Danyel 6

1 Ka zlghaftá Daryaves mnda la Mediya ta ga mgham ta ima ni mkuʼ mbsak his mida.

Dray gwal dagala dagala ta Danyel

2 Ka Daryaves mantsa: « Ɗina ka pghata ɗa ta guvnaha dərmək nda hisambsak (120) ta ghəŋa ga mghama ɗa, ŋa paghata ma inda vla ga mghama ɗa, » kaʼa. 3 Ta ghəŋa taŋ, ka pghatá tsi ta maliha hkən, tekw Danyel mataba taŋ. Tsa guvnaha dzaʼa kla lwa skwi dzaʼa dzrafta ŋa tsa maliha ya, kada kwala ghwaɗaka skwi ta slanaghatá mgham. 4 Tsa Danyel ya ná, malaghu mala ta tsa sanlaha ma maliha ya, nda tsa guvnaha ya tani, kabga mamu sulkum ta malapta ma tsatsi. Ka ndanaptá mgham ta fanaghata ta ghəŋa inda tsa ga mgham ya. 5 Mantsa tama, ka va zbə tsa sanlaha ma maliha ya, nda tsa gwal guvnaha ya ta skwi ŋa tsanavatá Danyel ma slna ta mag tsi. Slanagha a həŋ ta skwi dər ka kiʼa ŋa tsanavata wu, haɗ skwi htap tsi mida wu, kabga ŋərma ya ma slna ni, haɗ dər krughuva ni mutsaf həŋ wa. 6 Tsaya tama, ka tsa mnduha ya mantsa: « Haɗ sana skwi mutsaf mu ŋa tsanavatá tsa Danyel ya wu, ba ka mutsaf mutsa mu nda ma zlaha Lazglafta ni kasiʼi, » ka həŋ.

7 Mantsa tama, ka gi tskavatá maliha ya nda tsa guvnaha ya tizlik da mgham. Ka həŋ nda tsi mantsa: « Ari mgham Daryaves, ta mblam ka hafa gha! 8 Ka draftá inda tsa maliha ya, nda gwal dagala dagala, nda guvnaha, nda sanlaha ma gwal ta maganatá slna ta mgham, nda gwal vla hiɗaku tani, ta vlaŋtá hiɗaku ta mgham. Wya skwi mna həŋ: “Ɗina ka fatá zlahu ka ŋəɗaŋəɗa, ka pyaftá lu ta dər wati ma mndu tsi, ka fitik hkən mbsak. Ka wa da laghu da maga duʼa ŋa sana lazglaftaha, ka sana mndu a tsi, ka kagha a tsi wu, tsa mndu dzaʼa kwalaghuta ya, ksafta ka vzamta da ghuruma rveriha.” 9 Ndana tama rvera ɗa, vindaf vinda ta zlahu ŋa pyaftá mndu, ka thafta ka ta dzvu tida, ŋa kwala mndu walaŋta mbəɗanafta, manda nzakwa sanlaha ma zlahuha la Mediya nda Persiya kul haɗ lu ta hlanata ya, » ka həŋ. 10 Mantsa tama, mbaɗa mgham Daryaves ka thaftá dzva ni ta tsa zlahu ya.

11 Snaŋta Danyel kazlay na thaf tha mgham ta dzvu ta tsa skwi vindaf lu ya kəʼa, ka lam tsi da həga ni. Ma dzuguva ni ta ghəŋa sana həga, nda guna wa tgha finitira ni zur nda təv Ursalima. Baɗ tsa fitik ya, ka tsəlɓatá Danyel hkən səla ka maga duʼa, ka zləzləva Lazglafta ni manda va ya ta snuta tsi ta magay. 12 Ka gi lagha tsa mnduha ya slanaghatá Danyel ta maga duʼa ni, ta vla tawa ni ta kəma Lazglafta ni.

13 Mantsa tama, ka sliʼaftá həŋ ka lagha slanaghatá mgham, ka həŋ mantsa: « Thaf a kagha ta dzvu ta zlahu ya ta pyaftá mndu ka fitik hkən mbsak, ka maga duʼa ŋa sana mndu, ka sana lazglaftaha a tsi, ka kagha a tsi wu ra? Ka kwalaghu kwala mndu, dzaʼa ksaf ksa lu ta tsa mndu ya ka vzamta da ghuruma rveriha kay ra? » ka həŋ. « Aŋi, mantsa kurata yu, da la Mediya nda la Persiya ná, haɗ lu ta laviŋta mbəɗanaftá mndərga tsa zlahu ya wu, » kaʼa. 14 Ka tsa mnduha ya nda mgham mantsa: « Rvera ɗa, haɗ Danyel mnda la Yahuda ksagagha lu ya ta ngha kagha ka sana skwi wu, dər tsa zlahu thaf ka ta dzvu tida ya wa. Hkən səla ta vaghu kəʼa ta da tsəlɓu ŋa Lazglafta ni, » ka həŋ.

15 Snaŋta mgham ta tsa gwaɗaha ya, ka ɓasaftá tsi ta ŋuɗuf katakata. Ka faftá tsi ta ndana ni ta Danyel ŋa mbanaftá. Ha tekulemes fitika ni ta zba tvi ŋa kataŋta. 16 Ama ka gi lagha tsa mnduha ya tskavata tizlik ta vata mgham. Ka həŋ nda mgham mantsa: « Rvera ɗa, nda sna ka ná, ka zlaha la Mediya nda la Persiya ná, haɗ mndu dzaʼa laviŋtá mbəɗanafta skwi pyaf lu, ka zlahu a tsi fa lu thaf mgham ta dzvu tida wu, » ka həŋ. 17 Tsaya tama, ka mgham mantsa: « Ksafwa ksa ta Danyel ka vzamta lu da ghuruma rveriha, » kaʼa. Ka ksaftá lu, ka vzamta. Ka mgham nda Danyel mantsa: « Tsa Lazglafta gha ta dzata ka ta vgha ka maga slna ŋa ni ya kweŋkweŋ dzaʼa mbaghafta, » kaʼa. 18 Ka klaktá lu ta mghama klam ka fuŋta ta wa tsa ghurum ya. Ka ndiʼaftá mgham ta ŋizla ni nda ŋizla tsa mnduha ni dagala dagala ya tida, kada kwala mndu mbəɗanaftá skwi ta nghanaghatá Danyel. 19 Ka laghu mgham da həga ga mghama ni. Ka han tsi nda iri petsuweɗ, zaŋ a ta skwa zay wu, ka kwalaghutá tsi ta inda skwi ta zɗanaftá ŋuɗuf, ksaf a hani wa.

Mbanafta Lazglafta ta Danyel

20 Tahula tsa, ka sliʼaftá mgham bit tgha tsaɗakwər vli, ka laghu tsi misimmisim da vla tsa ghuruma rveriha ya. 21 Ta gavadaghatá tsi ta wa tsa ghurum ya, ka hgə tsi ta Danyel nda taw nda taw. Kaʼa mantsa: « Danyel, kwalva Lazglafta nda hafu mida, laviŋ lava suʼu tsa Lazglafta gha ta dzata ka ta vgha ka maganatá slna ya kay da rveriha ra? » kaʼa. 22 Ka Danyel nda mgham mantsa: « Rvera ɗa, ta mblam ka hafa gha. 23 Ghunaga ghuna Lazglafta ɗa ta duhwala ni ka hahanaftá wa rveriha. Baliha a həŋ wu, kabga haɗ sana skwi maga yu ta kəma ni wa. Haɗ skwi maga gha yu kul ɗinaku guli rvera ɗa wa, » kaʼa. 24 Ka rfu mgham ta rfu, kaʼa mantsa: « Kligiŋwa kla ta Danyel ma ghurum, » kaʼa. Ka tɗigiŋtá lu ta Danyel ma ghurum. Slanagha a həŋ balaku tida wu, kabga faf fa ta ghəŋa ni ta Lazglafta ni. 25 Ka mgham mnafta mantsa: « Kasagaghawa kasa ta tsa mnduha ta tsanavatá gwaɗa ta Danyel ya, » kaʼa. Ka kasagaghatá lu ta həŋ, nda hahəŋ tani, nda miʼa taŋ tani, nda zwana taŋ tani, ka pghadamta da ghuruma rveriha. Na tsa pghadamta lu ta həŋ ya, gi ta luwa ta luwa ka rveriha tsaʼuwaghutá həŋ, ka ɓalanaptá ghudzifa taŋ, ka dəghaɗutá həŋ, dɗada a həŋ ta haɗik wa.

26 Tahula tsa, ka vindaftá Daryaves ta ɗelewer ka tsaghanaftá inda mndəra mnduha ta inda haɗikha ta gwaɗaha kavghakavgha ta ghəŋa haɗik tender. Kaʼa mantsa: « Ka nza zɗaku katakata ta ghəŋa kaghuni! 27 Wya zlahu ta mnata yu: Ma inda vli ta gə yu ta mgham ta ghəŋa ni, inda mndu, ka zləŋa tsi ta Lazglafta Danyel, ka vla tsi guli ta glaku ŋa ni.

Tsatsi Lazglafta nda hafu mida,

ŋa kɗekedzeŋ nzatá nzakwa tsatsi.

Haɗ ga mghama ni ta ɓadzaku wu,

haɗ kɗavakta mbrakwa ni wa.

28 Tsatsi ta mbay, tsatsi ta zligiŋta.

Tsatsi ta zlagigiŋtá mandərmimiha, nda mazəmzəmha

ta luwa nda ya ta ghəŋa haɗik,

kabga tsatsi ta zluʼagaptá Danyel ma ɗahəŋa rveriha, » kaʼa.

29 Tahula tsa, ka mutsaftá Danyel ta vli dagala ma fitika ga mghama Daryaves, mantsa guli ta ga mghama Kures, mnda la Persiya.