Danyel 8

Lma maŋazak nda dugzum

1 Ta mahkəna vakwa mgham Belsatsar ta ga pala, ka nghəglaŋtá iʼi Danyel, ta skwi manda skwi ma suni tahula tsa ta luta ya. 2 Wya skwi nghaŋ yu: Ka nghə yu ná, manda skwi ma matsaka huzlu ma luwa Susaŋ yu, ta haɗika Ilam ta wa zala Ulay.

3 Kəʼa ka yu klaŋtá ghəŋ ná, ka nghaŋtá yu ta maŋazak ta wa tsa zala ya. Ghəzləŋəɗ ghəzləŋəɗ his duliha ni, ka malaghutá slrakwa tsa sani ta ɗyafta nda hul nda hul ya ta tsa ta ɗyafta taŋtaŋ ya. 4 Ka nghə yu ta tsa maŋazak ya ta guya duli nda ta tva dɗakwa fitik, nda ya nda ma nur, nda ya nda ma sud. Haɗ sana nimtak ta laviŋtá ŋaŋta da tsi wa. Haɗ mndu ta laviŋtá zluʼagapta da tsi guli wa. Ka mag tsi ta skwi manda ya ta kum tsi, ka sgaku mbrakwa ni.

5 Tata ndanay ndanay yu ta tsa skwi ta nghə yu ya, gi ka sagha sana dugzum nda ta tva dɗakwa fitik, ta ra inda vli ta ghəŋa haɗik kul ksaŋtá səla ni ta haɗik. Tsa dugzum ya ná, mamu sana duli ta ndraʼuwa mndu ta ɗyagapta ma takataka iriha ni. 6 Ka lab tsi nda təv tsa maŋazak his duliha ni nghaŋ yu ta wa zala ya kay, ka hwayadaptá tsi nda təv tsatsi nda inda kɗavakta mbrakwa ni. 7 Ka nghə yu ta ɓhadaghata ni ta vata tsa maŋazak ya. Ka gaftá tsi ta sidi, ka dza tsa maŋazak ya nda mbraku, ka ɓalinistá duliha ni his his. Ŋaŋ a tsa maŋazak ya da tsi wa. Mantsa tama, ka klaftá tsa dugzum ya ka slanata ta haɗik, ka diŋlay nda səla. Haɗ mndu ta laviŋta zluʼaptá tsa maŋazak ya da tsi wa. 8 Ka sgavaghatá mbrakwa tsa dugzum ya katakata. Ama manda sgavaghata mbrakwa ni, ka ɓlutá tsa dula ni ka mali ya, gi ka ɗayagaftá duliha fwaɗ ka skwa ndraʼuway ma vla ni griŋ griŋ, mbaɗata həŋ təv slrəŋa luwa fwaɗ.

9 Ka ɗyagaptá sana zwaŋa duli kiʼa ta sani ma tsa duliha tsa dugzum ya. Ka glaftá tsi griŋ zur nda ma sud, nda ya nda ma mndəra luwa, nda ya nda təv haɗik ta ɗinuta katakata. 10 Ka glaghatá tsi ka laghu slanaghatá gwal vulu ta luwa. Ka waɗigiŋtá tsi ta haɗik ta sanlaha ma həŋ, nda sanlaha ma tekwatsaha tani ka diŋlanapta nda səla. 11 Ka lagha tsa duli ya da liŋtá mali mataba gwal vulu ta luwa. Ka hlanatá tsi ta tsa pla ghəŋ ta plə lu inda fitik ŋa Lazglafta ya, ka dmanaftá tsi ta vli ni nda ghuɓa. 12 Ma tsa magay ni ta tsa ghwaɗaka skwa ni ya, ka vlaŋtá lu ta gwal vulu, nda pla ghəŋ ta gɗata lu ta magay mista mbrakwa tsa duli ya. Ka wuɗigiŋtá tsa duli ya ta kahwathwata ta haɗik. Ta zay tsa duli ya ta ghwa ma inda skwi ta mag tsi.

13 Ka snaŋtá yu ta sana mndu nda ghuɓa ta gwaɗa. Ka sana mndu nda ghuɓa guli nda tsa ta gwaɗata ya mantsa: « Tsa skwiha ta maravata manda skwi ma suni ya ní, kidaghi fitik dzaʼa magata tsi na? Ŋa kulam yawu dzaʼa hərɗiŋta lu ta tsa skwa pla ghəŋ ta plə lu inda fitik ya na? Tsa ghwaɗaka slna ta zaɗanatá inda skwi ya ní, ŋa kulam yawu dzaʼa nzəɗavatá tsi na? Ŋa kulam yawu dzaʼa diŋlanapta lu ta vli ya nda ghuɓa, nda gwal vulu ta luwa tani na? » kaʼa. 14 Kaʼa nda iʼi mantsa: « Dzaʼa lula hawu nda sərɗək dəmbuʼ his nda hkən dərmək (2.300) karaku. Tahula tsa, ŋa ghuɓəglaptá tsa vli nda ghuɓa ya ŋa magəgəltá slna nda tsi, » kaʼa.

Klatá ghəŋa tsa dugzum nda maŋazak ya

15 Ma tsa fitika vitsay iʼi Danyel ta tsa skwi ta magaku, ka psə yu ta snaŋta klatá ghəŋa ni ya, ka sagha sana skwi manda tsatá mndu da sladata ta kəma ɗa. 16 Ka snaŋtá yu ta lwa sana mndu ta gwaɗagapta ma takataka zala Ulay. Ka guguɗatá tsi. Kaʼa mantsa: « Gabriyel, mnana mna ta Danyel ta klatá ghəŋa tsa skwi ta nghə tsi ya, » kaʼa. 17 Ka gavadaghatá Gabriyel da tsa vli hada yu ya, ka ksaftá zləŋ ta iʼi, ka zləmbatá yu zlumbruh ta haɗik. Ama kaʼa nda iʼi mantsa: « Sna ɓa zwaŋa mndu, nda ra ka snaŋta gha kazlay na kɗavakta fitik ta mar na skwi nghaŋ ka na kəʼa, » kaʼa. 18 Mantsa tama, ma tsa fitik ta gwaɗ Gabriyel ta gwaɗa nda iʼi ya, zlumbruhwa yu ghərmbəzla ta haɗik, ka ksihatá tsi ka sliʼiɗifta.

19 Tahula tsa, kaʼa nda iʼi mantsa: « Dzaʼa mnagha mna yu ta skwi dzaʼa magaku ma kɗavakta fitik gufatá ŋuɗufa Lazglafta, kabga mamu fitik tsaf lu ŋa kɗavakta ni. 20 Tsa maŋazak nghaŋ ka si his duliha ni ya, tsaha ya mghamha Mediya nda Persiya. 21 Tsa dugzum ka swidi zbək ya ná, tsaya mghama la Gres. Tsa duli dagala ta ɗyagapta ma takataka iriha ni ya guli ná, tsaya taŋtaŋa mgham. 22 Ma ɓluta tsa duli ya, ka ɗayagaptá sanlaha fwaɗ ma vla ni. Tsaha ya ga mghamha fwaɗ dzaʼa sabi mataba mndəra mndu da manaka tsa taŋtaŋ ya, ama mutsafta a həŋ ta mbraku ta lafi ta ŋa ni wa.

23 Lagha tsa ga mghamha taŋ ya ta kɗavakta fitika taŋ, kɗanakha tsa gwal ta maga bisibisi ya ta inda dmakwa taŋ ya, dzaʼa səglapa sa sana mgham kul haɗ ta tawa hiɗahiɗa ɗekɗek, viɗviɗ ka nanaghatá mnduha nda slna ni. 24 Dzaʼa sgaku mbrakwa ni, ama ŋa vərɗa tsatsi a tsa mbraku ya wa. Dzaʼa hwanzaɓiŋ hwanzaɓa ta inda skwi nda mbraku ya ŋa ndraʼuwa nda ndraʼuwa. Dzaʼa zay ta ghwa ma inda skwi dzaʼa tsi magay. Dzaʼa psla psla ta gwal nda mbra nda mbra, nda mnduha nda ghuɓa ka ŋa Lazglafta.

25 Ma tsa viɗakwa ni ya dzaʼa katsafta tsi nanaghatá sanlaha. Ma ndana ni ná, dzaʼa glanaf gla ta ghəŋa ni, ŋa zaɗanata ni ta ndəghata mnduha gwal ta ndanay kazlay na nda katá aŋni kəʼa. Dzaʼa liŋ la ta mgham ta ghəŋa mghamha. Ama dzaʼa zaɗana zaɗa lu ta tsatsi, haɗ dzva mndu dzaʼa ksaŋta wa. 26 Mantsa tama, tsa skwi nghaŋ ka manda skwi ma suni ta ghəŋa hawu nda sərɗək ya ná, dzaʼa magaku manda va tsa kahwathwata. Kagha, ka ŋamta ka ma ghəŋa gha, kabga ta diʼiŋ fitika ni, » kaʼa.

27 Ma tsa fitik ya, iʼi Danyel, rabadakw yu. Ka ksutá tsi ta iʼi ka ɗaŋwa kidaghi fitika ɗa. Manda vrakta mbrakwa ɗa, ka laghu yu maga slna ɗa ga mgham, ama ta nda kɓa yu da tsa skwi nghaŋ yu ya, kabga sna a yu ɗekɗek ta klatá ghəŋa ni wa.