa, ŋa sagha sana mgham nda sludziha ni vlunduɗ zaɗanatá luwa nda vli ya nda ghuɓa. Dzaʼa gi sagha sa kɗavakta ni nda ndaghatá vli da imi. Ama ha kɗavakta ni dzaʼa vulay ta vulu, dzaʼa zaɗana zaɗa ta inda skwi manda ya kura lu. 27 Ma tsa luma turtuk ya, dzaʼa hbaf hba ta dzratá wi nda mbra nda ndəghata mnduha. Ma takataka tsa luma ya, dzaʼa pyaf pya ta slna pla ghəŋ nda mbəhuha. Ma tsa vla taŋ ya, dzaʼa mamu ghwaɗaka manzakɗaway ta vla mbiɗa ha ka zaɗanata lu ta tsa mndu ta klaktá zaɗaku ya, manda ya kura lu, » kaʼa.