<<    <     Danyel     7     >    >> 
Nghaŋta Danyel ta nimtakha fwaɗ ma suni
7
1 Ma taŋtaŋa vakwa mgham Belsatsar ta pala ma Babila, ka fanaghatá suni ta Danyel. Tata hana ni ta ghəzləŋ, ka nghaŋtá tsi ta sana skwiha manda skwi ma suni. Mantsa tama, ka vindaftá tsi ta tsa suna ni ya. Wya ghəŋa ni ghəŋa ni:
2 « Iʼi Danyel, skwi ya nghaŋ yu manda skwi ma suni girviɗik ná, ka nghaŋtá yu ta falak ta slərpəha luwa fwaɗ ta gigiɗanaftá drəf dagala. 3 Ka sab nimtakha dagala dagala fwaɗ ma tsa drəf ya. Kavghakavgha tsatá həŋ. 4 Tsa taŋtaŋa ni ya, manda tsatá rveri nzakwa ni. Mamu zlambakha ni manda zlambaka dzala. Ka nzatá yu ka nghay. Ka sagha lu da kwahaghatá tsa zlambakha ni ya. Ka kapanaftá lu ka dganata nda haɗik. Ka sladatá tsi ta səlaha ni his nda ga mahulhul manda ŋa mndu. Ka vlaŋtá lu ta mahizl manda ŋa mnda səla.
5 Wya sana mahisa tsa nimtakha ya guli, manda ziŋa tsatá ni guli. Ka sladatá tsi ta slərpa turtuk. Ka ŋanatá tsi ta dzidzalha hkən nda sliʼiŋha ni. Ka lu nda tsi mantsa: “Sliʼaf sliʼa ka va za ka hruma ta sluʼi!” ka lu.
6 Tahula tsa, kəʼa ka yu ná, gi ka nghaŋtá yu ta sana nimtak manda maspata, fwaɗ zlambakha ta hula ni manda ŋa zarak. Fwaɗ ghəŋa tsa nimtak ya, ka vlaŋtá lu ta mbrakwa mbranaghatá ghəŋa haɗik.
7 Tahula tsa, tata nghay nghay yu manda skwi ma suni girviɗik, gi ka nghaŋtá yu ta sana mafwaɗa nimtak. Ta ga zləŋ katakata, ghwaɗak ya, mbru mbra katakata. Dagulaʼ dagulaʼ sliʼiŋha ni ka kfur. Ta zuza ka ɓalanaptá inda skwi ta slanaghata tsi. Ya kul zə tsi ya guli, diŋlanapta ni nda səlaha ni. Nda dga tsatsi nda tsa sanlaha ma nimtakha taŋtaŋ ya. Ghwaŋ duli ta ghəŋa ni. 8 Ka nzatá yu ka ngha tsa duliha ya, gi ka zlagaptá sana duli ka lfiɗ, kiʼa nzakwa ni ta ɗyagapta ma takataka tsa sanlaha ya. Ka zlaɗiŋtá lu ta tsa duliha hkən taŋtaŋ ya ŋa ɗyagafta tsa kiʼa ya. Mamu iriha tsa duli ya manda ŋa mnda səla. Mamu wubisima ni ta mna gwaɗa gla ghəŋ dzeʼdzeʼ. »
Guma Lazglafta
9 « Ka va nzatá yu ka nghay.
Ka pghatá lu ta dughurukha ga mgham,
ka lagha sana mndu daga ta bamma nzafta tida.
Ka ŋusliŋ tilil lguta ni manda ɓata papla,
manda ɓata swida tuwak ghuɓap lu ya nzakwa swidi ma ghəŋa ni.
Ka vu ta zlghakwa dughurukwa ni,
ghandand ka vu nzakwa kliŋa mista ni.
10 Ka mbəzagaptá zala vu,
ka sabi ta kəma ni.
Mleŋwi mleŋwi mnduha ta ksanatá slna,
mleŋwi mleŋwi dəmbuʼ ghwaŋ mnduha ta sladu ta kəma ni.
Ka tskavatá gwal tsa guma,
ka gwananaftá lu ta sanlaha ɗelewerha.
11 Ka va gɗavatá yu tama ka nzata ka nghay, kabga dagala ya wa tsa zwaŋa duli ya, ta mna gwaɗa tsuʼaslaŋslaŋa. Tata nghay nghay yu, ka dzatá lu ta tsa mafwaɗa nimtak ya, ka vzaghatá mbla ni da vu ghandand ŋa zaɗanata. 12 Tsa sanlaha ma nimtak ya, ka hlaghutá lu ta mbrakwa ga mgham da həŋ, ama ka zlanatá lu ta həŋ nda hafu ŋa nzəɗavata taŋ kwitikw ka lab ta fitik ya tsaf lu.
13 Ka nghə yu manda skwi ma suni girviɗik,
ta sana skwi manda mnda səla,
ta saha ma ghwayak ta luwa.
Ka lagha tsi da tsa mndu daga bamma ya,
ka kladaghatá lu da tsi.
14 Ka vlaŋtá lu ta mbraku, nda sgit,
nda ga mgham.
Ka lagha inda mnduha ma mndəra mnduha,
ta inda haɗikha
ta gwaɗa inda gwaɗaha kavghakavgha,
da tsəlɓanatá tsəlɓu.
Tsa ga mghama ni ya ná,
ga mgham ya ta gɗavata ŋa ɗekɗek ya,
haɗ ta a kɗavakta ni guli wa,
haɗ lu dzaʼa walaŋta zaɗanatá ga mghama ni wa. »
Klatá ghəŋa tsa suni ya
15 « Nghay iʼi Danyel ta tsa skwi ya, ka ghudzavaftá yu. Siha sa tsa skwiha ya ta sulkum ta vgha. 16 Ka gavadaghatá yu ta vata sana mndu mataba tsa mnduha ta sladu ya, ka yu nda tsi mantsa: “Nahgani vərɗa klatá ghəŋa inda tsa skwiha ya na?” ka yu. Wya kəʼa mnihata klatá ghəŋa ni: 17 “Tsa nimtakha dagala dagala fwaɗ həŋ ya ná, tsaha ya mghamha fwaɗ dzaʼa sabi ta ghəŋa haɗik. 18 Ama ŋa mutsafta mnduha nda ghuɓa ka ŋa Lazglafta Dagala ta mbrakwa ga mgham, ŋa ŋanata taŋ ɓurkuts ŋa ɗekɗek, kul haɗ kɗavakta ni,” kaʼa.
19 Tahula tsa, ka kumaŋtá yu ta snaŋta klatá ghəŋa tsa mafwaɗa nimtak nda dga nda tsa sanlaha hkən ya. Tsatsi, ta gay ta zləŋ katakata ŋa mndu, nda tsa sliʼiŋha ni ka kfur, nda ɗahəŋha ni ka ghuva tili ya, ta zuza ka ɓalanaptá inda skwi ta slanaghata tsi. Ya kul zə tsi ya guli diŋlanapta ni nda səlaha ni. 20 Nahgani klatá ghəŋa na duliha ghwaŋ ta ghəŋa ni na na? Nahgani klatá ghəŋa na duli ta ɗyaku nda ɗya, ta zlambiŋtá tsaha hkən ya guli? Wana mamu iriha ni, mamu wubisima ni ta mna gwaɗaha tsuʼaslaŋslaŋa dzeʼdzeʼ, mal tsatsi ka sanlaha ka yu ta nghay. 21 Ka va nzata yu ka nghay, ka sliʼaftá tsa duli ya da vulu nda mnduha nda ghuɓa ka ŋa Lazglafta, ka va zə tsi ta ghwa ta ghəŋa taŋ, 22 ha ka sagha tsa mndu daga ta bamma, tsaya Lazglafta Dagala, da vlaŋtá zɗaku ta mnduha ni nda ghuɓa. Manda maga ta fitika ni, ka zlghaftá mnduha Lazglafta ta mbrakwa ga mgham.
23 Ka tsa mndu ta manihata klatá ghəŋa ni ya mantsa: “Tsa mafwaɗa nimtak ya ná, mafwaɗa ga mgham ta ghəŋa haɗik, klatá ghəŋa tsaya. Nda dga tsatsi nda inda sanlaha ma ga mgham. Dzaʼa zuza tsa ga mgham ya ta inda skwiha ta ghəŋa haɗik, ka diŋlanapta, ka ɓalanaptá inda skwi nda səlaha ni. 24 Tsa duliha ghwaŋ ya guli ná, mghamha ghwaŋ ya dzaʼa sabi ma tsa ga mghamha ya. Dzaʼa gay həŋ ta mgham sani tahula sani. Tahula tsa, dzaʼa sab sa sana maghwaŋpəɗ ndeŋa mgham nda dga nda sanlaha, ŋa klaghuta ni ta tsa ga mgham ya, ŋa zlambiŋta ni ta mghamha hkən. 25 Dzaʼa brufay ni ta ŋasli ta Lazglafta Dagala, ŋa ghuyay ni ta ɗaŋwa ŋa mnduha nda ghuɓa ka ŋa Lazglafta. Dzaʼa zbay ta tva mbəɗanaftá fitika skaluha rfu, nda zlahuha mnduha Lazglafta, ŋa gay ni ta mgham ta ghəŋa taŋ ka vaku hkən nda maŋəzlawats. 26 Tahula tsa guli, dzaʼa nza nza lu ka tsa guma ta luwa, ŋa klaghutá mbrakwa tsa ga mgham ya. Mantsa ya dzaʼa zaɗanata lu ha ŋa ɗekɗek, 27 ŋa nzakwa ga mgham, nda mbraku, nda glakwa inda ga mghamha ta ghəŋa haɗik, ka ŋa mnduha nda ghuɓa ka ŋa Lazglafta Dagala. Dzaʼa gɗava gɗa ga mghama tsa mndəra mndu ya ŋa ɗekɗek. Dzaʼa snay inda ga mgham ta gwaɗa da tsi, ka maganatá slna.”
28 Mantsa ya vraghuta tsa gwaɗa ya. Iʼi Danyel taɗa, siha sa tsa skwi ya katakata ta sulkum ta vgha, kɓiɗif kɓa ma ndanu. Ka ɓutá yu kusabrah, ama ka hamtá yu ta inda tsa skwiha ya ma ghəŋa ɗa, » kaʼa.